អ្នកនិពន្ធ អោម ចែតច័ន្ទថារី សម្ដែងអារម្មណ៍រីករាយក្រោយបានចេញផ្សាយស្នាដៃប្រលោមកំណាព្យដំបូងរបស់ខ្លួន
- June 11th, 2021
តាមរយៈហ្វេសប៊ុគផ្លូវការរបស់អ្នកនាង អោម ចែតច័ន្ទថារី បានបង្ហាញឱ្យដឹងថា អ្នកនាងទើបតែបានចេញផ្សាយស្នាដៃនិពន្ធផ្នែកប្រលោមកំណាព្យជាលើកដំបូងមានចំណងជើងថា «ស្ម័គ្រតាមទំនៀម» ដែលចំណងជើងនេះស្ដាប់ហើយហាក់មានការចាប់អារម្មណ៍យ៉ាងខ្លាំង។ ដោយហេតុចង់ដឹងច្បាស់ ខាង “គេហទំព័រអ្នកនិពន្ធកម្ពុជា” យើងខ្ញុំក៏បានទំនាក់ទំនងទៅអ្នកនិពន្ធតាមសារអេឡិចត្រូនិកសួរនាំឱ្យបានដឹងច្បាស់នេះ អ្នកនាងក៏បានរៀបរាប់បង្ហាញប្រាប់ជុំវិញស្នាដៃប្រលោមកំណាព្យដំបូងរបស់ខ្លួនមួយនេះថា “ជាការពិត! «ស្ម័គ្រតាមទំនៀម» ពិតជាស្នាដៃដំបូងផ្នែកប្រលោមកំណាព្យរបស់នាងខ្ញុំប្រាកដមែនដោយទើបតែបានចេញផ្សាយជាសៀវភៅថ្មីៗប៉ុន្មានថ្ងៃនេះឯង… តែនាងខ្ញុំសូមបញ្ជាក់ថា មិនមែនជាស្នាដៃទោលរបស់នាងខ្ញុំតែម្នាក់នោះទេ ខ្ញុំចង់មានន័យថា វាជាសៀវភៅរួមស្នាដៃគ្នាជាមួយកវីអ្នកនិពន្ធផ្សេងៗចំនួន៩រូបទៀត ដោយបូកទាំងនាងខ្ញុំសរុបទាំងអស់១០រូប ក្នុងសៀវភៅរួមគ្នាមានចំណងជើងថា «កម្រងប្រលោមកំណាព្យ» ដោយក្នុងនោះរឿងរបស់នាងខ្ញុំមានចំនួនតែ២០ទំព័រប៉ុណ្ណោះក្នុងទំព័រសរុបចំនួន ២៥៤។
អ្នកនិពន្ធ អោម ចែតច័ន្ទថារី (អ្នកនិពន្ធកម្ពុជានៅប្រទេសស្វីស)
អ្នកនាង អោម ចែតច័ន្ទថារី បានសង្ខេបរឿង «ស្ម័គ្រតាមទំនៀម»នេះប្រាប់គេហំព័រយើងថា “ជាសាច់រឿងនិយាយពីដំណើរជីវិតរបស់ក្មេងស្រីម្នាក់ ដែលបានឡើងមកបន្តការសិក្សានៅភ្នំពេញ។ នាងរៀនផង ធ្វើការផងរហូតបានបញ្ចប់បរិញ្ញាបត្រ។ ធ្វើការឆ្លងខេត្តឆ្ងាយពីផ្ទះដែលក្រុមគ្រួសារមាន ការបារម្ភពីសុខភាពផង និងទំនាក់ទំនងស្នេហាប្រុសស្រីខ្លាចមិនទៅតាមគន្លងប្រពៃណី ខ្លាចខូចចិត្តគិតខ្លីជាពិសេសឪពុកម្តាយរបស់នាងតែងតែផ្តាំផ្ញើនិងលើកទឹកចិត្តកូន។ ឆ្ងាយពីផ្ទះឆ្ងាយពីភ្នែកឪពុកម្តាយពិតមែន តែរ័ត្នជានារីរឹងមាំម្នាក់ និងមើលថែសុខភាពខ្លួនឯងបានល្អ។ចំពោះស្នេហាវិញ នាងតែងប្រុងប្រយ័ត្នមិនងាយបង់ចិត្តលើអ្នកណាដោយងាយឡើយ ពិសេសបុរសបានតែរសទឹកមាត់គ្មានសេចក្តីស្មោះពិត ដោយនាងធ្លាប់ឃើញគំរូមិត្តៗរងទុក្ខព្រោះតែស្នេហាមិនស្មោះជាច្រើននាក់។អាយុច្រើនទៅណាមកណាគេតែងសួរថ្ងៃណាចូលរោងការ តែនាងមិនបានខ្វល់ទេ ព្រោះនាងរង់ចាំជួបបុរសម្នាក់ដែលស្រឡាញ់នាងពិត ក្លាហានហ៊ានសារភាពក្តីស្រឡាញ់ចំពោះមុខនាងផ្ទាល់ និងផ្តល់កិត្តិយសចូលស្តីដល់មេបាគោរពតាមទំនៀមទម្លាប់ប្រពៃណីខ្មែរ។ អ្នកនាងបន្តសាច់រឿងទៀតថា“មានបុរសម្នាក់ហាក់ក្លាហានហ៊ានបោះពាក្យសុំស្រឡាញ់ សុំនាងធ្វើជាសង្សារជាច្រើនខែ ថាគេនឹងស៊ូរង់ចាំចម្លើយ។ យ៉ាងណានាងនៅតែជាក្មេងស្រី គង់ចាញ់នូវមន្តស្នេហ៍បុរសដែលពោលពាក្យផ្អែមល្ហែមលួងលោម។ ល្មមគិតច្បាស់ព្រមបើកចិត្តជឿថាស្មោះត្រង់ នាងក៏ពោលយល់ព្រមទទួលជាសង្សារ តែដោយគ្មាននិស្ស័យ ម្នាក់នោះក៏ដល់ថ្ងៃចូលរោងការល្មម។ នាងស្រាប់តែលែងជឿជាក់បុរសណាទៀតទាំងអស់ ដ្បិតថាជួបរឿងមិនសមបំណង តែក៏មិនត្រូវខូចចិត្តធ្វើបាបខ្លួនឯងដែរ។ រ័ត្នបានផ្ញើសារថា នារីមិនគួរឆាប់ជឿលង់នឹងសម្តីបុរស ឬមិនគួរឆាប់ប្រគល់ខ្លួនប្រាណឱ្យបុរសមុនចូលរោងការទេ ព្រោះវាអាចនឹងងាយចាញ់ល្បិចខាងបុរសដោយគេអាចដើរចេញដោយងាយ។ តួអង្គរ័ត្នបានលើកទឹកចិត្តនារីនៅក្នុងឃ្លាកំណាព្យ«ស្ម័គ្រតាមទំនៀម»ត្រង់វគ្គ១២៣ និង ១២៤ យ៉ាងដូច្នោះថា ៖
- ពេលនេះខ្ញុំឈឺតិចៗដែរ តែខ្ញុំខំថែខ្លួនឱ្យបាន
ធ្វើការរៀនសូត្រទៀតហំហាន គ្មានប្រុសរស់បានក៏មិនខ្សោយ
- ខ្សោយទៅឱ្យគេកាន់បានចិត្ត ខ្លួនស្រីតែពិតមិនបណ្តោយ
ទន់ខ្សោយមិនទន់ជ្រាយធ្វើឱ្យ ឈ្មោះស្រីក្រោយៗអាប់យសឡើយ។
សៀវភៅ “កម្រងប្រលោមកំណាព្យ” ស្នាដៃរួមរបស់កវីអ្នកនិពន្ធ១០រូប ដែលមានស្នាដៃរបស់ អ្នកនិពន្ធ អោម ចែតច័ន្ទថារី នៅក្នុងនោះ១
