អត្ថបទនេះ​ ជាការ​ចែក​រំលែក​ផុស​ចេញ​ពី​គំនិតនិង​ចំណេះដឹង​​របស់​លោក​ ឡាំ លីម អ្នក​និពន្ធ​កម្ពុជា​ប្រកបដោយទឹក​ដៃ​មួយរូប និង​ជា​ម្ចាស់​ស្នាដៃ​សៀវភៅ​ល្បីៗទាំង​ ៤ក្បាល រួមមានសៀវភៅ “ប្រតិទិនទស្សនៈ ៣៦៥ថ្ងៃ, “ប្រតិទិនទស្សនៈ ២២២ថ្ងៃ, “អំណានជាអំណាច” និងសៀវភៅ “ដំណើរ ជាស្នាដៃ​សហនិពន្ធ​ជាមួយ​អ្នក​និពន្ធ​ល្បីចំនួនពីររូបទៀត សុទ្ធសឹងតែជាសៀវភៅដែលទទួលបានការគាំទ្រ​ពីសំណាក់​ប្រិយមិត្ត​អ្នក​អាន​យ៉ាង​ខ្លាំង។

អត្ថបទ ត្រៀមខ្លួនធ្វើជា​អ្នក​និពន្ធ” នេះ លោក​សរសេរ​ឡើង​ជា​ពិសេស​សម្រាប់​អ្នក​ដែល​ចង់​រៀន​វគ្គ​តែង​និពន្ធ និង​អ្នក​ទាំង​ឡាយ​ដែល​ចង់​ក្លាយជា​អ្នក​និពន្ធ​ដ៏ពិតប្រាកដ​មួយរូប​នៅ​ថ្ងៃ​អនាគត ដែលអាច​តាក់តែង​និពន្ធ​ស្នាដៃ​ល្អៗ​ប្រកបដោយ​គុណ​តម្លៃ​ឡើង សម្រាប់​ពលរដ្ឋ សង្គម ក៏ដូចជា​មនុស្ស​ជាតិ​ទូទៅផងដែរ។ អាស្រ័យ​ហេតុ​នេះ ដើម្បី​កុំ​ឱ្យ​ខាត​ពេល សូម​អ្នក​បន្តអាន និងសិក្សា​ស្វែង​យល់​ទាំងអស់​គ្នា​ជាមួយ “គេហទំព័រអ្នកនិពន្ធ​កម្ពុជា” យើង​ខ្ញុំដូច​តទៅ ដោយ​យើង​ខ្ញុំសូម​បង្ហាញ​នូវ​អត្ថបទ​ដែល​សរសេរ​ដោយ​ លោក ឡាំ លីម ទាំង​ស្រុង​ជូន​ដល់​លោក​អ្នក​ដូច​តទៅ ៖

