លោក ជា តុងហៃ កើត​ថ្ងៃទី១២ ខែមិថុនា ឆ្នាំ១៩៩២ នៅ​ភូមិភូមិស្លែង ឃុំជំរះពេន ស្រុកសំរោង ខេត្តតាកែវ។ លោក​មាន​ឪពុកឈ្មោះ អ៊ី ហៀង (ស្លាប់) និង​ម្តាយឈ្មោះ ង៉ែត សេង (ជាកសិករ)។ ចំណែក​បងប្អូនបង្កើតវិញ​លោក​មានចំនួន៨នាក់ ក្នុង​នោះ​ប្រុស៥នាក់ ស្រី៣នាក់ ដោយ​លោក​ជាជាកូនទី៧ក្នុង​គ្រួសារ។ លោក​ចាប់ផ្តើមប្រឡូកក្នុងវិស័យតែងនិពន្ធនៅពាក់កណ្តាលឆ្នាំ២០១៧ តាមរយៈការចូលរួមប្រឡងប្រជែងស្នាដៃ​ជាមួយ​អ្នកនិពន្ធវ័យក្មេងជាច្រើនរូបផ្សេងទៀត ដែលរៀបចំ​ឡើង​ដោយផលិតកម្មមួយ។​ គិតមកទល់​នឹងពេលនេះ លោក​មានស្នាដៃដែល​បាន​បោះពុម្ពជាសៀវភៅមួយចំនួនដូចជា ៖

• ប្រលោមលោក រឿង “ទឹកភ្នែកគជ់ខ្យង” បោះពុម្ពភឆ្នាំ២០១៩ ដោយ “តម្រា” ​។
• ប្រលោមលោក រឿង “ពេលម៉ែចាស់ទៅ” ជាសហនិពន្ធជាមួយ អ្នកស្រី ពាន់ ភួងបុប្ផា បោះពុម្ភឆ្នាំ២០១៩ ដោយ “ក្លឹបអ្នកនិពន្ធខ្មែរប៉ាកកាមាស” ។
• រឿងខ្លី រឿង “ខុសគេ” បោះពុម្ពក្នុងសៀវភៅ “ខ្មាសខ្លួនឯង” ឆ្នាំ២០១៩ ដោយ “សមូហកម្មមន្តទឹកខ្មៅ” ។
• រឿងខ្លី រឿង “បន្ទប់ជួល” បោះពុម្ពក្នុងសៀវភៅ “ព្រៃរំដួល” ឆ្នាំ២០១៨ ដោយ “សមូហកម្មមន្តទឹកខ្មៅ”។
• ក្រៅពីនេះ កន្លងមក​លោកក៏ធ្លាប់​បានទទួល ជ័យលាភីលេខ៤ ពានរង្វាន់ឥន្ទ្រទេវី ឆ្នាំ២០១៩​ ផ្នែកប្រលោមលោក រឿង “ខ្ញុំមើលឃើញខ្មោច” និងជាអ្នកសរសេរអត្ថបទភាពយន្តមួយរូបក្នុងចំណោមអ្នកនិពន្ធដទៃទៀត ក្នុងរឿងភាគមានចំណងជើងថា “ផ្កាស្លា” ផលិតដោយ ​ផលិត​កម្មរាហ៊ូ ចាក់​បញ្ចាំងនៅ ស្ថានីយ៍ទូរទស្សន៍ CTN។​

