អ្នកនិពន្ធវ័យក្មេងឆ្នើម ធឿន វុទ្ធី បើកហាង “ ធីសៀវភៅ Bookstore & Café ” ដើម្បីលើកកម្ពស់ការអាន និងស្នាដៃអ្នកនិពន្ធកម្ពុជា
- November 1st, 2021
អ្នកនិពន្ធ ធឿន វុទ្ធី ថតពីមុខហាង “ ធីសៀវភៅ Bookstore & Café ” ភ្ញៀវ និងសៀវភៅរបស់អ្នកនិពន្ធកម្ពុជាមួយចំនួន
អ្នកនិពន្ធគ្រប់រូប តែងមានក្ដីស្រមៃរបស់ខ្លួនក្នុងវិស័យតែងនិពន្ធ ដូចជា និពន្ធស្នាដៃល្អៗដែលមានប្រយោជន៍ចំពោះអ្នកអាន, បើកក្រុមហ៊ុនបម្រើសេវាកម្មផ្នែកនិពន្ធ, បណ្ណាគារលក់សៀវភៅ, បណ្ណាល័យសម្រាប់អ្នកចូលចិត្តអានសៀវភៅ ឬហាងកាហ្វេដែលមានភ្ជាប់ជាមួយសៀវភៅជាដើម។ ជាក់ស្ដែង ប្រៀបដូចជា លោក ធឿន វុទ្ធី ដែលជាអ្នកនិពន្ធកម្ពុជាឆ្នើមមួយរូបនៅពេលនេះតែម្ដង គឺលោកបានសម្រេចចិត្តបើកហាងមួយ ដែលមានលក់ទាំងសៀវភៅនិងភេសជ្ជៈ ដែលការបើកហាងនេះ ហាក់ទទួលបានការសាទរ និងភ្ញាក់ផ្អើលពីសំណាក់អ្នកនិពន្ធ ក៏ដូចជាប្រិយមិត្តរបស់លោកយ៉ាងខ្លាំង។ ដូច្នេះ ដើម្បីឱ្យលោកអ្នកបានដឹងច្បាស់ពីហាងដែលលោកបើកនេះ និងព័ត៌មានសំខាន់ៗផ្សេងៗទៀតពាក់ព័ន្ធជាមួយហាងនេះថាយ៉ាងណាខ្លះនោះ! “គេហទំព័រអ្នកនិពន្ធកម្ពុជា” សូមធ្វើការបង្ហាញជូននូវបទសម្ភាសន៍ដែលបានធ្វើឡើងជាមួយលោកដូចតទៅ ៖
គេហទំព័រអ្នកនិពន្ធកម្ពុជា ៖ តើហាងកាហ្វេដែលលោកទើបបើកនេះ មានឈ្មោះផ្លូវការដូចម្ដេច? មានទីតាំងនៅទីណា? និងមានបម្រើសេវាកម្មអ្វីខ្លះ?
អ្នកនិពន្ធ ធឿន វុទ្ធី ៖ ហាង “ ធីសៀវភៅ Bookstore & Café ” មានទីតាំងស្ថិតនៅភូមិវត្តដំណាក់, សង្កាត់សាលាកំរើក, ក្រុងសៀមរាប ខេត្តសៀមរាប, តាមបណ្ដោយផ្លូវខាងកើតស្ទឹង ហួសស្ពានអាងក្រពើ១០០ម៉ែត្រ។ នៅទីនេះមានលក់សៀវភៅរបស់អ្នកនិពន្ធខ្មែររាប់រយចំណងជើង និងបម្រើសេវាកម្មកាហ្វេ ក៏ដូចជាភេសជ្ជៈជាច្រើនមុខទៀតផងដែរ។
គេហទំព័រអ្នកនិពន្ធកម្ពុជា ៖ តើហាងនេះបង្កើតឡើងដោយលោកតែម្នាក់ ឬមានការចូលរួមពីនរណាផ្សេងទៀត?
អ្នកនិពន្ធ ធឿន វុទ្ធី ៖ ហាងនេះ ត្រូវបានបង្កើតឡើងដោយមានការសហការពីមិត្តភក្ដិរបស់ខ្ញុំចំនួន២រូបគឺ កញ្ញា ភុយ រតនា ដែលចូលរួមក្នុងចំណែកដាក់លក់សៀវភៅ និងកញ្ញា វ៉ាន សុវណ្ណនី ដែលចូលរួមផ្នែកកាហ្វេ និងភេសជ្ជៈ។
អ្នកនិពន្ធ ធឿន វុទ្ធី និងដៃគូរួមចំណែកក្នុងការបើកហាង “ ធីសៀវភៅ Bookstore & Café ” ខាងឆ្វេង កញ្ញា វ៉ាន សុវណ្ណនី និងខាងស្ដាំ កញ្ញា ភុយ រតនា
គេហទំព័រអ្នកនិពន្ធកម្ពុជា ៖ តើអ្វីជាបុព្វហេតុដែលជំរុញឱ្យលោកបង្កើតហាងនេះឡើង? និងបង្កើតឡើងក្នុងគោលបំណងសំខាន់ៗអ្វីខ្លះ?