អ្នកនាង អោម ចែតច័ន្ទថារី បានបន្តសាច់រឿងសង្ខេបរឿងនោះទៀតថា “តួអង្គស្រីក្នុងរឿង នាងនៅតែជឿថាបុរសល្អនៅតែមានលើលោកនេះ មិនចាំបាច់ស្វែងរកទេ មើលថែខ្លួន និងរៀនបន្ថែមចំណេះដឹង ប្រឹងអភិវឌ្ឍខ្លួនឯងឱ្យតែខ្លាំងពូកែទៅ ពេលវេលាទៅមុខប្រាកដជាបានជួបបុរសដ៏ល្អពិតប្រាកដនោះជាក់ជាមិនខាន។ ហើយនៅទីបំផុតនាងក៏បានជួបបុរសដ៏ល្អម្នាក់ពិតមែនដោយថ្ងៃមួយ ស្របពេលដែលបេះដូងរបស់នាងកំពុងទំនេរស្រាប់តែមានបុរសស្រុកក្រៅម្នាក់បានមកទទួលទានអាហារថ្ងៃត្រង់នៅថ្ងៃចុងក្រោយមុននឹងគេត្រឡប់ទៅកាន់ប្រទេសដែលជាស្រុកកំណើតរបស់គេវិញបន្ទាប់ពីគេបានមកទស្សនាស្រុកខ្មែរជាលើកដំបូងក្នុងឆាកជិវិតរបស់ខ្លួន។ បុរសនោះចេះលើកដៃសំពះ គោរព និងចូលចិត្តជនជាតិខ្មែរដែលពេញដោយស្នាមញញឹមរួសរាយរាក់ទាក់។ គេបានរៀបរាប់សរសើរពីទេសភាពស្រុកខ្មែរ និងប្រាសាទចម្លាក់ដ៏ល្អឯករបស់ខ្មែរ។ ពិសេសទៅទៀតនោះ បុរសនោះបានឆ្លាក់ជាប់បុប្ផាកម្ពុជាមួយរូបជាប់ក្នុងបេះដូងមុននឹងឡើងយន្តហោះត្រលប់ទៅស្រុកកំណើតវិញ។បន្ទាប់មក ទោះជាគេទៅដល់ប្រទេសរបស់ខ្លួនវិញក្ដី ក៏គេតែងតែសួរសុខទុក្ខបុប្ផាកម្ពុជាមួយទងនោះតាមរយៈផ្ញើអ៊ីម៉េលជានិច្ចហើយនៅទីបំផុត ដោយពេញចិត្ត នឹកខ្លាំងពេក និងមានចិត្តស្រឡាញ់ស្មោះពិតផងនោះ គេក៏បញ្ចេញភាពក្លាហ៊ានសម្រេចចិត្តសួរនាំបេះដូងរបស់នាង និងសុំចូលស្តីដណ្តឹងរៀបការនាងជាប្រពន្ធតាមផ្លូវច្បាប់។ ការចេះពោលពាក្យបានសមរម្យ ចេះផ្ដល់តម្លៃនិងគោរពតាមប្រពៃណីខ្មែរបានល្អ បានឆក់យកបេះដូងរ័ត្នដែលជាតួអង្គស្រីឱ្យព្រមបើកទ្វារបេះដូងទទួលយករូបគេដោយពេញចិត្តពោរពេញដោយសេចក្ដីអាណិតស្រឡាញ់យ៉ាងខ្លាំងបំផុត។មិនយូរប៉ុន្មានពួកគេក៏ចាប់ផ្ដើមរៀបចំឯកសាររៀបការ ហើយចែកធៀបការទៅកាន់មនុស្សជាទីស្រឡាញ់ទាំងអស់របស់ខ្លួន ដើម្បីចូលរួមក្នុងពិធីរៀបអាពាហ៍ពិពាហ៍របស់ខ្លួនតាមគម្រោងដែលបានកំណត់ ប្រកបដោយភាពរីករាយ និងស្ម័គ្រតាមទំនៀមទម្លាប់ប្រពៃណីដ៏ផូរផង់របស់ខ្មែរ។វគ្គមួយដែលតួអង្គស្រីឈ្មោះរ័ត្នរំភើប បានបង្ហាញតាមរយៈការប្រើឃ្លោងឃ្លាជាកំណាព្យត្រង់វគ្គ ១៩៣ , ១៩៥ និង ១៩៨ ក្នុងថ្ងៃរៀបការរបស់ខ្លួនយ៉ាងដូច្នោះថា ៖
