ទី​បំផុតប្រលោមលោក​ រឿង “ទឹកភ្នែកក្រោមភ្លៀងរលឹម” ដែលជាស្នាដៃ​និពន្ធរបស់​អ្នក​និពន្ធ​ឆ្នើម មុខស្រស់​​វ័យក្មេង ធឿន វុទ្ធី បានចេញផ្សាយ​ជាផ្លូវការ​ហើយ គឺ​ចេញ​ពីរោងពុម្ព​ក្ដៅៗកាលពីថ្ងៃ​ទី១៨ ខែឧសភា ឆ្នាំ២០២០ ម្សិល​មិញ​នេះ​ឯង ដែលនេះ​ពិតជាដំណឹង​មួយ​ដ៏​រីករាយ​ខ្លាំង​​ណាស់​សម្រាប់ប្រិយមិត្ត​អ្នកដែលនិយម​អាន​ស្នាដៃ​និពន្ធ​របស់លោក ជាពិសេសអ្នក​ទាំង​ឡាយដែលបានកក់សៀវភៅ​នេះ​មុន​តែម្ដង។

អ្នកនិពន្ធ ធឿន វុទ្ធី និងសៀវភៅប្រលោមលោករឿង “ទឹកភ្នែកក្រោមភ្លៀងរលឹម” របស់លោក

លោក​ ធឿន វុទ្ធី បាន​បង្ហាញ​ប្រាប់​ “គេហទំព័រអ្នកនិពន្ធ​កម្ពុជា” ​ក្នុង​បទសម្ភាសន៍តាម​សារអេឡិចត្រូនិចថា “រឿង “ទឹកភ្នែកក្រោមភ្លៀងរលឹម” ជាប្រភេទប្រលោមលោកបែបមនោសញ្ចេតនាភេទដូចគ្នា ជារសជាតិថ្មីមួយបែបទៀតសម្រាប់យុវវ័យមិត្តអ្នកអាន និងជាលើកទីពីរ សម្រាប់ស្នាដៃតែងនិពន្ធរឿងមនុស្សស្រឡាញ់ភេទដូចគ្នារបស់​ខ្ញុំ​ បន្ទាប់ពីប្រិយមិត្តអ្នកគាំទ្រ រឿង “ទេពច្យុតក្លែងក្លាយ” បានធ្វើការសំណូមពរមកកាន់ខ្ញុំ​ អស់ជិតរយៈ​ពេល​មួយឆ្នាំទៅ​ហើយ​នោះ។”

លោក​បន្តទៀតថា “រឿងនេះ ឆ្លុះបញ្ចាំងពីជីវិតក្មេងប្រុសពីរនាក់ ដែលពួកគេមានសេចក្ដីស្រឡាញ់ចំពោះ​គ្នា ប៉ុន្តែស្នេហារបស់ពួកគេ ហាក់មិនមានលទ្ធផលល្អទាល់តែសោះ ព្រោះវាជាស្នេហាបែបបុរស​និងបុរស​ ជារឿងរ៉ាវដែលសង្គមរមែងច្រានចោលជារឿយៗ។ យើងនឹងបានឃើញពីឧបសគ្គដ៏សែនលំបាកមួយ ដែលតួអង្គត្រូវធ្វើការសម្រេចចិត្ត ដើម្បីស្នេហារបស់ពួកគេ។”

សៀវភៅប្រលោមលោករឿង “ទឹកភ្នែកក្រោមភ្លៀងរលឹម” របស់​អ្នក​និពន្ធ ធឿន វុទ្ធី

ប្រលោមលោករឿង​ “ទឹកភ្នែកក្រោមភ្លៀងរលឹម” របស់​អ្នក​និពន្ធ​ឆ្នើមមុខ​ស្រស់​វ័យ​ក្មេង​នេះ ប្រសិន​បើ​​លោក​អ្នក​មាន​ការ​ចាប់​អារម្មណ៍ចង់អាន លោក​អ្នក​​អាចរកជាវបាននៅតាមតូបលក់សៀវភៅ, បណ្ណាគារ  ឬក៏អាច​ទំនាក់​ទំនង​​​ទិញ​ដោយ​ផ្ទាល់​ពីរូបលោក​ក៏បាន តាម​រយៈ​ហ្វេសប៊ុក​ផេក​​ផ្លូវ​ការ​របស់​​លោកឈ្មោះ Thoeun VuThy – ធឿន វុទ្ធី  https://www.facebook.com/thoeunvuthy260296/ ក៏ដូចជា​​តាម​រយៈ​ទូរស័ព្ទលេខ 096 277 4271 និង 096 201 6220 ក៏បាន ក្នុងតម្លៃ ៣០,០០០ រៀល ។

