ស៊ិន ធារី អ្នកនិពន្ធទំនុកច្រៀងល្បីម្នាក់ ដែលចូលចិត្តសរសេរតែបទស្នេហាបែកបាក់
- February 12th, 2020
កញ្ញា ស៊ិន ធារី មានស្រុកកំណើតនៅខេត្តបាត់ដំបង។ កញ្ញាមានបងប្អូនបង្កើតចំនួន៤នាក់, ប្រុស២នាក់ ស្រី២នាក់ កញ្ញាជាកូនទី៤ក្នុងគ្រួសារ ដែលមានឪពុកឈ្មោះ ជា ស៊ុនហេង និងម្តាយឈ្មោះ ប៉ែន ស៊ុននី ។ បច្ចុប្បន្ន កញ្ញាគឺជាអ្នកនិពន្ធទំនុកច្រៀងបែបសម័យមួយរូប ដែលមានឈ្មោះបោះសំឡេង និងប្រកបដោយទឹកដៃក្នងការនិពន្ធយ៉ាងខ្លាំង ដោយគ្រប់បទដែលកញ្ញានិពន្ធ សុទ្ធសឹងតែទទួលបាននូវការគាំទ្រយ៉ាងខ្លាំងពីសំណាក់ប្រិយមិត្តអ្នកស្ដាប់ទាំងឡាយ ជាពិសេសបំផុតនោះ ទំនុកច្រៀងដែលកញ្ញានិពន្ធទាំងប៉ុន្មាន សុទ្ធតែទទួលបានការពេញចិត្តពីតារាចម្រៀងប្រុសស្រីដែលជាម្ចាស់បទដែលកញ្ញានិពន្ធ ព្រោះមានអត្ថន័យល្អ ចាក់ដោត គួបផ្សំនឹងបទភ្លេងពីរោះរណ្ដំទៀតនោះ ធ្វើឱ្យចម្រៀងនោះ ពេលច្រៀងចេញទៅទទួលបានការគាំទ្រយ៉ាងច្រើនកុះករ ពីសំណាក់អ្នកគាំទ្ររបស់តារាច្រៀងគ្រប់ៗគ្នា ដែលនេះពិតជាមោទកភាពមួយខ្លាំងណាស់ សម្រាប់អ្នកនិពន្ធទំនុកច្រៀង ដែលប្រកបដោយទេពកោសល្យរូបនេះ។ ហើយអ្វីដែលជាលក្ខណៈប្លែកមួយរបស់កញ្ញាក្នុងនាមជាអ្នកនិពន្ធទំនុកច្រៀងនោះ គឺកញ្ញាជាអ្នកនិពន្ធដែលចូលចិត្តសរសេរតែបទស្នេហាបែកបាក់ នេះបើតាមសង្កេតតាមដានពីអត្ថន័យខ្លឹមសារនៃទំនុកច្រៀងរបស់កញ្ញាកន្លងមក តាំងពីចាប់ផ្ដើមប្រឡូករហូតមកទល់នឹងបច្ចុប្បន្ន។
កញ្ញា ស៊ិន ធារី អ្នកនិពន្ធល្បីផ្នែកទំនុកច្រៀង
កញ្ញា ស៊ិន ធារី ចាប់ផ្ដើមចូលសរសេរឱ្យផលិតកម្មសាន់ដេដំបូងនៅដើមឆ្នាំ2014 ហើយបទដំបូងគេដែលកញ្ញាសរសេរនៅក្នុងផលិតកម្មនោះមានចំណងជើងថា “បងពីមុនបាត់ទៅណា?” ច្រៀងដោយ កញ្ញា អ៊ីវ៉ា និង បទ “បងពីមុនឆ្កួតបាត់ហើយ” ច្រៀងដោយ លោក ឆាយ វីរៈយុទ្ធ ដែលបទទាំងពីរនេះ ទទួលបានការគាំទ្រយ៉ាងខ្លាំងនឹកស្មានមិនដល់នាកំឡុងពេលនោះ ។ នៅដើមឆ្នាំ 2017 កញ្ញាក៏បានផ្លាស់ទ្រនំទៅផលិតកម្ម ថោន និងថ្មីៗនេះ សរសេរឱ្យផលិតកម្មរស្មីហង្សមាស ដែលជាផលិតកម្មល្បី កំពុងឈានមុខគេក្នុងព្រះរាជាណាចក្រកម្ពុជានាពេលបច្ចុប្បន្ន ។ រហូតមកទល់ពេលនេះ បើរាប់បទដែលកញ្ញាធ្លាប់បានសរសេរកន្លងមកសរុបទាំងអស់ដល់ទៅរាប់រយបទឯណោះ ដែលមិនមែនជាចំនួនតិចឡើយ ហើយក្នុងនោះ បទដែលទទួលការគាំទ្រខ្លាំង រួមមានដូចជា ៖