- ថ្ងៃនោះក៏ក្លាយជាការពិត ស្រីស្លៀកក្បិនរឹតយ៉ាងហានហំ
រៀបឫករៀបប្រាណបានយ៉ាងសម ខ្ញុំកូនខ្មែរចំមិនមែនកាត់។
- សំឡេងវាយឃ្មោះគោះហទ័យ ចិត្តអរលាយភ័យអស់អង្គា
បេះដូងក្តុងក្តាំងលោតគ្រប់គ្រា សូរប្រណាំងគ្នានឹងភ្លេងការ»។
…..
- អូនកូនក្រមុំសែនរំភើប ពេលប្រុសមកពើបឱបចង្កេះ
ឱនច្រមុះថើបដល់មាត់ក្រេះ ជាងថតបញ្ចេះថែមគ្រប់ប្លង់»។
អ្វីៗដែលបានរៀបរាប់ទាំងប៉ុន្មានខាងលើនេះហើយ គឺជាសាច់រឿងប្រលោមកំណាព្យ «ស្ម័គ្រតាមទំនៀម» សង្ខេបរបស់អ្នកនិពន្ធ អោម ចែតច័ន្ទថារី ដែលជាសាច់រឿងដ៏ទាក់ទាញមួយបើតាមការបង្ហាញរបស់អ្នកនិពន្ធ។ លើសពីនេះ ម្ចាស់ស្នាដៃប្រលោមកំណាព្យមួយនេះ ក៏បានបញ្ជាក់បន្ថែមពីស្នាដៃនិពន្ធរបស់ខ្លួនមួយនេះទៀតថា “រឿងនេះជាប្រភេទប្រលោមកំណាព្យបែបអប់រំមួយ ក្នុងន័យឱ្យនារីទាំងឡាយមានភាពរឹងមាំ បើទោះជាជួបស្នេហាបែកបាក់ក្នុងជីវិតច្រើនដងក៏ដោយ ដោយចង់ឱ្យនារីទាំងឡាយចេះទទួលស្គាល់ថា លើលោកនេះគ្មានអ្វីដែលសមតាមបំណងរហូតនោះទេ ហើយក៏មិនមែនចេះតែខកបំណងរហូតនោះដែរ ជាពិសេសទំនាក់ទំនងស្នេហាប្រុសស្រីនេះតែម្ដង។”អ្នកនាងបន្ថែមទៀតថា “យើងមានសិទ្ធិរើសគូជីវិតដោយខ្លួនឯងផង ដោយការជួយមើលពីគ្រួសារផង… អ្វីដែល សំខាន់គឺខ្លួនយើងត្រូវតែចេះសម្រេចចិត្តឱ្យច្បាស់លាស់ ប្រកបដោយទំនួលខុសត្រូវលើខ្លួនឯង ដោយមិនត្រូវបន្ទោសអ្នកណាទៅថ្ងៃក្រោយនោះឡើយ ហើយជៀសវាងពោលពាក្យសោកស្តាយ ព្រោះថាអ្វីៗគឺមិនទៀងទាត់ទេ។
អ្នកនិពន្ធ អោម ចែតច័ន្ទថារី និងកវីអ្នកនិពន្ធម្ចាស់ស្នាដៃរួមក្នុងសៀវភៅ៤រូបទៀត
