ថុន ថាវរី ម្ចាស់ស្នាដៃ “នារីប្រពៃ” សៀវភៅដ៏មានគុណតម្លៃសម្រាប់ស្ត្រីគ្រប់រូប
- November 23rd, 2019
ថុន ថាវរី ម្ចាស់ស្នាដៃ “នារីប្រពៃ” សៀវភៅដ៏មានគុណតម្លៃសម្រាប់ស្ត្រីគ្រប់រូប
ស្ត្រីគឺជាកម្លាំងចលករដ៏សំខាន់ក្នុងសង្គមមិនអាចខ្វះបានឡើយ។ ដូច្នេះហើយ ស្រីគ្រប់រូបគួរតែត្រូវបានលើកតម្កើងឱ្យបានខ្ពស់ លើកទឹកចិត្តឱ្យបានខ្លាំង និងជួយបង្កើនសមត្ថភាពចំណេះដឹងដល់ពួកគាត់ឱ្យដល់កម្រិតមួយ ដែលអាចឱ្យពួកគាត់ជួយខ្លួនឯងបាន ជាពិសេសក្រុមគ្រួសារ ពលរដ្ឋ និងសង្គមជាតិតែម្ដង។ សរុបមកសង្គមជាតិមួយ បើចង់ឱ្យខ្លាំង និងមានការរីកចម្រើនលូតលាស់ដូចបណ្ដាសង្គមអភិវឌ្ឍជឿនលឿនដទៃៗ គឺចាំបាច់ត្រូវតែមានការចូលរួមពីស្ត្រីក្នុងសង្គមនោះមិនអាចខ្វះបានឡើយ ហើយត្រូវផ្ដល់សិទ្ធិឱ្យស្មើភាពគ្នាជាមួយបុរស និងបើកឱកាសឱ្យពួកគាត់បានប្រើចំណេះដឹងសមត្ថភាពរបស់ពួកគាត់ម្នាក់ៗឱ្យអស់ តាមអ្វីដែលពួកគាត់អាចធ្វើទៅបាន ប្រៀបបីដូចទស្សនៈសកលដែលបានលើកឡើងថា “ស្ត្រីគឺជាមាតាពិភពលោក” យ៉ាងដូច្នោះដែរ! មិនមែនដូចទស្សនៈដ៏ងងឹតងងុលមួយចំនួន ដែលបានលើកឡើងថា “ស្ត្រីបង្វិលចង្ក្រាន្តមិនជុំ” នោះឡើយ នេះគ្រាន់តែជាទស្សនៈបែបចាស់កំរឹលហួសសម័យមួយប៉ុណ្ណោះ។
អ្នកនិពន្ធ ថុន ថាវរី ម្ចាស់ដៃសៀវភៅ “នារីប្រពៃ”
ដោយមើលឃើញពីតម្លៃរបស់ស្រ្តី និងភាពខ្លាំងរបស់ស្ត្រីក្នុងការចូលរួមអភិវឌ្ឍសង្គមជាតិនេះហើយ ទើបបានជា កញ្ញា ថុន ថាវរី បានលះបង់អស់កម្លាំងកាយចិត្ត ខិតខំនិពន្ធសៀវភៅដ៏មានតម្លៃមួយក្បាលឡើងមានចំណងជើងថា “នារីប្រពៃ” ដើម្បីទុកជាការលើកទឹកចិត្តខ្លួនឯងផង ជំរុញលើកទឹកចិត្តស្ត្រីដទៃៗផង និងក្នុងន័យចូលរួមចំណែកអភិវឌ្ឍសង្គមកម្ពុជាផង ហើយដោយសារតែសៀវភៅនេះពិតជាមានតម្លៃពិតប្រាកដមែននោះ ទើបបានជាសៀវភៅដែលជាស្នាដៃនិពន្ធរបស់កញ្ញានេះ ទទួលបានការគាំទ្រយ៉ាងខ្លាំងទាំងពេលបោះពុម្ពចេញផ្សាយដំបូងៗ និងរហូតមកទល់នឹងសព្វថ្ងៃ ព្រោះសៀវភៅមួយក្បាលនេះ បន្ទាប់ពីប្រិយមិត្តបានអានហើយ សុទ្ធតែទទួលស្គាល់ថា បានជួយអប់រំ លើកទឹកចិត្ត និងជំរុញចិត្តខ្លួនឱ្យកាន់តែមានភាពមោះមុតតស៊ូក្នុងជីវិតពិតប្រាកដមែន។ ទាក់ទងបុព្វហេតុដែលជំរុញឱ្យនិពន្ធសៀវភៅដ៏មានគុណតម្លៃសម្រាប់ស្ត្រីនេះឡើង កញ្ញាបានបញ្ជាក់ប្រាប់ “គេហទំព័រអ្នកនិពន្ធកម្ពុជា” ក្នុងបទសម្ភាសន៍ថា “ដោយសារតែនាងខ្ញុំចង់ឃើញនារីក្មេងៗចេះរៀនតស៊ូដើម្បីក្តីស្រមៃរបស់ពួកគេ ហើយមិនបោះបង់ក្តីស្រមៃនោះដោយងាយៗពេក… ដោយនាងខ្ញុំគ្រាន់តែសង្ឃឹមថា តាមរយៈសៀវភៅមួយក្បាលនេះ អ្នកអាននឹងទទួលបានការលើកទឹកចិត្តដើម្បីបន្តក្តីស្រមៃរបស់ខ្លួនបន្តទៀត។” កញ្ញាបានបង្ហាញបន្តទាក់ទងនឹងការបោះពុម្ពស្នាដៃលើកដំបូងថា “ដោយសារការបោះពុម្ពលើកទីមួយ គឺនាងខ្ញុំត្រូវរ៉ាប់រងធ្វើខ្លួនឯងទាំងអស់នោះ ដូច្នេះសៀវភៅនេះបានបង្រៀននាងខ្ញុំច្រើនណាស់ តាំងពីការសរសេរ ការធ្វើទីផ្សារ ការលក់ជាដើម។ លើសពីនេះ វាក៏បានធ្វើឱ្យនាងខ្ញុំបានទៅប្រទេសនានាតាមរយះសៀវភៅមួយក្បាលនេះដែរ។ លើសពីនេះ វាបានធ្វើឱ្យនាងខ្ញុំកាន់តែមានកម្លាំងចិត្តក្នុងការបន្តសរសេរសៀវភៅថ្មីៗបន្ថែមទៀត ដោយមិនខ្លាចនឿយហត់អ្វីទាំងអស់ ដើម្បីទុកជាប្រយោជន៍ដល់អ្នកអាន ពលរដ្ឋ និងសង្គមជាតិកម្ពុជានៃយើងបន្តទៀតផងដែរ។”
សៀវភៅ “នារីប្រពៃ” របស់អ្នកនិពន្ធ ថុន ថាវរី
កញ្ញា ថុន ថាវរី ម្ចាស់ស្នាដៃសៀវភៅ “នារីប្រពៃ” ដ៏ល្បីមានគុណតម្លៃសម្រាប់ស្ត្រីគ្រប់រូប កញ្ញាកើតឆ្នាំ១៩៨៩ នៅភូមិក្បាលកោះកើត ឃុំកោះខ្សាច់ទន្លា ស្រុកស្អាង ខេត្តកណ្តាល។ កញ្ញាជាកូនស្រីកណ្ដាលតែម្នាក់គត់ក្នុងគ្រួសារដែលមានបងប្អូនបង្កើតចំនួនបីនាក់។ កញ្ញាបានបង្ហាញពីហេតុផលដែលបណ្ដាលឱ្យកញ្ញាអាចនិពន្ធស្នាដៃជាសៀវភៅបានល្អដូចសព្វថ្ងៃថា “អាចមកពីដោយសារតែចំណូលចិត្តចូលចិត្តអាននិងសរសេររបស់នាងខ្ញុំតាំងពីក្មេង