លោក​ ជា តុង​ហៃ និងសៀវភៅ “ទឹកភ្នែកគជ់ខ្យង” ស្នាដៃ​និពន្ធ​របស់លោក

ខាង​លើ​គឺជាប្រវត្តិនៃ​ការ​ប្រឡូក​ចូលក្នុង​វិស័យតែងនិពន្ធ និង​ស្នាដៃ​​​ផ្នែក​តែងនិពន្ធទាំង​អស់​របស់លោក​ដែល​បាន​សាង​ឡើង​ក្នុង​រយៈពេលកន្លង​មកនោះ។ បន្ទាប់​មកក្នុង​បទសម្ភាសន៍​ជាមួយ​ “គេហទំព័រអ្នក​និពន្ធ​កម្ពុជា” លោក​ ជា តុង​ហៃ ក៏បាន​បន្ត​បង្ហាញ​ទាក់​ទង​នឹង​ការ​តែង​និពន្ធ​របស់​លោក​ថា “ដ្បិតតែទេពកោសល្យពីកំណើត គឺជាកត្តាចម្បងសម្រាប់អ្នកនិពន្ធ តែចំពោះខ្ញុំ ការពឹងតែលើកត្តាមួយនេះ គឺមិនគ្រប់គ្រាន់ទេ! ប្រឡូកក្នុងវិស័យតែងនិពន្ធនេះ ដំបូងខ្ញុំបានចូលរៀនវគ្គបណ្តុះបណ្តាល ការសរសេរអត្ថបទភាពយន្ត រយៈពេលបីខែ រៀបចំដោយ Cambodia Film Commission នៅពាក់កណ្តាលឆ្នាំ២០១៧។ ក្រោយមក នៅដើមឆ្នាំ២០១៨ ខ្ញុំបានចូលរៀនវគ្គ មូលដ្ឋានគ្រឹះនៃការសរសេរប្រលោមលោក រៀបចំដោយ ប្រលោមលោកសប្បាយ ដែលបង្រៀនដោយ អ្នកនិពន្ធ ម៉ីសន សុធារី ។ ក្រៅពីនេះ ខ្ញុំរៀនសូត្រពីការសាកសួរផ្ទាល់ និងអានស្នាដៃរបស់អ្នកនិពន្ធរៀមច្បង និងអ្នកនិពន្ធដទៃទៀត។ ចំណែកការមើលរឿងភាគទូរទស្សន៍ និងភាពយន្ត ក៏ជាចំណែកយ៉ាងសំខាន់ក្នុងការបង្កើនសមត្ថភាពក្នុង​ការសរសេររបស់ខ្ញុំដែរ។”

លោក​ ជា តុង​ហៃ និងអ្នក​និពន្ធ​វ័យ​ក្មេងដែលជាសមាជិកមួយចំនួនរបស់ “ទសប៉ាកកា”

ចំពោះ​សំណួរដែលថា តើ​លោក​នឹង​បោះ​បង់ចោលការ​តែង​និពន្ធ​នេះ​នៅ​ថ្ងៃ​ណាមួយដែរ​ឬទេនោះ? លោក ជា​ តុងហៃ ក៏បាន​តបថា “ខ្ញុំស្ថិតក្នុងដំណាក់កាលចាប់ផ្តើមនៅឡើយ! ដូច្នេះបើសួរថា តើខ្ញុំមានគម្រោងឈប់សរសេរដែលឬទេនោះ? ខ្ញុំមិនទាន់មានចម្លើយឡើយ។ ខ្ញុំ​គ្រាន់តែដឹងយ៉ាង​ច្បាស់ថា ការតែងនិពន្ធគឺជាកិច្ចការដែលខ្ញុំស្រឡាញ់ខ្លាំង! ម្យ៉ាងខ្ញុំក៏មានមហិច្ឆតាធំក្នុងវិស័យនេះផងដែរ… ខ្ញុំចង់ឱ្យមនុស្សជាច្រើនបានអានស្នាដៃខ្ញុំ… ខ្ញុំចង់ឈ្នះការប្រកួតប្រជែងពានរង្វាន់អក្សរសិល្ប៍… និង​ខ្ញុំចង់ក្លាយជាអ្នកនិពន្ធម្នាក់ដែលស្នាដៃរបស់​ខ្ញុំត្រូវបានអ្នកអានទូទៅទទួលស្គាល់ជាដើម… ដូច្នេះ អ្វីដែលខ្ញុំត្រូវធ្វើ គឺរៀនសូត្រ និងប្រឹងប្រែងបន្តទៀត ដើម្បីអភិវឌ្ឍខ្លួនឱ្យ​ឈានដល់ការសម្រេចគោលបំណងនេះនៅទីបំផុត។”