១. ខ្ញុំ​មិន​យល់ថា​​ខ្លួនឯង​មានចំណេះ​ជំនាញ​ទាក់ទង​នឹង​ការ​តែង​និពន្ធ​ទេ តែ​ខ្ញុំ​មានចិត្តចង់​ចែក​រំ​លែ​កខ្លះ​ៗ ហើយ “ត្រឹម​តែ​ចែករំលែក​” ប៉ុណ្ណោះ។ អ្នក​​ណា​ដែល​ចង់​មានចំណេះ​ផ្នែក​តែង​និពន្ធ រមែង​ពេញចិត្ត​ទទួល​យកគំនិត​ ជាពិសេស​ក្នុង​ន័យ​ពិចារណា។​ ប៉ុន្តែ​អ្នក​ណា​​ដែល​មានចំណេះ​ដឹង​​ផ្នែក​នេះ​ច្រើន​មក​​ហើយ ឬជា​អ្នកជំនាញ គឺ​រមែង​គិតថា​ខ្ញុំ​ប្រហែលជា​អួតអាង។ បញ្ហា​ចិត្ត​សាស្រ្ត​បែបនេះ គឺ​​ជា​បញ្ហា​ធម្មតា​ទេ ហើយ​ក៏​​ពុំមែន​ជា​បញ្ហា​ធំដុំ​អ្វី​ដែល​ត្រូវ​យក​មក​គិត​​ដែរ ពីព្រោះ​មនុស្សយើង​ម្នា​ក់ៗ មិន​អាច​ធ្វើអ្វី​មួយ ដោយ​​បំពេញចិត្ត​មនុស្ស​គ្រប់​ៗគ្នា​បាន​ឡើយ។ ខ្ញុំ​សូមរំឭក​កាល​វេលា​ដែល​ខ្ញុំ​នៅជា​គ្រូបង្រៀន​ភាសាអង់គ្លេស​និង​កុំព្យូទ័រ​បន្តិច។ នៅ​ក្នុង​ថ្នាក់រៀន​មួយ កម្រិត​ចំណេះដឹង​របស់​សិស្ស​មាន​ខុស​ៗគ្នា។ បើ​បង្រៀន​មេរៀន​ជ្រៅ​ពេក បង្រៀន​លឿន​ពេក ខ្លាចក្រែង​លោ​សិស្ស​ដែល​ខ្សោយ​ៗ គ្នា​តាម​មេរៀន​មិនទាន់។ បើ​បង្រៀន​មេរៀន​រា​ក់ៗ​ពេក បង្រៀន​យឺត​ជ្រុល​ពេក ខ្លាចក្រែង​លោ​សិស្ស​ដែល​ពូ​កែៗ សិស្ស​ឆ្លាតៗ គ្នា​ធុញទ្រាន់។ ដូច្នេះហើយ​មាន​ជម្រើស ៣ក្នុង​ការ​បង្រៀន៖ ទី១ បង្រៀន​ដោយ​ផ្តោត​លើ​សិស្ស​ដែល​ពូ​កែៗ​, ទី២ បង្រៀន​ដោយ​ផ្តោត​ការ​យកចិត្ត​ទុ​ក​ដាក់​ចំពោះ​សិស្ស​ខ្សោយ​ៗ និង​ទី៣ បង្រៀន​សិស្ស​ពូកែ​ផង និង​បង្រៀន​សិស្ស​ខ្សោយ​ផង តែ​ត្រូវលៃ​លក​ម៉ោង​បង្រៀន​ជា​ពីរ។ នេះ​ជា​ស្ថានភាព​សិស្ស​នៅ​តាម​អង្គការ​ក្រៅ​រដ្ឋាភិបាល​ខ្លះ​ប៉ុណ្ណោះ។ តើ​អនាគត​ជា​អ្នកនិពន្ធ​គួរ​ត្រៀមខ្លួន​បែប​ណា​?

២. បើ​យើង​ចង់​ធ្វើជា​អ្នកនិពន្ធ ជាដំបូង​បំផុត គឺ​មិនមែន​ទៅរៀន​ជំនាញ​តែង​និពន្ធ ឬវិធី​សាស្រ្ត​ជោគជ័យ​ខាង​តែង​និពន្ធ​ទេ ពីព្រោះ​បើ​យក​ការ​តែង​និពន្ធ​មក​បង្រៀន​ជាវ​គ្គ​ជោគជ័យ​និពន្ធ​, ជា​ទស្សនៈ​ខ្ញុំ ខ្ញុំ​យល់ថា “បាត់​តម្លៃពិត​នៃ​អ្នកនិពន្ធ​អស់ហើយ​”។ ចុះបើ​ថា “ខុស​” អ៊ីចឹង​តើ​គួរតែ​បែប​ណា​វិញ​? ក្នុងនាម​ជា​គ្រូបង្រៀន​ដែល​មានចំណេះ​ដឹង តើ​គ្រូ​ប៉ុន្មាន​នាក់​ដែល​យក​វិជ្ជាជីវៈ​ជា​គ្រូ​មក​ស្វែង​រ​កភាព​ជោគជ័យ​? បើសិនជា​តម្លៃ​ស្នូល​នៃ​ចំណេះដឹង ត្រូវ​បាន​វាស់វែង​ដោយ​ទឹកប្រាក់ តើ​តម្លៃពិត​នៃ​អ្នកចេះដឹង​នៅឯណា​? ក្នុងនាម​ជា​អ្នករៀន​សូត្រ​ចេះដឹង គឺ​ពុំគួរ​យកចំណេះ​ដឹង​មក​ធ្វើជា​កាំជណ្តើរ​ទេ។ ខ្ញុំ​លើកឡើង​បែបនេះ​ពុំ​មែន​ជា​ទ្រឹ​ស្តី​បែប​​ឧត្តមគតិ​និយម​ឡើយ តែ​វា​ជា​សច្ចភាពនិង​ការពិត​មួយ​ដែល​នាំ​ឱ្យ​សង្គម​រីកចម្រើន។ តើ​អ្នក​ចង់​ចេះ​ជំនាញ​តែង​និពន្ធ គួរ​ធ្វើ​យ៉ាងណា​ខ្លះ​? កុំ​ទាន់​រៀន​ជំនាញ​តែង​និពន្ធ តែ​ត្រូវ​ហ្វឹកហាត់​ខ្លួនឯង ទាំង​ផ្នែក​បញ្ញា ស្មារតី ចំណេះដឹង ចរិតលក្ខណៈ​ឱ្យ​ល្អ​សិន​…។ ការ​តែង​និពន្ធ គឺ​ត្រូវការ​ចំណេះដឹង​ច្រើន មិនថា​ជា​ការ​គិត​ពិចារណា​បាន​ល្អ ការ​ចេះ​វិភាគ​វែកញែក​ស៊ីជម្រៅ ជា​មនុស្ស​ដែល​ពូកែ​ស្រាវជ្រាវ និង​មាន​ឧត្តមគតិ​ខ្ពស់។ ហេតុអ្វី​ត្រូវ​មាន​ឧត្តមគតិ​ខ្ពស់​? ពីព្រោះ​ថា “ទឹក​ប៊ិក​របស់​អ្នកនិពន្ធ​​អាចយ​កទៅ​រកស៊ី ឬចរចា​មុខ​ជំនួញ​ជាមួយ​អ្នកនយោបាយ​បាន​”។ បើ​យើង​មាន​ចំណុច​ទាំងប៉ុន្មាន​ខាងលើ​ហើយ គឺ​អាច​ធ្វើ​​ជា​អ្នកនិពន្ធ​បាន​ហើយ។ យុវជន​យើង​ពុំគួរ​ទៅរៀន​វគ្គ​តែង​និពន្ធ​ទេ តែ​យើង​ត្រូវ​រក​ឱកាស​វិនិយោគ​លើ​ចំណេះដឹង​ឱ្យបាន​ច្រើន ធ្វើ​យ៉ាងណា​ឱ្យ​ខ្លួនឯង​មានចំណេះ​ដឹង​ទូលាយ​ជាមុន​សិន។

