ចាប មួយជួង ការអានពិតជាមានអត្ថប្រយោជន៍ខ្លាំងណាស់សម្រាប់ជីវិតខ្ញុំ
- August 31st, 2019
កញ្ញា ចាប មួយជួង, កើតឆ្នាំ២០០៣ នៅស្រុកស្ទឹងត្រង់ ខេត្តកំពង់ចាម, កញ្ញាមានឪពុកឈ្មោះ ចាប និត និងម្តាយឈ្មោះ ទ្រី គឹមអ៊ាង, កញ្ញាមានបងប្អូនចំនួន៣នាក់ ប្រុស២នាក់ ដោយកញ្ញាជាកូនស្រីច្បងក្នុងគ្រួសារ។ សព្វថ្ងៃកញ្ញាជាសិស្សថ្នាក់ទី១១ នៅសាលាអន្តរទ្វីបអាមេរិចកាំង ក្រុងភ្នំពេញ។ ក្រៅពីម៉ោងសិក្សា កញ្ញាតែងឆ្លៀតយកដំណាំហូបផ្លែពីចម្ការនៅស្រុកម្តាយរបស់កញ្ញាមកលក់ ព្រមទាំងឆ្លៀតចូលរួមក្នុងសកម្មភាពការងារសង្គមខ្លះៗ ដូចជា ចូលរួមក្នុងកម្មវិធីសប្បុរសធម៏ និងថតរឿងអប់រំខ្លីៗជាដើម ជាពិសេសចំណាយពេលច្រើនបំផុតលើសកម្មភាពការងារគ្រប់គ្រងក្លឹបមួយឈ្មោះថា “គ្រាប់ពូជក្លឹបអាន” ដែលជាក្លឹបអានមួយដែលកញ្ញាទើបតែបានបង្កើតឡើងថ្មីៗនេះ។
កញ្ញា ចាប មួយជួង ដែលជាយុវតីមួយរូបដែលស្រឡាញ់ការអានខ្លាំងណាស់ ហេតុនេះហើយទើបបានជាកញ្ញាខិតខំបង្កើតក្លឹបអាននេះឡើង ដើម្បីពង្រឹងការអានរបស់ខ្លួនផង និងជំរុញការអានក្នុងប្រទេសកម្ពុជាឱ្យកាន់តែរីកចម្រើនផង ដោយកញ្ញាបានបង្ហាញប្រាប់ “គេហទំព័រអ្នកនិពន្ធកម្ពុជា” ថា “មូលហេតុដែលធ្វើអោយនាងខ្ញុំស្រឡាញ់ការអានខ្លាំងបែបនេះ ព្រោះតែការអានមានអត្ថប្រយោជន៍ខ្លាំងណាស់សម្រាប់ជីវិតខ្ញុំ វាបានធ្វើអោយនាងខ្ញុំកែប្រែនិងអភិវឌ្ឍខ្លួនជាច្រើន និងមានគំនិតវិជ្ចមានហ៊ានតតាំងជាមួយបញ្ហាការលំបាកនានា, មានគំនិតចាស់ទុំជាងមុន ជាពិសេសបំផុតនោះ ធ្វើឱ្យនាងខ្ញុំហ៊ានសម្រេចចិត្តទៅលើកិច្ចការផ្សេងបានដោយខ្លួនឯងយ៉ាងមានជំនឿជាក់បំផុត!” បន្ថែមពីលើនេះកញ្ញាក៏បានបន្តទៀតថា “ហើយការអាននៅមានអត្ថប្រយោជន៍ជាច្រើនទៀតនឹកស្មានមិនដល់ មិនថាតែសម្រាប់រូបនាងខ្ញុំឬក៍នរណាម្នាក់ផ្សេងទៀតនោះទេ ឱ្យតែយើងអានសៀវភៅល្អៗបានច្រើន និងចេះអានបានត្រឹមត្រូវ នោះវានឹងជួយយើងជាច្រើនដូចជា ជួយយើងឱ្យមានគំនិតច្នៃប្រឌិត, ជួយកាត់បន្ថយស្រ្តេស, ជួយជំរុញកម្លាំងចិត្ត, ជួយបង្កើនបញ្ញា ភាពវៃឆ្លាត, ជួយធ្វើឱ្យយើងស្គាល់អ្វីថ្មីៗ, ជួយហ្វឹកហាត់ការគិត បង្កើនការចងចាំរបស់យើង ជាពិសេសជួយឱ្យយើងមានចំណេះដឹងទូលំទូលាយច្រើនជាងបុគ្គលទាំងឡាយដែលមិនអានសៀវភៅ និងធ្វើឱ្យយើងឆាប់ជោគជ័យដល់គោលដៅដែលយើងបានដៅក្នុងជីវិតបានលឿនឆាប់រហ័សផងដែរ។”
