អ្នកស្រី ប៉ុល ពិសី នឹងបោះពុម្ពចេញផ្សាយស្នាដៃប្រលោមលោកពាក្យកាព្យ រឿង “ល្ខោនជីវិត” និង “អប្សរា” ជាលើកទី២
- January 20th, 2021
អ្នកស្រី ប៉ុល ពិសី នឹងបោះពុម្ពចេញផ្សាយស្នាដៃប្រលោមលោកពាក្យកាព្យ រឿង “ល្ខោនជីវិត” និង “អប្សរា” ជាលើកទី២
“ល្ខោនជីវិត” និង “អប្សរា” គឺជាចំណងជើងនៃរឿងប្រលោមលោកពាក្យកាព្យដ៏ល្បី ដែលជាស្នាដៃនិពន្ធរបស់ អ្នកស្រី ប៉ុល ពិសី អ្នកនិពន្ធជើងចាស់ល្បីឈ្មោះបោះសំឡេងមួយរូបនៅកម្ពុជា ដែលស្នាដៃទាំងពីរនេះ ធ្លាប់បោះពុម្ពម្ដងរួចមកហើយ ក្នុងនោះ រឿង “ល្ខោនជីវិត” បោះពុម្ពឆ្នាំ១៩៩៦ និងរឿង “អប្សរា” បោះពុម្ពឆ្នាំ២០១៧ និងកំពុងតែត្រៀមបោះពុម្ពចេញផ្សាយលើកទី២ នាពេលប៉ុន្មានថ្ងៃខាងមុខនេះ។ ទាក់ទងនឹងការបោះពុម្ពលើកទី២នេះ អ្នកស្រី ប៉ុល ពិសី ដែលជាម្ចាស់ស្នាដៃ បានបង្ហាញពីហេតុផលក្នុងបទសម្ភាសន៍ជាមួយ “គេហទំព័រអ្នកនិពន្ធកម្ពុជា” តាមសារអេឡិចត្រូនិកថា “នេះក៏ព្រោះហេតុផលសំខាន់ៗមួយចំនួនដូចជា ទី១ ដោយសារតែសៀវភៅអស់ពីស្តុក, ទី២ព្រោះមានតម្រូវការទីផ្សារចាំបាច់ដែលត្រូវតែបោះ ដោយសារមានប្រិយមិត្តជាច្រើនបានសំណូមពរឱ្យខ្ញុំបោះពុម្ពឡើងវិញ និងទី៣ ព្រោះស្នាដៃប្រលោមលោកពាក្យកាព្យទាំងពីរនេះ ធ្លាប់ទទួលបានពានរង្វាន់ ដោយរឿងល្ខោនជីវិត បានជាប់ក្នុងពានរង្វាន់ព្រះសីហនុរាជ លេខ១ស្ទួន ឆ្នាំ១៩៩៥ រៀបចំដោយសមាគមអ្នកនិពន្ធខ្មែរ ហើយក៏បោះពុម្ពលោកទី១ ដោយសមាគមអ្នកនិពន្ធខ្មែរផងដែរ ចំណែករឿងអប្សរា ជាប់ក្នុងពានរង្វាន់ព្រះសុរាម្រិត ចំណាត់ថ្នាក់លេខ២ ឆ្នាំ២០០១ ដោយក្រសួងវប្បធម៌និងវិចិត្រសិល្បៈ ដោយកាលណោះ រៀបចំបោះពុម្ពលើកទី១ឡើងដោយសមាគមទ្រទ្រង់ការបោះពុម្ពនិងអប់រំ។”