៣. ក្រៅពី​ចំណេះដឹង​ហើយ គឺយើង​​ត្រូវការ​បទ​ពិសោធ​ជីវិត​ជាក់ស្តែង​ថែមទៀត។ តើ​អ្នកនិពន្ធ​គួរ​មាន​ចរិត​បែប​ណា​? និយាយ​​រួម និយាយ​ឱ្យ​ខ្លី និយាយ​ឱ្យ​ងាយ​យល់ អ្នកនិពន្ធ​ធ្វើ​ចរិត​បែប​ណា​ក៏បាន​ដែរ តែ​កុំឱ្យ​ខ្លឹមសារ​នៃ​សំណេរ និង​ការប្រព្រឹត្ត​របស់​ខ្លួនឯង ក្នុងនាម​ជា​​អ្នកនិពន្ធ​ខុសគ្នា​ឱ្យ​សោះ។ បើ​សំណេរ និង​ចរិត​ពិត​នៃ​អ្នកនិពន្ធ​មិន​មាន​លក្ខណៈ​ដើរ​ត្រសង​គ្នា ឬស្រដៀងគ្នា ឬមិន​ដូចគ្នា​ទេ គឺ​សំណេរ​នឹង​ក្លាយទៅជា​គ្មាន​តម្លៃ​ដាច់ខាត។ ចំណុច​នេះ​មានន័យថា “អ្នកនិពន្ធ​អាច​សរសេរ​ពី​ការ​ធ្វើល្អ សរសេរ​ពី​ការ​មាន​ចរិតល្អ ឬសរសេរ​ពី​ការ​ស្រឡាញ់​សង្គម តែបើ​ការប្រព្រឹត្ត​មិន​ដូច​នឹង​អ្វី​ដែល​ទឹក​ប៊ិក​ខ្លួន​ចារ​ជា​អក្ខរា​ទេ គឺ​ពុំមែន​ជា​ការត្រឹមត្រូវ​ឡើយ​”។ ជា​មនុស្សម្នាក់​ក្នុង​សង្គម ដែល​តំណាង​ឱ្យ​តួអង្គ​ចំណេះដឹង យើង​ត្រូវ​មាន​លក្ខណៈ​សម្បត្តិ​ជា​មនុស្ស​ត្រឹមត្រូវ ហើយ​ពុំ​អាច​ធ្វើអ្វី​បណ្តោយ​ខ្លួន​ឱ្យ​ដូច​មនុស្ស​ធម្មតា​បានទេ។ ការ​លើកឡើង​របស់ខ្ញុំ​បែបនេះ គឺ​ហាក់បីដូចជា​ដាក់កំហិត​ចំពោះ​អ្នកនិពន្ធ​បន្តិច តែ​នេះ​ជា​លក្ខខណ្ឌ​មួយ​ដែល​គួរ​ធ្វើ ដ្បិត​បើសិនជា​យើង​ចង់​កសាង​មូលធន​មនុស្ស​តាមរយៈ​អំណាន។ បើសិនជា​យើង​ចង់​បណ្តោយ​ខ្លួន ឬបណ្តែត​ប្រាណ​តាមតែ​ចិត្ត​ចង់​របស់​ខ្លួនឯង បម្រើ​តែ​តណ្ហា​ខ្លួនឯង ក៏​ពុំ​មានទាស់​ខុស​អ្វី​ដែរ។ ផ្ទុយទៅវិញ សំណេរ​របស់​យើង ទោះបី​ល្អ​យ៉ាងណាក៏ដោយ តែបើ​យើង​ធ្វើខ្លួន​មិន​ត្រឹមត្រូវ​ទេ គឺ​ខ្លឹមសារ​នៃ​សំណេរ​ដែល​ផ្សាយ​ចេញទៅ នឹង​ត្រូវ​សាបរលាប​ពី​ខ្លឹមសារ​ល្អ​ទៅជា​ខ្លឹមសារ​ឥតន័យ ឬជា​ខ្លឹមសារ​មិនល្អ ព្រោះតែ​ចរិត​លេងសើច​ហួសហេតុ ឬ​ចរិត​មិន​ត្រឹមត្រូវ ឬច​រិត​មិន​សមរម្យ​​របស់​យើង​ជាដើម។

