អានសៀវភៅ គឺជាសកម្មភាពដ៏ល្អបំផុតមួយរបស់មនុស្ស ពិសេសសម្រាប់ប្រជាជន​ដែល​ស្ថិត​ក្នុង​ប្រទេសជឿនលឿនក្នុងពិភពលោក។ សម្រាប់កម្ពុជាវិញ ទោះបីជាចំនួនអ្នកអានហាក់នៅមានកម្រិត​ទាប​ជាងបណ្តាប្រទេសលោកខាងលិចក្តី ប៉ុន្តែយើងក៏សង្កេតឃើញសន្ទុះគួរឱ្យចាប់អារម្មណ៍។ ទន្ទឹម​នឹង​នោះ ក៏មានដែរអ្នកដែលមានបំណងចង់សរសេរសៀវភៅ ប៉ុន្តែពួកគេពិតជាត្រូវការ​គំនិតយោបល់​ជា​ច្រើន។ ដើម្បីចូលរួមចំណែកក្នុងបំណងនេះ “គេហទំព័រអ្នកនិពន្ធកម្ពុជា” បានសម្ភាសតាមសារ​អេឡិច​ត្រូនិកជាមួយ លោក រឺន សីហា អ្នករៀបរៀងសៀវភៅ និងជាទីប្រឹក្សារបស់គ្រឹះស្ថាន​បោះពុម្ព​ផ្សាយ​ហាតប៊ុក។  លោកក៏ជា​ប្រធាននាយកប្រតិបត្តិ (CEO) របស់ក្រុមហ៊ុនអចលនទ្រព្យ ATSOLUTIONS ដ៏ល្បីមួយ​ក្នុង​ប្រទេស​កម្ពុជា​នាពេល​បច្ចុប្បន្ន​​ផងដែរ។

គេហទំព័រអ្នកនិពន្ធកម្ពុជា ៖ លោក​​អាច​​បង្ហាញ​​បាន​​ទេ​ថា តើ​មូល​ហេតុ​អ្វី​បាន​ជា​លោក​សម្រេច​ចិត្ត​សរសេរ​សៀវភៅរហូត​មកទល់នឹង​ពេលនេះ?

លោក រឺន សីហា ៖ ខ្ញុំបានដឹងយ៉ាងច្បាស់ថា ការអានសៀវភៅពិតជាលំបាក ហើយ​មាន​តែ​ការ​អាន​សៀវភៅ​ទេ ដែលបានប្រាប់រាល់ចម្ងល់ជាច្រើនលើសលប់ សម្រាប់ការចង់ចេះចង់ដឹងគ្រប់បញ្ហា គ្រប់​រឿង​រ៉ាវ និងគ្រប់កាលៈទេសៈ។ មិនតែប៉ុណ្ណោះ ធ្លាប់ជាគ្រូបង្រៀន និងណែនាំដល់និស្សិត ហើយដោយឈរ​លើ​​បុព្វហេតុ​មួយ ជាចម្បងដែលចង់បន្សល់ស្នាដៃ ជាចំណេះដឹង​ដែលបានរៀនសូត្រផង ជា​បទ​ពិសោធន៍​​ធ្លាប់​​​ឆ្លង​កាត់​ផង និងចូលរួមចំណែកក្នុងការជំរុញ​​ការអាន ដើម្បី​លើកកម្ពស់ក្នុង​វិស័យ​អប់រំ​ជា​ចាំ​បាច់  ខ្ញុំក៏បាន​សម្រេចចិត្តចាប់ផ្តើមសរសេរសៀវភៅ ដោយក្ដី​ស្រឡាញ់។ លើសពីនេះ ដោយ​ការ​រៀបរៀងចងក្រង គឺជាវិធីដ៏សំខាន់មួយ ក្នុងចំណោមវិធីសំខាន់​ផ្សេង​ទៀត ដើម្បី​អភិវឌ្ឍ​ចំណេះ​ដឹង​ផ្ទាល់​​ខ្លួន​ដោយប្រាកដ និងផ្តល់ការចែករំលែកការអភិវឌ្ឍន៍នេះដល់អ្នកជុំវិញខ្លួន ក៏​ដូច​ជា​សាធារណៈ​ជន​​ទូទៅ​ដោយ​ប្រយោល ដែលគ្រប់គ្នាចង់ឃើញ ដើម្បីភាពរីកចម្រើនរុងរឿងទៅលើអនាគតរៀងៗខ្លួន ជាមួយ​អត្ថន័យ​​នៃជីវិតដ៏ពិតប្រាកដ។