បូកផ្សំនឹងការសរសេរកំណត់ហេតុតាំងពីឆ្នាំ២០០៧ផងនោះ ទើបបានជាធ្វើឱ្យនាងខ្ញុំចាប់ផ្តើមសរសេរឡើងដោយខ្លួនឯង ដោយនាងខ្ញុំមិនធ្លាប់ទទួលបានការបង្ហាត់បង្រៀនពីនរណាម្នាក់ទេ។” នេះជាសម្ដីរបស់អ្នកនិពន្ធល្បីឈ្មោះ ថុន ថាវរី ដែលអាចឱ្យយើងសន្និដ្ឋានបានយ៉ាងច្បាស់ថា កញ្ញាពិតជាបុគ្គលមួយរូបដែលមានទេពកោសល្យផ្នែកនិពន្ធពីធម្មជាតិយ៉ាងប្រាកដ ដែលគួរឱ្យស្ងើចសរសើរយ៉ាងប្រាកដ។
អ្នកនិពន្ធ ថុន ថាវរី ជាមួយស្នាមញញឹមនៅកន្លែងសៀវភៅមួយ
អ្នកនិពន្ធ ថុន ថាវរី បានបន្តរៀបរាប់ពីសៀវភៅ “នារីប្រពៃ” ដែលជាស្នាដៃនិពន្ធមួយរបស់ខ្លួនយ៉ាងដូច្នេះទៀតថា “សៀវភៅ “នារីប្រពៃ” ស្នាដៃនិពន្ធរបស់នាងខ្ញុំនេះ មានជា៣ភាសា គឺ ភាសាអង់គ្លេស ភាសាខ្មែរ និងភាសាឆេក ដោយនាងខ្ញុំបានចាប់ផ្ដើមនិពន្ធបោះពុម្ពជាភាសាអង់គ្លេសមុនគេបំផុត ក្រោមចំណងជើងថា “A Proper Woman” ។ ប្រាំខែបន្ទាប់មកទៀត នាងខ្ញុំក៏បោះពុម្ពជាភាសាខ្មែរ ដោយដាក់ចំណងជើងថា “នារីប្រពៃ” ដូចអ្វីដែលលោកអ្នកឃើញនៅពេលនេះឯង.. បន្ទាប់មកក៏បានបោះពុម្ពជាភាសាឆេក និងកំពុងតែចរាចរនៅក្នុងទីផ្សារប្រទេសឆេកផងដែរ។” កញ្ញាក៏បានបង្ហាញពីស្នាដៃនិពន្ធសៀវភៅថ្មីៗបន្ទាប់ពី សៀវភៅ “នារីប្រពៃ” របស់កញ្ញាថា “ចំណែកក្នុងឆ្នាំ២០១៨ នាងខ្ញុំបានបោះពុម្ពសៀវភៅថ្មីមួយទៀតមានចំណងជើងថា “កាពីទែនជីវិត ភាគ១” បន្ទាប់មកក្នុង ខែតុលា ឆ្នាំ២០១៩ ថ្មីៗនេះ នាងខ្ញុំក៏បានបោះពុម្ពសៀវភៅ “កាពីទែនជីវិត ភាគ២” ជាបន្តទៀត។ ឯចុងឆ្នាំ២០១៩ខាងមុខនេះ នាងខ្ញុំនឹងចេញផ្សាយសៀវភៅថ្មីមួយក្បាលទៀត បែបបណ្តុះគំនិតនិងលើកទឹកចិត្ត ដែលមាន៣ជំពូកធំៗ គឺការស្វែងរកខ្លួនឯង ការដើរតាមក្តីស្រមៃ និងការផ្តល់ឱ្យ… មានចំណងជើងថា “ដំណើរ” ជាប្រភេទសៀវភៅសហនិពន្ធរួមគ្នាជាមួយអ្នកនិពន្ធពីររូបទៀតគឺ លោក ឡាំ លីម និង កញ្ញា សែត ហត្ថា ហៅ “កូនចាបមាស” ។”
សៀវភៅ “កាពីទែនជីវិត” របស់ អ្នកនិពន្ធ ថុន ថាវរី ភាគ១