៤. ខ្ញុំ​សុំ​លើកយក​ឧទាហរណ៍​អំពីខ្ញុំ​មក​ចែករំលែក។ ប្រសិនបើ​ខ្ញុំ​មានចំណេះ​ដឹង​ខាង​តែង​និពន្ធ ខ្ញុំ​នឹង​មិន​បង្រៀន​ជំនាញ​តែង​និពន្ធ​ទេ តែ​ខ្ញុំ​នឹង​ប្រែក្លាយ​ការ​បង្រៀន ​ឱ្យ​ទៅជា​ការ​បង្វឹក​ដោយ​ផ្ទាល់ ដោយ​មិន​យក​​ថ្លៃឈ្នួល​ជា​ថវិកា​ទេ​ (No price tag but priceless​)។ រយៈពេល​បង្វឹក គឺ​ត្រឹម​មួយឆ្នាំ។ របៀប​រៀន​​បែប​បង្វឹក​នេះ គឺ​មួយថ្ងៃ​ត្រូវ​អាន​សៀវភៅ​មួយ​ក្បាល ហើយ​សរសេរ​អត្ថបទ​ដែល​មាន​ប្រធានបទ​ជាក់លាក់​ពី ៥ទំព័រ ទៅ ១០ទំព័រ។ រហូតដល់​មួយឆ្នាំ ពេល​រៀនចប់ គឺ​នឹង​ក្លាយទៅជា​អ្នកនិពន្ធ​តែម្តង។ ការ​បង្វឹក​ពេញ​មួយឆ្នាំ​នេះ ខ្ញុំ​នឹង​បន្ថែម​លើ​ចំណេះដឹង​បច្ចេកទេស​ចាំបាច់​បំផុត​ខ្លះដូចជា ការ​រចនា​​អត្ថបទ​សៀវភៅ​តាមកម្ម​វិធី​ស្តង់​ដា (Adobe InDesign​), ការរចនា​ក្របសៀវភៅ​តម្រូវ​នឹង​ព្រលឹង​អត្ថបទ (Adobe Photoshop & Adobe Illustrator​), របៀប​ជ្រើសរើស​ចំណងជើង​សៀវភៅ​, រៀន​បន្សុទ្ធ​ចំណេះដឹង​តាមរយៈ​បរិបទ​សង្គម, ស្វែងយល់​ពី​សៀវភៅ​បកប្រែ​, សមាធិ​សម្រាប់​ការ​តែង​និពន្ធ (Writing meditations​), ព្រមទាំង​យុទ្ធ​សាស្រ្ត​រុញច្រាន​សៀវភៅ​ឱ្យ​ដល់ដៃ​អ្នកអាន​ទូទៅ​ផង​ដែរ។ លក្ខខណ្ឌ​ស៊ីជម្រៅ​នៃ​ការ​រៀន គឺ​មិន​ពិបាក​ឡើយ ដោយ​គ្រាន់តែ​រៀន​អាន​ឱ្យ​ពូកែ​, អាន​រហូត​ក្លាយទៅជា​អ្នក​​អាន​​បែប​ស្រាវជ្រាវ​, វិភាគ​អត្ថបទ​ឆ្លុះ​បញ្ជាំ​ងនឹង​សង្គម​, វិភាគ​ចរិត​អ្នក​សរសេរ (សម័យកាល ផ្នត់គំនិត ស្ថានភាព​…), បន្ទាប់មក គឺ​អាន​មនុស្ស និង​អាន​ពីសង្គម។ ក្រោយពី​បង្វឹក​មួយឆ្នាំ​ពេញ​ហើយ ខ្ញុំ​ហ៊ាន​ធានា​ថា​នឹង​ក្លាយទៅជា​អ្នកនិពន្ធ​ដែល​មានគំនិត​សរសេរ​សម្បូរ​បែប មិន​ចេះ​រីងស្ងួត។ យើង​នឹង​មិន​ហ៊ាន​បើក​បង្រៀន​វគ្គ​ជោគជ័យ​តែង​និពន្ធ​ទេ ដ្បិតពេលណា​ដែលយើង​ចេះ​និពន្ធ​ពិតប្រាកដ​ហើយ។

