លោក សួង ប្រុសប្រាថ្នា កើតថ្ងៃទី២ ខែសីហា ឆ្នាំ១៩៩៤ នៅស្រុកមោងឫស្សី ខេត្តបាត់ដំបង។  លោក​មានឪពុកឈ្មោះ ឌុច សាវឿន និងម្តាយឈ្មោះ ហៀង ម៉ាលី ដោយ​មានបងប្អូនបង្កើតចំនួន៣នាក់ ប្រុស១នាក់ ស្រី២នាក់ ហើយ​លោកជាកូនច្បង​ក្នុង​គ្រួសារ។ បច្ចុប្បន្ន ក្រៅពីមានងារជាអ្នក​និពន្ធ​កម្ពុជា​មួយរូប លោកជាអ្នកនិពន្ធនិងដឹកនាំសម្តែងនៅផលិត​កម្ម Sastra Film ដែលជា​ផលិតកម្មមួយ​​កំពុងមានឈ្មោះ​បោះសំឡេង​យ៉ាងខ្លាំងក្នុង​វិស័យ​ផលិត​​ភាពយន្ដនៅកម្ពុជាសព្វថ្ងៃ។

លោក សួង ប្រុសប្រាថ្នា អ្នកនិពន្ធឆ្នើមវ័យក្មេងល្បីឈ្មោះមួយរូបនៅកម្ពុជាបច្ចុប្បន្ន

ក្នុង​​បទសម្ភាសន៍តាមសារ​អេឡិចត្រូនិចជាមួយ “គេហទំព័រអ្នក​និពន្ធ​កម្ពុជា” លោក សួង ប្រុសប្រាថ្នា​ ក៏បាន​បន្ត​បង្ហាញ​​បន្ទាប់​ពីប្រវត្តិ​ត្រួសៗ​របស់​លោក​ខាង​លើ​ទៀតថា “ចំពោះការងារនិពន្ធ ខ្ញុំ​បាន​ចាប់ផ្ដើមនៅឆ្នាំ២០១៧ ដែលកាលនោះជាអ្នកកែសម្រួលអត្ថបទរឿងវិកលចរឹត និង រឿងកុមារ។ ការពិតទៅ ខ្ញុំចូលចិត្តមើលកុន ហើយក៏ឃើញមានភាពមិនប្រក្រតីជាច្រើននៅក្នុងភាពយន្ត ហើយក៏ចេះតែគិតថា បើសិនជាមានឱកាស ខ្ញុំនឹងព្យាយាមធ្វើឱ្យ​បានល្អជាងនេះ។” លោក​បាន​បន្ត​ពីគោលជំហររបស់ខ្លួន​ក្នុងកិច្ចការ​តែងនិពន្ធថា “សម្រាប់ពេលអនាគត ខ្ញុំគិតថា ខ្ញុំនឹង​នៅតែបន្តសរសរជានិច្ច​ ទោះជាបានតិច ឬច្រើនក្តី ព្រោះមានរឿងជាច្រើនទៀតណាស់ ដែលខ្ញុំចង់បង្ហាញ​តាម​រយៈ​ស្នាដៃ​តែងនិពន្ធ​របស់ខ្ញុំ។”

ដូច​បញ្ជាក់​ខាង​លើ​អ៊ីចឹង លោក សួង ប្រុសប្រាថ្នា បច្ចុប្បន្នគឺជាអ្នកនិពន្ធនិងដឹកនាំសម្តែងមួយរូបនៅផលិតកម្ម Sastra Film ដែលជា​ផលិតកម្មមួយ​​កំពុងមានឈ្មោះ​បោះសំឡេង​យ៉ាងខ្លាំងក្នុង​វិស័យ​ផលិត​​ភាពយន្ដនៅកម្ពុជាយើងសព្វថ្ងៃ។ ទាក់ទងនឹងចំណុចនេះ លោកក៏បាន​បង្ហាញពីកិច្ចការ​ផ្នែក​និពន្ធ ក៏ដូច​ជាសមិទ្ធផលការងារ​របស់ខ្លួន​កន្លងមកថា “ក្នុង​ការងារ​ជាអ្នកនិពន្ធ ក៏ដូចជាអ្នកដឹកនាំសម្តែងមួយរូបនៅក្នុងផលិតកម្ម Sastra Film រហូតមកដល់ពេលនេះ ខ្ញុំមានស្នាដៃនិពន្ធជាង២០ចំណងជើងហើយ​ ក្នុងនោះ រឿង “ឯងមានខ្ញុំក្រ”, “ផ្ញើសញ្ញាបត្រជូនម៉ែ”, “បងអាឆ្កួត”, “ពោះធំ”, “សង្សារចាស់” និង រឿង “ប្តីគេ”….. សុទ្ធតែជាស្នាដៃដែលទទួលបានការគាំទ្រច្រើនពីសំណាក់​ប្រិយមិត្ត​ទស្សនិកជន​របស់ Sastra Film ទាំងឡាយ។” លោក​បានបន្ត​បង្ហាញ​ពីសមត្ថភាព​ក្នុង​ការ​និពន្ធ​របស់​លោក​ទៀតថា “ក្រៅពីស្នាដៃជាខ្សែភាពយន្តដែលខ្ញុំបាន​បង្ហាញ​មុននេះ ខ្ញុំក៏នៅមាន​ស្នាដៃ​​និពន្ធ​ជា​សៀវភៅ​កុមារដែល​បាន​ចេញផ្សាយរួចប៉ុន្មានចំណងជើងទៀត​ផងដែរ ដូចជា រឿង “ឌីឌី “ច្រមុះខ្លី” និង “គ្រាប់ពូជ” ​ជាដើម។

