លោក គង់ រង្សី ប្រកាសវិលត្រឡប់មកប្រឡូកក្នុងវិស័យតែងនិពន្ធវិញ
- August 4th, 2023
បើជាអ្នកស្ថិតក្នុងវិស័យតែងនិពន្ធនៅកម្ពុជាក្រោយឆ្នាំ២០១៧ មុខជាមិនសូវស្គាល់ថា លោក គង់ រង្សី ជានរណានោះទេ! តែបើជាអ្នកប្រឡូកក្នុងវិស័យតែងនិពន្ធមុនឆ្នាំ២០១៧ ភាគច្រើនមុខជាបានស្គាល់ច្បាស់ហើយថា លោក គង់ រង្សី គឺជានរណា និងមានសកម្មភាពការងារក្នុងវិស័យតែងនិពន្ធនេះយ៉ាងណាខ្លះ។ ពិតណាស់! លោក គង់ រង្សី គឺជាអ្នកនិពន្ធកម្ពុជាមួយរូប ដែលមានប្រិយមិត្តអ្នកគាំទ្រស្នាដៃរបស់លោកជាច្រើន និងមានសកម្មភាពជាច្រើនក្នុងវិស័យតែងនិពន្ធនៅកម្ពុជាកន្លងមក ដូចជា ការតាក់តែងនិពន្ធទាំងសៀវភៅចំណេះដឹង, រឿងខ្លីនិងប្រលោមលោកផ្សាយតាមគេហទំព័រសប្បាយ និងការបង្កើតកម្មវិធីសំខាន់ៗមួយចំនួនសម្រាប់អ្នកនិពន្ធ ដូចជា កម្មវិធីវិទ្យុ និងកម្មវិធីក្នុងពិព័រណ៌អំណានផ្សេងៗជាដើមក្នុងនោះ សៀវភៅចំណេះដឹងដែលជាស្នាដៃនិពន្ធរបស់លោក ដូចជា “ចិត្តសាស្ត្រស្នេហា” និង “អ្នកផលិត រៀបចំដឹកនាំ គ្រប់គ្រងកម្មវិធីវិទ្យុទូរទស្សន៍” ជាសៀវភៅដែលទទួលបានការគ្រាំទ្រយ៉ាងខ្លាំង ចំណែកកម្មវិធីវិទ្យុឈ្មោះ “នាទីជំនួបកវីអ្នកនិពន្ធខ្មែរ” វិញ ក៏រឹតតែមានប្រជាប្រិយខ្លាំងណាស់ទៅទៀតក្នុងវិស័យតែងនិពន្ធនៅកម្ពុជានាពេលនោះ ដោយកម្មវិធីនេះទទួលបានការគាំទ្រពីសំណាក់បុគ្គលក្នុងវិស័យតែងនិពន្ធយ៉ាងលើសលប់ ព្រោះជាកម្មវិធីដែលជួយលើកតម្លៃអ្នកនិពន្ធ ក៏ដូចជាផ្សព្វផ្សាយពីស្នាដៃនិពន្ធថ្មីចាស់គ្រប់ផ្នែករបស់អ្នកនិពន្ធកម្ពុជា ទាំងដែលសម័យនោះ ការផ្សព្វផ្សាយតាមបណ្ដាញហ្វេសប៊ុកហាក់នៅមិនទាន់ពេញនិយមនោះទេនៅកម្ពុជា ដោយគេពេញនិយមស្ដាប់តាមវិទ្យុនៅឡើយ។
កីឡាការិនីស្នូគឃ័រខ្មែរលំដាប់ពិភពលោក ស្រួង ភាវី និងសៀវភៅ “ចិត្តសាស្ត្រស្នេហា” របស់លោក គង់ រង្សី
ស្រាប់តែពេលថ្មីៗនេះ លោកក៏បានប្រកាសពីដំណឹងដ៏ភ្ញាក់ផ្អើលមួយ គឺលោកនឹងប្រឡូកចូលក្នុងវិស័យតាក់តែងនិពន្ធវិញ ដោយផ្ដើមពីការចេញផ្សាយស្នាដៃនិពន្ធជាសៀវភៅចំណេះដឹងមួយក្បាលមានចំណងជើងថា “ពលករខ្មែរនៅកូរ៉េខាងត្បូង” ដែលលោកខិតខំនិពន្ធឡើងជាពិសេសសម្រាប់បងប្អូនពលករខ្មែរទាំងឡាយដែលកំពុងបំពេញការងារគ្រប់ផ្នែកនៅក្នុងប្រទេសកូរ៉េខាងត្បូង