អ្នកនិពន្ធ ធឿន វុទ្ធី ៖ ការសម្រេចចិត្តបើកហាង “ ធីសៀវភៅ Bookstore & Café ” នេះឡើង មានគោលដៅធំបំផុត គឺចូលរួមលើកកម្ពស់ទីផ្សារសៀវភៅរបស់អ្នកនិពន្ធកម្ពុជាគ្រប់រូប ក៏ដូចជាងាយស្រួលដល់ប្រិយមិត្តដែលនិយមចូលចិត្តអំណាន និងការអាន ក្នុងការស្វែងរកទីតាំងទិញសៀវភៅ។
សៀវភៅស្នាដៃចម្រុះរបស់អ្នកនិពន្ធកម្ពុជាមួយចំនួនក្នុងហាង “ ធីសៀវភៅ Bookstore & Café ”
គេហទំព័រអ្នកនិពន្ធកម្ពុជា ៖ តើហាងនេះនឹងបើកដំណើរការជាផ្លូវការនៅពេលណា? ហើយលោករំពឹងថា ហាងនេះនឹងមានដំណើរការបែបណាដែរ បន្ទាប់ពីបើកផ្លូវការរួច?
អ្នកនិពន្ធ ធឿន វុទ្ធី ៖ ហាងនេះ នឹងបើកដំណើរការសាកល្បង នៅថ្ងៃទី០១ ខែវិច្ឆិកា ឆ្នាំ២០២១ ហើយបើកលក់ជាផ្លូវការនៅថ្ងៃទី០៧ ខែវិច្ឆិកា ឆ្នាំ២០២១ ដែលខ្ញុំរំពឹងថា ប្រិយមិត្តដែលនិយមចូលចិត្តការអាន ការគាំទ្រស្នាដៃអ្នកនិពន្ធកម្ពុជា ក៏ដូចជាចូលចិត្តភ្លក្សរសជាតិកាហ្វេថ្មីៗ នឹងចាប់អារម្មណ៍ជាក់ជាពុំខាន។
គេហទំព័រអ្នកនិពន្ធកម្ពុជា ៖ តើរហូតមកទល់នឹងពេលនេះ លោកនិពន្ធសៀវភៅបានប៉ុន្មានក្បាលហើយ? ភាគច្រើនជាសៀវភៅផ្នែកអ្វី? និងចុងក្រោយមានចំណងជើងអ្វី?
ភេសជ្ជៈមួយប្រភេទក្នុងហាង “ ធីសៀវភៅ Bookstore & Café ”
អ្នកនិពន្ធ ធឿន វុទ្ធី ៖ រហូតមកដល់ពេលនេះ ខ្ញុំនិពន្ធសៀវភៅ និងបោះពុម្ពបានចំនួន១០ចំណងជើងហើយ ដែលភាគច្រើនជាប្រភេទប្រលោមលោកបែបរន្ធត់។ សៀវភៅបោះពុម្ពចុងក្រោយ មានចំណងជើងថា “ស្នាមវិញ្ញាណ” ជាប្រភេទរឿងរន្ធត់នៃសែស្រឡាយអារក្សខ្មៅ។
គេហទំព័រអ្នកនិពន្ធកម្ពុជា ៖ តើហាងដែលលោកបើកនេះ មានដាក់តាំងលក់តែសៀវភៅស្នាដៃនិពន្ធរបស់លោក ឬក៏មានស្នាដៃអ្នកនិពន្ធដទៃៗទៀតផងដែរ? ហើយអ្វីជាចំណុចពិសេសនៃហាងដែលលោកបើកនេះ?
