អ្នកនាង កែម លីហៀង កើតនៅថ្ងៃទី៩ ខែតុលា ឆ្នាំ១៩៧៩ នៅភូមិប្រក់ក្តារ ឃុំវិហារហ្លួង ស្រុកពញាឮ ខេត្តកណ្តាល។ ក្រៅពីមាន​អាជីពជាអ្នកនិពន្ធ ដែលធ្លាប់បង្កើតបាននូវ​ស្នាដៃ​ជាច្រើនតាំងពីឆ្នាំ១៩៩៨រហូតមកដល់បច្ចប្បន្ន​ អ្នកនាងក៏ជាផលិតករកម្មវិធីទូរទស្សន៍ ជាទីប្រឹក្សាគម្រោងកម្មវិធីអប់រំកុមារតាមបណ្តាអង្គការនានាដូចជាអង្គការ Asian Foundation និង អង្គការ Aide Et Actions ក្នុង​ប្រទេសកម្ពុជា។ ហើយ​ក៏ជាម្ចាស់ “គ្រឹះស្ថានបោះពុម្ពផ្សាយក្រោមដំបូលតែមួយ” ផងដែរ ដែលគ្រឹះសា្ថននេះ ផ្ដោត​សំខាន់​លើ​ការ​និពន្ធ​​​ និងបោះពុម្ពផ្សាយសៀវភៅសម្រាប់កុមារ។ ចំពោះស្នាដៃដែលបានចេញផ្សាយប្រមាណជា៣០ចំណងជើង​កន្លងមក ឃើញថាទទួលបាននូវការចាប់អារម្មណ៍ ពេញចិត្ត និង​គាំទ្រយ៉ាងខ្លាំងពីសំណាក់​ឪពុកម្ដាយ និងកុមារកម្ពុជាជាច្រើន​រូប។

អ្នកនាង កែម លីហៀង អ្នកនិពន្ធស្ត្រីមួយរូបនៅកម្ពុជា

ក្នុង​បទសម្ភាសន៍ជាមួយ “គេហទំព័រអ្នកនិពន្ធកម្ពុជា” តាមសារអេឡិចត្រូនិច អ្នក​នាង​ កែម លីហៀង បាន​បង្ហាញ​ពីគ្រឹះស្ថាន​ខាង​លើដូច​តទៅថា​ “គ្រឹះស្ថានបោះពុម្ពផ្សាយក្រោមដំបូលតែមួយ បង្កើតឡើងនៅកំឡុងខែតុលា ឆ្នាំ២០១៦ ដោយនាងខ្ញុំផ្ទាល់។ រហូតមកដល់បច្ចុប្បន្ននេះ គ្រឹះស្ថាន​ផលិតបានសៀវភៅចំនួន៣០ស្នាដៃ រួមទាំងស្នាដៃសម្រាប់កុមារតូច និងកុមារធំ ក្នុងនោះក៏មានការចូលរួមពីអ្នកនិពន្ធវ័យក្មេងចំនួន​២រូបទៀតដែរ គឺ លោក គង់ សុខកេង និង លោក សាត ឌិច។

អ្នក​នាង កែម លីហៀង បានបន្តទៀតថា “សម្រាប់គ្រឹះស្ថានបោះពុម្ពផ្សាយក្រោមដំបូលតែមួយ បច្ចុប្បន្នគឺមានតែស្នាដៃសម្រាប់កុមារតែប៉ុណ្ណោះទេ ប៉ុន្តែសម្រាប់ថ្ងៃអនាគត អាចនឹងបោះពុម្ពនូវស្នាដៃប្រលោមលោក ឬសៀវភៅទស្សនៈវិជ្ជា ដែលជាស្នាដៃនិពន្ធផ្ទាល់របស់នាងខ្ញុំ។ លើស​ពីនេះ ​នៅ​ថ្ងៃអនាគត យើងនឹងមានការទទួលយកស្នាដៃរបស់​អ្នកនិពន្ធដទៃៗទៀត ដើម្បីបោះពុម្ព និងចែកផ្សាយផងដែរ ក្រោមលក្ខខណ្ឌដែលអ្នកនិពន្ធព្រមអនុញ្ញាតឱ្យ​នាង​ខ្ញុំពិនិត្យ និងមានសិទ្ធិកែសម្រួលស្នាដៃនោះ។”

