លោក ប៊ីន យ៉ាន មាននាមប៉ាកកាក្នុងវិស័យតែងនិពន្ធថា  “កវីឦសាន្ត” ។ លោកកើតនៅថ្ងៃទី២ ខែមិថុនា ឆ្នាំ១៩៩១ នៅភូមិអន្លង់ស្វាយ ឃុំអូររៃ ស្រុកថាឡាបរិវ៉ាត់ ខេត្តស្ទឹងត្រែង។ លោក​មាន​ឪពុកឈ្មោះ ប៊ិត ម៉ន ម្តាយឈ្មោះ សាំង អឿន (តែលោកទាំងពីរបានទទួលមរណៈភាពអស់ហើយ) ​លោកមានបងប្អូនបង្កើតចំនួន៥នាក់ ប្រុស២នាក់ ស្រី២នាក់ ដោយ​លោកជាពៅក្នុងគ្រួសារ។ បច្ចុប្បន្នក្រៅពីអាជីពជាអ្នកនិពន្ធកម្ពុជា ប្រកបដោយសមត្ថភាព​មួយរូប លោក​​មានតួនាទីជាទីប្រឹក្សាឱ្យ​អង្គការយុវជនជនជាតិដើមភាគតិចកម្ពុជា (CIYA) និងជាអ្នកជំនួញផ្នែកអចលនទ្រព្យ ក៏ដូចជាជំនួញផ្សេងៗទៀតផងដែរ។ ដូច្នេះ ដើម្បីបាន​ដឹងច្បាស់ពីដំណើរជីវិតលើវិថីតែងនិពន្ធ ស្នាដៃនិពន្ធ និងអ្វីផ្សេងៗទៀត​ពាក់ព័ន្ធនឹងការនិពន្ធរបស់​ លោក ប៊ីន យ៉ាន នោះ! “គេហទំព័រអ្នកនិពន្ធកម្ពុជា” ក៏សូមបង្ហាញពីបទសម្ភាសន៍រវាងលោកនិងគេហទំព័រ តាមរយៈសារអេឡិចត្រូនិចដូចតទៅ ៖ ​

គេហទំព័រអ្នកនិពន្ធ​កម្ពុជា ៖ តើលោកចាប់​ផ្ដើម​ប្រឡូក​ក្នុងការ​តែង​និពន្ធ​តាំងពីពេលណា? ហើយអ្វី​ជាបុព្វហេតុ​ដែលជំរុញ​ឱ្យលោកចាប់​យកការ​តែងនិពន្ធនេះ?

លោក ប៊ីន យ៉ាន ៖ ខ្ញុំចាប់ផ្តើមប្រឡូកក្នុងវិស័យកិច្ចការតែងនិពន្ធតាំងពីឆ្នាំ២០១៧មកម្លេះ! ហើយ​ការណ៍ដែលខ្ញុំ​ចាប់យកការ​និពន្ធនេះ ដោយសារតែខ្ញុំចូលចិត្តអាន និងចង់បន្សល់ទុកជាកេរដំណែលស្នាដៃដល់កូនខ្មែរគ្រប់រូបមុនពេលស្លាប់ទៅ។

លោក ប៊ីន យ៉ាន ហៅ “កវីឦសាន្ត” អ្នកនិពន្ធវ័យក្មេងឆ្នើមមួយរូបនៅកម្ពុជា

គេហទំព័រអ្នកនិពន្ធ​កម្ពុជា ៖ តើ​រហូត​មកទល់​នឹងពេលនេះ លោកនិពន្ធ​ស្នាដៃជាសៀវភៅបានប៉ុន្មានហើយ? ក្នុងនោះជា​ភាសាខ្មែរប៉ុន្មានក្បាល និងជាភាសាអង់គ្លេសបានប៉ុន្មានក្បាល? ហើយ​​ក្នុង​ចំណោមនោះ ស្នាដៃ​មានចំណងជើងអ្វី ដែលទទួលបានការ​គាំទ្រ​ច្រើនជាងគេ?

