អ្នកនិពន្ធឆ្នើមបីរូប សហការគ្នានិពន្ធសៀវភៅដ៏ល្អមួយក្បាលឡើង
- December 1st, 2019
ពិតជារឿងមួយល្អយ៉ាងខ្លាំង ដែលអ្នកនិពន្ធកម្ពុជាឆ្នើមៗចំនួន៣រូបបានសហការគ្នានិពន្ធសៀវភៅដ៏ល្អមួយក្បាលឡើង ហើយវារឹតតែជាដំណឹងល្អនិងពិសេសណាស់ទៅទៀត សម្រាប់ប្រិយមិត្តទាំងឡាយដែលនិយមចូលចិត្តអានស្នាដៃនិពន្ធរបស់ពួកគាត់ ព្រោះសៀវភៅ “ដំណើរ” ដែលជាស្នាដៃសហនិពន្ធរបស់ពួកគាត់នេះ នឹងផ្សព្វផ្សាយសម្ពោធដាក់លក់ជាផ្លូវការក្នុងពេលឆាប់ៗប៉ុន្មានថ្ងៃខាងមុខនេះហើយ។ ដូច្នេះ ដើម្បីបានជ្រាបច្បាស់ពីសៀវភៅសហនិពន្ធដ៏ល្អមួយក្បាលនេះ យើងខ្ញុំសូមលើកយកនូវបទសម្ភាសន៍រវាង “គេហទំព័រអ្នកនិពន្ធកម្ពុជា” និង លោក ឡាំ លីម ដែលជាអ្នកនិពន្ធមួយរូបក្នុងសៀវភៅនេះ បង្ហាញឱ្យលោកអ្នកបានដឹងលម្អិតដូចតទៅ ៖
ក្នុងនាម លោក ឡាំ លីម ជាអ្នកនិពន្ធមួយរូបក្នុងសៀវភៅ “ដំណើរ” ដែលជាសៀវភៅសហនិពន្ធនេះ តើលោកអាចជម្រាបបានទេថា សៀវភៅនេះក្រៅពីលោក តើនៅមានអ្នកនិពន្ធរូបណាខ្លះទៀត? ហើយហេតុអ្វីបានជាពួកលោកសម្រេចចិត្តនិពន្ធសៀវភៅនេះរួមគ្នាឡើង? និងជាសៀវភៅផ្នែកអ្វី? និយាយផ្ដោតសំខាន់លើអ្វី?
“សៀវភៅដែលមានចំណងជើងថា “ដំណើរ” នេះជាស្នាដៃនិពន្ធរួមគ្នារវាងខ្ញុំបាទ ឡាំ លីម និងអ្នកនិពន្ធ ថុន ថាវរី ជាម្ចាស់ស្នាដៃសៀវភៅ “នារីប្រពៃ, កាពីទែនជីវិត ភាគ១, កាពីទែនជីវិត ភាគ២ ព្រមទាំងអ្នកនិពន្ធ សែត ហត្ថា (កូនចាបមាស) ជាម្ចាស់ស្នាដៃសៀវភៅ “វិញ្ញាសាជីវិត, កាដូជីវិត និង ខ្យល់ដង្ហើម”។ គោលបំណងធំចម្បងនៃការនិពន្ធសៀវភៅនេះឡើង គឺដើម្បីចែករំលែកបទពិសោធផ្ទាល់របស់អ្នកនិពន្ធអំពីការស្វែងរកខ្លួនឯង បទពិសោធអំពីការសម្រេចក្តីស្រមៃ និងបុព្វហេតុនៃការចេះផ្តល់ឱ្យនូវក្តីស្រឡាញ់។ លើសពីនេះ សៀវភៅនេះជារូបភាពដែលយើងជាអ្នកនិពន្ធទាំង៣រូបចង់បញ្ជ្រាបសារថា “អ្នកនិពន្ធយើងជំនាន់នេះ គឺត្រូវតែបង្កើតទស្សនវិស័យរួមគ្នាមួយ បង្កើតក្តីស្រមៃរួមគ្នាមួយ បំពេញបេសសកម្មតែមួយ និងរួមគ្នាជាធ្លុងមួយដើម្បីរួមចំណែកទទួលខុសត្រូវចំពោះសង្គមទៅតាមលទ្ធភាពរៀងៗខ្លួន ដោយឈរលើស្មារតីលះបង់ និងប្តេជ្ញាចិត្តខ្ពស់”។ ដូច្នេះហើយ ទើបយើងបង្កើតនូវស្លោកមួយដែលថា “ចុងប៊ិក៣ដើម គោលគំនិត១”។”
អ្នកនិពន្ធឆ្នើមៗទាំង៣រូប និងសៀវភៅសហនិពន្ធ “ដំណើរ”
តើសៀវភៅ “ដំណើរ” ដែលជាសៀវភៅសហនិពន្ធនេះមានកម្រាស់ប៉ុន្មានទំព័រ? ចែកជាប៉ុន្មានជំពូក? លោក ឡាំ លីម សរសេរពីអ្វី? មានប៉ុន្មានទំព័រ? ពីទំព័រណា ដល់ទំព័រណា? និងអ្នកនិពន្ធដទៃៗទៀត សរសេរពីអ្វី? មានប៉ុន្មានទំព័រ? ពីទំព័រណា ដល់ទំព័រណា? សូមរៀបរាប់បង្ហាញ!