៥. បើ​មិន​មានប្រសិទ្ធភាព ឬបើ​មិន​ជឿ​​ខ្ញុំ​ទេ ក៏​មិនដឹង​ធ្វើ​យ៉ាងណា​ដែរ ពីព្រោះ​ថា “បើ​បង្រៀន​យក​លុយ ពេល​រៀន​មិន​ចេះ មិនបាន​ផល មិន​អាច​ក្លាយទៅជា​អ្នកនិពន្ធ គឺ​នឹង​ប្រគល់​លុយ​ជូន​វិញ តែ​ដល់​បង្រៀន​មិន​គិត​ប្រាក់​អ៊ីចឹង មិនដឹង​ថាត្រូវ​និយាយ​បែប​ណាទើប​ជឿ។ ចុងក្រោយ ទោះ​ជឿ​ឬមិន​ជឿ​ក៏ដោយ ក៏​មិន​សំខាន់​ដែរ ព្រោះ​ជាក់ស្តែង វា​គ្រាន់តែ​ឧទាហរណ៍​ប៉ុណ្ណោះ។ ខ្ញុំ​ពុំ​មាន​ចេតនា​អ្វី​ផ្សេង ក្រៅពី​ជូន​ជា​គំនិត និង​ការពិចារណា​ដល់​យុវជន​យើង​ដែល​ចង់​ក្លាយ​ខ្លួន​ទៅជា​អ្នកនិពន្ធ​ប៉ុណ្ណោះ។ ប្រឹងប្រែង​រៀនសូត្រ កុំ​ចេះតែ​ឈូឆរ​តាម​ការបញ្ចុះបញ្ចូល ពីព្រោះ​ការងារ​ខ្លះ វា​មិន​ស្រួល​ដូច​អ្នកបង្រៀន​វគ្គ​ជោគជ័យ​ខ្លះ​និយាយ​ទេ។ នៅក្មេង ប្រឹងរៀន ប្រឹង​អាន​សៀវភៅ​ឱ្យ​បាន​ច្រើន ចេះ​អត់ធ្មត់​លត់ដំ​ខ្លួនឯង​​​ឱ្យ​ល្អ​សិន ហើយ​សន្សំ​បទ​ពិសោធ​ឱ្យ​បាន​ច្រើន។ ទោះ​យើង​ចង់​ធ្វើអ្វី ក៏អាច​ធ្វើ​បាន​ដែរ តែ​ត្រូវ​ធ្វើ​ឱ្យ​ត្រូវ​ផ្លូវ ប្រឹង​វិនិយោគ​លើ​ចំណេះដឹង​ជាក់ស្តែង។ បើ​យើង​ពិតជា​ចង់​មែន កុំទៅ​រក​មនុស្ស​លេង​ៗ កុំទៅ​រក​មនុស្ស​ដែល​ប្រាប់​ពី​ផ្លូវកាត់ តែ​ត្រូវ​រក​មនុស្ស​ដែល​ដឹង​ផ្លូវត្រូវ​ទៅ​ពិតប្រាកដ ទៅដល់​គោលដៅ ព្រមទាំង​អាច​ឈរជើង​បាន​យូរអង្វែង។ បញ្ជាក់​ជូន​ជាថ្មី​ម្តង​ទៀត អត្ថបទ​នេះ​សម្រាប់​ពិចារណា ហើយក៏​ជា​ការ​ជូន​គំនិត​ដល់​យុវជន​យើង​ដែល​មានបំណង​ចង់​​ក្លាយ​ជា​​អ្នកនិពន្ធ​ដែរ។ ឧទាហរណ៍​ខាងលើ គឺជា​ចំណេះដឹង​ដែល​អ្នកនិពន្ធ​គួរ​មាន។ ថ្វី​ដ្បិត​ជាឧទាហរណ៍​ពិតមែន តែ​វា​ប្រយោជន៍​សម្រាប់​ការងារ​តែង​និពន្ធ។ បើ​កន្លែងណា​ដែល​មាន​បង្រៀន​ចំណេះដឹង​តែង​​និពន្ធ​ដូច​ឧទាហរណ៍​​ខាងលើ ​ដូច​ដែល​ខ្ញុំ​បាន​លើកឡើង គឺ​គួរតែ​សាកល្បង​រៀន។ យើង​នឹង​ក្លាយទៅជា​អ្នកនិពន្ធ​ពិតប្រាកដ នៅពេល​ណា​យើង​រៀន​ចំ​ចំណេះដឹង​ពិតប្រាកដ​។