លោក ​ជា ​តុងហៃ ក្នុងពិធីទទួលជ័យលាភីស្នាដៃតែងនិពន្ធមួយ

លោក ​ជា ​តុងហៃ មិនត្រឹមតែ​ជាអ្នក​និពន្ធ​វ័យ​ក្មេង​ប្រកបដោយ​ទឹកដៃ​ប៉ុណ្ណោះ​ទេ លើស​ពីនេះ លោក​ថែមទាំង​ជាប្រធាន​ក្រុម ​ទសប៉ាកកា ដែល​ជាក្រុម​អ្នក​និពន្ធ​វ័យ​ក្មេង​ទៀត​ផង។ ទាក់​ទងនឹង​ក្រុម​នេះ លោក​បាន​បញ្ជាក់ថា ​“ទសប៉ាកកា ជាក្រុមអ្នកនិពន្ធវ័យក្មេង បង្កើតឡើងនៅថ្ងៃទី៥ ខែមេសា ឆ្នាំ២០១៨។ ពួកយើងមានសមាជិកចំនួន​១០រូប ដែលខ្ញុំមានតួនាទីជាប្រធានក្រុម។ ដំណើរដើមទងដែលបណ្ដាលឱ្យ​កើត​មាន​នៅក្រុម​នេះ​ឡើង គឺ​កាល​ណោះ​ពួកយើងជាសិក្ខាកាមដែលបានចូលរួមវគ្គបណ្តុះបណ្តាលការសរសេរប្រលោមលោក រៀបចំដោយ ប្រលោមលោកសប្បាយ។ ក្រោយពីចប់វគ្គសិក្សា ពួកយើងក៏​បាន​រួមគ្នាបង្កើតជាក្រុម ទសប៉ាកកា នេះឡើង ក្នុងគោលបំណងចម្បងគឺដើម្បី​រក្សាមិត្តភាពឱ្យនៅជិតស្និទ្ធ និងជួយគ្នាទៅវិញទៅមកលើការអភិវឌ្ឍខ្លួនក្នុងវិស័យតែងនិពន្ធនេះ។​ គិតមកដល់ពេលនេះក្រុម ទសប៉ាកកា មានអាយុជាងពីរឆ្នាំហើយ ហើយ​ពួកយើងក៏មានស្នាដៃមួយចំនួនគួរឱ្យកត់សម្គាល់ផងដែរ ដោយសមាជិកយើងខ្លះបានបោះពុម្ពស្នាដៃជាសៀវភៅ និងខ្លះទៀតបានជាប់ជ័យលាភីក្នុងការប្រកួតប្រជែងពានរង្វាន់អក្សរសិល្ប៍។” ​

សៀវភៅ “ទឹកភ្នែកគជ់ខ្យង” ស្នាដៃ​និពន្ធរបស់ លោក​ ជា តុង​ហៃ

ចំពោះ​ស្នាដៃ​របស់​ លោក ជា តុង​ហៃ វិញ ស្នាដៃចុងក្រោយបំផុត​របស់លោក មានចំណងជើងថា “ទឹកភ្នែកគជ់ខ្យង” ជាប្រលោមលោកមនោសញ្ចេតនាបែបលន្លង់លន្លោច។​  លោក​បាន​បញ្ជាក់ថា សៀវភៅនេះបោះពុម្ពដោយ “តម្រា” និងចេញផ្សាយកាលពីពិព័រណ៌សៀវភៅឆ្នាំ២០១៩។ ឯខណៈពេលនេះ លោក​កំពុងតែ​សរសេរស្នាដៃថ្មីមួយ​ទៀត ជាប្រភេទ​ប្រលោមលោកបែបរន្ធត់ទាក់ទងនឹងជំនឿផ្លូវងងឹតក្នុងសង្គមខ្មែរ ដោយ​មានគម្រោង​ចេញ​ផ្សាយក្នុងពេលឆាប់ៗខាងមុខនេះ​ឯង។

សៀវភៅប្រលោមលោករឿង “ពេលម៉ែចាស់ទៅ” ជាសហនិពន្ធ​របស់​លោក ជា តុងហៃ និង អ្នកស្រី ពាន់ ភួងបុប្ផា

អាន​បានចំណេះ។ ដូច្នេះ ​បើ​យើង​អាន​កាន់តែ​ច្រើន នោះ​យើង​ក៏នឹង​មានចំណេះកាន់តែ​ទូលំទូលាយផងដែរ។ ទាក់​ទង​នឹង​​អត្ថប្រយោជន៍​ក្នុង​ការ​អាន​នេះ ក្នុង​នាម​លោក​ ជា តុង​ហៃ ជាអ្នក​និពន្ធ​មួយរូប លោក​ដឹង​ច្បាស់​ណាស់ ដោយ​លោក​បាន​បង្ហាញថា “ការអានគឺជាកិច្ចការចម្បងបំផុតរបស់អ្នកនិពន្ធ។​ ខ្ញុំក៏ដូចជាអ្នកនិពន្ធដទៃទៀតដែរ គឺ​តែងយកការអានជាទម្លាប់របស់ពួកយើង។ ខ្ញុំចូលចិត្តអានស្នាដៃរបស់អ្នកនិពន្ធរៀមច្បង ដែលទទួលបានជ័យលាភីក្នុងការប្រកួតប្រជែងពានរង្វាន់អក្សរសិល្ប៍ ដូចជា ពានរង្វាន់ព្រះសីហនុរាជ សមូហកម្មអក្សសិល្ប៍ នូ ហាច មហោស្រពអក្សរសិល្ប៍ខ្មែរ ។ល។” លោក​បន្ត “មែន​ទែន​ទៅ! ខ្ញុំជាអ្នកនិយមអានស្នាដៃរបស់​អ្នកនិពន្ធ ម៉ីសន សុធារី និងស្នាដៃរបស់អ្នកនិពន្ធថ្មីៗជាច្រើនទៀតក្នុងប្រលោមលោកសប្បាយ ព្រោះ​ខ្ញុំ​យល់ថា អានច្រើន ដើម្បីបង្កើនចំណះដឹង… អានច្រើន ដើម្បីដឹងពីប្រធានបទដែលគេបានសរសេរ ហើយ ដឹងពីប្រធានបទដែលអ្នកអាននិយមចូលចិត្ត និងជាពិសេសសិក្សាពីសិល្ប៍វិធីសរសេររបស់អ្នកនិពន្ធដទៃទៀត។” នេះ​ជាការ​បញ្ជាក់​របស់​លោក​ទាក់​ទង​នឹង​ការ​អាន។

សៀវភៅ “ខ្មាសខ្លួនឯង” និង “ព្រៃរំដួល” ដែលមានស្នាដៃតែងនិពន្ធរបស់ លោក ជា តុងហៃ នៅក្នុងនោះ

