មុំ រដ្ឋា ម្ចាស់ស្នាដៃសៀវភៅ “ការពិតប្រៀបដូចបិសាច” អ្នកនិពន្ធឆ្នើមដែលមានដើមកំណើតចេញពីខេត្តបាត់ដំបង
- April 7th, 2020
មុំ រដ្ឋា ម្ចាស់ស្នាដៃសៀវភៅ “ការពិតប្រៀបដូចបិសាច” អ្នកនិពន្ធឆ្នើមដែលមានដើមកំណើតចេញពីខេត្តបាត់ដំបង
សព្វថ្ងៃនេះយើងឃើញយ៉ាងច្បាស់ថា មានសៀវភៅល្អៗជាច្រើនផ្នែក ដែលជាស្នាដៃរបស់អ្នកនិពន្ធថ្មីចាស់ប្រុសស្រីកំពុងត្រូវបានផលិតបោះពុម្ពផ្សាយលក់លើទីផ្សារព្រោងព្រាតឡើង ហើយភាគច្រើនទទួលបានការពេញនិយមពីសំណាក់ប្រិយមិត្តអ្នកអានយ៉ាងខ្លាំង មិនថាជាសៀវភៅប្រលោមលោក ចំណេះដឹង ទស្សនៈអប់រំ សង្គម នយោបាយ ឬសៀវភៅផ្នែកអ្វីមួយផ្សេងទៀតឡើយ ក្នុងនោះសៀវភៅ “ការពិតប្រៀបដូចបិសាច” ក៏ជាសៀវភៅមួយក្បាលដែលស្ថិតក្នុងការចាប់អារម្មណ៍ពីអ្នកនិយមអានច្រើនផងដែរ ដែលជាស្នាដៃនិពន្ធរបស់លោក មុំ រដ្ឋា អ្នកនិពន្ធឆ្នើមមួយរូបនៅកម្ពុជានាពេលបច្ចុប្បន្ន។
លោក មុំ រដ្ឋា និងសៀវភៅ “ការពិតប្រៀបដូចបិសាច” ស្នាដៃនិពន្ធរបស់លោក
លោក មុំ រដ្ឋា កើតនៅឆ្នាំ១៩៩៥ នៅភូមិស្វាយជាតិ ឃុំរាំងកេសី ស្រុកសង្កែ ខេត្តបាត់ដំបង, មានឪពុកឈ្មោះ សុខ មុំ និងម្ដាយឈ្មោះ ចែម ញ៉ាញ់។ លោកជាកូនប្រុសច្បងក្នុងគ្រួសារ ដែលមានបងប្អូនបង្កើតចំនួន៤នាក់ ប្រុស៣នាក់ ស្រី១នាក់។ បច្ចុប្បន្ន ក្រៅពីមានអាជីពជាអ្នកនិពន្ធកម្ពុជាមួយរូប លោកគឺជាគរុសិស្សកម្រិតមូលដ្ឋាន នៃ វិទ្យាស្ថានគរុកោសល្យបាត់ដំបង ឯកទេសប្រវត្តិវទ្យា-ភូមិវិទ្យា។ ទាក់ទងនឹងវិថីតែងនិពន្ធនេះ ក្នុងបទសម្ភាសន៍ជាមួយ “គេហទំព័រអ្នកនិពន្ធកម្ពុជា” លោកបានរៀបរាប់បង្ហាញថា “ខ្ញុំចាប់ផ្តើមសរសេរនៅចុងឆ្នាំ២០១៥ ដោយការចែករំលែកនៅលើបណ្ដាញសង្គម ហើយតាមរយៈការចែករំលែកនេះ ខ្ញុំមានឱកាសបានធ្វើស្វ័យកំណែប្រែផង និងបានរៀនសូត្របន្ថែមពីរៀមច្បងមុនៗផង។ មែនទែនទៅ ការតែងនិពន្ធ គឺជាកិច្ចការមួយដែលខ្ញុំពុំដែលនឹកស្រមៃដល់សោះឡើយ ក៏ប៉ុន្តែ ដោយហេតុថា ទឹកដីដែលខ្ញុំរស់នៅប្រៀបដូចជាជម្រុកមួយដ៏ធំ ដែលកវីនិពន្ធជំនាន់មុនបានបន្សល់ទុកនូវអនុស្សាវរីយ៍ជាច្រើនរាប់មិនអស់ និងមានសោភ័ណប្លែកៗពីគ្នាថែមទៀតផង, ខ្ញុំមានភ័ព្វសំណាងល្អណាស់ ដោយបានក្រេបជញ្ជក់នូវរសជាតិចំណេះដឹងពីកវីនិពន្ធជាច្រើនរូបនៅក្នុងទឹកដីមួយនេះ ហើយវាក៏បានក្លាយទៅជាផ្នែកមួយជួយជំរុញឱ្យទឹកចិត្តខ្ញុំឱ្យសរសេរ ដើម្បីជាការចែករំលែកទៅកាន់អ្នកដទៃផ្សេងទៀតផងដែរ។ មកទល់នឹងពេលនេះ សៀវភៅដែលខ្ញុំបានបោះពុម្ពផ្សាយ គឺមានតែមួយចំណងជើងប៉ុណ្ណោះ ដោយសៀវភៅនោះមានឈ្មោះថា “ការពិតប្រៀបដូចបិសាច” ហើយខ្ញុំសូមអរគុណយ៉ាងជ្រាលជ្រៅបំផុត ដល់គ្រឹះស្ថានបោះពុម្ពផ្សាយ “សៀវភៅជីវិត” ដែលជាអ្នកជួយគាំទ្រ និងជំរុញឱ្យស្នាដៃមួយនេះ បានចេញជារូបរាងឡើង។” នេះជាសម្ដីរបស់លោក មុំ រដ្ឋា ស្ដែងពីបុព្វហេតុដំបូងដែលបណ្ដាលឱ្យលោកឈានជើងចូលក្នុងវិថីតែងនិពន្ធរហូតទល់នឹងសព្វថ្ងៃ និងស្នាដៃដំបូងរបស់លោកដែលបានបោះពុម្ពផ្សាយផ្លូវការជាសៀវភៅឡើង។
សៀវភៅផ្នែកគំនិត “ការពិតប្រៀបដូចបិសាច” ស្នាដៃនិពន្ធរបស់លោក មុំ រដ្ឋា សៀវភៅដែលលោកអ្នកគួរអាន
លើសពីនេះ លោក មុំ រដ្ឋា ក៏បានបង្ហាញពីសៀវភៅ “ការពិតប្រៀបដូចបិសាច” ដែលជាស្នាដៃនិពន្ធសៀវភៅដំបូងរបស់លោកយ៉ាងដូច្នេះថា “សៀវភៅ ការពិតប្រៀបដូចបិសាច របស់ខ្ញុំនេះ បានបោះពុម្ពផ្សាយកាលពីខែកុម្ភៈ ឆ្នាំ២០២០ ថ្មីៗនេះឯង។ វាជាប្រភេទសៀវភៅផ្នែកគំនិត ដែលផ្តោតសំខាន់ទៅលើការស្គាល់ខ្លួនឯង ចេះស្រឡាញ់សង្គម និងអាចរួមរស់ជាមួយគ្នាដោយរីករាយ ក្នុងនាមជាសមាជិកម្នាក់ៗរបស់សង្គម។”
ថ្វីបើលោកបានបោះពុម្ពផ្សាយសៀវភៅ “ការពិតប្រៀបដូចបិសាច” ចេញជាសាធារណៈរួចរាល់អស់ទៅហើយក៏ដោយ តែលោកមិនទាន់មានគម្រោងបញ្ចេញស្នាដៃជាសៀវភៅផ្សេងទៀតនោះទេ តែលោកបានសន្យាថា នឹងនៅតែបន្តសរសេរតាមដែលលោកអាចធ្វើទៅបានបន្តទៀត និងខិតខំប្រឹងប្រែងសរសេរឱ្យបានកាន់តែល្អប្រសើរបំផុត ដើម្បីបម្រើដល់អារម្មណ៍ប្រិយមិត្តអ្នកអាន ទុកជាប្រយោជន៍ពលរដ្ឋនិងសង្គម ក៏ដូចជាក្នុងន័យដើម្បីចូលរួមចំណែកអភិវឌ្ឍវិស័យតែងនិពន្ធនៅកម្ពុជាឱ្យកាន់តែរីកចម្រើនបន្ថែមទៀត។
សៀវភៅ “ការពិតប្រៀបដូចបិសាច” និងអ្នកគាំទ្រ