លោក ប៊ីន យ៉ាន ៖ រហូត​មកទល់នឹងឆ្នាំ២០២០នេះ ខ្ញុំនិពន្ធបានចំនួន៨ចំណងជើងហើយ ដោយក្នុងនោះភាសាអង់គ្លេស៣ចំណងជើង ដូចជា Win Fate Create Miracle, Right Choice Right Time និង Sharpen Your Brain ចំណែកជាភាសាខ្មែរ រួមមាន៥ចំណងជើង ដូចជា និស្សិតបេះដូងមាស, បុប្ផារាជធានី, ចិត្តកូនស្រី, គតិអប់រំកូនខ្មែរ, សម្រង់គំនិត & កំពូលទស្សនៈ ប៊ីន យ៉ាន ។ ក្នុងចំណោមស្នាដៃទាំង៨នេះ គឺសៀវភៅមានចំណងជើងថា Win Fate Create Miracle, Right Choice Right Time និស្សិតបេះដូងមាស និង បុប្ផារាជធានី គឺ​សុទ្ធតែ​ជាស្នាដៃ​ដែលទទួលបានការគាំទ្រច្រើនជាងគេ។​

សៀវភៅល្បីៗមួយចំនួនៃស្នាដៃ​របស់ លោក ប៊ីន យ៉ាន ហៅ “កវីឦសាន្ត” ទាំងភាសាខ្មែរ និងអង់គ្លេស

គេហទំព័រអ្នកនិពន្ធ​កម្ពុជា ៖ ហេតុអ្វី​បាន​ជាលោក​និពន្ធសៀវភៅ​ជាភាសាបរទេសបែបនេះឡើង​? សម្រាប់​អ្នកអានប្រភេទណាខ្លះ​? និងមាន​លក់​នៅបរទេស​ដែរឬទេ?

លោក ប៊ីន យ៉ាន ៖ មូលហេតុដែលខ្ញុំបានសម្រេចនិពន្ធសៀវភៅជាភាសាបរទេស(អង់គ្លេស)បែបនេះ ដ្បិតមានគោលបំណងដើម្បីពង្រឹងភាសាអង់គ្លេសខ្លួនឯងផង ដើម្បីបម្រើទីផ្សារក្នុងស្រុក និងក្រៅប្រទេសផង(សម្រាប់ប្រទេសនានាដែលប្រើ និងនិយាយភាសាអង់គ្លេស) ដើម្បីជំរុញអ្នកដែលចេះភាសាអង់គ្លេសនៅកម្រិតមធ្យមនៅកម្ពុជាផង ហើយដើម្បីបង្ហាញទៅបរទេសថា កូនខ្មែរក៏អាចនិពន្ធ និងសរសេរសៀវភៅជាភាសាអង់គ្លេសបានផងដែរ មិនចំបាច់តែជនជាតិបរទេសនោះទេ។

គេហទំព័រអ្នកនិពន្ធ​កម្ពុជា ៖ តើ​​ស្នាដៃចុងក្រោយរបស់​លោកមានចំណងជើងអ្វី? ជាស្នាដៃប្រភេទ​អ្វី? ហើយ​ប្រសិនបើ​ប្រិយមិត្ត​ចាប់​អារម្មណ៍​ចង់ទិញស្នាដៃ​​របស់​លោកយកទៅអាន តើពួកគាត់​អាច​រក​ទិញបានដោយវិធីណា និង​នៅកន្លែងណាខ្លះ?