ទាក់ទងនឹងស្នាដៃប្រលោមកំណាព្យមួយនេះ អ្នកនិពន្ធ អោម ចែតច័ន្ទថារី ក៏បានសម្ដែងពីអារម្មណ៍ពិតរបស់ខ្លួន ដែលបានចេញផ្សាយស្នាដៃប្រភេទនេះផ្លូវការដំបូងរួមគ្នាជាមួយកវីអ្នកនិពន្ធកម្ពុជា៩រូបផ្សេងទៀតយ៉ាងដូច្នោះថា “នាងខ្ញុំពិតជាមានអារម្មណ៍រំភើបសប្បាយរីករាយខ្លាំងណាស់ ដែលបានចេញផ្សាយស្នាដៃបែបប្រលោមកំណាព្យជាលើកដំបូង ហើយអ្វីដែលធ្វើឱ្យនាងខ្ញុំរឹតតែរំភើបទៀតនោះ គឺបានចេញផ្សាយស្នាដៃនេះរួមគ្នាជាមួយអ្នកនិពន្ធកម្ពុជាឆ្នើមៗជាច្រើនរូប។ អ្នកនាងឆ្លៀតបន្ថែមទៀតថា “ត្រង់ចំណុចនេះ នាងខ្ញុំសូមធ្វើការបញ្ជាក់ថា ក្រុមទសកវីមានសមាជិកទាំងអស់១០រូប ដោយសុទ្ធតែមានស្នាដៃទាំងអស់ក្នុងសៀវភៅ «កម្រងប្រលោមកំណាព្យ»សៀវភៅនេះបានចេញផ្សាយជាផ្លូវការកាលពីថ្ងៃព្រហស្បតិ៍ ៩កើត ខែជេស្ឋ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២០, ខែឧសភា, គ.ស. ២០២១ ថ្មីៗនេះឯង ដោយក្រៅពីស្នាដៃនាងខ្ញុំ គឺនៅមានស្នាដៃរបស់កវីអ្នកនិពន្ធចំនួន៩រូបទៀតដូចជា ឈ្មោះ គង់ សម្ភស្ស (រឿង កម្មស្នេហ៍), ឃុល ប៊ុននាដ (រឿង វាសនាបុប្ផាជាយដែន), ជួន ខ្មៅ (រឿង កំណាព្យស្នេហ៍), ទី លីឈៀង (រឿង ស្រមោលសង្គ្រាម), ភិរម្យដារ៉ា (រឿង គ្រួសាររីករាយ), មិន សុធី (រឿង នាងច័ន្ទនារី), សាម សុនិត (រឿង ចិត្តជានារី), ស៊ឹម គឹមសាត (រឿង ម៉ាក់ប៉ាល្មមឈប់ហើយ និង អ្នកនិពន្ធឈ្មោះ ឡុង លាបសុជាតា (រឿង អរគុណជីវិត)… ទាក់ទងនឹងសៀវភៅនេះ ប្រសិនបើលោកអ្នកមានបំណងចង់ជាវយកទៅអាន គឺអាចទាក់ទងបានតាមរយៈអ្នកនិពន្ធឈ្មោះ ឃុល ប៊ុននាដ (ទូរសព្ទលេខ ០១៧ ៥២២ ០០១) ដែលជាប្រធានក្រុមទសកវី និងនៅ “បណ្ណាល័យបញ្ញវន្ត(ភ្នំពេញ)” តាមរយៈ លោក សុខ ឡាក់ ដែលមានទូរសព្ទលេខ ០៩៨ ៨៦៨ ៤៤២ បាន។” អ្នកនាងបន្ត “ប្រលោមកំណាព្យ កើតចេញពី ក្រុមអ្នកនិពន្ធមួយក្រុម ឈ្មោះថា “ទសកវី”។ “ទស” បង្ហាញពីអ្នកនិពន្ធទាំង១០រូប “កវី”យើងខ្ញុំដែលមានចំណេះដឹងនៅតិចតួចស្តួចស្តើងនៅឡើយ មិនបានតាំងនាមខ្លួន ឯងថាជាកវីអ្វីឡើយ។ ដោយការស្រលាញ់ចូលចិត្តវិស័យតែងកំណាព្យ គោរព ដឹងគុណកវីជំនាន់មុន កវីរាមច្បង ក្រុមទសកវីកំពុងខិតខំពង្រឹងសមត្ថភាព រៀនសូត្របន្ថែម និងទទួលការស្ថាបនា ពីមិត្តអ្នកអាន ដើម្បីឆ្ពោះយកតាមគំរូល្អរបស់លោក។ “ទសកវី” គឺជាក្រុមបេក្ខជននៃពានរង្វាន់ព្រះនាងឥន្ទ្រទេវី ឆ្នាំ២០២០ ចំនួន១០រូប ដែលរួមចិត្តតែមួយចងក្រងសៀវភៅកម្រងប្រលោមកំណាព្យ ដើម្បីផ្សព្វផ្សាយក្នុងគោលបំណងជួយថែរក្សាស្នាដៃសិល្បៈតែងកំណាព្យ។ សៀវភៅកម្រងប្រលោមកំណាព្យនេះមានការរៀបចំចងក្រងយ៉ាងផ្ចិតផ្ចង់ពីបងប្រុស ឃុល ប៊ុននាដ និងការចូលរួមពីសមាជិកម្នាក់ៗ។ នាងខ្ញុំក៏សូមអរគុណដល់សមាជិកក្នុងក្រុមទាំងអស់ផងដែរក្នុងការចូលរួមចងក្រងសៀវភៅមួយក្បាលនេះឡើង។
កវីអ្នកនិពន្ធម្ចាស់ស្នាដៃរួមជាមួយ អ្នកនិពន្ធ អោម ចែតច័ន្ទថារី ៥រូបទៀត
អ្នកនិពន្ធ អោម ចែតច័ន្ទថារី បានបង្ហាញពីកត្តាដែលជំរុញឱ្យអ្នកនាងនិពន្ធស្នាដៃប្រភេទនេះឡើងថា “ហេតុផលដែលជំរុញឱ្យនាងខ្ញុំនិពន្ធស្នាដៃបែបប្រលោមកំណាព្យនេះឡើង គឺដោយសារតែកត្តា ពីរយ៉ាងគឺ ទី១ ឆ្នាំ២០១៩នាងខ្ញុំបានអានកំណាព្យរឿងជាលើកទីដំបូង ដែលមានចំណងជើង ថា«ម្លប់ជីវិត» ជាស្នាដៃរបស់កវីនិពន្ធ លឹមផាន់ណា ដែលជាប់ជ័យលាភី លេខ២ ផ្នែកប្រលោមកំណាព្យ ពានរង្វាន់លោក លី ធាមតេង ឆ្នាំ២០១៨ ពីក្រសួងវប្បធម៌ និងវិចិត្រសិល្បៈ។ ខ្ញុំធ្លាប់អានតែកំណាព្យខ្លីៗ ប្រសិនជាពេលនោះមិនបានអានទេក៏មិនដឹងថាប្រលោមកំណាព្យ ឬកំណាព្យរឿង សរសេររំលេចបែបណាដែរ។ ការអានជាគំនិត បណ្តុះការគិត ហើយចាប់ផ្តើមសរសេរ។ ខ្ញុំពិតជាសូមអរគុណប្អូនស្រី លឹម ផាន់ណា ខ្លាំងណាស់ ដែលបាននិពន្ធស្នាដៃដ៏ល្អមួយនេះឡើង។ ចំណែកកត្តា ទី២ នៅពេលដែលខ្ញុំបានឃើញការផ្សព្វផ្សាយអំពីការប្រលងស្នាដៃតែងនិពន្ធពានរង្វាន់ព្រះនាងឥន្ទ្រទេវី ឆ្នាំ២០២០ ប្រលោមលោកខ្នាតខ្លី