រឿងល្បីៗមួយចំនួននិពន្ធដោយ លោក សួង ប្រុសប្រាថ្នា ​នៅផលិតកម្ម Sastra Film

ការណ៍ដែលអ្នក​និពន្ធ​មួយរូប​អាច​តាក់តែងនិពន្ធ​ស្នាដៃល្អ​មួយល្អបាន មិនមែន​ជារឿង​ចៃដន្យ​ឡើយ គឺទាមទារ​នូវការ​មានសមត្ថភាព​ចំណេះដឹង​ផ្នែក​តែងនិពន្ធ​ពិតប្រាកដទើបអាច​ទៅ​រួច ជាក់ស្ដែង​ប្រៀបដូចជា​លោក សួង ប្រុសប្រាថ្នា តែម្ដង។ ពាក់ព័ន្ធ​នឹង​ចំណុចនេះ លោក​បាន​ចែក​រំលែក​ជាចំណេះដឹង​ដល់​បុគ្គល​ទាំង​ឡាយ ដែល​មានបំណងចង់​និពន្ធ​ស្នាដៃឱ្យបាន​ល្អថា “សម្រាប់ខ្ញុំ ការនិពន្ធរឿងឱ្យ​បានល្អ អ្នកនិពន្ធត្រូវយល់ធាតុសំខាន់នៃការបង្ហាញតួអង្គ សាច់រឿង និងវត្ថុដែលត្រូវបង្ហាញ។ មានន័យថា ការផ្តល់ភាពសំខាន់ទៅលើអ្វីដែលយើងបានបង្ហាញ។ ត្រូវយល់ពីខ្លួនឯង ចំពោះសាច់រឿងដែលចង់បង្ហាញ​ឱ្យ​អ្នកអាន ឬអ្នក​ទស្សនា។ យើងមិនចេះតែនឹកឃើញសរសេរ នឹកឃើញសរសេរនោះទេ វាអាច​ឱ្យ​បែបសាច់រឿង ឬភាពពិសេសរបស់តួអង្គ ឬ សាច់រឿងបាន​។ សរុបមក យើង​ត្រូវចេះក្តោបសាច់រឿងខ្លួនឯងឱ្យ​បានមូល កុំឱ្យ​បែក ដែលយើងពិបាកនឹងទាញសាច់រឿងត្រឡប់មកវិញ។”

រឿងល្បីៗមួយចំនួនទៀតនិពន្ធដោយ លោក សួង ប្រុសប្រាថ្នា ​នៅផលិតកម្ម Sastra Film

ការ​អាន ជាផ្នែកមួយ​នៃការ​ទទួលបាននូវចំណេះដឹង​ថ្មីចាស់​​យ៉ាង​សម្បូរបែប បើយើងអានកាន់តែ​ច្រើន យើង​ក៏ហ្នឹងទទួលបាននូវចំណេះដឹងកាន់តែច្រើន​ផងដែរ ជាពិសេស​វានឹងជួយ​យើងជាច្រើនក្នុងការ​ពង្រឹងភាព​ជោគជ័យ​លើ​អាជីពការងារ​របស់យើងសព្វថ្ងៃ។ នេះ​ហើយ​ជាអត្ថប្រយោជន៍នៃការ​អាច​ដែលមិនអាច​ប្រកែកបាន ដែល​លោក​អ្នកគួរតែ​ព្យាយាម​អាន​ឱ្យបាន​ច្រើន​បំផុត មិនថាពីសៀវភៅ ឬពីប្រភព​ណា​ផ្សេង​ទៀតនោះទេ។ មែនទែនទៅ បើនិយាយ​ពីការអាននេះ លោក សួង ប្រុសប្រាថ្នា ក៏ជាអ្នក​និពន្ធ​មួយរូបដែលចូលចិត្ត​អានសៀវភៅខ្លាំងណាស់ដែរ ដោយលោក​បាន​​បង្ហាញ​ថា “ខ្ញុំចូលចិត្តអានសៀវភៅណាស់ តែដោយសារ ការងារមួយរយៈនេះ មមាញឹក ខ្ញុំមិនសូវជាបានអានច្រើនទេ តែពេលទំនេរ ខ្ញុំតែងតែឆ្លៀតអានសៀវភៅ បែបប្រលោមលោកអភិនីហារ ចិត្តសាស្រ្ត ក៏ដូចជាអានសៀវភៅថ្មី ដែលទាក់ទងនឹងប្រធានបទដែលខ្ញុំត្រូវនិពន្ធ ព្រោះជាក់ស្តែងវាជួយឱ្យ​ខ្ញុំ ទទួលបានគំនិតថ្មីៗជាច្រើន ដោយវាជួយឱ្យ​យើង មិនបែកគំនិតចេញពីប្រធានបទ ពីអ្វីដែលយើងកំពុងសរសេរឡើយ។ ដូច្នេះ ខ្ញុំសូម​ធ្វើការ​លើកទឹកចិត្តឱ្យ​គ្រប់គ្នា អានសៀវភៅ មិនថាជាសៀវភៅប្រភេទណា ឱ្យ​តែគ្រប់គ្នាពេញចិត្តក្នុងការអាន ព្រោះវាជួយឱ្យ​យើងមានគំនិតក្នុងការនិយាយ ក៏ដូចជាមានអ្វីថ្មីៗ ប្លែកៗ ក្នុងការលើកយកមកជជែកក្នុងន័យការងារ ឬប្រាស្រ័យទាក់ទងគ្នាទូទៅ។”

