“អនិច្ចាជីវិត” គឺជា​ចំណងជើង​​សៀវភៅកម្រងកំណាព្យ ស្នាដៃនិពន្ធ​របស់ ​លោក ​វ៉ែន សុន​ កវីនិពន្ធ​ខ្មែរ​ជើងចាស់​ដ៏​ល្បាញ​ល្បី​មួយ​រូប​នៅ​កម្ពុជា​នាពេល​បច្ចុប្បន្ន ហើយ​ក៏ជា​ស្នាដៃ​ជ័យ​លាភី “ពានរង្វាន់កវីនិពន្ធ​អាស៊ី​អាគ្នេយ៍ ​ឆ្នាំ២០១៩” ។

តាម​រយៈ​ការចាប់អារម្មណ៍របស់ “សមាគមអ្នក​និពន្ធខ្មែរ” ដែល​បបង្ហាញ​ក្នុង​ទំព័រ​ដំបូងៗ​ក្នុង​សៀវភៅ​ខាង​លើ បាន​បង្ហាញ​ពីហេតុផល ក៏ដូចជា​​បុព្វ​ហេតុ​ដែល​ជំរុញ​ឱ្យសមាគម​សម្រេច​បោះ​ពុម្ពស្នាដៃ​​នេះ​ជាសៀវភៅ​ឡើងថា ការ​ស្រាវជ្រាវ បណ្ដុះបណ្ដាល និង​បោះពុម្ពផ្សាយ ជាបេសកកម្មរបស់​សមាគម​​អ្នក​និពន្ធខ្មែរ, ហេតុ​នេះ​ហើយ ទើប​គណៈ​កម្មការ​បោះពុម្ពផ្សាយ​នៃសមាគមអ្នក​និពន្ធ​ខ្មែរ ​សម្រេច​ជ្រើសរើស​ស្នាដៃ​ដែលធ្លាប់ជាប់ពានរង្វាន់​មកបោះពុម្ពផ្សាយ។ ការបោះពុម្ពនេះគឺជាការចូលរួមលើកកម្ពស់ស្នាដៃកវីនិពន្ធខ្មែរឱ្យទូលំទូលាយទៅក្នុង​សង្វៀន​អក្សរសិល្ប៍ផង, ​បង្ហាញ​ពីភាពលេចធ្លោ​របស់​បទនិពន្ធកំណាព្យ​ខ្មែរ​ផង, ជាកិច្ច​តបស្នងសងគុណ​ ក្នុងន័យថែរក្សាមរតកដែលជាស្នាដៃ​និពន្ធ​​ខ្មែរផង និង​ដើម្បី​ជាការលើក​​ទឹក​ចិត្ត​ផង។ កវីនិពន្ធ វ៉ែន សុន បានលះបង់ស្ទើរ​មួយ​ជីវិតក្នុង​បុព្វហេតុ​អក្សរសាស្ត្រជាតិ នេះ​ជា​សកម្មភាព​ដ៏​ប្រពៃ​មួយ​ក្នុង​នាមជា​កវីនិពន្ធខ្មែរ​មួយរូប​នៅកម្ពុជា ដែល​ទទួល​បាន​នូវការ​គោរព​លើក​តម្កើង​យ៉ាង​ប្រាកដ។

តាម​ខ្លឹមសារ​ក្នុងការចាប់​អារម្មណ៍របស់ “សមាគមអ្នក​និពន្ធខ្មែរ” ​បាន​បញ្ជាក់​ទៀតថា សៀវភៅនេះបានរួមបញ្ចូលវណ្ណកម្មមួយចំនួនដែលធ្លាប់​បោះ​ពុម្ពផ្សាយនៅក្នុង​កម្រងសៀវភៅ​អប់រំ​របស់​អង្គការ​អន្តរជាតិ​ក្នុងស្រុក ​ដែល​មានប្រែជា​ភាសាអង់គ្លេសផងដែរ… ចំណែក​ថវិកា​ចំណាយ​ក្នុង​ការ​បោះពុម្ព​ស្នាដៃ​នេះ​ឡើង សមាគមអ្នកនិពន្ធខ្មែរទទួលបាន​ការឧបត្ថម្ភគាំទ្រ​ពីមូលនិធិគ្រួសារ លោក អៀ ហុកនីម និង​លោកស្រី ហ៊ន ច័ន្ទ​សោភា រួមនឹង​មូលនិធិ​ កវីយិនលួត។