និងកំណាព្យរឿង លើប្រធានបទសេរី ពីលោកគ្រូ កុក រស់លើបណ្តាញសង្គមហ្វេកប៊ុគ។ គ្រានោះហើយជាគ្រាដំបូងដែលនាងខ្ញុំបានគិត ហើយសម្រេចខិតខំបញ្ចប់សាច់រឿងប្រលោមកំណាព្យ ទាំងប្រថុចញ៉ុចមែនទែននាវេលាជិតបិទការទទួលយកស្នាដៃទៅហើយនោះ។ (ត្រង់នេះនាងខ្ញុំសូមបញ្ជាក់ថា រឿងរបស់នាងខ្ញុំមិនបានជាប់ជ័យលាភីទេ តែមានមិត្តក្នុងក្រុមទសកវី ពីររូបបានជាប់ពានរង្វាន់ និងបីរូបទៀតទទួលបានប័ណ្ឌកិត្តិយស ក្នុងកម្មវិធីប្រកួតប្រជែងនេះ។ នាងខ្ញុំសូមអរគុណក្រសួងវប្បធម៌ និងវិចិត្រសិល្បៈក៏ដូចជាលោកជំទាវ លោកគ្រូអ្នកគ្រូ និងគណៈកម្មការទាំងអស់ ដែលបានរៀបចំឱ្យមានជាកម្មវិធីដ៏ល្អនេះ ដំណើរការ ឡើង ដែលជាការចូលរួមចំណែកលើកកម្ពស់វិស័យតែងនិពន្ធនៅកម្ពុជាឱ្យកាន់តែរីកចម្រើនបន្ថែមទៀត)។
មុននឹងបិទបញ្ចប់បទសម្ភាសន៍ អ្នកនិពន្ធ អោម ចែតច័ន្ទថារី ក៏បានថ្លែងថា “ឆ្លៀតក្នុងឱកាសនេះ ខ្ញុំ ក៏ដូចជាសមាជិកក្រុមទសកវីទាំងអស់ សូមគោរពថ្លែងអំណរគុណដល់ប្រិយមិត្តដែលបានជួយគាំទ្រស្នាដៃកំណាព្យខ្មែរយើង ព្រោះការគាំទ្ររបស់ប្រិយមិត្ត គឺជាការកម្លាំងទឹកចិត្តនៃយើងខ្ញុំដែលជាកវី និពន្ធឱ្យកាន់តែមានកម្លាំងចិត្តក្នុងការរិះគិតអ្វីថ្មីៗបន្ថែមទៀត ក្នុងន័យចូលរួមជួយថែរក្សាមរតកកំណាព្យដូនតាយើងផង និងលើកលើកស្ទួយវិស័យតែងនិពន្ធជាតិខ្មែរយើងផង។ លើសពីនេះ ជាចុងក្រោយ នាងខ្ញុំក៏សូមលើកទឹកចិត្តដល់យុវជនខ្មែរដែលមានឧបនិស្ស័យក្នុងការតាក់តែងនិពន្ធ សូមចូលរួមដាក់ប្រឡងស្នាដៃតែងនិពន្ធក្នុង ពានរង្វាន់ព្រះនាងឥន្ទ្រទេវី ឆ្នាំ២០២១ ផ្នែកប្រលោមលោកខ្នាតខ្លី និងកំណាព្យរឿង លើប្រធានបទសេរីឱ្យបានច្រើនកុះករ ដើម្បីជាបទពិសោធន៍ដ៏ល្អមួយ ហើយក៏ជាឱកាសមួយជួយឱ្យបានស្គាល់មិត្តដែលជាអ្នកនិពន្ធដទៃៗជាច្រើនទៀតផងដែរ។ ហើយនាងខ្ញុំ ក៏មិនភ្លេចអរគុណដល់គេហទំព័រអ្នកនិពន្ធកម្ពុជា cambowriter.com ផងដែរ ដែលបានផ្ដល់កិត្តិយសសម្ភាសន៍ជួយផ្សព្វផ្សាយពីស្នាដៃប្រលោមកំណាព្យដំបូងរបស់នាងខ្ញុំនៅពេលនេះ។ សូមអរគុណ។”