លោក ឡាំ លីម និងសៀវភៅល្បីៗទាំង៤ក្បាលរបស់លោក

“គេហទំព័រអ្នកនិពន្ធកម្ពុជា” សូមបញ្ជាក់ថា ខាង​លើ​ជាអត្ថបទសរសេរចែករំលែក​ដោយលោក ឡាំ លីម ។ លោក​មានស្រុកកំណើត​នៅខេត្តសៀមរាប និង​ជាកសិករធ្វើស្រែសម្រាប់មួយក្រពះនៅ​លើ​​ទឹក​ដី​ដ៏​ពិសិដ្ឋ​នេះ​ដល់​សព្វថ្ងៃ​។ លោកមានបងស្រីពីរនាក់ និងប្អូនប្រុសពីរនាក់ ដោយលោកជាកូនប្រុសកណ្តាលក្នុងគ្រួសារ។ ក្រៅ​ពី​ចូល​ចិត្ត​អាន លោក​ជាបុគ្គលមួយរូបដែល​និយម​​​សរសេរជាសំណេរខ្លីៗ ជាពិសេសអត្ថបទដែល​ទាក់ទងនឹងទស្សនវិជ្ជាអប់រំ សង្គម នយោបាយ ភាពជាអ្នកដឹកនាំ និងផ្នែក​ប្រាជ្ញា​ស្មារតី​ក្នុង​ការ​គិត​ថ្លឹង​ថ្លែង​ពិចារណា​ជាដើម និង​ជា​ម្ចាស់​ស្នាដៃ​សៀវភៅល្បីៗទាំង​៤ក្បាលដូច​បាន​រៀបរាប់​ខាង​លើ។ ដូច្នេះ ប្រសិន​បើលោកអ្នកចង់ដឹងពីទឹកដៃក្នុងការសរសេរអត្ថបទប្រភេទ​នេះ​របស់លោក លោកអ្នកអាចស្វែងរកសៀវភៅ​ទាំង​ ៤ក្បាល​របស់​លោកនេះ​​​យកមកអានបាន ហើយ​បើ​លោក​អ្នក​ចង់​អានដោយងាយឆាប់​រហ័សនោះ លោក​អ្នកអាច​ចូលទៅអានអត្ថបទ​របស់​លោក​ក្នុង​ហ្វេស​ប៊ុក​ផ្លូវការ​របស់​លោក​តែម្ដងបាន តាមរយៈឈ្មោះ Lam Lim https://www.facebook.com/lamlem01 នោះ​លោក​អ្នក​មុខជាបាន​ដឹងច្បាស់​ជាក់​ជាមិនខាន។ សូមអរគុណ៕

អត្ថបទ និងរូបភាព ៖ ឡាំ លីម / រក្សាសិទ្ធិ ៖ cambowriter.com

ប្រពន្ធមិនចាំបាច់​​ឥតខ្ចោះ​នោះទេ តែប្រពន្ធចាំបាច់​ត្រូវតែល្អ ​ត្រូវ​​តែ​ជា​នារី​​ដែលអាចជួយលើក​កម្ពស់​មុខមាត់ស្វាមីនិងគ្រួសារឱ្យថ្កុំ​ថ្កើងរុងរឿង ទាំងកិត្តិយស ការងារ និងទ្រព្យសម្បត្តិ។ នេះ​ហើយជា​​​លក្ខណៈសម្បត្តិរបស់ប្រពន្ធ​ល្អ​ ដែល​បុរសៗទាំង​ឡាយ​​តែងតែ​ប្រាថ្នាចង់​បាន​ជាគូអនាគត និង​ចង់​ឱប​ក្រសោប​ក្នុង​ជីវិត​បំផុត។