អ្នកនាង​ កែម លីហៀង រួមនិងលោកគ្រូអ្នកគ្រូថតនៅមុខបណ្ណាល័យក្នុងសាលាមួយ

ខាងលើ គឺជាការ​បង្ហាញ​របស់ អ្នកនាង​ កែម លីហៀង ទាក់ទងទៅនឹង “គ្រឹះស្ថានបោះពុម្ពផ្សាយក្រោមដំបូលតែមួយ”​ តែ​បើ​និយាយ​ពីអាជីពជាអ្នកនិពន្ធរបស់​អ្នកនាងវិញ អាចនិយាយបានថា អ្នកនាងគឺ​ជាអ្នកនិពន្ធពហុជំនាញមួយរូប ព្រោះ​ជាង២០ឆ្នាំកន្លងមកនេះ អ្នក​នាង​ធ្លាប់បាន​និពន្ធប្រលោមលោក, អត្ថបទភាពយន្ត​ (ប្រតិដ្ឋនិងស្រាវជ្រាវ) ផលិតកម្មវិធីទូរទស្សន៍  កំណាព្យ, ចម្រៀង, អត្ថបទសារព័ត៌មាន និងរឿងនិទានកុមារជាច្រើនស្នាដៃ។ ខាងក្រោមនេះ យើងខ្ញុំនឹងបង្ហាញ​ពីស្នាដៃសំខាន់ៗមួយចំនួនរបស់ អ្នកនាង កែម លីហៀង ឱ្យលោកអ្នកបានដឹងដូចតទៅ ៖

ស្នាដៃផ្នែកប្រលោមលោក​

• រឿង “សៀវភៅកំណត់ហេតុ” និង រឿង “អាថ៌កំបាំងជីវិត” រឿងទាំងពីរនេះ ​ធ្លាប់បោះពុម្ពផ្សាយនៅ “គ្រឹះស្ថានបោះពុម្ពផ្សាយ Mind Book” ដែលជាគ្រឹះស្ថានបោះពុម្ពផ្សាយល្បីមួយ​នៅកម្ពុជា។  បន្ទាប់ពីស្នាដៃទាំងនេះត្រូវ​បានលក់អស់នៅលើទីផ្សារ បច្ចុប្បន្នកំពុងត្រៀមបោះពុម្ពឡើងវិញដោយ គ្រឹះស្ថានបោះពុម្ពផ្សាយក្រោមដំបូលតែមួយ ខ្លួនឯងវិញម្ដង។ រួមទាំងស្នាដៃថ្មី២រឿងបន្ថែមទៀតគឺ រឿង “ឆ្នេរខ្សាច់ពន្លកស្នេហ៍” និង​រឿង “សុបិននិស្ស័យ” (ស្នាដៃទាំងពីរនេះ កំពុងរចនាក្រប)។

ស្នាដៃផ្នែកអត្ថបទភាពយន្ត

• រឿង “រំដួលអង្គរ” និងរឿង “ទូរស័ព្ទផ្តាច់ព្រលឹង” (ចូលរួមនិពន្ធជាមួយអ្នកនិពន្ធផ្សេងទៀតនៃផលិតកម្មបក្សីឋានសួគ៌ភាពយន្ត) បានផលិតជាភាយន្តរួចហើយ។

• រឿង “ឧកញ៉ាក្រឡាហោមគង់” (ស្នាដៃភាពយន្តបែបប្រវត្តិសាស្រ្ត ស្រាវជ្រាវ និងរៀបរៀងជាមួយក្រុមអ្នកនិពន្ធ នៃផលិតកម្មបក្សីឋានសួគ៌ភាពយន្ត)មិនទាន់បានផលិត។
• រឿង “គ្រូពេទ្យខ្ញុំ” (ភាពយន្តភាគរបស់ទូរទស្សន៍ PNN)
• រឿង “ប្រអប់សំបុត្រចោលទុក្ខ” (ភាយន្តភាគរបស់ទូរទស្សន៍MYTV ក្នុងវគ្គទី២នៃរឿង)។