ជា​ចុង​បញ្ចប់ លោក ជា តុងហៃ ថ្លែង​ថា “ជាដំបូង ខ្ញុំ​សូមអរគុណដល់ គេហទំព័រអ្នកនិពន្ធកម្ពុជា ជាពិសេសបងប្រុស គង់ រង្សី ដែលបានផ្តល់ឱកាសចំពោះកិច្ចសម្ភាសន៍នេះ។ ខ្ញុំក៏ជាប្រិយមិត្តប្រលោមលោករបស់គាត់​ក្នុងប្រលោមលោកសប្បាយដែរ។ ជាចុងក្រោយ ខ្ញុំមានពាក្យពេចន៍មួយចំនួនទៅដល់ប្អូនៗដែលស្នេហាការតែងនិពន្ធ សូមប្អូនៗស្វែងរកការបង្ហាត់បង្ហាញពីអ្នកនិពន្ធរៀមច្បង ឬស្ថាប័នដែលមានវិជ្ជាជីវៈច្បាស់លាស់ក្នុងការតែងនិពន្ធ ជាជាងការពឹងផ្អែកទាំងស្រុងលើទេពកោសល្យធម្មជាតិរបស់ខ្លួន។ លើសពីនេះ ខ្ញុំសូម​លើកទឹកចិត្តឱ្យប្អូនៗចូលរួមកម្មវិធីទាក់ទងនឹងការតែងនិពន្ធឱ្យបានច្រើនតាមដែលអាចធ្វើបាន ដូចជាកម្មវិធីសម្ពោធសៀវភៅថ្មី កម្មវិធីជួបជុំអ្នកនិពន្ធ សិក្ខាសាលា ឬការប្រកួតប្រជែងស្នាដៃជាដើម ដើម្បីមានឱកាសស្គាល់អ្នកនិពន្ធផ្សេងទៀត និងជាឱកាសរៀនសូត្របន្ថែមផងដែរ។ ហើយខ្ញុំក៏មិន​​ភ្លេច​អរគុណដល់ប្រិយមិត្តអ្នកអានទាំងអស់​ផងដែរ ដែលតែងតែគាំទ្រស្នាដៃ​តែងនិពន្ធមិនថាជាស្នាដៃរបស់ខ្ញុំ ឬរបស់អ្នកនិពន្ធដទៃទៀត។ សង្ឃឹមថាអ្នកទាំងអស់គ្នានឹង​នៅតែបន្តគាំទ្រការអានសៀវភៅបន្ត​ទៀត​ជារៀងរហូតតទៅ។ ខ្ញុំសន្យាថា នឹងប្រឹងប្រែងអភិវឌ្ឍសមត្ថភាពរបស់ខ្លួនបន្ថែមទៀត និងខិតខំបង្កើតស្នាដៃថ្មីៗឱ្យបាន​កាន់តែ​ល្អ​ ដើម្បីបង្កើនរសជាតិអំណានដល់អ្នកអានឱ្យបានកាន់តែច្រើន។”

លោក​ ជា តុងហៃ កំពុងអានសៀវភៅប្រលោមលោករឿង “ភ្នំពេញអើយបងនឹកអូន” ស្នាដៃនិពន្ធរបស់ លោក លី សុផាត

“គេហទំព័រអ្នកនិពន្ធកម្ពុជា” សូមបញ្ជាក់ថា លោក​ ជា តុងហៃ កើត​ឆ្នាំ១៩៩២ នៅស្រុកសំរោង ខេត្តតាកែវ។ បច្ចុប្បន្ន ក្រៅពីមានអាជីពជាអ្នកនិពន្ធកម្ពុជាមួយ លោកគឺជាប្រធានក្រុម​ “ទសប៉ាកកា” ដែលជាក្រុមអ្នកនិពន្ធវ័យក្មេង ប្រកបដោយ​សមត្ថភាព​ក្នុងការ​តែងនិពន្ធ។ លោក​គឺជា​ម្ចាស់​ស្នាដៃសៀវភៅ “ទឹកភ្នែក​គជ់ខ្យង” ដែលជាប្រលោមលោកមួយដ៏ល្បី និង​ស្នាដៃ​មួយ​ចំនួន​ទៀត។ ដូច្នេះ ប្រសិនបើ​លោក​អ្នក​ចង់​ដឹង​ពីទឹកដៃក្នុង​ការ​និពន្ធ​របស់​លោកថា​មានលក្ខណៈ​ល្អ​យ៉ាង​ណាខ្លះ​នោះ លោក​អ្នក​អាច​ស្វែងរកទិញ​សៀវភៅ​របស់​លោក​យកមកអានបាន តាមរយៈ​ហ្វេស​ប៊ុក​ផេក​ផ្លូវការ​របស់ តម្រា https://www.facebook.com/DomraOfficial/ និងបណ្តាអ្នកលក់សៀវភៅតាមអនឡាញជាច្រើនទៀត ដូចជា Grey Universe https://www.facebook.com/Greyuniverses/ និង ភ្នំពេញ Terminal https://www.facebook.com/PhnomPenhTerminal/ ជាដើម ដោយគេហទំព័រ​យើងខ្ញុំ​ជឿជាក់​ថា លោក​អ្នកមុខជានឹងមិនខកបំណង​ឡើយ។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ ជា តុងហៃ / រក្សាសិទ្ធិ ៖ cambowriter.com