គេហទំព័រអ្នកនិពន្ធកម្ពុជា ៖ គេហទំព័រដើម្បីអ្នកនិពន្ធ និងវិស័យតែងនិពន្ធនៅកម្ពុជា
- August 9th, 2023
“គេហទំព័រអ្នកនិពន្ធកម្ពុជា” www.cambowriter.com ជាគេហទំព័រមួយដែលបង្កើតឡើងក្នុងន័យដើម្បីចូលរួមចំណែកលើកកម្ពស់អ្នកនិពន្ធ និងវិស័យតែងនិពន្ធនៅកម្ពុជាឱ្យកាន់តែរីកចម្រើន តាមរយៈការជួយផ្សព្វផ្សាយពីអ្នកនិពន្ធ, ស្នាដៃតែងនិពន្ធ, កម្មវិធីក្នុងវិស័យតែងនិពន្ធ និងការបង្កើតសកម្មភាពការងារថ្មីៗក្នុងវិស័យតែងនិពន្ធ ដែលអាចជួយជំរុញឱ្យអ្នកនិពន្ធនិងវិស័យតែងនិពន្ធនៅកម្ពុជាកាន់តែមានលក្ខណៈល្អប្រសើរជាដើម គឺផ្ដោតសំខាន់តែលើសកម្មភាពការងាររបស់អ្នកនិពន្ធ និងការងារក្នុងវិស័យតែងនិពន្ធនៅកម្ពុជាប៉ុណ្ណោះ។
គោលបំណងសំខាន់ៗរបស់ “គេហទំព័រអ្នកនិពន្ធកម្ពុជា”
១ ដើម្បីឱ្យអ្នកនិពន្ធកម្ពុជាមានគេហទំព័រផ្លូវការមួយក្នុងវិស័យការងារតែងនិពន្ធរបស់ខ្លួន
២ ដើម្បីជួយផ្សព្វផ្សាយព័ត៌មានសំខាន់ៗជុំវិញសកម្មភាពរបស់អ្នកនិពន្ធកម្ពុជាទាំងឡាយ
៣ ដើម្បីជួយពាំនាំស្នាដៃតែងនិពន្ធថ្មីៗគ្រប់ផ្នែករបស់អ្នកនិពន្ធកម្ពុជាទៅកាន់ប្រិយមិត្តអ្នកគាំទ្រ
៤ ដើម្បីជួយលើកកម្ពស់គុណតម្លៃកិត្តិយស កេរ្តិ៍ឈ្មោះ និងជីវភាពរស់នៅរបស់អ្នកនិពន្ធកម្ពុជា
៥ ដើម្បីជួយជំរុញការអានសៀវភៅនៅកម្ពុជាឱ្យកាន់តែរីកដុះដាលដូចបណ្ដាជាតិអភិវឌ្ឍដទៃ
៦ ដើម្បីជួយផ្សព្វផ្សាយព័ត៌មានជុំវិញព្រឹត្តការណ៍សំខាន់ៗនានាក្នុងវិស័យតែងនិពន្ធនៅកម្ពុជា និងអន្តរជាតិ
៧ ដើម្បីជួយពង្រឹងនិងពង្រីកវិស័យតែងនិពន្ធនៅកម្ពុជាឱ្យកាន់តែរីកលូតលាស់រឹងមាំបន្ថែមទៀត
៨ ដើម្បីចូលរួមចំណែកជួយអភិវឌ្ឍសង្គមជាតិកម្ពុជាឱ្យកាន់តែរីកចម្រើនជឿនលឿន តាមរយៈវិស័យតែងនិពន្ធ៕
ចក្ខុវិស័យរបស់ “គេហទំព័រអ្នកនិពន្ធកម្ពុជា”
លើកទឹកចិត្តអ្នកនិពន្ធ, ផ្សព្វផ្សាយស្នាដៃអុ្នកនិពន្ធ, ការពារស្នាដៃអ្នកនិពន្ធ, លើកកម្ពស់គុណតម្លៃអ្នកនិពន្ធ, បង្កើនកម្រិតជីវភាពរស់នៅរបស់អ្នកនិពន្ធ, បណ្ដុះអ្នកនិពន្ធកម្ពុជាថ្មីៗឆ្នើមៗ ដែលមានសមត្ថភាពចំណេះដឹងក្នុងការតាក់តែងនិពន្ធស្នាដៃល្អៗ ប្រកបដោយគុណតម្លៃពិតប្រាកដចំពោះពលរដ្ឋនិងសង្គម, ចូលរួមលើកស្ទួយវិស័យតែងនិពន្ធនៅកម្ពុជាឱ្យកាន់តែរីកចម្រើនជឿនលឿនដូចបណ្ដាជាតិសាសន៍អភិវឌ្ឍដទៃ គឺជាអ្វីដែលយើងចាំបាច់ត្រូវតែសម្រេចឱ្យបានខ្ពស់បំផុត យ៉ាងយូរត្រឹមឆ្នាំ២០៣០។
“គេហទំព័រអ្នកនិពន្ធកម្ពុជា” សូមបញ្ជាក់ថា នេះគឺជាដំណើការនៃការផ្សព្វផ្សាយឡើងវិញ បន្ទាប់ពីគេហទំព័រយើងខ្ញុំបានផ្អាកការផ្សព្វផ្សាយអស់ពេលយ៉ាងយូរ ដោយសារតែគេហទំព័រមានបញ្ហាផ្នែកបច្ចេកទេសតម្រូវឱ្យមានការជួសជុលកែលម្អឡើងវិញ។ ដូច្នេះ ចាប់ពីថ្ងៃនេះតទៅ គេហទំព័រយើងខ្ញុំ នឹងធ្វើការផ្សព្វផ្សាយពីអ្នកនិពន្ធ, ស្នាដៃតែងនិពន្ធ, កម្មវិធីសំខាន់ៗក្នុងវិស័យតែងនិពន្ធ និងវិស័យដែលពាក់ព័ន្ធនឹងវិស័យតែងនិពន្ធនៅកម្ពុជា ឱ្យកាន់តែសកម្មឡើងវិញ ដើម្បីជាប្រយោជន៍ចំពោះអ្នកនិពន្ធកម្ពុជាគ្រប់រូប ជាពិសេសដើម្បីចូលរួមចំណែកលើកកម្ពស់វិស័យតែងនិពន្ធនៅកម្ពុជាឱ្យកាន់តែមានភាពរីកចម្រើនបន្ថែមទៀត។ ហើយទៅថ្ងៃអនាគតដ៏ខ្លី យើងខ្ញុំនឹងធ្វើឱ្យគេហទំព័រដ៏មានសារៈសំខាន់មួយនេះ កាន់តែមានលក្ខណៈសម្បូរបែបបន្ថែមទៀត ដោយបន្ថែមនូវមាតិកាថ្មីៗប្លែកៗ ដើម្បីបម្រើដល់អារម្មណ៍ប្រិយមិត្តអ្នកនិពន្ធការអានទាំងឡាយ ជាពិសេសស្នាដៃថ្មីៗគ្រប់ផ្នែករបស់អ្នកនិពន្ធកម្ពុជា។ សូមអរគុណ៕
អត្ថបទ ៖ ឫទ្ធិពង្ស / រូបភាព ៖ គេហទំព័រអ្នកនិពន្ធកម្ពុជា / រក្សាសិទ្ធិ ៖ cambowriter.com
