លោក ទី ធាវី កើត​ថ្ងៃទី១៤ ខែមករា ឆ្នាំ១៩៧៥ មានឪពុកឈ្មោះ ទី គិន  និងម្តាយឈ្មោះ អេង ឡន និងមាន​បងប្អូនបង្កើតចំនួន៧នាក់ ក្នុងនោះស្រី៥នាក់  និងបងប្រុស១នាក់  ហើយលោកជាកូនពៅក្នុងគ្រួសារ។ បច្ចុប្បន្ន ក្រៅពីអាជីពជាអ្នកនិពន្ធ លោកជាបុគ្គលិកបម្រើការងារនៅក្រុមហ៊ុនធានារ៉ាប់រងឈានមុខគេមួយនៅកម្ពុជាដោយមានតួនាទីជាមន្ត្រីជាន់ខ្ពស់អង្កេតហានិភ័យ។ ក្រៅពីនេះ លោកក៏ជាម្ចាស់ស្ទូឌីយោ និងផលិតកម្ម EYE SCENE ដែលជាផលិតកម្មប្រកាន់នូវគោលជំហរផលិតតែបទចម្រៀងនិពន្ធថ្មីមិនលួចចម្លងផងដែរ។

លោក ទី ធាវី អ្នកនិពន្ធកម្ពុជាមួយរូប និង និម្មិតសញ្ញាផលិតកម្មរបស់លោក

បើ​និយាយ​ពីការ​តែងនិពន្ធនេះ លោក ទី ធាវី ចាប់ផ្តើមតែងនិពន្ធតាំងពីឆ្នាំ២០០៤មកម្ល៉េះ ដោយ​លោក​ចេះតែងនិពន្ធជាច្រើនផ្នែក ដូចជា អត្ថបទសារព័ត៌មាន, កំណាព្យ, ទំនុកច្រៀង, ប្រលោមលោក និងសេណារីយូភាពយន្តជាដើម ដែលអាច​និយាយបានថា លោកគឺជាអ្នកនិពន្ធពហុជំនាញ​មួយរូប។ កន្លងមកលោកក៏​ធ្លាប់ចេញផ្សាយស្នាដៃមួយចំនួនផងដែរដូចជា ចងក្រងបោះពុម្ពសៀវភៅចំណងជើងថា “ដើម្បីឈ្នះល្បែងជីវិត” រឿងខ្លី “ហួសពេលហើយអូន” និងអត្ថបទសារព័ត៌មានជាច្រើនតាមទស្សនាវដ្តី លើស​​​ពីនេះ រឿង “ព្រហ្មលិខិត” ដែលជាស្នាដៃមួយទៀតរបស់លោក ក៏បានចុះផ្សាយនៅ web page របស់អ្នកនិពន្ធល្បីឈ្មោះកំពុងរស់នៅប្រទេសបារាំង លោក ជំទាវ ពេជ្រ សង្វារវ៉ាន ផងដែរ។

បន្ថែមលើសពីនេះទៅទៀត ក្នុង​បទសម្ភាសន៍ជាមួយ “គេហទំព័រអ្នកនិពន្ធកម្ពុជា” លោក ទី ធាវី ក៏បានបង្ហាញបន្ត​ទាក់ទងរឿងជ័យលាភីតែងនិពន្ធវិញម្ដងថា “ខ្ញុំ​ធ្លាប់ជាប់ភាគច្រើនក្នុងពានរង្វាន់កិត្តិ​យស ទី១ ទំនុកច្រៀងបទ “យប់មិនព្រាត់ថ្ងៃ” ក្នុងកម្មវិធីប្រកួតស្នាដៃទំនុកច្រៀង រៀបចំដោយស្ថានីយ៍​ទូរទស្សន៍អាសីអាគ្នេយ៍ ឆ្នាំ២០១២។ ទី២ ស្នាដៃប្រលោមលោកខ្លីរឿង “និស្ស័យទន្លេ”  ជាប់លេខ៥ ក្នុង​ការ​ប្រកួត​យក​ពានរង្វាន់ទន្លេមេគង្គ រៀបចំដោយ សមាគម​អ្នក​និពន្ធ​ខ្មែរ ​ឆ្នាំ​២០១៤។ ទី៣ ជាប់ពានរង្វាន់លេខ៤ស្ទួន ជារង្វាន់កិត្តិយស ឆ្នាំ២០១៩ ក្នុងកម្មវិធីយុវជនដើម្បីវប្បធម៌ ​ដែលរៀបចំដោយ ក្រសួងវប្បធម៌និងវិចិត្រសិល្បៈ។”