មុននឹងបញ្ចប់​បទសម្ភាសន៍នេះ លោក​ក៏បាន​ថ្លែងអំណរគុណដល់ប្រិយមិត្ត​របស់​លោក​ផងដែរ ដែលតែងតែ​គាំទ្រ​ស្នាដៃ​និពន្ធ​របស់​លោក​កន្លងមក ហើយ​លោក​បាន​បង្កើបពីការចេញស្នាដៃនិពន្ធថ្មីទៀតថា “សម្រាប់ពេលឆាប់ៗខាងមុខនេះ ខ្ញុំមានគម្រោងចេញផ្សាយនូវប្រលោមលោកខ្សែរឿងរន្ធត់ “អារក្សខ្មៅ” ជាបន្តទៀត ដែលប្រិយមិត្តអ្នកគាំទ្រសែស្រឡាយនេះកំពុងទន្ទឹងរង់ចាំ គឺប្រលោមលោករឿង “អារក្សខ្មៅ វគ្គបំណុលឈាម” ។

អ្នក​និពន្ធ ធឿន វុទ្ធី និងសៀវភៅ​ល្បីៗមួយចំនួន​របស់​លោក​កន្លងមក​

“គេហទំព័រអ្នកនិពន្ធកម្ពុជា” សូមបញ្ជាក់ថា លោក ធឿន វុទ្ធី   កើតឆ្នាំ១៩៩៦ នៅភូមិចារលើ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ។​ មានឪពុកឈ្មោះ ថន ប៊ុនធឿន និងម្ដាយឈ្មោះ អឿល រដ្ឋា (ជាកសិករ) និងមានបងប្អូនបង្កើត​ចំនួន៣នាក់ ស្រី២នាក់ ដោយរូបលោកជាកូនប្រុសច្បងក្នុងគ្រួសារ។ បច្ចុប្បន្ន ក្រៅ​ពីមានអាជីព​ជាអ្នកនិពន្ធឆ្នើម​វ័យ​ក្មេង​មួយរូបនៅ​កម្ពុជា លោកគឺ​​ជាគ្រូបង្រៀននៅ អនុវិទ្យាល័យពោធិ៍ទ្រាយ ភូមិទ្រាយ ឃុំពោធិ៍ទ្រាយ ស្រុកពួក ខេត្តសៀមរាប, បង្រៀនមុខវិជ្ជា ជីវវិទ្យា ផែនដីវិទ្យា។ លោក​ជាអ្នក​និពន្ធ ដែល​និយមចូល​ចិត្ត​​និពន្ធ​ប្រលោមលោក​បែប​ភ័យ​រន្ធត់ខ្លាំងបំផុត ទន្ទឹម​នឹង​នេះ​ក៏អាច​និពន្ធ​ប្រលោមលោក​មនោសញ្ចេតនា​បាន​យ៉ាង​ល្អ​ផងដែរ ជាពិសេស​រឿង​ស្នេហា​ភេទ​ដូចគ្នា​នេះ​តែម្ដង។ ដូច្នេះ ប្រសិន​បើ​​លោក​អ្នក​ចង់ជាវស្នាដៃរបស់លោក​យកទៅអាន លោក​អ្នក​អាចរកទិញ​បាន​តាម​ការ​ណែនាំ​ខាង​លើ នោះ​លោក​អ្នក​មុខជា​ដឹង​ច្បាស់​ពីកម្រិតនៃ​​ទេពកោសល្យ​ក្នុង​ការ​និពន្ធ​របស់​លោក​​ជាក់​ជាមិន​ខាន។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ ធឿន វុទ្ធី / រក្សាសិទ្ធិ ៖ cambowriter.com