- “លើសពី Fan បានអត់?” ច្រៀងដោយ លោក ខេមរៈ សិរីមន្ត
- “គេមិនបានស្រឡាញ់យើងទេ” “មានតែព្រះទើបដឹងយើងឈឺ” ច្រៀងដោយ លោក ឆាយ វីរៈយុទ្ធ
- “ខឹងឬស្អប់ បងអាចជេរអូនបាន” “មានតែព្រះទើបឮយើងយំ” ច្រៀងដោយ កញ្ញា អ៊ីវ៉ា
- “ថ្ងៃឯកា” ច្រៀងដោយ លោក គូម៉ា
- “ដើរលេងបំភ្លេចមនុស្សម្នាក់” ច្រៀងដោយ មាស សុខសោភា
- “សុំទោសដែលឱ្យយល់ច្រឡំ” ច្រៀងដោយ ឱក សុគន្ធកញ្ញា
អ្នកនិពន្ធ ស៊ិន ធារី និង តារាចម្រៀងល្បី អ៊ីវ៉ា
កញ្ញា ស៊ិន ធារី បានបញ្ជាក់ពីសមត្ថភាពក្នុងការនិពន្ធទំនុកច្រៀងរបស់កញ្ញាដល់ “គេហទំព័រអ្នកនិពន្ធកម្ពុជា” ក្នុងបទសម្ភាសន៍ថា “អាចសរសេរបានដូចរាល់ថ្ងៃនេះ វាជាទេពកោសល្យពីកំណើតរបស់នាងខ្ញុំ តែក៏ទទួលបានការណែនាំខ្លះៗពីអ្នកនិពន្ធរៀមច្បងផងដែរ ហើយអ្វីដែលពិសេសបំផុតនោះ គឺរៀនសង្កេតមើលទិចនិចនៃការសរសេររបស់រៀមច្បងដោយខ្លួនឯងតែម្ដង ។ ហើយសម្រាប់កញ្ញាផ្ទាល់ ចំពោះចំណង់ចំណូលចិត្តក្នុងការនិពន្ធ នាងចូលចិត្ត សរសេរបទបែបមនោសញ្ចេតនាស្នេហាបែកបាក់ និង បទលើកទឹកចិត្ត” ។ កញ្ញាក៏បានបង្ហាញពីផលប៉ះពាល់ក្នុងការនិពន្ធទំនុកច្រៀងរបស់កញ្ញាផងដែរថា “បើនិយាយពីផលលំបាកក្នុងការនិពន្ធទំនុកច្រៀងរបស់នាងខ្ញុំ ដូចមិនសូវជាមានបញ្ហាទេ តែមានផលប៉ះពាល់វិញ ដូចជាពេលខ្លះអារម្មណ៍មិនសូវល្អ ជីវិតជួបរឿងស្មុគស្មាញច្រើន មិនមានអារម្មណ៍ក្នុងការសរសេរ អ៊ីចឹងពេលខ្លះទុកចោល ចេញក្រៅមើលគេមើលឯងមួយសន្ទុះ ទើបត្រឡប់មកវិញសរសេរបន្តទៀត ។” នេះហើយជាវិធីសាស្ត្រដោះស្រាយបញ្ហាជាប់គាំងរបស់កញ្ញាពេលសរសេរទំនុកច្រៀង ដែលអាចឱ្យប្អូនៗជំនាន់ក្រោយយកទៅអនុវត្តតាមបាន។
អ្នកនិពន្ធ ស៊ិន ធារី និង តារាចម្រៀងល្បី ឆាយ វីរៈយុទ្ធ