អ្នកនិពន្ធ អោម ចែតច័ន្ទថារី និង ក្របរឿង “ឆ្នាំថ្មី” ស្នាដៃរឿងខ្លីបែបអប់រំមួយរបស់ខ្លួន
“គេហទំព័រអ្នកនិពន្ធកម្ពុជា” សូមបញ្ជក់ថា អ្នកនាងអោម ចែតច័ន្ទថារីមាននាមប៉ាកកាក្នុងវិស័យតែងនិពន្ធថា “និរតី” ។ កើតថ្ងៃទី១១ ខែមករា ឆ្នាំ១៩៨៨ នៅភូមិ៣ មណ្ឌល៣ ខណ្ឌមិត្តភាព ក្រុងព្រះសីហនុ ខេត្តព្រះសីហនុ។ មានឪពុកឈ្មោះអោម បូយ៉េតជាមន្ត្រីចូលនិវត្តន៍ និងម្តាយឈ្មោះប្រាជ្ញ សឿនជាស្ត្រីមេផ្ទះនិងមានបងប្អូនបង្កើតចំនួន៤នាក់ ស្រី២នាក់ ប្រុស២នាក់ ជាកូនស្រីច្បងក្នុងគ្រួសារ។ អ្នកនាងជាអ្នកនិពន្ធកម្ពុជាមួយរូបកំពុងរស់នៅប្រទេសស្វីស ជាមួយក្រុមគ្រួសាររបស់អ្នកនាង។ រឿង «ស្ម័គ្រតាមទំនៀម»ជាស្នាដៃប្រលោមកំណាព្យដំបូងរបស់អ្នកនាង ដោយកន្លងមកធ្លាប់តែចេញផ្សាយរឿងខ្លី, កំណាព្យខ្លីៗនិងទំនុកច្រៀងប៉ុណ្ណោះ។ ដោយក្នុងឆ្នាំ២០១៧ ស្នាដៃរឿងខ្លីមួយរបស់អ្នកនាងមានចំណងជើងថា“វីរនារី”បានចុះផ្សាយនៅក្នុងសៀវភៅ«មន្តទឹកខ្មៅ»ដែលជាកម្រងវណ្ណកម្មរួមសម័យជាមួយអ្នកនិពន្ធ២១រូបដទៃទៀត។ចំណែក រឿង“ភ្លេចអស់ហើយ”និង រឿង “ឆ្នាំថ្មី”ដែលជាប្រភេទរឿងខ្លី ត្រូវបាន“គេហទំព័រអ្នកនិពន្ធកម្ពុជា”ជ្រើសរើសឱ្យចុះផ្សាយក្នុងមាតិកា“រឿងខ្លីចម្រុះ”កាលពីប៉ុន្មានខែមុន។ ដូច្នេះប្រសិនបើលោកអ្នកចង់ដឹងថា តើប្រលោមកំណាព្យដែលជាស្នាដៃផ្នែកនេះដំបូងរបស់អ្នកនាងថាមានអត្ថន័យខ្លឹមសារល្អយ៉ាងណានោះ? លោកអ្នកអាចរកទំនាក់ទំនងរកទិញអានតាមរយៈការបង្ហាញខាងលើបាន នោះលោកអ្នកមុខជានឹងបានដឹងច្បាស់ពីកម្រិតទឹកដៃរបស់អ្នកនិពន្ធ អោម ចែតច័ន្ទថារីនិងអ្នកនិពន្ធ៩រូបទៀត ដែលមានក្នុងសៀវភៅនេះជាក់ជាមិនខាន ។ សូមអរគុណ៕
អត្ថបទ ៖ ពុទ្ធិពង្ស / រូបភាព ៖ អោម ចែតច័ន្ទថារី / រក្សាសិទ្ធិ ៖ cambowriter.com