លោក រឺន សីហា និងស្នាដៃសៀវភៅល្បីៗរបស់លោក

គេហទំព័រអ្នកនិពន្ធកម្ពុជា ៖ តើយើងត្រូវមានចរិតលក្ខណៈសម្បត្តិ ឬទាមទារកត្តាសំខាន់អ្វីខ្លះ ទើប​អាច​ក្លាយជា​អ្នក​សរសេរ​សៀវភៅ​ដ៏​ល្អ​មួយរូប​​បាន​?

លោក រឺន សីហា ៖ ដើម្បីក្លាយជាសរសេរសៀវភៅមួយរូប ចាំបាច់ណាស់ យើងត្រូវតែជាអ្នកដែលចូលចិត្តអានមួយរូប ចូលចិត្តចែករំលែក និងចូលចិត្តសិក្សាស្រាវជ្រាវ ដើម្បីចងក្រងសម្រាប់ជាប្រយោជន៍រួម។ លើស​ពីនេះ ភាពមិនលម្អៀង និងមិនប្រព្រឹត្តសេចក្ដីអសីលធម៌ខុសពីការពិត ជាអត្តសញ្ញាណដ៏ចាំបាច់​សម្រាប់អ្នក​សរសេរ ឬអ្នករៀបរៀង ហើយទទួលយកការរិះគន់ដោយបើកចំហផ្នត់គំនិត។

គេហទំព័រអ្នកនិពន្ធកម្ពុជា ៖ ពេលចាប់ផ្តើមសរសេរសៀវភៅ តើលោកជួបការលំបាកនិងភាពងាយស្រួលអ្វីខ្លះ?

លោក រឺន សីហា ៖ ដោយសារការសរសេរសៀវភៅឬការរៀបរៀង និងចងក្រងសៀវភៅមួយក្បាលៗ ពិត​ណាស់​គឺមិនងាយស្រួលឡើយ។ យើងត្រូវចំណាយកម្លាំងកាយ កម្លាំងចិត្ត ពេលវេលា និង​សុភមង្គល​គ្រួសារ​មួយចំនួន ដើម្បីសម្រេចសៀវភៅមួយក្បាលៗ។ ហេតុអ្វីខ្ញុំត្រូវធ្វើដូចនេះ? គឺ​ដើម្បី​បដិវត្ត​ផ្នត់​គំនិត និងចង់ឃើញ ប្រទេសមួយនេះ សម្បូរទៅដោយធនធានដែលវ័យឆ្លាត ចេះដឹង ច្បាស់ពីវិធីកសាង លើស​ពីអ្វី​ដែល​យើងរំពឹងទុក។ ការពិតទៅបើនិយាយថា តើថាមានឧបសគ្គ ឬផលលំបាកដែរឬទេ? ពិត​ណាស់ ពិត​ជា​មាន។ ផលលំបាកទីមួយគឺ យើងត្រូវប្រើខួរក្បាល ប្រើការគិត និងការវិភាគ សម្រាប់​ការយកមក​បរិយាយ ដែលត្រូវការពេលវេលាច្រើន និងបរិយាកាសល្អ ព្រមជាមួយនឹងគុណតម្លៃខ្ពស់។ សម្រាប់​ខ្ញុំ គឺមិនខុសពីអ្នកសរសេរគ្រប់រូបឯទៀតឡើយ។ ការចំណាយពេលវេលាដ៏ក្រិតក្រម គឺ​ជា​ផល​លំបាក​ដែលខានមិនបានមួយទៀត ហើយយ៉ាងណាមិញ សម្រាប់អាជីពការសរសេរនេះ មិនបានផ្តល់​ផល​​ជាលុយកាក់ សម្រាប់ផ្គត់ផ្គង់គួ្រសារបានល្អប្រសើរឡើយ។ តែវាបានផ្តល់គុណតម្លៃឥតគណនា។ ដោយ​សារការ សិក្សាស្រាវជ្រាវលើប្រភពដែលសម្បូរបែប ភាគច្រើនជាភាសាបរទេស។ ឧបសគ្គក្នុង​ការ​​ស្វែងរកប្រភព ដែលត្រូវស្វែងយល់ជាភាសាបរទេសផងនោះ ក៏ជាផលលំបាកច្រើនណាស់ដែរ។

សៀវភៅល្បីៗមួយចំនួនរបស់ លោក រឺន សីហា នៅ “គ្រឹះស្ថានហាតប៊ុក”

គេហទំព័រអ្នកនិពន្ធកម្ពុជា ៖ តើលោកត្រូវចំណាយពេលប៉ុន្មាន សម្រាប់​ការ​សរសេរ​សៀវភៅ​មួយ​ក្បាលៗ?

