“ពិភពសុបិន” ក្រុមមួយដែលបង្កើតឡើង ដើម្បីជួយបោះពុម្ពស្នាដៃអ្នកនិពន្ធដែលគ្មានលទ្ធភាព
- March 2nd, 2020
“ពិភពសុបិន” ក្រុមមួយដែលបង្កើតឡើង ដើម្បីជួយបោះពុម្ពស្នាដៃអ្នកនិពន្ធដែលគ្មានលទ្ធភាព
មួយរយៈចុងក្រោយនេះ ឃើញថាមានក្រុមការងារក្នុងវិស័យតែងនិពន្ធជាច្រើនត្រូវបានបង្កើតឡើង ក្នុងនោះ “ពិភពសុបិន” គឺជាក្រុមមួយបង្កើតឡើង ដើម្បីជួយបោះពុម្ពស្នាដៃរបស់អ្នកនិពន្ធមួយចំនួនដែលគ្មានលទ្ធភាពក្នុងការបោះពុម្ព ជាសកម្មភាពការងារមួយល្អយ៉ាងខ្លាំង ព្រោះមិនត្រឹមតែបានជួយអ្នកនិពន្ធប៉ុណ្ណោះទេ ថែមទាំងជាការចូលរួមចំណែកមួយក្នុងការអភិវឌ្ឍវិស័យតែងនិពន្ធនៅកម្ពុជាឱ្យកាន់តែរីកចម្រើនទៀតផង។
ទាក់ទងនឹង «ពិភពសុបិន» ដែលជាក្រុមមួយធ្វើការងារក្នុងវិស័យតែងនិពន្ធដ៏ល្អនេះ ក៏ត្រូវបានកញ្ញា ណាត គង់ ដែលគ្រប់គ្នាស្គាល់តាមរយៈនាមប៉ាកកា “ពេជ្រ ជិន្នា” ជាអ្នកបង្កើតក្រុមនេះ បង្ហាញប្រាប់ “គេហទំព័រអ្នកនិពន្ធកម្ពុជា” ក្នុងបទសម្ភាសន៍ថា “មូលហេតុចម្បងជំរុញឱ្យនាងខ្ញុំមានការបង្កើត «ពិភពសុបិន» នេះឡើង គឺដើម្បីជាជំនួយជួយដល់អ្នកនិពន្ធដែលមានសមត្ថភាពនិពន្ធ តែខ្វះលទ្ធភាពក្នុងការរៀបចំបោះពុម្ពចេញផ្សាយជាសៀវភៅ ក្នុងគោលបំណងឱ្យពួកគេទទួលបាននូវផលតបស្នងស័ក្តិសមនឹងទេពកោសល្យនិងការខិតខំប្រឹងប្រែង ក៏ដូចជាដើម្បីជៀសវាងត្រូវរងគ្រោះ ដោយសារការបាក់ទឹកចិត្ត និងកត្តាអវិជ្ជមានផ្សេងៗទៀត។” ម្យ៉ាងទៀត កញ្ញាក៏បានបញ្ជាក់ពីហេតុផលទៀតថា “ហើយមូលហេតុដែលចាំបាច់ត្រូវជួយដល់អ្នកនិពន្ធដែលគ្មានលទ្ធភាព ព្រោះដោយសារតែនាងខ្ញុំស្រឡាញ់ការសរសេរ និងការអាន ជាពិសេសចង់ឃើញវិស័យអំណាននៅក្នុងប្រទេសយើងរីកចម្រើនដូចប្រទេសជឿនលឿននានាលើសកលលោក និងចង់បញ្ជាក់ថា ក្មេងក៏មានសមត្ថភាពអាចនិពន្ធសៀវភៅដែលទទួលបានការទទួលស្គាល់ពីមហាជនទូទៅផងដែរ។”
កញ្ញា ណាត គង់ ហៅ “ពេជ្រ ជិន្នា” អ្នកបង្កើតក្រុម “ពិភពសុបិន”