បន្ថែមលើសពីនេះ កញ្ញា ស៊ិន ធារី ក៏ចែករំលែកចំណេះដឹងក្នុងការនិពន្ធទំនុកច្រៀងឱ្យបានល្អថា “តាមបទពិសោធន៍នាងខ្ញុំផ្ទាល់ ក្នុងនាមជាអ្នកសរសេរម្នាក់ ត្រូវមានការតាំងចិត្តខ្ពស់ ពូកែស្រមើស្រមៃ មានគំនិតច្នៃប្រឌិត ពូកែរកអ្វីដែលថ្មី ហើយដើម្បីឱ្យបទនីមួយៗមានលក្ខណៈល្អពេញលេញ ពេលសរសេរត្រូវចូលតួឱ្យដល់ ហើយក្នុងបទនីមួយៗត្រូវចេះដាក់ពាក្យចាក់ដោត ឬ ដាក់ពាក្យឆ្ងាញ់ចូល បើយើងសរសេរដាក់តែពាក្យរាយពេក ក៏វាមិនសូវទាក់ទាញ ស្តាប់ហើយៗមិនដក់ក្នុងអារម្មណ៍ ជាពិសេសយើងត្រូវដាក់ចុងជួនឱ្យត្រូវពីមួយឃ្លាទៅមួយឃ្លា ពីមួយវគ្គទៅមួយវគ្គ ទើបស្តាប់ទៅកាន់តែពីរោះមានន័យ ។ ហើយវាក៏អាចជួយសម្រួលដល់តារាចម្រៀង គាត់យកទៅហាត់សម ឱ្យងាយចាំប៉ារ៉ូល ឆាប់ចាប់បាន។”
យើងខ្ញុំជឿថាមានប្អូនៗមិនតិចនាក់ទេ ដែលចង់ក្លាយជាអ្នកនិពន្ធទំនុកច្រៀងជោគជ័យមួយរូបដូចកញ្ញា ។ ហេតុនេះបើលោកអ្នកពិតជាចង់មែននោះ លោកអ្នកអាចរៀនពីវិធីក្នុងការនិពន្ធទំនុកច្រៀងតាមរយៈការចែករំលែករបស់កញ្ញាខាងលើបាន ដោយយើងខ្ញុំជឿជាក់ថា បើលោកអ្នកអាចធ្វើបានតាមវិធីរបស់កញ្ញា លោកអ្នកមុខជាអាចវិវត្តខ្លួនឱ្យជោគជ័យខ្ពស់ដូចជាកញ្ញាដែរជាក់ជាមិនខាន។ មុននឹងបញ្ចប់បទសម្ភាសន៍ កញ្ញា ស៊ិន ធារី ក៏បានថ្លែងជាចុងក្រោយថា “ជាចុងបញ្ចប់ នាងខ្ញុំសូមអរគុណដល់ប្រិយមិត្តទាំងអស់ ដែលតែងតែគាំទ្រស្នាដៃនិពន្ធទំនុកច្រៀងរបស់នាងខ្ញុំរហូតមក! នាងខ្ញុំសូមជូនពរឱ្យអ្នកទាំងអស់គ្នា ជួបប្រទះតែសេចក្តីសុខ សំណាងល្អ និងរកទទួលទានមានបានគ្រប់ក្រុមគ្រួសារ ។”
អ្នកនិពន្ធ ស៊ិន ធារី ក្នុងសកម្មភាពកំពុងនិពន្ធទំនុកច្រៀង
“គេហទំព័រអ្នកនិពន្ធកម្ពុជា” សូមបញ្ជាក់ថា កញ្ញា ស៊ិន ធារី មានស្រុកកំណើតនៅខេត្តបាត់ដំបង។ កញ្ញាមានបងប្អូនបង្កើតចំនួន៤នាក់, ប្រុស២នាក់ ស្រី២នាក់ ហើយជាកូនទី៤ក្នុងគ្រួសារ ដែលមានឪពុកឈ្មោះ ជា ស៊ុនហេង និងម្តាយឈ្មោះ ប៉ែន ស៊ុននី ។ បច្ចុប្បន្ន កញ្ញាគឺជាអ្នកនិពន្ធទំនុកច្រៀងបែបសម័យមួយរូប ដែលមានឈ្មោះបោះសំឡេង និង ប្រកបដោយទឹកដៃក្នុងការនិពន្ធយ៉ាងខ្លាំង។ ក្រៅពីចូលចិត្តនិពន្ធ ក៏កញ្ញាក៏ចូលចិត្តផ្នែកដឹកនាំសម្តែង, ថតរូប, Design និងកាត់តវីដេអូផងដែរ។ សូមអរគុណ៕
អត្ថបទ ៖ ឫទ្ធិពង្ស / រូបភាព ៖ ស៊ិន ធារី / រក្សាសិទ្ធិ ៖ cambowriter.com