រឿង “សៀវភៅកំណត់ហេតុ” និង រឿង “អាថ៌កំបាំងជីវិត” ស្នាដៃនិពន្ធរបស់ អ្នកនាង កែម លីហៀង

ស្នាដៃផ្នែកកំណាព្យ

• ប្រមាណជា៤០ស្នាដៃ (មិនទាន់បានចងក្រងជាសៀវភៅ)។

ស្នាដៃផ្នែកចម្រៀង

• ប្រមាណជា៣០ចំណងជើង (នៅផលិតកម្ម សាន់ដេ កំឡុងឆ្នាំ១៩៩៨ ដល់ឆ្នាំ២០០០មិនចាំស្នាដៃដែលបានផលិតនោះទេ)។

ស្នាដៃផ្នែករឿងនិទានសម្រាប់កុមារ

• ប្រមាណជា៤០ចំណងជើង បានបោះពុម្ពផ្សាយនៅក្នុងទំព័រទស្សនាវដ្តីតាំតាំ កំឡុងឆ្នាំ២០០២ ដល់២០០៩ ក្នុងតួនាទី ជានិពន្ធនាយិកាទស្សនាវដ្ដីតាំតាំ។
• ចំនួន១៧ចំណងជើង ដែលបានបោះពុម្ពផ្សាយដោយ “គ្រឹះស្ថានបោះពុម្ពផ្សាយក្រោមដំបូលតែមួយ” សព្វថ្ងៃនេះ។

ដើម្បីជាការលើកទឹកចិត្តចំពោះការខិតខំប្រឹងប្រែងកសាងនូវស្នាដៃជាច្រើនទាំងនេះ អ្នក

និពន្ធកែមលីហៀង ក៏ទទួលបានការលើកទឹកចិត្តពីព្រះមហាក្សត្រនូវគ្រឿង ឥស្សរិយយស មុនីសាភ័ណ្ឌ ថ្នាក់មហាសេនា និងទទួនបាននូវពានរង្វាន់ទន្លេមេគង្គថែមទៀតផង។

អ្នកនាង កែម លីហៀង ក្នុងពិធីទទួលពានរង្វាន់ទន្លេមេគង្គ និងបណ្ណប្រកាសនីយបត្រ គ្រឿងឥស្សរិយយស មុនីសារាភ័ណ្ឌ