ទាំងអស់ខាងលើនេះជាសម្ដីរបស់កញ្ញា ចាប មួយជួង ដែលបានលើកឡើងពីមូលហេតុដែលធ្វើឱ្យកញ្ញាចូលចិត្តអានសៀវភៅ និងអត្ថប្រយោជន៍ដែលបានពីការអានសៀវភៅ។ បន្ថែមលើសពីនេះទៀត ក្នុងនាមជាបុគ្គលស្រឡាញ់ការអានសៀវភៅមួយរូប កញ្ញាក៏បានបង្ហាញពីអារម្មណ៍ពិតឡើងទាំងរំភើបថា “សម្រាប់រូបនាងខ្ញុំផ្ទាល់ នាងខ្ញុំពិតជាមានអារម្មណ៍រំភើបសប្បាយរីករាយណាស់ ដែលឃើញវិស័យអំណាននៅកម្ពុជារបស់យើងបច្ចុប្បន្ន មានអ្នកអានកើនឡើងច្រើន ព្រោះនាងខ្ញុំសង្កេតឃើញថា ឱ្យតែពេលមានពិធីតាំងពិព័រណ៍សៀវភៅនៅកម្ពុជាម្ដងៗ មានអ្នកចូលរួមច្រើនមែនទែន ជាពិសេសប៉ុន្មានឆ្នាំចុងក្រោយនេះឃើញកើតមានអ្នកនិពន្ធក្មេងៗដែលមានសមត្ថភាពក្នុងការតាក់តែងនិពន្ធស្នាដៃថ្មីៗល្អប្រកបដោយគុណតម្លៃជាច្រើនរូប ឯហាងលក់សៀវភៅវិញក៍កើតមានថ្មីៗច្រើនដែរ ដូចជាហាងលក់សៀវភៅតាម Online ជាដើម ហើយអ្វីដែលគួរឱ្យចាប់អារម្មណ៍បំផុតនោះ គឺឃើញកើតមានហាងកាហ្វេថ្មីៗដែលមានដាក់ជាសៀវភៅលក់និងឱ្យភ្ញៀវអាន ដែលការកើនឡើងនូវកម្មវិធីទាក់ទងការអាន, ហាងសៀវភៅ, បណ្ណាគារ និងអ្នកនិពន្ធកម្ពុជាថ្មីៗវ័យក្មេងនេះ បើនៅតែបន្តមានសន្ទុះកើនឡើងខ្លាំងបែបនេះ នាងខ្ញុំជឿជាក់ ការអាននៅកម្ពុជាយើងនឹងកាន់តែរីកចម្រើន ដែលជាហេតុធ្វើឱ្យប្រទេសកម្ពុជាយើងនឹងសម្បូរធនធានមនុស្សពូកែៗច្រើនដូចបណ្ដាប្រទេសអភិវឌ្ឍន៍ដទៃៗយ៉ាងប្រាកដ។”
ជាចុងបញ្ចប់កញ្ញា ចាប មួយជួង យុវតីវ័យក្មេងស្រស់ស្អាតរូបនេះ ក៏បានសំណូមពរដល់មនុស្សគ្រប់រូប ជាពិសេសមិត្តៗយុវវ័យដែលជាទំពាំងស្នងឫស្សីរបស់សង្គមជាតិកម្ពុជាទាំងអស់ សូមបណ្ដុះវិស្ស័យអានសៀវភៅឱ្យបានគ្រប់ៗគ្នា ព្រោះមានតែការអានសៀវភោប៉ុណ្ណោះដែលធ្វើឱ្យមនុស្សម្នាក់ៗមានចំណេះដឹងទូលទូលាយគ្រប់គ្រាន់ សម្រាប់យកទៅសាងភាពជោគជ័យដល់ជីវិតរបស់ខ្លួន ដោយសូមកុំស្តាយក្នុងការចំណាយលុយទៅលើការទិញសៀវភៅល្អៗយកមកអានឱ្យសោះ ព្រោះគ្មានអ្វីដែលប្រសើរជាងការវិនិយោគលើការអានឡើយ។
“គេហទំព័រអ្នកនិពន្ធកម្ពុជា” សូមបញ្ជាក់ថា កញ្ញា ចាប មួយជួង ជាស្ថាបនិក “គ្រាប់ពូជក្លឹបអាន” ដែលជាក្លឹបអានមួយបង្កើតឡើង ដើម្បីជំរុញការអានសៀវភៅនៅកម្ពុជាឱ្យកាន់តែរីកចម្រើន ដោយកញ្ញាកំពុងតែមមាញឹកក្នុងការគ្រប់គ្រងរៀបចំក្លឹបនេះយ៉ាងខ្លាំង ដោយកញ្ញាបានសន្យាថា នឹងធ្វើឱ្យក្លឹបនេះមានដំណើរការរលូនល្អ និងរីកចម្រើនតាមផែនការដែលកញ្ញានិងក្រុមការងារបានកំណត់ឱ្យបាន ហើយនៅពេលខាងមុននេះ កញ្ញានឹងផ្ដល់បទសម្ភាសន៍លម្អិតពីក្លឹបអានមួយនេះឱ្យសាធារណៈជនបានដឹងច្បាស់តែម្ដង។ សូមអរគុណ៕
និពន្ធអត្ថបទ ៖ ឫទ្ធិពង្ស / រូបភាព ៖ ចាប មួយជួង / រក្សាសិទ្ធិ ៖ cambowriter.com