លោក ប៊ីន យ៉ាន ៖ ស្នាដៃចុងក្រោយខ្ញុំមានចំណងជើងថា “Sharpen Your Brain” និង “ចិត្តកូនស្រី” ។ “Sharpen Your Brain” ជាប្រភេទសៀវភៅផ្តល់គំនិត និងលើកទឹកចិត្ត ដោយឡែក “ចិត្តកូនស្រី” ជាប្រភេទប្រលោមលោកបែបការតស៊ូ ជំរុញចិត្ត និងលើកទឹកចិត្ត។ ហើយ​ប្រសិនបើ​ប្រិយមិត្តអ្នកអានចង់អាន លោក​អ្នក​អាចទៅរកទិញនៅតាម​បណ្ណាគារ គីណូគូនីយ៉ា(KinoKuniya) នៅផ្សារទំនើបអេអន២ ជាន់ទី១ និងនៅបណ្ណាគារ ម៉ោនញូមិនប៊ុកគ្រប់សាខា បណ្ណាគារបាក់ទូក និងបណ្ណាគារប្រជាប្រិយទល់មុខវិទ្យាល័យ សន្ធរ ម៉ុក ។ល។ជាដើម ឬខលមកខ្ញុំបាទផ្ទាល់តាមរយៈ​លេខ ០៩៧៨០១៣២៦១ / ០៩៨២៣៧១១៦ ឬ ឆាតមកទំព័រហ្វេសប៊ុកផ្លូវការ​របស់​ខ្ញុំផ្ទាល់ Bin Yan TV Show https://www.facebook.com/binyan.tvshow ក៏បាន។​

គេហទំព័រអ្នកនិពន្ធ​កម្ពុជា ៖ តើ​លោកមានគម្រោងចេញ​ផ្សាយស្នាដៃ​ជាសៀវភៅ​ថ្មី​ទៀត​ឬទេ? បើមាន! តើមាន​ចំណងជើងអ្វី? ជាសៀវភៅ​ប្រភេទអ្វី? និង​ចេញ​ផ្សាយ​ផ្លូវការនៅពេលណា?

លោក ប៊ីន យ៉ាន ៖ បាទ! ខ្ញុំមានបំណងចេញច្រើនចំណងជើងទៀតណាស់ ដូចជា “ចៅគុហ៍កុមារ” ដែលជាប្រភេទសៀវភៅរឿងនិទានបែបស្រមើស្រមៃ សរសេរចេញជាកាព្យ ៣០០ទំព័រ និង ”ករុណា (១០វគ្គ)” ជាប្រភេទសៀវភៅស្រមើស្រមៃទៅពិភពលោកប្លែកៗ និងសៀវភៅ “ក្បួនលក់ឆ្លាតវៃ” ជាប្រភេទសៀវភៅផ្នែកការលក់ និងទីផ្សារ។

គេហទំព័រអ្នកនិពន្ធ​កម្ពុជា ៖ មើលទៅលោកចូលចិត្តអានសៀវភៅណាស់! ដូច្នេះ ​លោកអាច​ប្រាប់បានទេ​ថា តើ​លោកចូលចិត្តអានកម្រិតណា? ហើយការអានសៀវភៅនេះ​​បាន​ផ្ដល់​នូវអត្ថប្រយោជន៍​អ្វី​ខ្លះ​ដល់​ការតែង​និពន្ធរបស់លោក?