បន្ទាប់មក អ្នកនាង កែម លីហៀង ក៏បាន​បង្ហាញ​ប្រាប់​ពីគោលបំណងសំខាន់ៗ​ដែលជំរុញ​ឱ្យ​អ្នក​នាង ​​បង្កើតគ្រឹះស្ថានបោះពុម្ពផ្សាយនេះឡើងថា “គោលបំណងសំខាន់នៃការបង្កើតគ្រឹះស្ថានបោះពុម្ពផ្សាយក្រោមដំបូលតែមួយនេះ​ឡើង រួមមាន៖ កត្តាទី១ ចង់លើកកម្ពស់​ការអាននៅកម្ពុជា ដូចនេះកំឡុងពេលដែលនាង​ខ្ញុំធ្វើការនៅ SEATV នាង​ខ្ញុំបានបោះពុម្ពស្នាដៃថ្មីមួយ គឺរឿងក្រោ​មដំបូលតែមួយ។ បំណង គឺចែកដល់កុមារក្នុងកម្មវិធី ទេពកោសល្យកុមារ ដែលខ្ញុំផលិតប៉ុណ្ណោះ។ ហើយស្នាដៃនោះក៏បានផ្ញើថ្វាយ សម្តេចតា (សម្តេចនរោត្តមសីហនុ) និងព្រះមហាក្សត្រ នរោត្តម សីហ មុនី​ ( នៅកំឡុងឆ្នាំ២០១២)។ ​ក្រោយមក មានអាណាព្យាបាលសិស្សបានខលសួរថា សៀវភៅរឿង ក្រោមដំបូលតែមួយ ហ្នឹងទៅរកទិញឯណាបាន? ចំពោះសំណួររបស់អាណាព្យាបាលសិស្សធ្វើឲ្យខ្ញុំចងចាំ ហើយក៏ចាប់ផ្តើមចែកផ្សាយទៅលើទីផ្សារ ដោយមិត្តភក្តិដែលធ្លាប់ធ្វើការជាមួយគ្នានៅតាំតាំ​ជាអ្នកចែកផ្សាយឱ្យ​។ កត្តាទី២៖ ពេលនាង​ខ្ញុំទៅធ្វើកម្មវិធី ទេពកោសល្យកុមារ ឱ្យ​SEATV នាង​ខ្ញុំឃើញតាមសាលា​នីមួយៗមិនសូវជាមានសៀវភៅរឿងនិទានសម្រាប់កុមារ ដែលជាស្នាដៃនិពន្ធថ្មីនោះទេ មានតែរឿងចាស់ៗ និងរឿងបកប្រែពីបរទេស។ ហើយបើទៅមើលនៅសាលាតាមសហគមន៍វិញ គឺកាន់តែខ្សត់សៀវភៅទៅទៀត។ កត្តាទី៣៖ កំឡុងពេលធ្វើការនៅSEATV​ នាង​ខ្ញុំធ្វើការជាមួយកុមារច្រើនណាស់ នៅតាមគ្រឹះស្ថានអប់រំ​រដ្ឋ និងឯកជន នាង​ខ្ញុំឃើញមានករណីជាច្រើនដែលកុមារត្រូវរៀនសូត្របន្ថែមពីអ្វីដែលបានរៀនពីសាលា ឆ្លៀតពេលតានតឹងក្នុងចិត្តនោះ នាង​ខ្ញុំក៏និពន្ធបានរឿងថ្មីៗប្រមាណជា៣០រឿង ដែលជាប្រធានបទអប់រំក្នុងបរិបទសង្គមថ្មី ដោយសង្ឈឹមថា ថ្ងៃណាមួយកុមារនឹងមានស្នាដៃថ្មីអាន​ ហើយផ្នត់គំនិតរបស់នាង​ខ្ញុំនឹងបានចូលដល់ផ្នត់គំនិតរបស់ក្មេងៗ។ ចំណែក​កត្តាទី៤៖ ដែល​ជា​កត្តាចុងក្រោយ គឺ​នៅកំឡុងឆ្នាំ២០១៦ សា្ថនីយ៍ទូរទស្សន៍ចាប់ផ្តើមកាត់បន្ថយកម្មវិធី  ហើយនាង​ខ្ញុំក៏នឹងជិតផុតកង់ត្រាជាមួយទូរទស្សន៍ដែរ។ ដោយធ្លាប់មានបទពិសេធន៍ការងារធ្វើសៀវភៅកុមារនេះ អស់ពេលជាង៧ឆ្នាំនៅទស្សនាវដ្តីតាំតាំផង និងដោយសារការលើកទឹកចិត្តពីលោកគ្រូ ជ័យ ចាប  នាយកសាលាអន្តរជាតិ ហ្គោហ្គោ និងពិសេសបំផុត នាយកក្រុមហ៊ុន ពីរ៉ាមីតបកប្រែ គាត់មិនត្រឹមតែបានលើកទឹកចិត្តប៉ុណ្ណោះទេ គឺថែមទាំងជួយឧបត្ថម្ភលើការបោះពុម្ពទៀតផង។ ដោយមានការគាំទ្រ និងលើកទឹកចិត្តពីពួកគាត់ ខ្ញុំក៏សម្រេចចិត្តបង្កើតគ្រឹះស្ថានបោះពុម្ពផ្សាយនេះឡើង ដោយយកចំណងជើងរឿង ក្រោមដំបូលតែមួយ ធ្វើជាឈ្មោះគ្រឹះស្ថានតែម្តង។” ​