លោក​ Mark Zuckerberg ស្ថាបនិក​ Facebook ដែលជាបណ្ដាញសង្គម​ដ៏ពេញ​និយម​ទូទាំង​ពិភពលោកនាពេល​​បច្ចប្បន្ន លោកបាន​លើក​ឡើងថា “ប្រពន្ធល្អ​ គឺជា​ប្រពន្ធ​ដែល​អាច​ជួយ​ជម្រុញ​ឱ្យ​ប្ដី​សម្រេច​កិច្ចការ​ធំ មិនមែនជាប្រពន្ធដែល​ចង់​ឱ្យ​ប្ដី​លើក​ធ្វើ​​ជាធំ​នោះ​ឡើយ” លោក​ចង់​មានន័យថា ​ទោះជា​​​ប្រពន្ធ​​​ពូកែ​យ៉ាង​ណា ឆ្លាត​វាង​វៃ​​យ៉ាង​ណា ត្រូវតែ​ចេះ​ដាក់​ខ្លួននៅពីក្រោយប្ដី ត្រូវតែ​ចេះ​ផ្ដល់​គំនិតយោបល់​​ឱ្យ​ប្ដី​នៅ​ពីក្រោយ​ខ្នង មិនមែនជាប្រភេទ​ប្រពន្ធដែល​ល្ងង់​ធ្វើ​ចេះ ហើយ​​តែងតែ​ព្យាយាម​ចង់​ដើរស្មើប្ដី ឆ្កាដៃ​ឆ្កាជើងច្រង៉េងច្រង៉ាង ទ្រឹស្ដី​ហៀរហូរ ដោយ​ចេះ​តែ​ចង់​សម្ដែង​គំនិត​នៅចំពោះ​មុខ​មិត្តភ័ក្តិក្រុម​ការងារប្ដី ដើម្បី​ចង់​ឱ្យគេមើល​គ្រប់​គ្នា​មើលឃើញថាខ្លួនជាប្រពន្ធដ៏អស្ចារ្យចេះ​ដឹងគ្រប់​រឿង​​នោះទេ ហើយ​ក៏គ្មាន​ប្ដី​ណាមកសប្បាយ​ចិត្ត​ដែល​ឃើញ​ប្រពន្ធ​របស់​ខ្លួនបែប​នេះ​​នោះដែរ ត្បិត​នេះ​ជារឿង​ដ៏គួរ​អាម៉ាស់ខ្លាំង​ណាស់​ចំពោះ​បុរសជាប្ដី​ក្នុង​ក្រសែ​ភ្នែក​មនុស្ស​ជុំ​វិញ​ខ្លួន ជាពិសេសមិត្តភក្តិ ក្រុម​ការងារ អ្នកក្រោម​បង្គាប់ និង​ដៃគូរស៊ីទាំង​ឡាយ។

ខ្ញុំ​ជឿ​ថា​ សព្វ​ថ្ងៃ​មាន​ច្រើន​ណាស់​នារីជាប្រពន្ធ​ដែល​មាន​ចរិត​បែប​នេះ តែ​ត្រង់​ចំណុច​នេះ ខ្ញុំសូម​មិនបរិយាយ​វែង​ឆ្ងាយ​ទេ ​តែ​អ្វីដែល​ខ្ញុំ​ចង់​បង្ហាញ​បំផុតនោះ គឺ​លក្ខណៈ​សម្បត្តិ​ល្អ​របស់​ប្រពន្ធ ដែល​ជា​ចំណុច​ដ៏ចម្បង​បំផុត​ដែល​កំណត់​​ជោគវាសនាគ្រួសារ​ប្ដី​ប្រពន្ធទាំង​ឡាយថា តើ​នឹង​រុងរឿង ឬអាប់ឱន​នៅថ្ងៃ​អនាគត ព្រោះ​បើ​ជា​ប្ដី​ពូកែយ៉ាង​ណា ល្អយ៉ាង​ណា ប្រកបដោយ​កេរ្តិ៍​ឈ្មោះ​កិត្តិយស​ខ្ពង់​ខ្អស់​កម្រិត​ណា ​បើ​ប្រពន្ធ​មិនប្រពន្ធ​មាន​ចរិត​មិន​កើត​ហើយ មុននិង​ក្រោយ​ច្បាស់ជាចំណង​គ្រួសារ​នោះ មុខជាគ្មាន​ថ្ងៃ​​អាច​​សាង​ភាព​ជោគជ័យធំ​ដុំ​ក្នុង​គ្រួសារ​​ ​ និង​មិន​អាច​ទទួល​បានការ​ឱ្យ​​តម្លៃខ្ពស់​ពីមនុស្ស​ជុំ​វិញ​ខ្លួន​ឡើយ ផ្ទុយ​ទៅវិញ មានតែ​ធ្វើ​ឱ្យ​គ្រួសារ​កាន់តែ​អាប់ឱន​ពី​មួយថ្ងៃ​ទៅ​មួយ​ថ្ងៃរហូត​ដល់​លិច​លង់​​ប៉ុណ្ណោះ។ ចំណែកឯរឿង​កិច្ចការផ្ទះ ការ​ទុកដាក់ទ្រព្យ​សម្បត្តិ ការប្រើប្រាស់​ពាក្យ​សម្ដី ឫកពារ អាកប្បកិរិយា មាយាទ និង​ភាព​ស្មោះ​ត្រង់​ក្នុង​គ្រួសារ ខ្ញុំ​សុំ​មិន​លើក​យកមក​និយាយ​នោះទេ ព្រោះចំណុច​អស់​ទាំង​នេះវាជាបេះដូងនៃ​ទំនាក់ទំនងគ្រួសារ​ប្ដី​ប្រពន្ធរួច​ទៅហើយ បើ​គ្មាន​​​ចំណុច​អស់​ទាំងនេះទេ​ គ្រួសារមួយ​ក៏មិនអាច​ដើរទៅមុខជាមួយ​គ្នា​ដល់​ត្រើយសុភមង្គលនៅ​ទីបំផុតដែរ។ 