“សៀវភៅ “ដំណើរ” នេះមានកម្រាស់សរុបចំនួន ៣៧៣ទំព័រ ដែលចែកជា ៣ជំពូកធំៗរួមមានដូចជា៖
ជំពូកទ១ និយាយអំពី “ការស្វែងរកខ្លួន” ដែលនិពន្ធដោយខ្ញុំបាទ ឡាំ លីម ។ តើហេតុអ្វីនិយាយអំពីការស្វែងរកខ្លួនឯង? គ្មានអ្វីដែលអាចផ្តល់ផ្លែផ្កាដល់ជីវិតបាន ជាជាងទង្វើប្រឹងប្រែងទេ។ មុននឹងមនុស្សអាចប្រឹងប្រែងបាន លុះត្រាណាតែមានបុព្វហេតុរស់នៅត្រឹមត្រូវ។ មុននឹងមានបុព្វហេតុជីវិត លុះត្រាណាតែមនុស្សរកខ្លួនឯងឱ្យឃើញសិន។ ក្រៅពីនិយាយអំពីការស្វែងរកខ្លួនឯង ខ្ញុំក៏បាននិយាយអំពីការប្រឹងប្រែងដោយខ្លួនឯង និងអំពីការបង្កើតសេចក្តីសុខឱ្យខ្លួនឯង ចិត្តវិញ្ញាណ ឬសេចក្តីសុខផ្លូវចិត្តផងដែរ។ ជីវិតជាជម្រើស យើងអាចជ្រើសរើសថាយើងចង់ដើរតាមផ្លូវជីវិតបែបណា ធ្វើជាមនុស្សបែបណា រស់នៅបែបណា យើងប្រាថ្នាអ្វីក៏បានដែរ វាសុទ្ធតែជាកម្មសិទ្ធិរបស់យើងទេ ប៉ុន្តែអ្វីដែលយើងត្រូវខ្វល់ខ្វាយគឺត្រូវតែធ្វើជាមនុស្សល្អ មនុស្សត្រឹមត្រូវ មិនធ្វើអាក្រក់ដើម្បីបំផ្លាញអ្នកដទៃ!
ជំពូកទី២ និយាយអំពី “គោលដៅ និងក្តីស្រមៃ” ដែលនិពន្ធដោយអ្នកនិពន្ធ ថុន ថាវរី ។ ប្រសិនបើយើងមានតែគោលដៅដោយសរសេរដាក់តែក្នុងក្រដាសនោះវាហាក់គ្មានន័យអ្វីទាំងអស់។ ប្រសិនបើយើងមានក្តីស្រមៃហើយគ្មានការប្តេជ្ញាចិត្ត និងហ៊ានពុះពារដើម្បីក្ដីស្រមៃនោះទេ វាក៏គ្មានថ្ងៃអាចចេញជារូបរាងបានដែរ។ គ្មានអ្វីដែលបានមកដោយគ្មានការដោះដូរនោះទេ។ មនុស្សម្នាក់ៗអាចមានក្ដីស្រមៃជាច្រើនដែលចង់សម្រេច ប៉ុន្តែមនុស្សជាច្រើនមិនអាចធ្វើឱ្យក្ដីស្រមៃរបស់ខ្លួនក្លាយជាការពិតនោះទេ ហើយដរាបណាក្ដីស្រមៃនៅតែមិនទាន់ក្លាយទៅជាគោលដៅទេ នោះពួកគេក៏មិនអាចមានផែនការដើម្បីសម្រេចជោគជ័យលើគោលដៅដែរ ហើយចុងក្រោយអ្នកទាំងនោះនៅតែមានអារម្មណ៍ថាជីវិតរបស់ខ្លួនរស់នៅគ្មានកោះគ្មានត្រើយ។