កម្រងកំណាព្យ “អនិច្ចាជីវិត” នេះ​ សមាគមអ្នកនិពន្ធខ្មែរ​បានដាក់លក់ជាសាធារណៈ ដើម្បីប្រមូលថវិកា ផ្ដល់ជូនលោកគ្រូ ​វ៉ែន សុន និង​បន្ត​បោះពុម្ពផ្សាយស្នាដៃ​របស់លោកមួយចំនួនទៀត។

កវីនិពន្ធ វ៉ែន សុន (រូបភាព​យកពីហ្វេសប៊ុគផេក សមាគមទ្រទ្រង់ការបោះពុម្ព និងអប់រំ)

ប្រវត្តិកវីនិពន្ធ វ៉ែន សុន

     កវីនិពន្ធ វ៉ែន សុន (Ven Son) នាមដើម រិត សុន្ទសារី  (Rith Sonsary)  កើតថ្ងៃទី​២៣ ​ខែវិច្ឆិកា ឆ្នាំ១៩៣៩ លោកឪពុកនាម រ៉ិត វ៉ែន​(ស្លាប់) អ្នកម្តាយនាម កាន់ សុំ (ស្លាប់)។

     កវីនិពន្ធ វ៉ែន សុន  កំព្រាឪពុកតាំងពីអាយុ៦ឆ្នាំ និងមានប្អូនស្រី២ នាក់ទៀត។  នៅពេលដែលឪពុកស្លាប់ដោយជំងឺអាសន្នរោគចោលទៅ កុមារ វ៉ែន សុន ត្រូវ ជីតាអ៊ំខាងឪពុកជាព្រះគ្រូចៅអធិការវត្តខ្យាងខាងជើង ព្រះនាម ម៉ៅ អៀម​ ជាជីតា យកទៅឱ្យនៅរៀនសូត្រជាមួយ ដែលកាលនោះការរៀនសូត្រតាមវត្តអារាមគឺរៀនបែបបុរាណដែលជាទូទៅការរៀនអក្សរសាស្ត្រជាតិជាកំណាព្យ សាស្ត្រាស្លឹករឹតទាំងអស់​ដូចជា៖   សាស្ត្រាច្បាប់ក្រម, កេរ្តិ៍កាល, ពាក្យចាស់, កូនចៅ, ច្បាប់ប្រុស, ច្បាប់ស្រី, ជុច និងត្រី, ផ្គរផ្តាំក្តាមខ្យង, សាស្ត្រាជាងកែវ, ឃុនឆាងឃុនផែន, សុបិនកុមារ, ព្រះចន្ទគោរព, មរណមាតា, មគ្គលីផល,​ព្រះគោព្រះកែវ, ហង្សយន្ត, ទិព្វសង្វារ, ព្រះជិនវង្ស, រិទ្ធិសែននាង  កង្រី (ឬហៅ រឿងនាង១២) រឿង នាងដាវគុន (និយាយពីក្បាច់គុនចិន),​ ស័ង្ខសិល្ប៍ជ័យ, ព្រះល័ក្សិណ្ណវង្ស, រឿងចៅស្រទបចេក និង រឿងទុំទាវ​។ ល។ និង ។ល។ វត្តខ្យាង ស្ថិត​នៅភូមិខ្យាង ឃុំស្វាយ  ស្រុកកំពង់ត្រឡាច  (បច្ចុប្បន្នស្រុកសាមគ្គីមានជ័យ) ខេត្តកំពង់ឆ្នាំង។​

ទីលំនៅបច្ចុប្បន្ន ភូមិក្បាលទំនប់ សង្កាត់បឹងទំពុន ខណ្ឌមានជ័យ រាជធានីភ្នំពេញ។

អំពីស្ថានភាពគ្រួសារ        កវីនិព្ធ វ៉ែន សុន មានភរិយានាម​     ណុប ណាគ្រី កើតឆ្នាំ១៩៥២​ ជាមេផ្ទះ។ ​​​​​​​​​​មានកូន៨នាក់ស្រី៥, ប្រុស៣ (ក្នុងចំនួននេះចប់បរិញ្ញាបត្រជាន់ខ្ពស់ម្នាក់ខាងបុរាណវិទ្យា និងថ្នាក់បរិញ្ញាបត្រចំនួន៤នាក់ ក្រៅពីនោះកម្រិតក្រោមថ្នាក់ទី​១២ ចំនួន៣​ នាក់។

​សៀវភៅកម្រងកំណាព្យ “អនិច្ចាជីវិត” របស់កវីនិពន្ធ ​វ៉ែន សុន ដែល​ទើប​បោះពុម្ពចេញ​ផ្សាយថ្មីៗ​