ចំណែកខាងក្រោយនេះ គឺជា គោលបំណង, អត្ថប្រយោជន៍, បេសកកម្ម, ចក្ខុវិស័យ និងអ្វីៗទាំងឡាយដែលពាក់ព័ន្ធនឹងក្រុម “ពិភពសុបិន” ដែលលោកអ្នកគួតែដឹងអំពីក្រុមមួយនេះថា តើមានលក្ខណៈល្អ និងអត្ថប្រយោជន៍ខ្ពស់កម្រិតណាចំពោះអ្នកនិពន្ធ និងវិស័យតែងនិពន្ធកម្ពុជា។
អំពីប្រវត្តិ និងស្នាដៃ
ក្រុម “ពិភពសុបិន” បង្កើតឡើងនៅថ្ងៃទី០១ ខែតុលា ឆ្នាំ២០១៩ ដោយកញ្ញា «ណាត គង់» រហូតមកទល់ពេលនេះមានអ្នកនិពន្ធដែលជាសមាជិកចំនួន ០៥ នាក់ហើយដូចជា ៖
ក្រុមអ្នកនិពន្ធទាំង៦រូបរបស់ “ពិភពសុបិន”
ជាងនេះទៀតសោតក្រុម “ពិភពសុបិន” ក៏បានសម្រេចនូវសមិទ្ធផលមួយចំនួន និងទទួលបានផ្លែផ្កាផងដែរ ដូចជាការចេញផ្សាយសៀវភៅគិតមកទល់ពេលនេះបាន ១៣ ចំណងជើងហើយ រួមមាន ៖
1-រឿងយុទ្ធសាស្ត្រស្នេហ៍ និពន្ធដោយ ពេជ្រ ជិន្នា
2-ព្រះអាទិត្យកណ្ដាលរាត្រី និពន្ធដោយ ពេជ្រ ជិន្នា
3-និស្ស័យស្នេហ៍កម្ម និពន្ធដោយ ពេជ្រ ជិន្នា
4-ភ្លើងស្នេហ៍ និពន្ធដោយ ឡូនលី
5-ភ្លើងគំនុំ និពន្ធដោយ ឡូនលី
6-កូនក្រមុំម៉ាហ្វៀ និពន្ធដោយ ភីក ដាវ៉ាន់
7-ភារកិច្ចចងស្នេហ៍ និពន្ធដោយ ជុំ មនោ
8-លោហិតប្ដូរស្នេហ៍ និពន្ធដោយ លាក់មុខ
9-ទេវបុត្រសង្គ្រោះបេះដូង និពន្ធរួមគ្នាដោយ លីលី, ពេជ្រ ជិន្នា និង ពេជ្រ មន្នី
10-ទឹកឃ្មុំបួនរដូវ និពន្ធដោយ ភីក ដាវ៉ាន់
11-ចិត្តស្អប់បង្កប់ស្នេហ៍ និពន្ធដោយ លីលី
12-ឧទ្ទានបេះដូងម៉ាហ្វៀ និពន្ធដោយ លាក់មុខ
13-នរកក្នុងបេះដូង និពន្ធដោយ ឡូនលី
សៀវភៅរបស់ “ពិភពសុបិន” មួយចំនួន, តម្លៃ និងទីតាំងដាក់លក់
គោលបំណង
ក្រុម “ពិភពសុបិន” បង្កើតឡើងក្នុងគោលបំណងសំខាន់ៗដូចជា ៖
អត្ថប្រយោជន៍
ក្រុម “ពិភពសុបិន” បង្កើតឡើងដោយនឹងផ្ដល់នូវអត្ថប្រយោជន៍ដល់អ្នកនិពន្ធដូចជា ៖
បេសកកម្ម
បេសសកម្មចម្បងបំផុតរបស់ក្រុម “ពិភពសុបិន” គឺការជំរុញទឹកចិត្តអ្នកនិពន្ធ តាមរយៈតម្លាភាព សុក្រឹតភាព និងចំណេះដឹងអំពីកម្មសិទ្ធបញ្ញា លើស្នាដៃរបស់ខ្លួន។