កម្រងរូបភាពសំំខាន់ៗរបស់លោក ទី ធាវី ក្នុងពិធីទទួលប័ណ្ណសរសើរជ័យលាភីផ្នែកតែងនិពន្ធកន្លងមក

ត្រឡប់​មក​ប្រធានបទសំខាន់នៅពេលនេះវិញ មែនទែនទៅ​គេហទំព័រយើងខ្ញុំ​ចង់​លើការងារតែងនិពន្ធចម្រៀងបទថ្មីរបស់ លោក ទី ធាវី ទៅវិញទេ ព្រោះ​លោក​គឺជាអ្នក​និពន្ធកម្ពុជាមួយរូបដែលប្រកាន់គោលជំហរនិពន្ធបទចម្រៀងថ្មីៗដោយមិនលួចចម្លងស្នាដៃ ដែលរហូតមកមកទល់នឹងពេលនេះ លោក​បានបើកផលិតកម្មផ្ទាល់ខ្លួនមួយ​មានឈ្មោះថា EYE SCENE ដោយផលិតបានចម្រៀងជាង១០០បទហើយ និងសុទ្ធតែជាចម្រៀងផលិតថ្មី។ លោក​បាន​បញ្ជាក់ពីផលិតកម្មដែលលោកបង្កើតយ៉ាងដូច្នេះថា “EYE SCENE គឺ​ ជា​ឈ្មោះ​ផលិតកម្ម​មួយ​ដែល​បង្កើត​ឡើង​ដោយ​ខ្ញុំបាទ ទី ធាវី ក្នុង​គោល​បំណង​និង​ទស្សនៈ​វែងឆ្ងាយ​ដែល​មាន​ផែនការណ៍​មិន​សំដៅ​តែ​លើ​បទ​ចម្រៀងមិនចម្លងគេ​នោះទេ ពោល​គឺមានផែនការថតជារឿងខ្លី, ភាពយន្តខ្នាត៩០នាទី និង រឿងភាគ។ តែ​បច្ចុប្បន្ន​ដោយធ្វើតាមផែនការដំណាក់កាលទី១ ផលិតបទមិនចម្លងគេសិន។” លោក បន្ត “EYE SCENE បង្កើត​ឡើង​នៅ​ចុងឆ្នាំ២០១៩ ហើយ​រហូត​មក​ដល់​ពេលនេះ​យើង​បាន​ផលិត​បទ​មិន​ចម្លង​គេ​បាន​ប្រហែល​១០០បទហើយ។” នេះ​ជាការ​បញ្ជាក់​របស់​លោក​ ទី ធាវី ស្ថាបនិកផលិតកម្មខាងលើ។