លក្ខណៈពិសេសរបស់កវីនិពន្ធ វ៉ែន សុន

កវីនិពន្ធ វ៉ែន សុន ជា​អ្នកនិពន្ធរឿងសម្រាប់កុមារដោយរូបភាព

– និពន្ធកំណាព្យសម្រាប់កុមារ ដោយរូបភាព

– សរសេរអក្សរភ្លេងអន្តរជាតិសម្រាប់សរសេរបទកំណាព្យ និងសម្រាប់ និពន្ធបទភ្លេង​ និងនិពន្ធទំនុកច្រៀង​បានផ្ទេរចំណេះដឹង​ផ្នែកកំណាព្យ ឱ្យអ្នកជំនាន់ក្រោយក្នុងវគ្គ​បណ្តុះបណ្តាលអ្នកនិពន្ធ​នៅសមាគមអ្នកនិពន្ធខ្មែរបាន៣៣វគ្គនិង កំពុងបង្រៀនមុខវិជ្ជា​កំណាព្យនៅមហាវិទ្យាល័យនាដសាស្ត្រនៃសាកលវិទ្យាល័យ​ភូមិន្ទ​ វិចិត្រសិល្បៈ(ឱ្យនិស្សិតឆ្នាំទី២និងឆ្នាំទី៣)។

កំរិតវប្បធម៌​​ និង​បទ​ពិសោធ

      កវីនិពន្ធ វ៉ែន សុន បានបួសរៀនក្នុងសំណាក់​ព្រះពុទ្ធសាសនា​ ​​រយៈពេលបួន​ព្រះវស្សា។

      ឆ្នាំ១៩៦២ បញ្ចប់មធ្យមសិក្សាចំណេះទូទៅដើម្បីចូលរៀន​  ផ្នែកតូរ្យតន្ត្រី នៅទីស្នាក់ការយុវជនរាជសង្គមនិយមខ្មែរ និងនៅសាលាជាតិតន្ត្រី បច្ចុប្បន្នជាមហាវិទ្យាល័យតូរ្យតន្ត្រី ជំនាញ​ឯកទេស​«Note Solfege, Theorie & Harmonie et Instrument Saxophone-Tenor​» គឺធ្វើការងាររដ្ឋផង រៀនផងរហូតដល់ ឆ្នាំ១៩៧០។

ឆ្នាំ២០១៣ ទទួល​បរិញ្ញាបត្រមហាវិទ្យាល័យផ្នែក​សិល្បៈ​  នាដសាស្ត្រនៃសាកលវិទ្យាល័យភូមិន្ទវិចិត្រសិល្បៈ ឯកទេស តែងនិពន្ធ (Writing Poem) ។

អំពីបទពិសោធការងារ

      ឆ្នាំ១៩៦៤ ដល់ ១៩៦៥ ជាអ្នកនិពន្ធទំនុកច្រៀងនៅក្រុមតន្ត្រី ព្រះរាជទ្រព្យរួមជាមួយ​​លោក​ ស្វាយ​ ស និងលោក ប៉ិច សាលឿន ជាអ្នកនិពន្ធបទភ្លេង។

      ឆ្នាំ១៩៦៥ ដល់១៩៧០ ជាតន្ត្រីករ Saxophone Tenor និងជាអ្នកនិពន្ធ បទភ្លេង និងទំនុកច្រៀង​នៅក្រុមតន្ត្រីរាជតម្រួត​   ភិរម្យ (Police រយៈពេលប្រាំឆ្នាំ)។

ឆ្នាំ១៩៧០ ដល់១៩៧៥​ ធ្វើការនៅវិទ្យុយុទ្ធជន AM ជាអ្នកផលិតកម្មវិធីកំណាព្យភ្លេងប្រពៃណី​ និង រឿងកំប្លែងខ្លី (ជាកងទ័ព E.X. G.P. រយៈពេល៥ឆ្នាំ)។