អ្នកនិពន្ធ ធឿន វុទ្ធី ៖ ហាងដែលខ្ញុំបើកនេះ គឺប្រមូលផ្ដុំដោយសៀវភៅសម្បូរបែប ជាស្នាដៃនិពន្ធរបស់អ្នកនិពន្ធ កវីរៀមច្បង និងអ្នកនិពន្ធចាស់ថ្មី ក្នុងប្រទេសកម្ពុជាយើង។ ចំណុចពិសេសនៃហាងនេះ គឺប្រិយមិត្តមិនត្រឹមតែអាចរកជាវសៀវភៅចាស់ថ្មី សម្បូរបែបប៉ុណ្ណោះទេ ថែមទាំងបានភ្លក្សនូវរសជាតិកាហ្វេប្រចាំហាងដែលមានតម្លៃសមរម្យ មានកន្លែងអង្គុយអានសៀវភៅ ធ្វើការ និងជជែកពិភាក្សាប្រកបដោយផាសុកភាពទៀតផង។
សៀវភៅល្បីៗមួយចំនួនរបស់អ្នកនិពន្ធឆ្នើម ធឿន វុទ្ធី
គេហទំព័រអ្នកនិពន្ធកម្ពុជា ៖ អ្វីជាមតិចុងក្រោយរបស់លោកមុននឹងបិទបញ្ចប់បទសម្ភាសន៍ជាមួយ “គេហំទព័រអ្នកនិពន្ធកម្ពុជា” ? ជាពិសេសពាក់ព័ន្ធនឹងហាងដែលលោកបើកនេះ តើលោកមានសំណូមពរអ្វីដល់សាធារណជនអ្នកស្នេហាការអាន ក្នុងបំណងឱ្យជួយគាំទ្រហាងរបស់លោកនេះ? សូមគោរពអញ្ជើញ!
អ្នកនិពន្ធ ធឿន វុទ្ធី ៖ ជាចុងក្រោយ ខ្ញុំសូមថ្លែងអំណរគុណដល់គេហទំព័រអ្នកនិពន្ធកម្ពុជា ដែលជួយផ្សព្វផ្សាយពីការបើកដំណើរការរបស់ “ ធីសៀវភៅ Bookstore & Café ” ក៏ដូចជាថ្លែងអំណរគុណដល់ប្រិយមិត្តអ្នកគាំទ្រ ដែលរមែងគាំទ្រស្នាដៃតែងនិពន្ធរបស់ខ្ញុំតាំងពីដើម រហូតដល់ខ្ញុំមានឱកាសបើកហាងសៀវភៅផ្ទាល់ខ្លួន។ ខ្ញុំសង្ឃឹមថា ប្រិយមិត្តនឹងបន្តជួយគាំទ្រ និងលើកកម្ពស់វិស័យអំណាន និងការអាន ក៏ដូចជាវិស័យតែងនិពន្ធនៅកម្ពុជាយើង ឱ្យកាន់តែមានសម្ទុះខ្លាំងឡើងតទៅមុខទៀត។
អ្នកនិពន្ធឆ្នើម ធឿន វុទ្ធី និងស្នាដៃល្បីមួយរបស់លោក
“គេហទំព័រអ្នកនិពន្ធកម្ពុជា” សូមបញ្ជាក់ថា អ្នកនិពន្ធ ធឿន វុទ្ធី កើតឆ្នាំ១៩៩៦ នៅភូមិចារលើ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ។ មានឪពុកឈ្មោះ ថន ប៊ុនធឿន និងម្ដាយឈ្មោះ អឿល រដ្ឋា (ជាកសិករ) និងមានបងប្អូនបង្កើតចំនួន៣នាក់ ស្រី២នាក់ ដោយរូបលោកជាកូនប្រុសច្បងក្នុងគ្រួសារ។ បច្ចុប្បន្ន ក្រៅពីមានអាជីពជាអ្នកនិពន្ធឆ្នើមវ័យក្មេងមួយរូបនៅកម្ពុជា លោកគឺជាគ្រូបង្រៀននៅ អនុវិទ្យាល័យពោធិ៍ទ្រាយ ភូមិទ្រាយ ឃុំពោធិ៍ទ្រាយ ស្រុកពួក ខេត្តសៀមរាប, បង្រៀនមុខវិជ្ជា ជីវវិទ្យា ផែនដីវិទ្យា។ លោកជាអ្នកនិពន្ធកម្ពុជាមួយរូប ដែលនិយមចូលចិត្តនិពន្ធប្រលោមលោកបែបភ័យរន្ធត់ខ្លាំងបំផុត ទន្ទឹមនឹងនេះក៏អាចនិពន្ធប្រលោមលោកមនោសញ្ចេតនាបានយ៉ាងល្អផងដែរ ជាពិសេសរឿងស្នេហាភេទដូចគ្នា។ ដូច្នេះ ប្រសិនបើលោកអ្នកចង់មានភាពងាយស្រួលក្នុងការជាវស្នាដៃរបស់លោកយកទៅអាន ឬចង់ភ្លក្សរសជាតិភេសជ្ជៈហាងរបស់លោកដែលទើបតែនឹងបើកនៅខេត្តសៀមរាបនេះ លោកអ្នកអាចទៅជួយគាំទ្រនៅទីតាំងដូចដែលលោកបានបង្ហាញខាងលើបាន។ សូមអរគុណ៕
អត្ថបទ ៖ ពុទ្ធិពង្ស / រូបភាព ៖ ធឿន វុទ្ធី / រក្សាសិទ្ធិ ៖ cambowriter.com
