ហេតុអ្វីបានជាបុគ្គលជោគជ័យភាគច្រើន ច្រើនតែមានប្រភពមកពីគ្រួសារក្រីក្រ និងរៀនក្នុងសាលាបានតិច?
- August 19th, 2019
ប្រសិនបើអ្នកជាបុគ្គលដែលចូលចិត្តអានប្រវត្តិបុគ្គលជោគជ័យល្បីៗជុំវិញពិភពលោក អ្នកនឹងឃើញយ៉ាងច្បាស់ថា ភាគច្រើននៃបុគ្កលជោគជ័យល្បីៗអស់ទាំងនោះ សុទ្ធតែមានប្រភពមកពីគ្រួសារក្រីក្រ និងរៀនក្នុងសាលាបានតិចទាំងអស់។ ដូច្នេះ តើអ្វីទៅជាមូលហេតុដែលជម្រុញឱ្យពួកគេអាចសាងភាពជោគជ័យដ៏អស្ចារ្យក្នុងជីវិតទាំងស្ថានភាពរបស់ខ្លួនបែបនេះបាន? មិនបាច់ឆ្ងល់ច្រើនទេ! នេះក៏ព្រោះតែហេតុផលសំខាន់ៗ៣យ៉ាង ដូចខាងក្រោមនេះឯង ៖
ហេតុផលសំខាន់ទី១ / ព្រោះដោយសារតែពួកគាត់កើតមកចំគ្រួសារក្រីក្រនេះហើយ ទើបបានជាពួកគាត់ចាំបាច់ត្រូវតែខិតខំប្រឹងប្រែងធ្វើអ្វីៗគ្រប់បែបយ៉ាង ដើម្បីសាងជីវភាពរបស់ខ្លួនឱ្យបានកាន់តែល្អប្រសើរពីមួយថ្ងៃទៅមួយថ្ងៃ រហូតដល់អាចរំដោះខ្លួនចេញផុតពីស្ថានភាពក្រីក្រឆ្ពោះទៅរកភាពមានបានដ៏មិនគួរឱ្យជឿរហូតដូចសព្វថ្ងៃ។
ហេតុផលសំខាន់ទី២ / ព្រោះដោយសារតែពួកគេរៀនក្នុងសាលាបានតិច គ្មានសញ្ញាបត្រខ្ពស់ខ្ពស់ សម្រាប់ដាក់ចូលយកតួនាទីធំៗក្នុងក្រុមហ៊ុនល្បីៗនានាដូចជាអ្នករៀនបានខ្ពង់ខ្ពស់ដទៃនេះហើយ ទើបបានជាពួកគាត់ចាំបាច់ត្រូវតែខិតខំប្រឹងប្រែងព្យាយាមស្វ័យសិក្សារៀនសូត្រស្វែងរកចំណេះដឹងក្រៅសាលាពីប្រភពនានាមកពង្រឹងសមត្ថភាពរបស់ខ្លួនបន្ថែមឱ្យកាន់តែខ្លាំងពូកែជាបន្តបន្ទាប់ ហើយបង្កើតមុខរបររកស៊ីជារបស់ខ្លួន រហូតដល់អាចសាងខ្លួនជាថៅកែក្រុមហ៊ុនធំៗជាច្រើនដ៏មិននឹកស្មានដល់។
ហេតុផលសំខាន់ទី៣ / ព្រោះដោយសារតែពួកគាត់ឈឺចាប់ខ្លាំងនឹងការមើលងាយមើលថោករបស់មនុស្សជុំវិញខ្លួន ព្រោះតែខ្លួនក្រីក្រនិងរៀនក្នុងសាលាបានតិចនេះហើយ ទើបពួកគាត់បែកគំនិតចង់សងសឹកយកឈ្នះបុគ្គលទាំងអស់នោះវិញ ដោយការសាងខ្លួនឱ្យជោគជ័យជាងបុគ្គលអស់ទាំងនោះ រហូតដល់អាចសាងអាណាចក្រដ៏រុងរឿងក្នុងជីវិតខ្លួនបានលើសពីក្ដីស្រមៃដែលខ្លួនប៉ងក្នុងជីវិតទៅទៀត។
៣ហេតុផលសំខាន់ៗនេះហើយ គឺជាដើមចមដ៏ចម្បងបំផុតដែលបណ្ដាលឱ្យបុគ្គលជោគជ័យភាគច្រើន ច្រើនតែមានប្រភពមកពីគ្រួសារក្រីក្រនិងរៀនក្នុងសាលបានតិច ដែលអ្នកគួរតែដឹង និងយកជាគំរូក្នុងជីវិតរបស់អ្នក។ ខ្ញុំមិនដឹងថាសព្វថ្ងៃនេះ អ្នកដែលកំពុងតែអានអត្ថបទមួយនេះមានឋានៈជាអ្វី? ស្ថិតគ្រួសារមានជីវភាពបែបណា? ឬរៀនបានខ្ពង់ខ្ពស់កម្រិតណានោះទេ តែប្រសិនបើអ្នកជាកូនអ្នកក្រនិងរៀនក្នុងសាលាបានតិច គ្មានសញ្ញាបត្រខ្ពង់ខ្ពស់ដូចគេដទៃនោះ សូមអ្នកកុំអស់សង្ឃឹមឱ្យសោះ ព្រោះការសាងភាពជោគជ័យមិនមែនអាស្រ័យលើឋានៈគ្រួសារ ឬកម្រិតសញ្ញាបត្រនោះទេ តែវាអាស្រ័យនៅលើថា តើអ្នកមានសមត្ថភាព ចំណេះដឹង ភាពឆ្លាតវៃកម្រិត និងសេចក្ដីព្យាយាមក្នុងការអនុវត្តកិច្ចការងារដល់កម្រិតណានោះឯង បើអ្នកមានកាន់តែខ្ពស់ នោះកម្រិតដែលអ្នកអាចសាងភាពជោគជ័យបានក្នុងជីវិតក៏ខ្ពស់ទៅតាមនោះដែរ។ ហេតុនេះ អ្នកត្រូវតែតាំងចិត្តឱ្យបានរឹងមាំ ត្រូវតែចេះលើកទឹកចិត្តខ្លួនឯង និងត្រូវតែខិតខំប្រឹងប្រែងព្យាយាមសិក្សារៀនសូត្រក្រេបជញ្ជក់យកចំណេះដឹងពីប្រភពក្រៅសាលានានាឱ្យបានច្រើនបំផុត ដោយមិនត្រូវបាក់ទឹកចិត្ត ហើយបណញដោយឱ្យពេលវេលាដ៏មានតម្លៃកន្លងផុតទៅដោយឥតប្រយោជន៍ឡើយ ហើយខ្ញុំជឿជាក់១០០%ថា ប្រសិនបើអ្នកពិតជាមានការតស៊ូប្រឹងប្រែងមិនរាថយក្នុងការដើរឆ្ពោះទៅរកគោលដៅជីវិតរបស់អ្នកនោះ នោះអ្នកមុខជាអ្នកទៅដល់ទីប្រាថ្នាក្នុងជីវិតអ្នកបានជាក់ជាមិនខាន៕
និពន្ធអត្ថបទ ៖ ឫទ្ធិពង្ស / រូបភាព ៖ Google / រក្សាសិទ្ធិ ៖ cambowriter.com