ចក្ខុវិស័យ
ចក្ខុវិស័យរបស់ក្រុម “ពិភពសុបិន” នៅថ្ងៃអនាគត គឺការវិវត្តន៍ខ្លួនទៅជាគ្រឹះស្ថានបោះពុម្ពមួយ ដែលមានការទទួលស្គាល់ទូលំទូលាយពីសាធារណជន និងរាជរដ្ឋាភិបាលកម្ពុជា។
សៀវភៅ “ពិភពសុបិន” ដែលត្រៀមដាក់លក់នៅ “ទិវាអំណានជាតិ លើកទី៥”
ខាងលើគឺជាអ្វីគ្រប់យ៉ាងដែលពាក់ព័ន្ធនឹងក្រុម “ពិភពសុបិន” ដែលគេហទំព័រយើងទទួលបានពី កញ្ញា ណាត គង់ ហៅ “ពេជ្រ ជិន្នា ដែលជាអ្នកបង្កើតក្រុមនេះឡើង។ លើកពីនេះ កញ្ញាក៏បានបញ្ជាក់ថា “ប្រសិនបើអ្នកនិពន្ធដទៃទៀតចង់ចូលរួមជាមួយក្រុមពិភពសុបិន អាចឆាតមកក្នុង Page «ពិភពសុបិន» ផ្ទាល់ https://www.facebook.com/piphubsobennovel/?epa=SEARCH_BOX ដោយគ្រាន់តែផ្ញើសាច់រឿង ចំនួន50ទំព័រ មកកាន់ប្រអប់សាររបស់ Page ប៉ុណ្ណោះ។ ហើយជាចុងក្រោយបំផុត ពិភពសុបិន ពិតជារីករាយជាខ្លាំង និងសូមអរគុណចំពោះការគាំទ្រកន្លងមក ហើយក្រុមយើងខ្ញុំសង្ឃឹមថា នឹងអាចចូលខ្លួនទៅជាសភាវដែលបំពេញសេចក្ដីសុខផ្លូវអារម្មណ៍របស់ប្រិយមិត្តអ្នកអាន ជួបនឹងសុបិនមួយដែលរីករាយគ្មានទីបញ្ចប់។”
កញ្ញា ណាត គង់ ហៅ “ពេជ្រ ជិន្នា” អ្នកបង្កើតក្រុម “ពិភពសុបិន” និងស្នាដៃមួយរបស់កញ្ញា
“គេហទំព័រអ្នកនិពន្ធកម្ពុជា” សូមបញ្ជាក់ថា កញ្ញា ណាត គង់ មាននាមប៉ាកកា ពេជ្រ ជិន្នា កញ្ញាគឺជាអ្នកនិពន្ធស្ត្រីវ័យក្មេងប្រកបដោយសមត្ថភាពទេពកោសល្យពីធម្មជាតិមួយរូប ដែលមានដើមកំណើតមកពីខេត្តកំពង់ចាម។ បច្ចុប្បន្ន ក្រៅពីមានអាជីពជាអ្នកនិពន្ធប្រលោមលោកបែបបរទេសមួយរូប កញ្ញាគឺជាមន្រ្តីរាជការស៊ីវិល បម្រើការនៅ “មន្ទីរវប្បធម៌និងវិចិត្រសិល្បៈ” ខេត្តក្រចេះ ជាពិសេសជាអ្នកគ្រប់គ្រងក្រុម “ពិភពសុបិន” ដែលកញ្ញាជាអ្នកបង្កើតដើម្បីជួយអ្នកនិពន្ធនេះតែម្ដង។ សូមអរគុណ៕
អត្ថបទ ៖ ពុទ្ធិពង្ស / រូបភាព ៖ ណាត គង់ / រក្សាសិទ្ធិ ៖ cambowriter.com