រឿង “ក្រោមដំបូលតែមួយ” សៀវភៅកុមារល្បី ស្នាដៃនិពន្ធរបស់ អ្នកនាង កែម លីហៀង មុនវិវត្តឈ្មោះទៅជាគ្រឹះស្ថានបោះពុម្ពផ្សាយ 

បន្ថែម​លើស​ពីនេះ អ្នក​នាង កែម លីហៀង ក៏បាន​បង្ហាញ​ពី​សារៈសំខាន់​នៃសៀវភៅ​កុមារឡើងថា “ក្នុងនាមនាងខ្ញុំ​ជា​អ្នកនិពន្ធរឿងនិទានសម្រាប់កុមារ នាង​ខ្ញុំគិតថា​ស្នាដៃថ្មីដែលបាននិពន្ធ និងបោះពុម្ពផ្សាយនេះ មានសារៈសំខាន់ណាស់សម្រាប់កុមារ ដូចជា  ទី១​ ៖ គឺកុមារមានសៀវភៅថ្មី ដែលមានរូបភាពស្អាតៗមើល និងអាន។  ​ ​ម៉្យាងទៀត ខ្លឹមសារនៅក្នុងស្នាដៃ ខ្ញុំព្យាយាមបញ្ចូលនូវសារអប់រំខ្លីៗសម្រាប់កុមារ ដែលមានទាំងចំណោទបញ្ហា និងដំណោះស្រាយ។ អ៊ីចឹងកុមារនៅពេលដែលគាត់ជួបហេតុការណ៍នោះ គាត់នឹងមានមធ្យោបាយដោះស្រាយ ដោយបានដឹងខ្លះៗអំពីស្នាដៃយើង។ និងទី២ ៖ ក្នុងស្នាដៃ នាង​ខ្ញុំបានបញ្ចូលនូវសារអប់រំផ្លូវចិត្ត ការរស់នៅប្រចាំថ្ងៃរបស់មនុស្សដែលត្រូវតែអនុវត្តនិងជួបប្រទះ ដើម្បីឱ្យ​ពួកគេបានត្រៀមខ្លួនដើម្បីទទួលយក និងទទួលខុសត្រូវលើជីវិតផ្ទាល់ខ្លួន​របស់ពួកគេ ​។ ការណ៍ដែលកុមារចូលចិត្តអាន ហើយទទួលបាននូវចំណេះដឹងបន្ថែមកាន់តែច្រើន ធ្វើឱ្យ​កុមារមានថាមពលផ្លូវចិត្តកាន់តែរឹងមាំ នៅពេលដែលយើងទទួលបានធនធានកុមារដែលល្អ នោះថ្ងៃអនាគតយើងនឹងមានពលរដ្ឋល្អសម្រាប់សង្គម។ កុមារប្រៀបដូចជាក្រដាសសអ៊ីចឹង បើយើងប្រាប់គាត់ពីអ្វីហើយគាត់នឹងចាំជាប់នូវអំពើ នូវទ្រឹស្តី និងសកម្មភាពនោះបានយ៉ាងច្បាស់ ដូចនេះការផលិតសៀវភៅសម្រាប់កុមារ គឺនាង​ខ្ញុំមានការប្រយ័ត្នប្រយែងជាងសរសេរសៀវភៅមនុស្សធំ។ រាល់ពេលដែលនាង​ខ្ញុំចាប់ផ្តើមនិពន្ធរឿងសម្រាប់កុមារ នាង​ខ្ញុំតែងតែសួរនូវ៥សំណួរសម្រាប់ខ្លួនឯងជានិច្ច, ទី១ ៖ ខ្ញុំជាអ្នកណា? ចម្លើយ ខ្ញុំជាអ្នកនិពន្ធ។ ទី២ ៖ ខ្ញុំមកពីណា? ចម្លើយ ខ្ញុំមកពីស្ថាប័នអប់រំ។ ទី៣ ៖ ខ្ញុំកំពុងធ្វើអ្វី? ចម្លើយ ខ្ញុំកំពុងរៀបចំនិពន្ធរឿង។ ទី៤ ៖ ខ្ញុំនិពន្ធដើម្បីអ្វី? ចម្លើយ គឺខ្ញុំនិពន្ធដើម្បីអប់រំកុមារអំពី អនាម័យ (ចំពោះប្រធានបទនេះ ឬនោះ គឺទៅតាមភាពជាក់ស្តែង)។ និងសំណួរទី៥ ៖ ចុងក្រោយ គឺខ្ញុំសរសេរសម្រាប់អ្នកណា? ចម្លើយ សម្រាប់កុមារ​ (កុមារតូច ឬកុមារធំទៅតាមភាពជាក់ស្តែង)។” អ្នកនាងបន្ត “ក្រោយពេលឆ្លើយសំណួរទាំងនេះហើយ ទើបនាង​ខ្ញុំចាប់ផ្តើមសរសេរ។ ការអប់រំកុមារមិនថាអ្នកនិពន្ធ  គ្រូបង្រៀន ឬអាណាព្យាបាលនោះទេ ត្រូវតែមានការប្រុងប្រយ័ត្នឱ្យ​បានមែនទែន ព្រោះកុមារគាត់អត់ទាន់ចេះគិត និងពិចារណាអំពីអ្វីល្អឬអាក្រក់នោះទេ បើ​គាត់ចាប់បានអ្វីពីយើងដែលជាមនុស្សធំ មិនថាដោយផ្ទាល់ឬប្រយោលនោះទេ គាត់ប្រាកដជាចងចាំ និងអនុវត្តតាម។ បើយើងចង់បានធនធានមនុស្សដែលខ្លឹម យើងត្រូវចាប់ផ្តើមពីការអប់រំកុមារឱ្យមានខ្លឹមជាមុនសិន។”