លោក រឺន សីហា ៖ សម្រាប់ពេលវេលាក្នុងការសរសេរសៀវភៅមួយក្បាលៗ វាអាស្រ័យលើពេលវេលា កាលៈទេសៈ និងស្ថានភាពសុខភាព ក៏ដូចប្រភេទសៀវភៅដែលយើងចង់សរសេរ និងរៀបរៀង។ សម្រាប់​​ខ្ញុំ​ប្រហែល១ឆ្នាំឡើងទៅ ទើបអាចបញ្ចប់សៀវភៅបានមួយក្បាលៗបាន។

គេហទំព័រអ្នកនិពន្ធកម្ពុជា ៖​ តើលោកមានស្នាដៃអ្វីខ្លះ? ហើយសៀវភៅទាំងនោះនិយាយអំពីអ្វី?

លោក រឺន សីហា ៖ ចាប់ផ្តើមដំបូងជាមួយនឹងសៀវភៅដែលមានចំណងជើងថា “៣៦៥ គតិ​បណ្ឌិត​នៃ​ភាព​ជោគ​ជ័យ” ជា​សៀវភៅ​ដំបូងរបស់ខ្ញុំ ហើយបន្ទាប់មកមានដូចជា៖

• សុភាសិតមហាយក្សចិន
• ជម្រើសនៃភាពជាអ្នកដឹកនាំ
• និងសៀវភៅដែលរៀបរៀងរួមគ្នា ២ក្បាលផ្សេងទៀត
  • ចំណេះដឹងសកល
  • បណ្ដុំគំនិត

លោក រឺន សីហា ជាមួយសកម្មភាពចែករំលែកចំណេះដឹងក្នុងកម្មវិធីសំខាន់មួយ

គេហទំព័រអ្នកនិពន្ធកម្ពុជា ៖ តើធ្វើដូចម្តេច ទើបសៀវភៅរបស់លោកត្រូវបានបោះពុម្ពផ្សាយ?

លោក រឺន សីហា ៖ ទម្រាំបានចេញបោះពុម្ពផ្សាយ ត្រូវឆ្លងកាត់ការពិនិត្យដោយខ្លួនឯងជាច្រើនលើកច្រើនសារ ហើយត្រូវឆ្លងការពិនិត្យរបស់អ្នកពាក់ព័ន្ធផ្សេងទៀត។ ដោយ​ពឹង​ផ្អែក​លើ​ “គឹ្រះស្ថាន​បោះ​ពុម្ព​ផ្សាយ​ហាតប៊ុក” និងជាសៀវភៅដែលជ្រោមជ្រែងដោយម្ចាស់គ្រឹះស្ថានផងនោះ ទើប​បាន​ឆ្លង​ទៅ​បណ្ណាល័យ​ជាតិ ដើម្បីបានលេខកូដ ISBN សម្គាល់​សៀវភៅនិងបាកូដ។ ​ជាសៀវភៅដែលបោះពុម្ព​ក្រោមការ​ត្រួត​ពិនិត្យ​ និងចាត់ចែងផ្ទាល់របស់ “គ្រឹះស្ថានបោះពុម្ពផ្សាហាតប៊ុក​” និងបញ្ជូនទៅកាន់ប្រិយមិត្ត​អ្នកអាន​ដោយ​​គ្រឹះស្ថាននេះផ្ទាល់​ដូចគ្នា។

គេហទំព័រអ្នកនិពន្ធកម្ពុជា ៖ តើលោកមានអ្វីបន្ថែម សម្រាប់​ជា​យោបល់​ជូន​អ្នក​មាន​បំណង​ចង់​សរសេរ​សៀវភៅ​ដែរឬទេ?