និងសម្រាប់អ្នកដែលទើបមានបំណងចង់ឡើងទៅបំពេញការងារនៅកូរ៉េខាងត្បូង ក៏ដូចជាអ្នកដែលបានប្រឡងជាប់ឈ្មោះហើយកំពុងត្រៀមឡើងទៅបំពេញការងារនៅកូរ៉េខាងត្បូងផងដែរ ដើម្បីឱ្យពួកគាត់គ្រប់រូបអាចសម្រេចបានជោគជ័យលើវិថីការងារដែលខ្លួនធ្វើសមតាមក្ដីប្រាថ្នា ជាពិសេសមានសេចក្ដីសុខសុវត្ថិភាពល្អពេលបំពេញការងារនៅទីនោះ។ ហើយមូលហេតុដែលលោកប្រកាសវិលត្រឡប់មកប្រឡូកក្នុងវិស័យតែងនិពន្ធវិញនៅពេលនេះ ដោយសារតែកូនស្រីជាស្រឡាញ់របស់លោកធំល្មមនឹងអាចឱ្យលោកអាចចាប់ផ្ដើមធ្វើការងាររបស់លោកឡើងវិញបានងាយស្រួលមិនសូវលំបាកដូចពេលមុន ព្រោះកូនស្រីមានការយល់ដឹងច្រើន។
លោក ខាត់ វ៉ៃហាំង តារាសម្ដែងប្រុសដ៏ល្បីរបស់កម្ពុជា និងសៀវភៅ “អ្នកផលិត រៀបចំដឹកនាំ គ្រប់គ្រងកម្មវិធីវិទ្យុទូរទស្សន៍” របស់លោក គង់ រង្សី
គិតរហូតមកទល់នឹងពេលនេះ បើតាមការបញ្ជាក់របស់លោកដែលលោកបង្ហោះលើបណ្ដាញសង្គមហ្វេសប៊ុកប៉ុន្មានថ្ងៃមុន លោកបានបញ្ជាក់ថា លោកបានផ្អាកសកម្មភាពតាក់តែងនិពន្ធស្នាដៃថ្មី (មានន័យថា ខានចេញផ្សាយស្នាដៃថ្មីៗ) អស់រយៈពេលជាង៧ឆ្នាំមកហើយ មូលហេតុដោយសារតែលោកត្រូវចាំបាច់ត្រូវផ្អាកសកម្មភាពការងារទាំងអស់នៅកម្ពុជា ឡើងមកមើលថែកូនស្រីរបស់លោកនៅប្រទេសកូរ៉េខាងត្បូង ដោយសារតែគ្មានសាច់ញាតិឬអ្នកជួយមើលថែនៅទីនោះ ដែលលោកជាឪពុកចាំបាច់ត្រូវតែទទួលរ៉ាប់រងនូវភារកិច្ចនេះ។ ដំណឹងនៃការវិលត្រឡប់របស់លោកមកកាន់វិស័យតែងនិពន្ធ វិញនេះ គឺពិតជាប្រសើរខ្លាំងណាស់ ព្រោះបើពិតជាបែបនេះមែន ប្រិយមិត្តអ្នកគាំទ្ររបស់លោកកន្លងមកនឹងបានអានស្នាដៃថ្មីៗរបស់លោកបន្តទៀត ជាពិសេសកម្មវិធីថ្មីៗប្លែកៗក្នុងវិស័យតែងនិពន្ធនៅកម្ពុជាអាចនឹងលេចចេញជារូបរាងឡើងបន្ថែមទៀត តាមរយៈសកម្មភាពនៃការបង្កើតដោយគំនិតរបស់លោកទាក់ទងនឹងវិស័យនេះ ដោយសារកន្លងមកលោកតែងតែបង្កើតកម្មវិធីល្អសម្រាប់អ្នកនិពន្ធ។
សៀវភៅ “ចិត្តសាស្ត្រស្នេហា” និង “អ្នកផលិត រៀបចំដឹកនាំ គ្រប់គ្រងកម្មវិធីវិទ្យុទូរទស្សន៍” ស្នាដៃនិពន្ធរបស់ លោក គង់ រង្សី ដែលចេញផ្សាយកាលពីជិត១០ឆ្នាំមុន
