បុរសខ្លះតាមស្រឡាញ់ស្រីស្អាតឆ្លាតពូកែមិនបាន ទៅជាគុំកួនស្អប់ខ្ពើមនាង តើជាទង្វើត្រឹមត្រូវដែរឬទេ?
- August 19th, 2019
មានបុរសៗមិនតិចទេដែលតាមស្រឡាញ់ស្រីស្អាតឆ្លាតពូកែមិនបាន ទៅជាគុំកួនស្អប់ខ្ពើមនាង រហូតដល់ថ្នាក់ជេរស្ដីប្រមាថ, មើលងាយមើលថោក, អៀលត្មះឱ្យនាងកប់ៗមាត់ថាជាស្រីលេងឫក, ប្រកាន់វណ្ណៈ, និងស្រឡាញ់រកតែប្រុសសង្ហា, សម្បូរដុល្លារ និងរៀនបានខ្ពង់ខ្ពង់ ឯបុរសដែលមិនឡូយ, មិនហ៊ឺហារ, ការងារមិនធំដុំ នាងមើលមិនចូលភ្នែក មិនព្រមផ្ដល់ក្ដីស្រឡាញ់ឡើយ។
ត្រង់ចំណុចនេះសួរថា តើជាទង្វើត្រឹមត្រូវដែរឬទេ? ទេ! ពិតជាមិនត្រឹមត្រូវឡើយ ព្រោះអ្វី? នេះក៏ព្រោះថា នៅលើលោកយើងនេះនារីណាក៏ប្រាថ្នាចង់បានបុរសល្អមកធ្វើជាគូអនាគតដែរ ហេតុនេះ ការណ៍ដែលនាងបដិសេធបុរសអស់ទាំងនោះ មកពីនាងមិនពេញចិត្ត គិតថាមិនស័ក្តិសមនឹងខ្លួននោះឯង។
ដូច្នេះបុរសទាំងឡាយដែលមានចរិតដូចខាងលើ សូមគិតគិតឡើងវិញឱ្យមែនទែន ព្រោះក្នុងរឿងស្នេហា អ្នកមានសិទ្ធិស្រឡាញ់នាង តែអ្នកគ្មានសិទ្ធិចាប់បង្ខំនាងឱ្យមកស្រឡាញ់អ្នកវិញឡើយ ព្រោះនាងក៏មានសិទ្ធិក្នុងការស្រឡាញ់នរណាម្នាក់ដូចអ្នកដែរ។
កន្លងមកខ្ញុំឃើញច្រើនណាស់ បុរសខ្លះគាត់រៀនបានខ្ពស់តែគាត់គ្មានសីលធម៌ ខ្លះមានទ្រព្យច្រើនតែចូលចិត្តមើលងាយអ្នកដទៃ ខ្លះចង់មានស្នេហ៍ស្មោះតែគាត់បែរជាឃើញស្រីមិនបាន ភ្នែកលានដូចក្ដាមសម្លឹងមិនដាក់ភ្នែក ជាពិសេសនោះ បុរសខ្លះគាត់គិតតែពីចង់បានស្រីស្អាតឆ្លាតពូកែជាគូ តែគាត់បែរជាមិនខិតខំសាងខ្លួនឱ្យមានតម្លៃក្នុងស្រកែភ្នែកនាង ដោយគិតតែពីចាប់ស្រឡាញ់ទាំងងងឹតងងុល លុះស្រឡាញ់នាងមិនបាន ក៏ទៅជាគុំកួន ហើយចាប់ផ្ដើមប្រមាថមើលងាយងាយ រហូតដល់តាមព្យាបាទនាងក៏មាន ទាំងដែលនាងមិនបានប្រព្រឹត្តកំហុសអ្វីចំពោះគេឡើយ ដោយគ្រាន់តែបដិសេធស្នេហ៍ចំពោះគេប៉ុណ្ណោះ ដែលស្ដាប់ទៅដូចជាមិនសមហេតុផលសោះ តែវាជារឿងពិតដែលកើតមានឡើងជាច្រើនរាប់មិនអស់ទៅហើយរហូតមកទល់បច្ចុប្បន្ន។
ដូច្នេះ សូមចងចាំណា៎បុរសទាំងឡាយដែលមានចរិតដូចខាងលើ បើអ្នកពិតជាចង់បានស្រីស្អាតឆ្លាតពូកែមកធ្វើជាគូអនាគតមែន អ្នកមិនត្រូវគុំកួនស្អប់ខ្ពើមនាងបើនាងបដិសេធស្នេហ៍អ្នក ផ្ទុយទៅវិញ អ្នកត្រូវតែខិតខំសាងខ្លួនឱ្យបានខ្ពស់បំផុត ទាំងសមត្ថភាព, ចំណេះដឹង, មុខរបរការងារ និងកេរ្តិ៍ឈ្មោះកិត្តិយសក្នុងសង្គម ជាពិសេសកិរិយាសម្បត្តិរបស់អ្នកតែម្ដងចាំបាច់ត្រូវតែល្អជាទីគាប់ចិត្តរបស់មនុស្សជុំវិញខ្លួន បើអ្នកអាចធ្វើបាន នោះទៅថ្ងៃខាងមុខ អ្នកនឹងមិនខ្វះស្រីស្អាតឆ្អាតឆ្លាតពូកែដែលចង់បានអ្នកមកធ្វើជាគូរបស់នាងឡើយ ត្បិតនារីណាក៏ប្រាថ្នាចង់បានបុរសដែលមានលក្ខណៈសម្បត្តិបែបនេះដែរ៕
និពន្ធអត្ថបទ ៖ ឫទ្ធិពង្ស / រូបភាព ៖ Google / រក្សាសិទ្ធិ ៖ cambowriter.com