លោក រឺន សីហា ៖ ខ្ញុំ​បាទ​ស្នើដល់អ្នកមានបំណងចង់សរសេរសៀវភៅ គួរ​ចាប់​ផ្តើម​ដោយ​ការ​អានឱ្យ​បានច្រើន សរសេរឱ្យ​បាន​ច្រើន គ្រប់វិធីសាស្រ្ត និងគ្រប់មធ្យោបាយ ហើយ​ឈរ​លើ​គោល​ជំហរ​ចែក​រំលែក​ចំណេះ​ដឹង​ពិត និងជួយជ្រោមជ្រែងលើកកម្ពស់ការអានទាំងអស់គ្នា ដើម្បីប្រទេសជាតិដ៏រុងរឿងមួយនេះ។

លោក រឺន សីហា អ្នកនិពន្ធ និងរៀបរៀងចងក្រងសៀវភៅឆ្នើមមួយរូបនៅកម្ពុជា

“គេហទំព័រអ្នកនិពន្ធកម្ពុជា” សូមបញ្ជាក់ថា បច្ចុប្បន្ន លោក រឺន សីហា គឺជាទីប្រឹក្សាគ្រឹះស្ថានហាតប៊ុក និង​ជា​អ្នក​រៀប​រៀង​សៀវភៅដ៏ឆ្នើម​មួយរូបប្រចាំ​គ្រឹះស្ថាន​ហាតប៊ុក។ លើស​ពី​នេះ លោក​ក៏​ជា​ប្រធាន​នាយក​ប្រតិបត្តិការ​ (CEO) របស់​ ក្រុមហ៊ុន​អចលនទ្រព្យ ATSOLUTIONS  ដែល​ជា​ក្រុមហ៊ុន​ដ៏ល្បីមួយ​នៅ​កម្ពុជា​នាពេល​បច្ចប្បន្ននេះ​​ផងដែរ។ លោក​បាន​បញ្ចប់​ការ​សិក្សា​ថ្នាក់​​បរិញ្ញាបត្រជាន់ខ្ពស់ (អនុបណ្ឌិត)​ ពីប្រទេសចិន និង​បាន​បំពេញ​ការងារ​នៅ​ក្រុមហ៊ុនឯកជន​ជា​ច្រើន​ឆ្នាំមកហើយ។ ដូច្នេះ ប្រសិន​បើ​លោក​អ្នកចង់​ដឹងថា តើ​ទឹក​ដៃ​ក្នុង​ការ​សរសេរ និងរៀបរៀងចងក្រង​សៀវភៅ​របស់​លោក​មាន​លក្ខណៈ ល្អ​យ៉ាង​ណា​ខ្លះ​នោះ លោក​អ្នក​អាច​រកជាវ​សៀវភៅ​របស់​លោក​ទាំង​ឡាយ​ដូច​ដែល​បាន​រៀបរាប់​ខាង​លើ នៅតាមបណ្ណាគារធំៗ​ក្នុង​ក្រុង​ភ្នំពេញដូចជា បណ្ណាគារអន្តរជាតិ, សន្តិភាព, បាក់ទូក, អង្គរធំ, នគរធំ, ប្រជាប្រិយ, ពិភពលោក, ណូវែល, អង្គរ, តូបលក់សៀវភៅផ្សារអូរឫស្សី, តូបលក់សៀវភៅមុខសាលាដូនពេញ និងតាមបណ្តាខេត្តមួយចំនួនដូចជា បាត់ដំបង, សៀមរាប, បន្ទាយមានជ័យ តាកែវ, កំពង់ឆ្នាំង , ឧត្តរមានជ័យ, រតនៈគិរី និង ស្ទឹងត្រែង ជាដើម ឬក៏លោកអ្នកអាច​ទំនាក់​ទំនង​ទិញ​តាមរយៈទំព័​រហ្វេ​ស​ប៊ុក​ផ្លូវការរបស់​គ្រឹះស្ថានហាតប៊ុក https://www.facebook.com/HeartBookCambodia/ ឬគេហទំព័រផ្លូវការ​របស់​គ្រឹះស្ថានហាតប៊ុក heartbookcambodia.com ក៏បាន នោះលោក​អ្នកមុខជា​មិន​ខក​បំណង​ឡើយ។ សូមអរគុណ៕

អត្ថបទ និងរូបភាពផ្ដល់ដោយ ៖ លោក ឈុំ សីហា / រក្សាសិទ្ធិដោយ ៖ cambowriter.com