សៀវភៅ “កាពីទែនជីវិត” របស់ អ្នកនិពន្ធ ថុន ថាវរី ភាគ២
សៀវភៅសហនិពន្ធចំណងជើង “ដំណើរ” ដែលត្រៀមចេញផ្សាយឆាប់ៗ
ខាងលើគឺជាចំណងជើងសៀវភៅទាំងឡាយរបស់អ្នកនិពន្ធ ថុន ថាវរី ទាំងចាស់ ថ្មី និងត្រៀមចេញផ្សាយខាងមុខ។ ដូច្នេះ ប្រសិនបើលោកអ្នកចង់ជាវសៀវភៅរបស់កញ្ញា និងសៀវភៅរបស់អ្នកនិពន្ធទាំងឡាយផ្សេងទៀតរបស់គ្រឹះស្ថាន “សៀវភៅជីវិត” ឬក៏ចង់កក់ទុកជាមុននូវសៀវភៅថ្មីដែលកញ្ញាត្រៀមនឹងចេញផ្សាយនោះ លោកអ្នកអាចទាក់ទងតាមរយៈហ្វេសប៊ុកផេករបស់សៀវភៅជីវិត https://www.facebook.com/seavphovjivet/ ឬក៏តាមបណ្ណាគារផ្សេងៗ ដូចតទៅនេះបាន ៖ បណ្ណាគារ 1. Monument Bookstore (គ្រប់សាខា) / 2. My Bookshop / 3. បណ្ណាគារពិភពលោក (ជិតផ្សារថ្មី) / 4. ស្រឡាញ់សៀវភៅ / 5. បណ្ណាគារអង្គរធំ (ផ្លូវកម្ពុជាក្រោម) / 6. បណ្ណាគារអង្គរធំ (ទល់មុខ សកលវិទ្យាល័យវ៉ាន់ដា) / 7. បណ្ណាគារប្រជាប្រិយ (ទល់មុខវិទ្យាល័យសន្ធរម៉ុក) / 8. បណ្ណាគារប្រជាប្រិយ (ផ្សារហេងលី) / 9. សេដ្ឋគុណ (ផ្លូវ 122) / 10. តូបកាសែតពន្លឺវិជ្ជា (ក្រោយសាលាស៊ីសុវត្ថិ) / 11. តូបលេខ ៨ (ក្រោយសាលាស៊ីសុវត្ថិ) / 12. តូបលេខ ៩ ក្រោយសាលាស៊ីសុវត្ថិ) / 13. បណ្ណាគារតាព្រហ្ម (ជិតអូរឫស្សី) / 14. បណ្ណាគារអង្គរ /15. បណ្ណាគារសន្តិភាព (គ្រប់សាខានៅក្នុងភ្នំពេញ) / 16. Mind Book (ក្រោយ សកលវិទ្យាល័យវ៉ាន់ដា) / 17. បណ្ណាល័យបញ្ញាវន្ត (ទល់មុខសាលាទួនហ្វា) / 18. បណ្ណាគារបាក់ទូក / 19. DJ Nana’s Store (ផ្សារសុរិយា ជាន់ទី ៤) / 20. My Home Bookstore (ទួលគោក) / 21. LA Bookstore (សៀមរាប) / 22. Footprint Cafe (សៀមរាប) / 23. បណ្ណាគារព្រះវិហារ (សៀមរាប) / 24. បណ្ណាគារពន្លឺអង្គរ (សៀមរាប) / 25. បណ្ណាគាររចនា (សៀមរាប) /26. បណ្ណាគារពន្លឺវិជ្ជា (បាត់ដំបង) / 27. បណ្ណាគារចន្រ្ទា (បាត់ដំបង) / 28. បណ្ណាគារឥន្រ្ទទេវី (បាត់ដំបង) / 29. បណ្ណាគារថ្មគោល (ស្រុកថ្មគោល) / 30. បណ្ណាគារបញ្ញាស័ក្ដិសិទ្ធិ (តាកែវ) / 31. បណ្ណាគារស្វាយរៀង (ស្វាយរៀង) /32. បណ្ណាគារមនោរម្យ (កោះកុង) / 33. បណ្ណាគារអាស៊ានមានជ័យ (បន្ទាយមានជ័យ) / 34. បណ្ណាគារពោធិ៍សាត់ (ទល់មុខអនុវិទ្យាល័យពោធិ៍សាត់)។ ចំណែកតាម Online រួមមានដូចជា 1. L192 Online Store (App) / 2. Buyloy.com (Website) / 3. បណ្ណាគារ Online / 4. Book5biz (Website) / 4. Ah Gogo Online Shop / 5. Garden Online Shop / 6. កន្រ្តក Online Shop / 7. បណ្ណាល័យតូច (Little Library) និងចុងក្រោយអាចរកទិញនៅ ហាងកាហ្វេឈ្មោះ “សួស្ដីកាហ្វេ (Soursdey Cafe)” បានផងដែរ។
ស្នាដៃអ្នកនិពន្ធ ថុន ថាវរី និងសៀវភៅជីវិតដទៃៗទៀត
អ្នកនិពន្ធ ថុន ថាវរី បានបង្ហាញពីគោលបំណងក្នុងការនិពន្ធ និងផលលំបាកដែលកញ្ញាធ្លាប់បានឆ្លងកាត់យ៉ាងដូច្នេះថា “ខ្ញុំគ្រាន់តែចង់ចែករំលែកចំណេះដឹងនិងបទពិសោធទៅអ្នកដែលបានអានសៀវភៅនាងខ្ញុំសរសេរ។ នោះគឺជាគោលដៅចម្បងមុនគេ ពេលនាងខ្ញុំចាប់ផ្តើមសរសេរសៀវភៅ “នារីប្រពៃ”។ ប៉ុន្តែការលំបាកកាលណោះគឺ នាងខ្ញុំមិនដឹងទៅពិភាក្សា ឬសុំយោបល់ពីនរណា ដោយសារការតែងនិពន្ធ ក៏ដូចការលក់សៀវភៅ មិនទាន់ផុសផុលដូចសព្ធថ្ងៃនេះទេ។ ខ្ញុំត្រូវប្រថុយប្រើលុយសន្សំផ្ទាល់ខ្លួនក្នុងការបោះពុម្ពសៀវភៅឱ្យចេញជារូបរាងនិងអាចចរាចរនៅលើទីផ្សារក្នុងស្រុកខ្មែរ។ នៅបណ្ណាគារខ្លះខ្ញុំសុំដាក់សៀវភៅលក់ គេមិនទទួល ឬក៏ទារតម្លៃជើងសារថ្លៃហួសជាដើម។”
និពន្ធ ថុន ថាវរី កំពុងចុះហត្ថលេខាលើសៀវភៅរបស់ខ្លួនទុកជូនប្រិយមិត្ត