អ្នកនិពន្ធ កែម លីហៀង ថតនៅតូបលក់សៀវភៅគ្រឹះស្ថានរបស់ខ្លួនក្នុងពិធីតាំងពិព័រណ៌សៀវភៅធំមួយ​ ជាមួយកុមារៗសិស្សានុសិស្ស

ចំពោះ​សំណួរខាងក្រោយ ស្តីអំពីបេសកកម្មរបស់​គ្រឹះសា្ថន អ្នកនាង កែម លីហៀង បាន​បញ្ជាក់ថា “បេសកកម្មចម្បងរបស់គ្រឹះស្ថាន​ពុម្ពផ្សាយក្រោមដំបូលតែមួយ គឺផលិតស្នាដៃនិពន្ធថ្មីៗឱ្យ​បានច្រើន ដោយគុណភាពខ្ពស់ និងក្នុងតម្លៃសមរម្យដែលកុមារស្ថិតក្នុងគ្រួសារកម្រិតណាក៏អាច​មានលទ្ធភាពទិញ។ ម៉្យាងទៀត យើងក៏មានផែនការណ៍សម្រាប់ថ្ងៃអនាគត គឺលើកកម្ពស់ម្ចាស់ស្នាដៃ ទាំងអ្នកនិពន្ធ និងអ្នកគូររូប ដោយផ្តល់ជាភាគរយនៃស្នាដៃដែលលក់បានបន្ថែមលើកញ្ចប់ថវិកាដែលយើង​បានទិញគាត់ពីមុន។ ផែនការណ៍នេះ នឹងអនុវត្តនៅពេលដែលគ្រឹះស្ថានមានស្ថានភាពនឹងនផ្នែកសេដ្ឋកិច្ច ដែលអាចមានលទ្ធភាពប្រើបុគ្គលិក។ ចំពោះបច្ចុប្បន្ននេះ គឺនាង​ខ្ញុំទទួលខុសត្រូវម្នាក់ឯងគ្រប់ផ្នែកទាំងអស់ សូម្បីតែការដឹកជញ្ជូន ព្រោះលទ្ធភាពនៅមានកម្រិត។”