តែទោះជាយ៉ាងនេះក្ដី លោកក៏បានបញ្ជាក់ផងដែរថា ក្នុងរយៈពេលជាង៧ឆ្នាំកន្លងមកនេះ ថ្វីបើលោកមិនបានចេញផ្សាយស្នាដៃនិពន្ធថ្មីៗសម្រាប់ប្រិយមិត្តអ្នកគាំទ្ររបស់លោកក៏ពិតមែន តែក្នុងរយៈពេលនោះ លោកក៏បានបង្កើតវេបសាយដ៏សំខាន់មួយសម្រាប់ផ្សព្វផ្សាយពីអ្នកនិពន្ធ, ស្នាដៃថ្មីៗរបស់អ្នកនិពន្ធ និងសកម្មភាពសំខាន់ៗក្នុងវិស័យតែងនិពន្ធផងដែរ ដែលវេបសាយនេះមានឈ្មោះថា “ គេហទំព័រអ្នកនិពន្ធកម្ពុជា / www.cambowriter.com ” ជាវេបសាយដែលលោកបង្កើតឡើងក្នុងន័យដើម្បីអ្នកនិពន្ធ និងវិស័យតែងនិពន្ធនៅកម្ពុជា។ លោកក៏បានបន្ថែមទាក់ទងនឹងវេបសាយដ៏មានសារៈសំខាន់នេះថា វេបសាយនេះលោកបានផ្អាកសំណើរការផ្សាយជាច្រើនលើកច្រើនសារ ដោយសារតែមានបញ្ហាផ្នែកបច្ចេកទេស តម្រូវឱ្យចាំបាច់ត្រូវជួសជុលកែលម្អជាបន្តបន្ត និងត្រូវចំណាយថវិកាផ្ទាល់ខ្លួនជាច្រើនក្នុងការជួសជុលនិងអភិវឌ្ឍន៍ឱ្យកាន់តែមានលក្ខណៈល្អប្រសើរ តែលោកបានតាំងចិត្តថា លោកនឹងធ្វើគ្រប់បែបយ៉ាងអភិវឌ្ឍវេបសាយដ៏សំខាន់មួយនេះ មិនឱ្យបាត់បង់ទៅណាឡើយ ដើម្បីបន្តជាប្រយោជន៍សម្រាប់អ្នកនិពន្ធកម្ពុជា ក៏ដូចជាវិស័យតែងនិពន្ធកៅកម្ពុជាបន្តទៀត ទោះជាត្រូវលះបង់ច្រើនយ៉ាងណាក៏ដោយ ដែលនេះពិតជាទឹកចិត្តមួយដែលល្អថ្លៃថ្លាខ្លាំងណាស់ ដែលលោកមានចំពោះអ្នកនិពន្ធ និងវិស័យតែងនិពន្ធនៅកម្ពុជា។
លោក គង់ រង្សី និងសៀវភៅ “ពលករខ្មែរនៅកូរ៉េខាងត្បូង” ដែលលោកត្រៀមនឹងចេញផ្សាយនាពេលខាងមុខ
ដូច្នេះ ប្រសិនបើអ្នកដែលកំពុងតែបំពេញការងារនៅកូរ៉េខាងត្បូង ឬអ្នកចង់ឡើងទៅធ្វើការងារនៅកូរ៉េខាងត្បូង ឬកំពុងតែត្រៀមខ្លួនឡើងទៅបំពេញការងារនៅកូរ៉េខាងត្បូងចង់ដឹងថា តើសៀវភៅ “ពលករខ្មែរនៅកូរ៉េខាងត្បូង” ដែលលោកត្រៀមនឹងចេញផ្សាយនេះមានអត្ថប្រយោជន៍កម្រិតណា? និងថាតើលោកនឹងមានសកម្មភាពសំខាន់ៗអ្វីខ្លះក្នុងវិស័យតែងនិពន្ធនៅកម្ពុជា នាពេលខាងមុខបន្ទាប់ពីលោកប្រកាសប្រឡូកចូលវិស័យតែងនិពន្ធនេះវិញនោះ? លោកអ្នកអាចរង់ចាំតាមដានពីសកម្មភាពរបស់លោកជាបន្តបន្ទាប់ទៀតបាន ដោយ “គេហទំព័រអ្នកនិពន្ធកម្ពុជា” នឹងបន្តផ្សព្វផ្សាយពីសកម្មភាពថ្មីៗរបស់ លោក គង់ រង្សី ជាបន្តបន្ទាប់មិនឱ្យដាច់ឡើយ ចាប់ពីពេលលោកប្រកាសវិលត្រឡប់ចូលវិស័យនេះវិញតទៅ។ សូមអរគុណ៕
អត្ថបទ ៖ ពុទ្ធិពង្ស / រូបភាព ៖ លោក ង៉ែត រ៉ា / រក្សាសិទ្ធិ ៖ cambowriter.com