ជំពូកទី៣ និយាយអំពី “បុព្វហេតុនៃការផ្តល់ឱ្យ” ដែលនិពន្ធដោយអ្នកនិពន្ធ សែត ហត្ថា (កូនចាបមាស)។ ជំពូកនេះនិយាយអំពីយើងជាមួយគ្រួសារ ទំនាក់ទំនងជាមួយមនុស្សក្នុងសង្គម ការលះបង់ចំពោះសេចក្ដីស្រឡាញ់ ការកំណត់គោលដៅនិងការរៀបចំផែនការជីវិត ការជឿជាក់ចំពោះខ្លួនឯង ការអត់ធ្មត់ជាមួយបញ្ហា ព្រមទាំងការផ្ដល់ឱកាសឱ្យខ្លួនឯងទទួលយកការផ្លាស់ប្ដូរដើម្បីអភិវឌ្ឍខ្លួនជាដើម។ ក្ដីស្រឡាញ់វាធ្វើឱ្យមនុស្សចេះលះបង់ ហើយបើកាន់តែចេះលះបង់គឺយើងនឹងកាន់តែចេះស្រឡាញ់ ហេតុនេះទើបក្ដីស្រឡាញ់វាមានតម្លៃស្មើនឹងការលះបង់ជានិច្ច ប៉ុន្តែយើងភាគច្រើនចេះតែនិយាយពីពាក្យថាស្រឡាញ់ ច្រើនជាងការបង្ហាញពីទង្វើដែលបញ្ជាក់នូវសេចក្ដីស្រឡាញ់។”
សៀវភៅសហនិពន្ធ “ដំណើរ” របស់អ្នកនិពន្ធឆ្នើមទាំង៣រូប
តើសៀវភៅនេះគ្រោងបោះពុម្ពសម្ពោធដាក់លក់ជាផ្លូវការនៅថ្ងៃខែឆ្នាំណា? ហើយលក់ក្នុងតម្លៃប៉ុន្មាន?
“សៀវភៅនេះគ្រោងចេញផ្សាយជាផ្លូវការនៅមុនថ្ងៃទី៧ ខែធ្នូ ឆ្នាំ២០១៩ ព្រមទាំងដាក់សម្ភោធជាផ្លូវការនៅរសៀលថ្ងៃទី៧ ខែធ្នូ ឆ្នាំ២០១៩ វេលាម៉ោង១ ដល់ម៉ោង ៥នាទីល្ងាច នៅសាកលវិទ្យាល័យអន្តរជាតិផារ៉ាហ្គន (Paragon International University) រាជធានីភ្នំពេញ។ សៀវភៅនេះមានតម្លៃ ៣៦០០០រៀល ឬស្មើនឹង ៩ដុល្លារ។”
លោក ឡាំ លីម និងអ្នកនិពន្ធពីររូបទៀត គឺកញ្ញា ថុន ថាវរី និង សែត ហត្ថា “កូនចាបមាស”
ខាងលើគឺជាសម្ដីទាំងស្រុងរបស់ លោក ឡាំ លីម អ្នកនិពន្ធមួយរូបក្នុងសៀវភៅសហនិពន្ធដែលមានចំណងជើងថា “ដំណើរ” ដែលនឹងដាក់សម្ពោធជាផ្លូវការនៅថ្ងៃទី៧ ខែធ្នូរ ឆ្នាំ២០១៩ ប៉ុន្មានថ្ងៃឆាប់ៗខាងមុខនេះ ហើយលោកក៏ជាម្ចាស់ស្នាដៃសៀវភៅដ៏ល្បីទាំង៣ក្បាល “ប្រតិទិនទស្សនៈ ៣៦៥ថ្ងៃ”, “ប្រតិទិនទស្សនៈ ២២២ថ្ងៃ” និង “អំណានជាអំណាច” ផងដែរ ដោយគេហទំព័រយើងខ្ញុំជឿជាក់ថា បើលោកអ្នកជាអ្នកនិយមចូលចិត្តអានសៀវភៅនោះ នោះលោកអ្នកមុខជាស្គាល់លោកច្បាស់ហើយ។ ដូច្នេះសូមកុំភ្លេចណា៎! បើលោកអ្នកចង់ដឹងថា តើស្នាដៃសហនិពន្ធរបស់អ្នកនិពន្ធកម្ពុជាឆ្នើមៗទាំង៣រូបមានអត្ថន័យខ្លឹមសារល្អយ៉ាងណាខ្លះនោះ? លោកអ្នកអាចចូលរួមនិងទិញសៀវភៅនេះ នៅថ្ងៃសម្ពោធលក់ជាផ្លូវការដូចលោកបានរៀបរាប់ខាងលើនេះបាន នោះលោកអ្នកមុខជាមិនខកបំណងឡើយ។ សូមអរគុណ!!!
អត្ថបទ ៖ ឫទ្ធិពង្ស / ប្រភពរូបភាព ៖ ឡាំ លីម / រក្សាសិទ្ធិ ៖ cambowriter.com