លោក​បានបន្ត​បង្ហាញ​ពីគោលជំហររបស់​ផលិត​កម្មលោកថា “EYE SCENE ​មាន​គោល​ជំហរ​ផលិត​តែបទមិនចម្លងគេទេប៉ុណ្ណោះ ព្រោះ​ថា​ក្នុង​នាម​យើង​ជា​អ្នកនិពន្ធ ​យើង​ត្រូវគិតដល់កម្មសិទ្ធិ​បញ្ញារបស់បទមរតកដើម។ ណាមួយចង់ធ្វើជាគំរូល្អមួយសម្រាប់សង្គមជាតិ​ក្នុងការ​បង្កើតថ្មី ដែលមិនចាំតែយករបស់ស្រាប់មកធ្វើឡើងវិញនោះឡើយ។” ចំពោះសំណួរទាក់ទងនឹងផលលំបាកវិញ លោក​បាន​ឆ្លើយថា “អ្វីដែលជាផលលំបាកក្នុងដំណើរប្រតិបត្តិតាមបំណងទស្សនៈវិស័យ​របស់​ EYE SCENE ដែលកំពុងជួបប្រទះ គឺពិបាក​រក​អ្នក​ច្រៀង​អាជីព​ដែល​ស័្មគ្រ​រួម​គំនិត​គ្នា​លើ​វិថី​បទ​មិនចម្លងគេនេះ ព្រោះ​ថា​បទ​ថ្មី​តម្រូវ​ឱ្យ​មាន​ពេលហាត់សម ហើយ​អ្នក​ច្រៀង​ចាំបាច់​ត្រូវ​យល់​ដឹង​ពី​បទ​ភ្លេង​ថ្មី​និង​តន្ត្រី​​ដែល​បាន​តាក់​តែង។ កន្លង​ទៅ​ បើ​ឱ្យអ្នក​ច្រៀង​ទៅ​ស្តាប់​គំរូ​បទភ្លេង​ដែល​ម្ចាស់​ទំនុក​ចាក់​ពុម្ព​បទភ្លេង​ឱ្យ​ ភាគ​ច្រើន​បរាជ័យដោយបោះបង់​ចោលការទទួលការសន្យា ម៉្យាង​ទៀត ​បើ​តម្រូវ​មក​ស្ទូឌីយោឱ្យ​ពួក​គាត់​មក​ហាត់​សម​ដោយ​បង្រៀន​ផ្ទាល់​ពួកគាត់​នៅ​តែ​ពិបាក​ក្នុង​ការ​លើកដាក់តាម Chord ភ្លេង។ និយាយ​រួម ពួកគាត់មិនចង់ចំណាយពេលហាត់តែម្តង។ លើសពីហ្នឹងទៀត ពួកគាត់តែងរើសទំនុកតាមការចង់បានរបស់គាត់។ ដូចនេះកវីនិពន្ធដែលនិពន្ធទំនុកទុកមិនត្រូវតាមអារម្មណ៍​គាត់ចង់បាន ឬទំនុក​មិនត្រូវចិត្តគាត់ គាត់មិនទទួលយកច្រៀងតែម្តង ឧទាហណ៍ទំនុកប្រាត់ប្រាស ស្លាប់ ឈឺចាប់​ដៀលស្រីជាដើម។ល។ អ្វីដែលខ្ញុំអាចជម្នះបាន គឺថា ខ្ញុំបន្តជ្រើសរើសអ្នកចម្រៀងណាដែលថ្មី មិនមានបទពិសោធន៍សោះយកមកបង្រៀន។ អ្នកទាំងនោះអាចស្តាប់បង្គាប់យើងបាន។”

លោក ទី ធាវី ជាមួយតារាចម្រៀង និងក្រុមការងារមួយចំនួនរបស់លោក

បន្ទាប់មក លោក ទី ធាវី ក៏បង្ហាញពីទស្សនវិស័យរបស់លោកថា “ទស្សនៈវិស័យរបស់ EYE SCENE គឺ​រំពឹង​នឹង​ទទួល​ផល​វិជ្ជមាន ​ព្រោះ​ថា​យើង​បាន​កំណត់​ពេល​វែង​ឆ្ងាយ​ដោយ​ធ្វើ​ដំណើរ​មិន​បង្ខំ ពោល​គឺ​បេសកកម្ម​ដំណើរ​គីង្គក់​មួយៗ ​អ្វី​ដែល​សំខាន់​ការ​អាច​គ្រប់​គ្រង​ការ​ចំណាយ​បាន​តាមផែនការរំពឹងទុកដល់អនាគតដែលនឹងទទួលផលនោះ។ បច្ចុប្បន្ន​ចេញដំណើរពី ការ​ប្រមូល​ធនធានអ្នកចម្រៀង អ្នកភ្លេង និងកវីនិពន្ធ ដោយ​ធ្វើការ​រួប​រួម​លើក​ទឹកចិត្ត គិតគូរ​ពី​ផល​ប្រយោជន៍​បុគ្គល និងផលប្រយោជន៍រួម។ ប្រាក់​កម្រៃ​ផ្តល់​​ឱ្យ​ជា​ផល​ប្រយោជន៍​បុគ្គលចូលរួមធ្វើ ផលិតផល​ដែល​បាន​ចេញ​ជា​ចម្រៀង​ជា​ផល​ប្រយោជន៍​រួម ​អាច​និយាយ​ថា ជា​ផល​ប្រយោជន៍​ជាតិ​ បើបទនោះរក្សាបាននូវភាពថ្លៃថ្នូរ ឬទំនាក់ទំនងនឹងវប្បធម៌។ EYE SCENE អាច​នឹង​រីក​ចម្រើន​ដោយ​គិត​គូ​រដល់​ផល​ប្រយោជន៍​អ្នក​ចូល​រួម​ជាមួយ​នឹង​ផែនការ​លើក​ទឹកចិត្ត។” នេះហើយជា​ទស្សនវិស័យផលិតកម្មរបស់លោក ដែល​លោកចង់​ឱ្យអ្នកទាំងអស់គ្នាដឹង។