ជាចុងក្រោយ អ្នកនាង កែម លីហៀង ក៏បាន​ថ្លែងថា​ “ជាចុងក្រោយ នាងខ្ញុំសូមអរគុណចំពោះគេហទំព័រអ្នកនិពន្ធកម្ពុជា ដែលបានមកសម្ភាសន៍នាងខ្ញុំ។ ហើយក៏អរគុណដល់បណ្ណាគារ បណ្តាគ្រឹះស្ថានអប់រំ អង្គការនានា និងអាណាព្យាបាលទាំងឡាយ ដែលតែងតែគាំទ្រនូវស្នាដៃរបស់គ្រឹះស្ថានបោះពុម្ពផ្សាយក្រោមដំបូលតែមួយរបស់នាងខ្ញុំផងដែរ។”

សៀវភៅកុមារស្នាដៃមួយចំនួនធំរបស់អ្នកនិពន្ធ កែម លីហៀង ក្នុង “គ្រឹះស្ថានបោះពុម្ពផ្សាយក្រោមដំបូលតែមួយ” និងលេខទូរសព្ទដែលអាចឱ្យលោកអ្នកទំនាក់ទំនងជាវបាន

“គេហទំព័រអ្នកនិពន្ធកម្ពុជា” សូមបញ្ជាក់ថា អ្នកនាង កែម លីហៀង កើតឆ្នាំ១៩៧៩ នៅស្រុកពញាឮ ខេត្តកណ្តាល។ បច្ចុប្បន្ន ក្រៅពីមាន​អាជីពជាអ្នកនិពន្ធកម្ពុជាមួយរូប អ្នកនាងគឺជាផលិតករកម្មវិធីទូរទស្សន៍ និងមានតួនាទីជាទីប្រឹក្សាគម្រោងកម្មវិធីអប់រំកុមារ តាមបណ្តាអង្គការនានាក្នុង​ប្រទេសកម្ពុជា ហើយ​ក៏ជា​អ្នក​ទទួលបន្ទុកផ្នែកបោះពុម្ព និងចែកផ្សាយរាល់ស្នាដៃរបស់ “គ្រឹះស្ថានបោះពុម្ពផ្សាយក្រោមដំបូលតែមួយ” ផងដែរ ដែលជាគ្រឹះសា្ថន​ស្ថាប​និកឡើងដោយ​អ្នកនាងផ្ទាល់ ធ្វើ​ការ​ផ្ដោត​សំខាន់​លើ​ការ​និពន្ធបោះពុម្ពផ្សាយសៀវភៅសម្រាប់​កុមារនៅកម្ពុជា​។ ដូច្នេះ បើលោក​អ្នក​ ជាពិសេស​ឪពុកម្ដាយគ្រប់​រូបមានបំណងទិញ​សៀវភៅ​កុមារដែលជាស្នាដៃ​និពន្ធថ្មីៗរបស់គ្រឹះស្ថានបោះពុម្ពផ្សាយក្រោមដំបូលតែមួយ ​យកទៅ​អានឱ្យកូនៗរបស់លោកអ្នកអាន ឬក៏ចង់​ដឹងថា តើស្នាដៃ​និពន្ធ​សៀវភៅ​កុមារ​របស់​អ្នកនាងមាន​អត្ថន័យខ្លឹមសារ​ល្អ​យ៉ាង​ណា​នោះ លោកអ្នក​អាច​ទាក់ទងទិញបាន​តាមរយ:​ ហ្វេសប៊ុកផ្លូវការរបស់​អ្នកនាងផ្ទាល់ ឈ្មោះ Lyheang Author https://www.facebook.com/kem.lyheang  ឬហ្វេសប៊ុក​ផេកផ្លូវការរបស់​គ្រឹះស្ថាន Under The Roof Publishing https://www.facebook.com/LyheangKemtheAuthor  ក៏បាន នោះ​លោក​អ្នកមុខជាបានដឹងច្បាស់មិនខាន។ សូមអរគុណ៕

អត្ថបទ ៖ ពុទ្ធិពង្ស / រូបភាព៖ អ្នកនាង កែម លីហៀង / រក្សាសិទ្ធិ ៖ cambowriter.com