វិស័យតែងនិពន្ធពិតជាសំខាន់ណាស់​សម្រាប់​សង្គមជាតិនីមួយៗ ហើយក្នុងនោះ អ្នក​និពន្ធ​គឺជាតួអង្គយ៉ាងសំខាន់​ក្នុងការបង្កើតនូវស្នាដៃ​ផ្នែក​និពន្ធផ្សេង ដើម្បី​បម្រើ ក៏ដូចជា​លើក​ស្ទួយវិស័យនោះ ដែលជាផ្នែកមួយ​ក្នុងការ​ចូលរួមចំណែក​អភិវឌ្ឍ​វិស័យ​តែង​និពន្ធ ក៏ដូចជា​សង្គម​ជាតិ​របស់​ខ្លួន​ឱ្យកាន់តែ​រីកចម្រើន​យ៉ាង​ប្រាកដ។ បើ​ក្រឡេក​មក​វិស័យតែង​និពន្ធ​កម្ពុជា​យើង​វិញ ឃើញ​មួយរយៈ​ចុងក្រោយនេះ​ហាក់​មានសន្ទុះរីកចម្រើនគួរឱ្យកត់សម្គាល់ ជា​ពិសេស​ការចេញស្នាដៃ​ជាសៀវភៅ​ថ្មីៗគ្រប់​ផ្នែក​របស់អ្នក​និពន្ធ​ទាំងចាស់​ក្មេង ក្នុង​នោះ​សៀវភៅ​ប្រលោមលោកក៏​មានច្រើន​ផងដែរ​។ ដូច្នេះ ​ថ្ងៃ​នេះ​ “គេហទំព័រ​អ្នក​និពន្ធ​កម្ពុជា” សូម​លើក​យក​នូវ​បទសម្ភាសន៍​តាមសារអេឡិច​ត្រូនិកមួយ ជាមួយ​អ្នក​និពន្ធវ័យក្មេង​ឆ្នើម​មួយរូប គឺ លោក ឆាន់ វុត្ថា មកចែក​ជូន​ឱ្យ​លោកអ្នក​បាន​ដឹង ពីស្នាដៃ​ថ្មី​ចុងក្រោយ​របស់​លោក ដោយ​គេហទំព័រយើង​ខ្ញុំ សូម​លើក​យកតែ​សំណួរសំខាន់ៗជាមួយ​លោក មកបង្ហាញ​ជូន​ប៉ុណ្ណោះ។ ដើម្បី​បានដឹងច្បាស់ សូម​តាមដានដូចតទៅ ៖

លោក ឆាន់ វុត្ថា  ហៅ “វេហាស៍” និងសៀវភៅ “មន្តស្នេហ៍កូនកាំបិត” របស់លោក

គេហទំព័រ​អ្នក​និពន្ធ​កម្ពុជា ៖ តើ​រហូតមកទល់នឹងពេលនេះ លោកចេញស្នាដៃនិពន្ធរឿង​ប្រលោមលោក​ជាសៀវភៅបានប៉ុន្មានចំណងជើងហើយ? ហើយរឿងចុងក្រោយមានចំណងជើងអ្វី? សូមសង្ខេបសាច់រឿងបែបខ្លី!

លោក ឆាន់ វុត្ថា ៖ មកដល់ពេលនេះ ខ្ញុំបានចេញស្នាដៃចេញជាសៀវភៅបានចំនួន​៣ចំណងជើងហើយ មានដូចជា រឿង “ភ្លេចស្នេហ៍ក្បែរជើងមេឃ”, “មនុស្សគល់ឈើ” និងចុងក្រោយនេះរឿង “មន្តស្នេហ៍កូនកាំបិត”  ដែលជាប្រលោមលោកបែប​ស៊ើបអង្កេត និយាយអំពីការស្លាប់យ៉ាងអាថ៌កំបាំងរបស់ភរិយាម្ចាស់ភោជនីយដ្ឋានល្បីឈ្មោះមួយ ដែលមានការតាមរកការពិតពី សានុ ដែលជាកូនប្រុស ហើយគ្រប់យ៉ាងនៃរឿងនេះ គ្រប់គ្នាបានដាក់ការសង្ស័យទៅលើឪពុកនីតា ដែលជាតួឯកស្រី រហូតដល់ស៊ើបដឹងការពិតគ្រប់យ៉ាងបង្ហាញឡើងមក មិនដូចជាការគិតរបស់គ្រប់គ្នាឡើយ។

គេហទំព័រ​អ្នក​និពន្ធ​កម្ពុជា ៖ តើ​លោកមានគម្រោងចេញផ្សាយស្នាដៃនិពន្ធរឿងប្រលោមលោក​អ្វីទៀត​ទេខាងមុខ? បើមាន! តើមានចំណងជើងអ្វី? ជាប្រភេទរឿងអ្វី? និងចេញផ្សាយ​ផ្លូវការ​ពេលណាដែរ?

លោក ឆាន់ វុត្ថា ៖ សម្រាប់ការចេញផ្សាយបន្ទាប់ ខ្ញុំមានគម្រោងចេញផ្សាយសៀវភៅថ្មីចំនួនពីររឿងទៀតនៅក្នុងឆ្នាំ២០២១ ប៉ុន្តែរឿងដែលបោះពុម្ពបន្ទាប់ពីរឿង “មន្តស្នេហ៍កូនកាំបិត” មានចំណងជើងថា “ចង្វាក់បេះដូង” ជាប្រភេទរឿងស្នេហាបុរសនិងបុរស ហើយអាចនឹងមានវត្តមាននៅលើទីផ្សារនៅដើមឆ្នាំក្រោយនេះឯង។

សៀវភៅប្រលោមលោក​ទាំង៣ក្បាលរបស់ លោក ឆាន់ វុត្ថា 

គេហទំព័រ​អ្នក​និពន្ធ​កម្ពុជា ៖ ប្រសិនបើប្រិយមិត្ត​ចង់​ទិញសៀវភៅ​រឿងប្រលោមលោករបស់​លោក​យកទៅអាន តើពួកគាត់ទាក់ទង​រកទិញបានដោយវិធីណា? និងនៅកន្លែងណាខ្លះ?

លោក ឆាន់ វុត្ថា ៖ ប្រសិនបើប្រិយមិត្តចង់ទិញសៀវភៅខ្ញុំបាទ​យកទៅអាន ប្រិយមិត្ត​អាច​រកទិញ​បាន​នៅផេក ក៏ដូចជា​ទីតាំង​មួយចំនួនដូចជា Page វេហាស៍, ហាងស្រលាញ់សៀវភៅ គ្រប់សាខា, តូបពន្លឺវិជ្ជា, កាហ្វេស្វាង និងហាងសៀវភៅ, នគរសៀវភៅ,  Le Story , និស្ស័យស្នេហ៍សៀវភៅសួស្តីកាហ្វេ ជម្ពូវ័ន្ត, បណ្ណាល័យបញ្ញវន្ត, បណ្ណាគារអ្នកម្តាយ ខេត្តកំពង់ចាម, ចូលចិត្តសៀវភៅ, មីនា-March Books, Grey Universe, ទំព័រជីវិត ខេត្តសៀមរាប, ជីវិត និងសៀវភៅ ក្រុងព្រះសីហនុ, នគរសៀវភៅ, Sycon ខេត្តព្រៃវែង, ហាងប្លូរ៉ូមែន, បណ្ណាគារលឹមឆៃនី ខេត្តព្រះវិហារ, បណ្ណាគារឥន្ទ្រទេវី ខេត្តបាត់ដំបង និងតាមបណ្តាហាងជាច្រើនទៀត… ឬក៏​អាច​ទំនាក់​ទំនង​មកកាន់ខ្ញុំផ្ទាល់​តាមរយៈហ្វេសប៊ុគផ្លូវការ​របស់ខ្ញុំដែលមានឈ្មោះថា ឆាន់ វុត្ថា https://www.facebook.com/bro.vuthana ក៏បាន។

គេហទំព័រ​អ្នក​និពន្ធ​កម្ពុជា ៖ ជាចុង​ក្រោយ តើអ្វី​ជាមតិរបស់លោកមុននឹងបិទ​បញ្ចប់​សម្ភាសន៍ជាមួយ “គេហទំព័រអ្នកនិពន្ធ​កម្ពុជា” នៅពេលនេះ? សូមគោរពអញ្ជើញ!! …