សម័យវាលពិឃាដ  ប៉ុល ពត ជាប្រជាជនថ្មី  គេចាត់ឱ្យធើ្វជា

ជាងឈើ នៅកងទី៩ ឃុំស្វាយ កំពង់ត្រឡាច កំពង់ឆ្នាំង។

បម្រើការងារសម័យរដ្ឋកម្ពុជា ១៩៧៩­ –២០០៨ រួមមាន ៖

-១៩៧៩-១៩៨១ ជាអនុប្រធានភ្លេងត្រែទ័ព

-១៩៨១-១៩៨៧ ជាប្រធានក្រុមសិល្បៈមហាជនយោធាក្រុង។

-១៩៨៧-១៩៩៣ នៅមន្ទីរវប្បធម៌សិល្បៈស្នងការឃោសនាអប់រំ នៃអគ្គស្នងការនយោបាយ​។

-១៩៩៣-២០០៨ នៅមន្ទីរហ្វឹកហ្វឺន កងទ័ពជើងគោក។

-ឆ្នាំ២០០៨ ជាអតីតនាយទាហាន ចូលនិវត្តន៍។

ចំពោះស្នាដៃពីឆ្នាំ១៩៧៩​រហូតដល់សព្វថ្ងៃនិពន្ធបទភ្លេង និង​ទំនុក​ចម្រៀង​១០បទ (ថត/ហង្សមាស) និពន្ធរឿងល្ខោននិយាយ​រឿង ចំណងដៃទឹកភ្នែក រឿង ផ្កាដុះលើថ្ម (ថតជាVideo​)​កំណាព្យ​បណ្តាំ​កវី (ទទួលជ័យលាភីលេខ១ បានមេដាយមាសពីក្រសួង​​  វប្បធម៌​ វិចិត្រសិល្បៈក្នុងមហោស្រព​ប្រឡងតែងនិពន្ធ​    ទូទាំង​ប្រទេសឆ្នាំ១៩៩១) និពន្ធរឿង ឋានសួគ៌ក្នុងសុបិន ជាប្រលោម​កំណាព្យទទួលបានពានរង្វាន់ «៧មករា» ពីសមាគមអ្នកនិពន្ធខ្មែរ ឆ្នាំ១៩៩៧ និពន្ធរឿង ភ្នំព្រះនាងកែវ ជាកំណាព្យបែបប្រវតិ្តសាស្ត្រ ទទួលបានពានរង្វាន់អក្សរសិល្ប៍ទន្លេមេគង្គក្នុងឱកាស​មហោស្រព​អក្សរ​សិល្ប៍​ប្រទេសទាំង​បី​នៅ​ទីក្រុង​វៀងចន្ទន៍ ប្រទេសឡាវ កាលពី​ ខែ​មីនា ឆ្នាំ២០១០។ល។

-ថ្ងៃទី២៦មិថុនា​ ២០១៣​ ទទួលពានរង្វាន់ Sunthorn Phu ថ្នាក់កវីអាស៊ានមកពីប្រទេសទាំង១០ នៅទីក្រុងបាងកក, ព្រះរាជាណាចក្រថៃ ជាស្នាដៃកំណាព្យ របាំប្រពៃណីខ្មែរ។ លោកបាន​និពន្ធ​រឿង និងកំណាព្យសម្រាប់កុមារ ឱ្យអង្គការមួយចំនួនដូចជាអង្គការ «Room to Read, Cambokids. SVA, អរិយធម៌ខ្មែរ និងគ្រឹះស្ថានបោះពុម្ពផ្សាយឯកជនមួយចំនួនទៀត។ល។

ការងារស្រាវជ្រាវអំពីរបៀបនិពន្ធ និងស្មូត្រកំណាព្យខ្មែររួមមាន

-ឆ្នាំ១៩៩១-២០០១​ចាប់ផ្តើមស្រាវជ្រាវទោល លទ្ធផលរកឃើញ១បទ គឺ៖

បទ ឥន្ទ្រជិត ឬ ឥន្ទជិត រកឃើញទាំងរបៀបសរសេររកឃើញទាំងរបៀបស្មូត្រ​​ដោយផ្ដល់ការចង្អុល​បង្ហាញ​ពីលោកតាអាចារ្យ​​  សួង គ្រុយ នៅវត្តហង្សឈូក ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។ លោកតាអាចារ្បបញ្ជាក់ថា “គាត់ចេះចាំបទឥន្ទជិត ឬ​ បទ ឥន្ទ្រជិត​នេះ តាំងពីអាយុ១០ឆ្នាំ នៅក្នុងសាស្ត្រាស្លឹករឹតរឿងព្រះបាទ វិនា ត្រង់ព្រះបាទវិនា ទ្រង់បញ្ជាឱ្យអាមាត្យចាត់ចែងធ្វើពិធីជញ្ជាត់ព្រលឹង ថ្វាយព្រះនាងគោត្តមីជាអគ្គមហេសីដែលនាងឆន្ទាច្រានទម្លាក់សមុទ្រ។ល។