អ្នកស្រីបានបន្ថែមទៀតទាក់ទងនឹងការបោះពុម្ពលើកទី២នេះថា “ដើម្បីអនុវត្តគម្រោងបោះពុម្ពផ្សាយរបស់ខ្លួន សមាគមអ្នកនិពន្ធខ្មែរ ក៏បានស្នើយកស្នាដៃ ដែលធ្លាប់ជាប់ពានរង្វាន់ជាតិ អន្តរជាតិ និងស្នាដៃដែលធ្លាប់បោះពុម្ពកន្លង មកបោះពុម្ពឡើងវិញ រាប់ចាប់ពីឆ្នាំ២០២១ នេះតទៅ។ ដូច្នេះហើយ ទើបស្នាដៃទាំងពីររបស់ខ្ញុំនេះ ត្រូវបានគណៈកម្មការបោះពុម្ពផ្សាយ ជ្រើសរើសយកទៅបោះពុម្ពឡើងវិញនៅពេលនេះ ដែលជាការបោះពុម្ពលើកទី២។” អ្នកស្រីបន្ត “ហើយខ្ញុំសូមបញ្ជាក់ថា សៀវភៅទាំងពីរនេះនឹងត្រូវផ្សាយចេញនៅអំឡុងខែមករា ២០២១ ប៉ុន្មានថ្ងៃខាងមុខនេះហើយ និងដាក់លក់ក្នុងតម្លៃ ១៨.០០០រៀល (មួយម៉ឺនប្រាំបីពាន់រៀល) ក្នុងមួយក្បាល ដោយដាក់លក់នៅក្នុងហ្វេកប៊ុគផេកផ្លូវការរបស់ គ្រឹះស្ថានបោះពុម្ពឯកសារខ្មែរ https://www.facebook.com/khmerbooks.net និងហ្វេសប៊ុគផេកលក់សៀវភៅមួយចំនួនទៀតក្នុងស្រុក ឬអាចទាក់ទងទិញផ្ទាល់ពីនាងខ្ញុំបាន តាមរយៈហ្វេសប៊ុកផ្លូវការបស់នាងខ្ញុំ ឈ្មោះ Pol Pisey https://www.facebook.com/pol.pisey.3 ឬផេកសមាគមអ្នកនិពន្ធខ្មែរ https://www.facebook.com/KhmerWritersAssociation ឬក៏អាចទំនាក់ទំនងតាមរយៈទូរស័ព្ទលេខ ០៩២ ៧៨៨ ៩៩០ និង ០៨៩ ៨៥៦ ៧៦៤ ក៏បាន។”
ប្រលោមលោកពាក្យកាព្យរឿង “ល្ខោនជីវិត” ស្នាដៃនិពន្ធរបស់ អ្នកស្រី ប៉ុល ពិសី
ប្រលោមលោកពាក្យកាព្យរឿង “អប្សរា” ស្នាដៃនិពន្ធរបស់ អ្នកស្រី ប៉ុល ពិសី
មុននឹងបញ្ចប់បទសម្ភាសន៍ អ្នកស្រី ប៉ុល ពិសី ក៏បានថ្លែងថា “ជាចុងក្រោយ នាងខ្ញុំសូមថ្លែងអំណរគុណចំពោះបងប្អូនជនរួមជាតិខ្មែរ និងប្រិយមិត្តអ្នកអានទាំងអស់ ដែលតែងតែលើកទឹកចិត្ត និងជួយគាំទ្រនូវរាល់ស្នាដៃតែងនិពន្ធរបស់នាងខ្ញុំរហូតមក ដែលជាឱសថទិព្វដ៏សក្តិសិទ្ធជំរុញឱ្យនាងខ្ញុំកាន់តែមានកម្លាំងចិត្តខិតខំប្រមែប្រមូលសន្សំរឿងមកច្នៃប្រតិដ្ឋរចនារំលេចចេញជាសាច់រឿងប្លែកៗដើម្បីបម្រើអារម្មណ៍មិត្តអ្នកអានជាបន្តទៀត និងសូមថ្លែងអំណរគុណជាអនេកចំពោះ សមាគមអ្នកនិពន្ធខ្មែរ ដែលបានជ្រើសរើសស្នាដៃនាងខ្ញុំទាំងពីរនេះមកបោះពុម្ពជាលើកទី២ទៀត ក៏ដូចជាសូមថ្លែងអំណរគុណចំពោះ គេហទំព័រអ្នកនិពន្ធកម្ពុជា ដែលបានជួយផ្សព្វផ្សាយនូវប្រវត្តិស្នាដៃនិពន្ធរបស់នាងខ្ញុំកន្លងមក