ផុន សុខណេន នាមប៉ាកកា ហ៊ុន ឆេង វិ កញ្ញាគឺជាអ្នកនិពន្ធពន្លកក្រោយមួយរូប ដែលមានដើមកំណើតនៅភូមិត្រពាំងច្រនៀង, ឃុំជ្រលង, ស្រុកបារាយណ៍(តាំងគោក), ខេត្តកំពង់ធំ។
កញ្ញាមានឪពុកឈ្មោះ ភោគ ហ៊ុន និងម្ដាយឈ្មោះ ងិន អ៊ាងងួន ដោយលោកទាំងពីរជាកសិករ, មានបងប្អូនចំនួន៧នាក់ ស្រី២នាក់ ប្រុស៥នាក់ ដោយកញ្ញាជាកូនទី២ក្នុងគ្រួសារ។
កញ្ញាបានបញ្ជាក់ប្រាប់ “គេហទំព័រអ្នកនិពន្ធកម្ពុជា” ថា “ស្នាដៃដែលនាងខ្ញុំចូលចិត្តតែងនិពន្ធជាងគេគឺ រឿងខ្លី, ប្រលោមលោក និងអត្ថបទភាពយន្ត ដែលអត្ថបទភាពយន្តនេះនាងខ្ញុំទើបតែបានចាប់ផ្ដើមថ្មីៗនេះប៉ុណ្ណោះ ចំណែកកន្លងមក ស្នាដៃដែលនាងខ្ញុំធ្លាប់បាននិពន្ធមានចំនួន៨ស្នាដៃ ក្នុងនោះរឿងខ្លី៤រឿង និងប្រលោមលោក៤រឿង មានចំណងជើងដូចជា Lesbian បណ្ដូលចិត្ត, ខ្ជិលឈឺ, ម្ដាយចុងខ្ញុំ Coca Queen ដែល៤រឿងនេះជារឿងខ្លី និង រឿងប្រលោមលោកទាំង៤រឿងមានចំណងជើងដូចជា ប្រពន្ធអត់ខាន់ស្លា(ស្នេហ៍ខំក្នុងចិត្ត), ចិត្តស្នេហ៍តែម្ខាង, ទ្វេគំនុំទ្វេស្នេហ៍, កូនភ្លោះបំបែកកាយ និងចុងក្រោយកំពុងតែមានស្នាដៃរឿងខ្លីមួយដែលត្រូវបានគណៈកម្មាការ “មន្តទឹកខ្មៅ” ជ្រើសរើសយកមកធ្វើការបោះពុម្ពរួមជាមួយស្នាដៃអ្នកនិពន្ធដទៃទៀតជាសៀវភៅក្នុង “សមូហកម្មមន្តទឹកខ្មៅ” នៅឆ្នាំ២០១៩នេះផងដែរ។”
ពិតណាស់! ការណ៍ដែល កញ្ញា ផុន សុខណេន ចេះតែងនិពន្ធនេះ មិនមែនជារឿងចៃដន្យឡើយ នេះក៏ព្រោះតែកញ្ញាមានទេពកោសល្យផ្នែកនិពន្ធពីកំណើតស្រាប់ និងមួយចំណែកទៀតទទួលបានពីការបណ្ដុះបណ្ដាលផ្នែកតែងនិពន្ធពី “សមាគមអ្នកនិពន្ធខ្មែរជំនាន់ទី៣៣” ក្រោមការបង្ហាត់បង្រៀនពីលោកគ្រូ អ្នកគ្រូ ជាច្រើនរូប ដែលសុទ្ធសឹងជាកវីនិពន្ធឆ្នើមៗល្បីៗនៅក្នុងប្រទេសកម្ពុជា។
តែទន្ទឹមនឹងនេះ កញ្ញា ផុន សុខណេន ក៏បានជម្នះនូវលំបាកមិនស្ទើរទេទម្រាំតែកញ្ញាអាចសាងខ្លួនជាអ្នកនិពន្ធមួយរូបសមតាមបំណងដូចសព្វថ្ងៃ ដោយកញ្ញាបានបង្ហាញថា “ដោយសារជីវភាពគ្រួសាររបស់នាងខ្ញុំមានការលំបាក និងការសិក្សាបានត្រឹមឌីប្លូម ជាពិសេសចំណេះផ្នែកតែងនិពន្ធនៅមានកម្រិតមិនទាន់ខ្ពស់ដូចរៀមច្បង, លោកគ្រូ, អ្នកគ្រូ និងអ្នកនិពន្ធឯទៀតៗ នាងខ្ញុំក៏សម្រេចចិត្តខិតខំសិក្សាស្រាវជ្រាវរៀនសូត្របន្ថែម តាមរយៈការអានសៀវភៅល្អៗ, រៀនពីបុគ្គលពូកែៗជុំវិញខ្លួន, រៀនសង្កេតពីសង្គម, សិក្សាស្រាវជ្រាវចំណេះដឹងថ្មីៗពីបណ្ដាញអ៊ីនធឺណេត និងចូលរៀនក្នុងវគ្គបណ្ដុះបណ្កាលតែងនិពន្ធជាដើម ព្រោះនាងខ្ញុំដឹងយ៉ាងច្បាស់ថា មានតែវិធីនេះប៉ុណ្ណោះ ទើបនាងខ្ញុំអាចឱ្យនាងខ្ញុំមានចំណេះដឹងគ្រប់គ្រាន់សម្រាប់ក្លាយជាអ្នកនិពន្ធមួយរូបបាន។