ឆ្នាំ២០០១-ឆ្នាំ២០០៣ សហការស្រាវជ្រាវ សមាសភាពរួមមាន ខ្ញុំបាទ វ៉ែន​សុន កាលនៅជាអនុប្រធានសមាគមអ្នកនិពន្ធខ្មែរ។

សាស្ត្រាចារ្យ យ៉ាន់ បុរិន្ទ, អ្នកគ្រូសាស្ត្រាចារ្យ ម៉ម សុខលី​​​លោក ថី ចន្ទោ អ្នកសម្របសម្រូលសមាគម KamboKids ជាអ្នកឧបត្ថម្ភលទ្ធផលទទួលបាន១ បទ​ រកឃើញវិធីសាស្រ្តនិពន្ធបទមូលដ្ឋានគ្រឹះបំបែកចេញពីច្បាប់ដើម(បទទ្វេមាត្រ)​​​សរុប ៧៤​ បទ (នៅបាត់២ទៀតគឺ ទន្សាយទីសទៀស​​ និង មាន់ទឹកបណ្តើរកូន។​​  ក្នុងនោះដែរក៏បានរកឃើញបទស្មូត្រកំណាព្យ៥៩បែប។ល។

កវីនិពន្ធ វ៉ែន សុន ក្នុងសកម្មភាពការងារ​តែងនិពន្ធរបស់​លោក

“គេហទំព័រអ្នកនិពន្ធ​កម្ពុជា” សូមបញ្ជាក់ថា ទិន្នន័យ​ទាំង​ប៉ុន្មាន​ដែល​ខាង​គេហទំព័រយើង​ខ្ញុំបាន​​បង្ហាញ​ខាង​លើ គឺ​ផ្ដល់​ដោយ “​សមាគមអ្នកនិពន្ធខ្មែរ” ឯស្នាដៃ​កម្រងកំណាព្យ “អនិច្ចាជីវិត” របស់​កវី​និពន្ធ វ៉ែន សុន ​ដែលខាង​សមាគម​អ្នក​និពន្ធ​ខ្មែរសម្រេច​ចិត្ត​ជ្រើស​រើស​បោះពុម្ពផ្សាយ​ជាសៀវភៅ​នេះ ​ទទួលបន្ទុកបោះពុម្ព​ផ្សាយទាំងស្រុង​ដោយ គ្រឹះស្ថានបោះពុម្ពឯកសារខ្មែរ https://www.facebook.com/ ។ មែនទែនទៅ អ្វីៗ​ដែលពាក់​ព័ន្ធនឹង​កវី​និពន្ធ វ៉ែន សុន នៅមានច្រើន​ទៀតក្នុង​សៀវភៅ​ដែល​ទើប​បោះ​ពុម្ព​ចេញ​ផ្សាយ​នេះ ដែលអាច​ឱ្យ​លោក​អ្នក​ដឹង​បានដោយ​គ្រាន់​តែ​ស្វែង​រក​សៀវភៅ​នេះ​មកអាន​ប៉ុណ្ណោះ។ ដូច្នេះ បើ​លោកអ្នក​ចង់​ដឹង​ច្បាស់ថា តើ​ កវីនិពន្ធ​ វ៉ែន សុន កវី​និពន្ធ​ខ្មែរ​ជើង​ចាស់​ល្បាញ​​ល្បី​មានស្នាដៃ​សម្បូរ​បែប​យ៉ាង​ណា? ផ្នែក​អ្វី​ខ្លះ? មានចំណងជើង​អ្វី​ខ្លះ? ជាពិសេស​ស្នាដៃ​ “អនិច្ចាជីវិត” របស់​លោក​ ដែល​សមាគមអ្នក​និពន្ធ​ខ្មែរទើបតែសម្រេច​ជ្រើស​មក​បោះ​ពុម្ព​ថ្មីៗ​នេះ​មានអត្ថន័យ​ខ្លឹម​សារ​ល្អ​យ៉ាង​ណា? លោកអ្នក​អាច​ស្វែង​រកទិញនៅតាមតូបលក់សៀវភៅ, បណ្ណាគារ ឬទាក់ទងទិញ​តាមរយៈទូរសព្ទលេខ៖ ០៨៩ ៨៥៦ ៧៦៤ និង ០៩២ ៧៨៨ ៩៩០ ដែលជាលេខ​ទូរសព្ទ​របស់​ គ្រឹះស្ថានបោះពុម្ពឯកសារខ្មែរ។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ កវីនិពន្ធ វ៉ែន សុន / រក្សាសិទ្ធិ ៖ cambowriter.com ​