លោក ឆាន់ វុត្ថា ៖ ជាចុងក្រោយ ខ្ញុំសូមអរគុណដល់ “គេហទំព័រអ្នកនិពន្ធ​កម្ពុជា” ជាពិសេសបងប្រុស គង់ រង្សី ដែលបានផ្តល់កិត្តិយស​សម្ភាសន៍ខ្ញុំ​នៅពេលនេះ។ ហើយ​ឆ្លៀតក្នុង​ឱកាសនេះ ខ្ញុំក៏សូមថ្លែងអំណរគុណដល់ប្រិយមិត្តអ្នកអានដែលតែងតែគាំទ្រស្នាដៃរបស់ខ្ញុំ និងអ្នកនិពន្ធដទៃៗទៀតផងដែរ។ ដោយ​មុននឹង​បញ្ចប់​ ខ្ញុំគ្រាន់តែ​មានជាគំនិត​បន្តិច​បន្តួចទៅកាន់បងប្អូនដែលស្រឡាញ់វិស័យតែងនិពន្ធថា បើ​បងប្អូនចង់​ក្លាយជា​អ្នក​និពន្ធ​ដែលអាច​សាងស្នាដៃ​និពន្ធ​ល្អ​មួយរូបពិតប្រាកដ សូមបងប្អូនស្វែងរកការបង្ហាត់បង្ហាញពីអ្នកនិពន្ធរៀមច្បង ឬស្ថាប័នដែលមានវិជ្ជាជីវៈច្បាស់លាស់ ដើម្បីជាដើមទុនបន្ថែមទៅលើទេពកោសល្យពីធម្មជាតិរបស់ខ្លួន និងព្យាយាម​និពន្ធ​ស្នាដៃមួយដែលមានលក្ខណៈមួយជារបស់ខ្លួន មិនថា​ជាស្នាដៃ​ផ្នែក​អ្វីនោះ​ឡើយ។

អ្នក​និពន្ធ​ ឆាន់ វុត្ថា ហៅ “វេហាស៍” កំពុងលេងឧបករណ៍រនាដ ក្នុងសម្លៀកបំពាក់បែបប្រពៃណីខ្មែរ

“គេហទំព័រអ្នកនិពន្ធកម្ពុជា” សូមបញ្ជាក់ថា លោក ឆាន់ វុត្ថា មាននាមប៉ាកកាក្នុងវិស័យតែងនិពន្ធថា “វេហាស៍” ។ លោកកើតឆ្នាំ១៩៩៣ នៅភូមិព្រៃធំ ឃុំស្មោងត្បូង ស្រុកកំចាយមារ ខេត្តព្រៃវែង។ លោកមានឪពុកឈ្មោះ ទួន សឿន និងម្តាយឈ្មោះ ស៊ុំ រិន ដោយ​មានបងប្អូនបង្កើតចំនួន៦នាក់ ក្នុងនោះ​ប្រុស៤នាក់ ស្រី២នាក់ ហើយលោកជាកូនទី៣ក្នុងគ្រួសារ។ បច្ចុប្បន្ន ក្រៅពីមានអាជីពជាអ្នក​និពន្ធកម្ពុជាមួយរូប លោកគឺជា​ម្ចាស់​កន្លែងលក់សម្ភារៈសិក្សាខ្នាត​តូច​មួយកន្លែង ដែលមានទីតាំងនៅខាងមុខសាលាបឋមសិក្សា និងអនុវិទ្យាល័យព្រៃធំ ​ក្នុងទឹក​ដី​នៃ​ស្រុកកំណើត​របស់​លោក​តែម្តង។ ហេតុនេះ បើ​លោក​អ្នកចង់​ដឹងថា តើស្នាដៃ​និពន្ធ​ប្រលោមលោក​របស់​លោក​មានភាព​ទាក់ទាញ​យ៉ាងណា? និងមានអត្ថន័យខ្លឹមសារ​យ៉ាង​នោះ? លោក​អ្នក​​អាច​ស្វែងរក​សៀវភៅ​ទាំង​៣ក្បាល​របស់​លោក​យកមកអាន តាមការ​បញ្ជាក់​បង្ហាញ​ខាងលើ​របស់​លោក​បាន ដោយ​គេហទំព័រយើងខ្ញុំ​ជឿជាក់ថា លោក​អ្នក​មុខជា​ស្លុងអារម្មណ៍នឹងសាច់​រឿង​ក្នុង​សៀវភៅ​របស់​លោក​ជាក់​ជាមិនខាន។​ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ ឆាន់ វុត្ថា / រក្សាសិទ្ធិ ៖ cambowriter.com