កញ្ញា ផុន សុខណេន បានសង្កត់ធ្ងន់ត្រង់ចំណុចនេះបន្ថែមទៀតថា “មែនទែនទៅ! នាងខ្ញុំធ្លាប់បោះបង់ការតែងនិពន្ធនេះចោលម្ដងទៅហើយ ដោយសារតែកាលនោះនាងខ្ញុំបាក់ទឹកចិត្តខ្លាំងពេក តែនាងខ្ញុំក៏បានសម្រេចចិត្តចាប់កាន់ប៉ាកកាឡើងវិញ បន្ទាប់ពីបានមើលនិងបានស្ដាប់ពាក្យពេចន៍ណែនាំនិងលើកទឹកចិត្តរបស់លោក គង់ រង្សី ដែលជាអ្នកនិពន្ធកម្ពុជាល្បីឈ្មោះមួយរូប ក្នុងកម្មវិធី ៣០ DALY TALK ក្រោមប្រធានបទ «ចង់ចេះនិពន្ធរឿង គួរដឹងពីចំណុចអ្វីខ្លះ?» របស់ Sabay Tv ដោយការចាប់ផ្ដើមលើវិថីតែងនិពន្ធថ្មីលើកនេះ កាន់តែធ្វើឱ្យនាងខ្ញុំមានកម្ចាំងចិត្តទ្វេដង រហូតដល់អាចឈរជើងបានមកដល់សព្វថ្ងៃ ព្រោះពេចន៍ដ៏ល្អៗដែលជាការណែនាំរបស់លោកទាំងប៉ុន្មានពេលនោះ បានធ្វើឱ្យនាងខ្ញុំយល់កាន់តែច្បាស់ពីវិធីសាស្ត្រក្នុងការតែងនិពន្ធ ក៏ដូចជាវិធីក្នុងការជម្នះឧបសគ្គលំបាកទាំងឡាយ ដោយចាប់តាំងពីពេលនោះមក នាងខ្ញុំក៏បានចាត់ទុកនិងគោរពរូបលោកប្រៀបដូចជាគ្រូរបស់នាងខ្ញុំរហូតមក។
ជាចុងក្រោយ កញ្ញា ផុន សុខណេន បានមានមតិផ្ដាំផ្ញើដូច្នេះថា “នាងខ្ញុំសូមផ្ដាំផ្ញើដល់មិត្តអ្នកអានគ្រប់រូប សូមរួមគ្នាលើកស្ទួយការអានសៀវភៅនៅក្នុងប្រទេសកម្ពុជាយើងឱ្យបានកាន់តែច្រើន និងខិតខំរិះរកវិធីបង្កើនធនធានមនុស្សក្នុងប្រទេសកម្ពុជាឱ្យបានច្រើនបំផុតតាមដែកអាចធ្វើទៅបាន។ សារមួយទៀត នាងខ្ញុំសូមអគុណមែនទែនចំពោះមិត្តអ្នកអានជាទីស្រឡាញ់គ្រប់រូប ដែលបានចំណាយពេលវេលាដ៏មានតម្លៃអានស្នាដៃរបស់នាងខ្ញុំគ្រប់ស្នាដៃ ជាពិសេសតែង CHAT ចូលក្នុងអាខោន Facebook របស់នាងខ្ញុំផ្ទាល់ លើកទឹកចិត្ត និងរង់ចាំអានស្នាដៃរបស់នាងខ្ញុំជាបន្តទៀត ដោយនាងខ្ញុំសូមសន្យាថា ទោះបីជានាងខ្ញុំមមាញឹកក្នុងការសរសេរអត្ថបទភាពយន្តដែលជាការងារថ្មីរបស់នាងខ្ញុំយ៉ាងណា ក៏នាងនឹងនឹងព្យាយាមចេញស្នាដៃប្រលោមលោកថ្មីជាបន្តបន្ទាប់ទៀតជូនមិត្តអ្នកអានផងដែរ។
ហើយនាងខ្ញុំសូមអគុណ និងសូមគោរពជូនពរដល់លោកគ្រូ អ្នកគ្រូ ដែលបានជួយបង្ហាត់បង្រៀនដល់រូបនាងខ្ញុំនៅ ”សមាគមអ្នកនិពន្ធខ្មែរ” កន្លងមក និងមិត្ៗតអ្នកអានទាំងអស់ ជួបតែសេចក្ដីសុខ សុវត្តិភាព សុខភាពរឹងមាំ និងជោគជ័យគ្រប់ភារកិច្ចការងា។ ជាពិសេសបុគ្គលទាំងឡាយដែលមានបំណងចង់ក្លាយជាអ្នកនិពន្ធ សូមកកុំបោះការតាំងចិត្តឱ្យសោះ។
“គេហទំព័រអ្នកនិពន្ធកម្ពុជា” សូមបញ្ជាក់ថា កញ្ញា ផុន សុខណេន បច្ចុប្បន្នគឺជាអ្នកនិពន្ធកម្ពុជាមួយរូបដែលប្រើនាមប៉ាកកាថា “ហ៊ុន ឆេង វិ” និងកំពុងបម្រើការងារជាអ្នកនិពន្ធអត្ថបទភាពយន្ត (Script writer ) ក្នុងផលិតកម្មមួយ។ សូមអរគុណ៕
និពន្ធអត្ថបទ ៖ ឫទ្ធិពង្ស / រូបភាព ៖ ផុន សុខណេន / រក្សាសិទ្ធិ ៖ cambowriter.com