“ពោះធំ” និង “សង្សារចាស់” រឿងល្បីៗទាំងពីរថ្មីៗរបស់ លោក សួង ប្រុសប្រាថ្នា នៅផលិតកម្ម Sastra Film

ជាចុងបញ្ចប់​ក្នុង​បទសម្ភាសន៍ លោក សួង ប្រុសប្រាថ្នា ក៏បានថ្លែងថា “ខ្ញុំ​ពិតជា​អរគុណខ្លាំងណាស់​សម្រាប់​អ្នក​គ្រប់គ្នា ដែលបាន​ចំណាយពេលនៅជាមួយទំព័រមួយនេះ ដោយ​ខ្ញុំ​ពិតជា​សប្បាយចិត្តណាស់ ដែលបានចែករំលែកជាមួយអ្នកទាំងអស់គ្នាតាមរយៈ​បទសម្ភាសន៍​មួយនេះ និងពិតជា​សូមអរគុណខ្លាំងណាស់ ដែលអ្នក​ទាំងអស់​គ្នា​តែងតែ​គាំទ្រស្នាដៃរបស់ខ្ញុំកន្លងមក។ ជាចុងក្រោយ ខ្ញុំ​សូម​លើកទឹកចិត្តដល់​ប្អូនៗជំនាន់ក្រោយ ដែលស្រឡាញ់ការងារ​តែងនិពន្ធនិង ដឹកនាំសម្តែងទាំងអស់ សូមឱ្យ​អានសៀវភៅឱ្យបានច្រើន ជាពិសេសសៀវភៅដែលអាចផ្ដល់​ជាចំណេះដឹងដល់ការតែងនិពន្ធឱ្យ​ល្អ និង​ត្រូវតែ​ដឹងឱ្យបាន​ច្បាស់​ពីអ្វីដែលខ្លួនឯងស្រឡាញ់បំផុត។”

“គេហទំព័រអ្នក​និពន្ធ​កម្ពុជា” សូម​បញ្ជាក់ថា លោក សួង ប្រុសប្រាថ្នា កើតឆ្នាំ១៩៩៤ នៅស្រុកមោងឫស្សី ខេត្តបាត់ដំបង។ បច្ចុប្បន្ន លោកជាអ្នកនិពន្ធនិងដឹកនាំសម្តែងនៅ Sastra Film ដែលជា​ផលិតកម្មមួយ​​កំពុងមានឈ្មោះ​បោះសំឡេង​យ៉ាងខ្លាំងក្នុង​វិស័យ​ផលិត​​ភាពយន្ដនៅកម្ពុជាសព្វថ្ងៃ ក្នុង​នោះនិពន្ធល្បីៗ​របស់​លោក​ រួមមានដូចជា រឿង “ឯងមានខ្ញុំក្រ”, “ផ្ញើសញ្ញាបត្រជូនម៉ែ”, “បងអាឆ្កួត”, “ពោះធំ”, “សង្សារចាស់” និង រឿង “ប្តីគេ” ជាដើម។ ដូច្នេះ បើលោកអ្នក​ចង់ដឹងថា តើរឿងរបស់​លោក​មានអត្ថន័យខ្លឹមសារ​ល្អ​យ៉ាង​ណា​ខ្លះនោះ លោកអ្នក​អាច​ចូលទស្សនាតាម Channel YouTube របស់ ផលិតកម្ម Sastra Film https://www.youtube.com/results?search_query=sastra+film នោះ​លោក​អ្នក​មុខជា​បានដឹងច្បាស់ និង​មិន​ខក​បំណងឡើយ។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ សួង ប្រុសប្រាថ្នា / រក្សាសិទ្ធិ ៖ គេហទំព័រអ្នក​និពន្ធ​កម្ពុជា