និងនៅតែបន្តជួយផ្សព្វផ្សាយជាបន្តទៀត។ ដូច្នេះ ឆ្លៀតក្នុងឱកាសនេះ នាងខ្ញុំសូមជូនពរដល់ជនរួមជាតិ និងប្រិយមិត្តអ្នកអានទាំងអស់ សូមមានសុខភាពល្អ កម្លាំងមាំមួន និងសម្រេចបានគ្រប់បំណងប្រាថ្នា និងសូមជូនពរដល់សមាគមអ្នកនិពន្ធខ្មែរ សូមបានចម្រើនរុងរឿងទៅមុខជាបន្តឥតឈប់ឈរ ដើម្បីរួមចំណែកការពារវប្បធម៌ប្រពៃណីដ៏ផូរផង់របស់ដូនតា ពិសេសបានជួយថែរក្សាទ្រទ្រង់នូវរាល់ស្នាដៃរបស់បុព្វកវីនិពន្ធជំនាន់មុន និងបន្តបណ្តុះបណ្តាលនូវពន្លកអ្នកនិពន្ធថ្មីជំនាន់ក្រោយឱ្យបានរីកដុះដាលបន្តទៀត។ ជាពិសេសសូមជូនពរឱ្យ គេហទំព័រអ្នកនិពន្ធកម្ពុជា www.combowriter.com កាន់តែទទួលបាននូវប្រជាប្រិយភាព និងមានការគាំទ្រដ៏ច្រើនលើសលប់ពីមិត្តអ្នកអានគ្រប់ស្រទាប់។ ដោយក្ដីគោរពស្រឡាញ់ពីនាងខ្ញុំ ប៉ុល ពិសី ។”
អ្នកស្រី ប៉ុល ពិសី ថ្លែងក្នុងកម្មវិធីអក្សរសិល្ប៍មួយ
“គេហទំព័រអ្នកនិពន្ធកម្ពុជា” សូមបញ្ជាក់ថា អ្នកស្រី ប៉ុល ពិសី គឺជាអ្នកនិពន្ធជើងចាស់ល្បីឈ្មោះមួយរូបនៅកម្ពុជា ដែលរហូតមកទល់នឹងពេលនេះ អ្នកស្រីធ្លាប់សាងស្នាដៃជាច្រើនក្នុងវិស័យតែងនិពន្ធ ដោយលោកអ្នកអាចស្វែងយល់បន្ថែមពីអ្នកស្រីបានដោយគ្រាន់តែចុចចូលអានតាម Link ប៉ុណ្ណោះ https://cambowriter.com/ ។ បច្ចុប្បន្ន ក្រៅពីមានអាជីពជាអ្នកនិពន្ធកម្ពុជាមួយរូប អ្នកស្រីគឺជាអនុប្រធាន “សមាគមអ្នកនិពន្ធខ្មែរ” និងជាប្រធានផ្នែកផ្សព្វផ្សាយនៃ “សមាគមទ្រទ្រង់ការបោះពុម្ពនិងអប់រំនៅកម្ពុជា”។ ដូច្នេះ បើលោកអ្នកចង់ដឹងថា តើរឿង “ល្ខោនជីវិត” និង “អប្សរា” ដែលជាស្នាដៃនិពន្ធផ្នែកប្រលោមលោកពាក្យកាព្យរបស់អ្នកស្រី មានអត្ថន័យខ្លឹមសារល្អយ៉ាងណានោះ? លោកអ្នកអាចរង់ចាំជាវយកទៅអានពេលចេញពីរោងពុម្ពឆាប់ៗនេះបាន ដោយព័ត៌មានបន្ថែម គេហទំព័រយើងខ្ញុំនឹងផ្សាយជូនជាបន្តទៀត នៅពេលស្នាដៃទាំងពីររបស់អ្នកស្រីចេញផ្សាយជាផ្លូវការរួច។ សូមអរគុណ៕
អត្ថបទ ៖ ពុទ្ធិពង្ស / រូបភាព ៖ អ្នកស្រី ប៉ុល ពិសី / រក្សាសិទ្ធិ ៖ cambowriter.com