ដោយសារតែ អ្នកនិពន្ធ ថុន ថាវរី ចូលចិត្តចែករំលែកតាមរយៈការសរសេរ ដូច្នេះការតែងនិពន្ធគឺជាផ្នែកមួយនៃសុភមង្គលផ្ទាល់ខ្លួនរបស់កញ្ញាមិនអាចខ្វះបានឡើយ។ លើសពីនេះ កញ្ញាបានតាំងចិត្តថានឹងបន្តការសរសេរជាបន្តទៅទៀត គ្រាន់តែមិនអាចស្មានទុកមុនថា ខ្លួននឹងអាចចេញសៀវភៅ១ចំណងក្នុងមួយឆ្នាំឬអត់ប៉ុណ្ណោះ ព្រោះដោយសារតែកញ្ញាក៏មានការងារផ្សេងទៀតដែលមមាញឹក ក្រៅពីការងារនិពន្ធ។ ហើយជាចុងបញ្ចប់នៃបទសម្ភាសន៍ កញ្ញាក៏មានពាក្យអ្វីចង់និយាយទៅកាន់ប្រិយមិត្តដែលតែងតែគាំទ្រស្នាដៃនិពន្ធរបស់កញ្ញាផងដែរថា “នាងខ្ញុំពិតជាសូមអរគុណខ្លាំងណាស់ដល់មិត្តអ្នកអានទាំងឡាយដែលតែងតែគាំទ្រស្នាដៃនាងខ្ញុំ ព្រោះតែការគាំទ្រនេះគឺជាកម្លាំងជំរុញចិត្តរបស់នាងខ្ញុំឱ្យបន្តនិពន្ធ និងខិតខំរកគំនិតថ្មីដើម្បីនិពន្ធសៀវភៅថ្មីៗបន្ថែមទៀត។”
និពន្ធ ថុន ថាវរី និង អ្នកនិពន្ធ សែត ហត្ថា ហៅ “កូនចាបមាស”
“គេហទំព័រអ្នកនិពន្ធកម្ពុជា” សូមបញ្ជាក់ថា កញ្ញា ថុន ថាវរី បច្ចុប្បន្នក្រៅពីមានអាជីពជាអ្នកនិពន្ធកម្ពុជាមួយរូប កញ្ញាគឺជាអ្នកគ្រប់គ្រងផ្នែកផលិតនៅគ្រឹះស្ថានបោះពុម្ពផ្សាយ ”សៀវភៅជីវិត” ដែលជាគ្រឹះស្ថានបោះពុម្ភផ្សាយសៀវភៅល្អៗប្រកបដោយគុណតម្លៃមួយនាពេលបច្ចុប្បន្ន ជាពិសេសសៀវភៅបែបទស្សនវិជ្ជាអប់រំ សង្គម នយោបាយ, ប្រលោមលោក, ការអភិវឌ្ឍផ្នត់គំនិត, ការគិត និងសៀវភៅចំណេះដឹងផ្សេងៗទៀតជាដើម។ កញ្ញាគឺជាអ្នកនិពន្ធប្រកបដោយទេពកោសល្យពីធម្មជាតិមួយរូប ដែលនិយមចូលចិត្តសរសេរផ្ដោតលើការជំរុញចិត្តឱ្យហ៊ានចាកចេញពីរង្វង់នៃក្ដីសុខស្រួល, ការហ៊ានដើរតាមក្តីស្រមៃ និងការដើរផ្សងព្រេងទៅកន្លែងផ្សេងៗក្នុងនាមជាមនុស្សស្រី ដែលលក្ខណៈនេះពិតជាប្លែកណាស់បើប្រៀបធៀបជាមួយនឹងអ្នកនិពន្ធដទៃទៀត។ នេះហើយគឺ កញ្ញា ថុន ថាវរី ម្ចាស់ស្នាដៃ “នារីប្រពៃ” សៀវភៅដ៏មានគុណតម្លៃសម្រាប់ស្ត្រីគ្រប់រូប ដែលលោកអ្នកគួរតែស្គាល់ ជាពិសេសមិត្តៗនារី គួរតែទិញស្វែករកស្នាដៃនេះយកទៅអាន ដើម្បីបង្កើនគុណភាពជីវិតរបស់ខ្លួនឱ្យបានកាន់តែប្រសើរ៕
អត្ថបទ ៖ ឫទ្ធិពង្ស / រូបភាព ៖ ថុន ថាវរី / រក្សាសិទ្ធិ ៖ cambowriter.com