លោក​បានបង្ហាញ​ពីទស្សនៈយល់ឃើញផ្ទាល់ខ្លួនទាក់ទងនឹងវិស័យតែងនិពន្ធបទចម្រៀងនៅកម្ពុជា​បច្ចុប្បន្ន​យ៉ាង​ដូច្នេះថា “តាមការយល់ឃើញផ្ទាល់ខ្លួនរបស់ខ្ញុំ ខ្ញុំ​យល់​ការ​វិស័យ​តែង​និពន្ធបទចម្រៀង​​នៅ​កម្ពុជាសព្វថ្ងៃ​នៅ​មិន​ទាន់​មាន​ភាព​រីក​ចម្រើន​ទេ​ ព្រោះ​ថា​បើ​យើង​សម្លឹង​មើល​លើ​សង្គម​ទាំងមូល ឃើញតែលួចចម្លងគេ ឬ​យក​របស់​គេ​មក​ធ្វើឡើងវិញ។ បើ​រីក​ចម្រើន​មែន​នោះ​វិស័យ​មួយ​នេះ​គួរ​តែ​មាន​បទ​ថ្មី​ ដែលប្រកប​ដោយ​សីល​ធម៌​ វប្បធម៌​ច្រើន​ដើម្បី​ជា​ស្នាដៃសម្រាប់មនុស្ស​ជំនាន់ក្រោយ។”

ជាចុងក្រោយមុននឹងបិទបញ្ចប់បទសម្ភាសន៍ លោក ទី ធាវី ក៏បានថ្លែងថា “ជាចុងក្រោយ ខ្ញុំ​សូមឱ្យ​បុគ្គល​គ្រប់រូប​ដែល​មានងារជា​អ្នក​និពន្ធ គួរ​រួម​កម្លាំង​គ្នា​និពន្ធ​និង​ផលិត​របស់​ណា​ដែល​មាន​ឈាម​ជ័រជាខ្មែរឱ្យបានច្រើន ដោយផ្នែកលើគុណតម្លៃនៃស្នាដៃ ជា​ប្រយោជន៍​សង្គម​ជាតិ ដោយសូម​កុំ​ផលិត​​បទ​ណា ​ស្នាដៃ​ណា ​ដែល​គ្រាន់​តែ​ជា​ការ​កំដរ​អារម្មណ៍​សប្បាយ គួរ​គិត​លើ​ស្នាដៃ​យូរ​អង្វែង។ ឧទាហរណ៍ ស្នាដៃទំនុកច្រៀងត្រូវផ្នែកលើអត្ថន័យ អត្ថរស និង​អត្ថរូបផង។”

លោក ទី ធាវី អ្នកនិពន្ធកម្ពុជាមួយរូប និងជាស្ថាបនិកផលិតកម្ម EYE SCENE 

“គេហទំព័រអ្នកនិពន្ធកម្ពុជា” សូមបញ្ជាក់ថា លោក ទី ធាវី កើតឆ្នាំ១៩៧៥ មានឪពុកឈ្មោះ ទី គិន និងម្តាយឈ្មោះ អេង ឡន មាន​បងប្អូនបង្កើតចំនួន៧នាក់ ហើយលោកជាកូនពៅក្នុងគ្រួសារ។ បច្ចុប្បន្ន ក្រៅពីអាជីពជាអ្នកនិពន្ធ លោកជាបុគ្គលិកបម្រើការងារនៅក្រុមហ៊ុនធានារ៉ាប់រងឈានមុខគេមួយនៅកម្ពុជា ដោយមានតួនាទីជាមន្ត្រីជាន់ខ្ពស់អង្កេតហានិភ័យ។ លើសពីនេះ លោកគឺជាម្ចាស់ស្ទូឌីយោ និងផលិតកម្ម EYE SCENE ជាផលិតកម្មមួយដែល​ប្រកាន់គោលជំហរផលិតតែបទចម្រៀងនិពន្ធថ្មីមិនលួចចម្លងផងដែរ។ ដូច្នេះ បើលោកអ្នកចង់ដឹងថា តើបទចម្រៀងដែលផលិតកម្មរបស់លោក​ផលិតកន្លងមក​មានលក្ខណៈយ៉ាងណាខ្លះនោះ? លោកអ្នកអាច​ចូលស្ដាប់​តាម Channel YouTube របស់ផលិតកម្ម​បាន​ https://www.youtube.com/channel/UC0YXeF8Q7aToUvgEtGKVx7A  នោះលោកអ្នកមុខជាបានដឹងច្បាស់មិនខាន។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ លោក ទី ធាវី / រក្សាសិទ្ធិ ៖ camnowriter.com