ដូច្នេះ​ចូរចាំណា៎ស្ត្រីដែលកំពុង​មានងារ​ជាប្រពន្ធ​ទាំងឡាយ អ្នក​ត្រូវតែ​យល់​ពីចំណុច​នេះ​ឱ្យបាន​ច្បាស់ មិន​ថា​អ្នក​ឆ្លាត​វៃយ៉ាងណា ពូកែ​យ៉ាង​ណា ឬ​មាន​ឋានៈ​គ្រួសារ​ខ្ពង់​​ខ្ពង់​ជាង​ប្ដីកម្រិត​ណា​​នោះទេ ​អ្នក​ត្រូវតែ​ចេះ​ដាក់​ខ្លួន ត្រូវតែ​ចេះ​ផ្ដល់​តម្លៃ​ឱ្យ​ប្ដី​របស់​ខ្លួន​ឱ្យ​បាន​ខ្ពស់​បំផុត​តាមដែល​អាច​ធ្វើ​ទៅបាន ជាពិសេស​ពេល​នៅ​ចំពោះ​មុខ​អ្នក​ដទៃតែ​ម្ដង ​មិន​ត្រូវ​ធ្វើ​អ្វី​ក្នុង​ន័យចង់​​ឱ្យ​គេស្ងើច​សរសើរ​ខ្លួន​ថា​​អស្ចារ្យ​ជាង​ប្ដីនោះ​ឡើយ តែ​អ្នក​ត្រូវ​តែ​ជានារីដ៏​ពូកែ​ម្នាក់​ ត្រូវ​តែ​ជាទីប្រឹក្សា​ដ៏​ឆ្នើម​ម្នាក់​នៅ​ពី​ក្រោយ​ប្ដី ដែល​អាច​ជួយ​លើក​មុខ​មាត់​កិត្តិយសប្ដី និង​ជួយ​ឱ្យ​ប្ដី​សម្រេចកិច្ចការ​ធំបាន នោះទើប​​ហៅ​ថា​ជា “ប្រពន្ធល្អ ប្រពន្ធឆ្នើម” ពិតប្រាកដ។​ 

តែប្រពន្ធ​ទាំង​ឡាយ​ក៏​ត្រូវ​ចង់​ចាំ​ដែរ​ផង​ណា៎ ទង្វើ​នេះសម្រាប់​តែបុរស​ជាប្ដី​ទាំង​ឡាយ​ណា​ដែល​ស័ក្តិ​សមនឹង​​ឱ្យ​អ្នក​ផ្ដល់​តម្លៃ​និងលើក​តម្កើងតែប៉ុណ្ណោះ មានន័យថាជាប្ដីល្អដែលចេះ​ស្រឡាញ់ក្រុម​គ្រួសារ ស្មោះ​ត្រង់​ចំពោះ​គ្រួសារ ហ៊ាន​លះ​បង់គ្រប់​យ៉ាង​ដើម្បីគ្រួសារ ចេះលើក​កម្ពស់​មុខ​មាត់​កិត្តិយស​គ្រួសារ និង​គិតពីគ្រួសារ​ជាធំប៉ុណ្ណោះ មិន​មែន​ជាប្រភេទ​ប្ដី​ហេង​សយ ដែល​យក​ស្រា​ជាទឹក ហាង​ផឹក​ស៊ី​ជាផ្ទះ​នោះឡើយ៕

និពន្ធអត្ថបទ ៖ ឫទ្ធិពង្ស / រូបភាព ៖ Google / រក្សាសិទ្ធិ ៖ cambowriter.com

error: អត្ថបទរក្សាសិទ្ធ !!