លោក មុំ រដ្ឋា ក៏ជាអ្នកនិពន្ធមួយរូបដែលចូលចិត្តអានសៀវភៅខ្លាំងណាស់ដែរ ហើយថែមទាំងដឹងយ៉ាងច្បាស់ពីអត្ថប្រយោជន៍នៃការអានក្នុងនាមជាអ្នកនិពន្ធទៀតផង ដោយលោកបានបង្ហាញពីទំនាក់ទំនងរវាងការនិពន្ធនិងការអានយ៉ាងដូចនេះថា “ការអាន និងការតែងនិពន្ធ ពុំមែនជារឿងទីទៃពីគ្នានោះទេ។ បានន័យថា អ្នកនិពន្ធមិនអាចជួយឱ្យគុណភាពសំណេររបស់ខ្លួនប្រសើរឡើងបានទេ ប្រសិនបើគេមើលរំលងការអាន។ ខ្ញុំបានកំណត់ថា ការអាន និងការតែងនិពន្ធ គឺជាកិច្ចការតែមួយ ពីព្រោះវាជួយខ្ញុំច្រើនបំផុតទៅលើការសរសេរកន្លងមក ហើយសៀវភៅដែលខ្ញុំបានអានច្រើនជាងគេ គឺសៀវភៅផ្នែកគំនិត ទស្សនវិជ្ជា សង្គមវិជ្ជា សាសនា និងប្រវត្តិសាស្ត្រ។”
មុននឹងបញ្ចប់បទសម្ភាសន៍ លោកក៏មានពាក្យពេចន៍ចុងក្រោយថា “ខ្ញុំពិតជាត្រេកអរណាស់ នៅពេលបានឃើញប្រជាជនខ្មែរភាគច្រើនងាកមកចាប់អារម្មណ៍ទៅលើការអាន និងសូមអរគុណចំពោះការខិតខំប្រឹងប្រែងទៅលើការងារ ដែលប្រកបដោយឧត្តមប្រយោជន៍មួយនេះ ហើយសូមបន្ត និងបង្កើនចំនួនឱ្យកាន់តែច្រើនឡើងថែមទៀត ល្គឹកណាបានក្លាយទៅជាទម្លាប់គ្រប់ៗគ្នា។ ជាចុងក្រោយ ខ្ញុំក៏សូមអរគុណយ៉ាងជ្រាលជ្រៅចំពោះ “គេហទំព័រអ្នកនិពន្ធកម្ពុជា” ដែលបានផ្តល់កិត្តិយសដល់រូបខ្ញុំ និងសូមជូនពរឱ្យគេហទំព័រកាន់តែរីកចម្រើនទៅមុខជាលំដាប់។”
លោក មុំ រដ្ឋា កំពុងអង្គុយអានពិនិត្យសៀវភៅ “ការពិតប្រៀបដូចបិសាច” របស់លោក
“គេហទំព័រអ្នកនិពន្ធកម្ពុជា” សូមបញ្ជាក់ថា លោក មុំ រដ្ឋា ជាអ្នកស្រុកសង្កែ ខេត្តបាត់ដំបង។ បច្ចុប្បន្ន ក្រៅពីអ្នកអាជីពជាអ្នកនិពន្ធកម្ពុជាមួយរូប លោកគឺជាគរុសិស្សកម្រិតមូលដ្ឋាន នៃ វិទ្យាស្ថានគរុកោសល្យបាត់ដំបង ឯកទេសប្រវត្តិវទ្យា-ភូមិវិទ្យា។ លោកជាម្ចាស់ស្នាដៃសៀវភៅ “ការពិតប្រៀបដូចបិសាច” ជាប្រភេទសៀវភៅផ្នែកគំនិត ដែលផ្តោតសំខាន់ទៅលើការស្គាល់ខ្លួនឯង ចេះស្រឡាញ់សង្គម និងអាចរួមរស់ជាមួយគ្នាដោយរីករាយ ក្នុងនាមជាសមាជិកម្នាក់ៗរបស់សង្គម។ ដូច្នេះ បើលោកអ្នកទាំងឡាយដែលមិនទាន់បានអានសៀវភៅនេះ មានការចាប់អារម្មណ៍ចង់ទិញយកទៅអាននោះ លោកអ្នកអាចរកជាវសៀវភៅនេះបាន នៅតាមបណ្ណាគារមួយចំនួនក្នុងរាជធានីភ្នំពេញ និងនៅបណ្ណាគារ ឥន្ទ្រទេវី សម្រាប់ខេត្តបាត់ដំបង ឬអាចទាក់ទងទិញដោយផ្ទាល់តាមរយៈហ្វេសប៊ុកផេកផ្លូវការរបស់គ្រឹះស្ថាន សៀវភៅជីវិត https://www.facebook.com/seavphovjivet/ នោះលោកអ្នកមុខជាមិនខកបំណងដោយសារសៀវភៅមួយក្បាលនេះឡើយ។ សូមអរគុណ៕
អត្ថបទ ៖ ពុទ្ធិពង្ស / រូបភាព ៖ មុំ រដ្ឋា / រក្សាសិទ្ធិ ៖ cambowritercom