លោក ប៊ីន យ៉ាន ៖ បាទមែនហើយ ខ្ញុំចូលចិត្តអានសៀវភៅខ្លាំងណាស់ គឺចូលចិត្តមែនទែន ឬអាចនិយាយបានថា ញៀននឹងការអានសៀវភៅ។ ពេលខ្ញុំបានប្រាក់ខែ គឺដើររកទិញសៀវភៅមុននឹងដើររកទិញអីហូប ឬរបស់របរផ្សេងៗ ហើយខ្ញុំចូលចិត្តសន្សំសៀវភៅ មិនថាសៀវភៅចាស់ ឬថ្មី ឬសៀវភៅដែលគេបោះចោលក៏ខ្ញុំរើសទុកដែរ ទោះដាច់ក្របក៏ដោយ។ ជាការពិតណាស់ បើយើងមិនចូលចិត្តអានសៀវភៅច្រើន យើងក៏គ្មានគំនិតច្រើនក្នុងការតាក់តែងនិពន្ធផងដែរ ការអានសៀវភៅគឺប្រៀបបីដូចជាការបើកវាំងននទៅកាន់ពិភពនៃគំនិតអ៊ីចឹង អានកាន់តែច្រើនចេះកាន់តែច្រើន យល់កាន់តែច្រើន ទាំងបទពិសោធន៍ក្នុងសៀវភៅ និងស្នាដៃរបស់អ្នកសរសេរ ឬអ្នកនិពន្ធផ្សេងៗ។ បើយើងមិនចេះ និងមិនចូលចិត្តការអានទេ ទោះយើងពូកែយ៉ាងណាក៏គង់តែអស់គំនិតក្នុងការសរសេរផងដែរ។ គ្មានអ្នកប្រាជ្ញណាម្នាក់ក្លាយជាអ្នកប្រាជ្ញដោយគ្មានការអានសៀវភៅច្រើននោះទេ។ ក្នុងទស្សនៈខ្ញុំ បើអ្នកអាចអានចប់សៀវភៅបាន ១០០ក្បាល គឺស្មើនឹងអ្នករៀនចប់វិទ្យាល័យ បើអានចប់២០០ក្បាល ស្មើនឹងអ្នករៀនចប់មហាវិទ្យាល័យ បើអានចប់៣០០ក្បាល គឺស្មើនឹងអ្នករៀនចប់ថ្នាក់អនុបណ្ឌិត ហើយបើអ្នកអានចប់៥០០ក្បាល ទៅ១០០០ក្បាល​ គឺអាចស្មើនឹងអ្នករៀនចប់បណ្ឌិតទៅហើយ ប៉ុន្តែការអាននេះត្រូវតែអានសៀវភៅដែលពិភពលោក ឬ ប្រទេសជាតិទទួលស្គាល់ និងគាំទ្រ មិនមែនអានត្រឹមតែអាននោះទេ គឺអានរួចយកមកវិភាគរកខុសត្រូវ និងយកមកអនុវត្តនូវចំនុចល្អៗ។

លោក ប៊ីន យ៉ាន ហៅ “កវីឦសាន្ត” កំពុងអានសៀវភៅទាំងកំពុងដាំបាយ

គេហទំព័រអ្នកនិពន្ធ​កម្ពុជា ៖ ជាចុងក្រោយ មុននឹង​បញ្ចប់​បទសម្ភាសន៍ជាមួយ “គេហទំព័រអ្នកនិពន្ធ​កម្ពុជា”​ តើលោកមានពាក្យពេចន៍អ្វីចង់និយាយ​ទៅកាន់ប្រិយ​មិត្ត​អ្នកគាំទ្រ​ស្នាដៃ​សៀវភៅ​របស់​លោក​ដែរ​ឬទេ?​ ក៏ដូចជា​យុវ​ជន​កម្ពុជា​ដែរឬទេ? សូមគោរពអញ្ជើញ!!!

លោក ប៊ីន យ៉ាន ៖ ជាចុងក្រោយ ក្នុងនាមជាអ្នកនិពន្ធវ័យក្មេងកម្ពុជា ដែលចេះតិចតួចម្នាក់ ខ្ញុំសូមថ្លែងអំណរគុណដល់អស់លោក លោកស្រី អ្នកនាងកញ្ញា ប្រិយមិត្ត និងមិត្តនិយមក្នុងការអានជាទីស្រឡាញ់ទាំងអស់ដែលតែងតែនិយមគាំទ្ររាល់ស្នាដៃ និងសៀវភៅរបស់ខ្ញុំបាទកន្លងមក ហើយខ្ញុំបាទមានមតិផ្តាំផ្ញើដល់យុវជនយើងថា «បើចង់ល្ងង់ ខ្វះគំនិត និងបរាជ័យ អ្នកមិនចាំបាច់អានសៀវភៅនោះទេ តែបើចង់ជោគជ័យ សម្បូរគំនិត និងក្លាយជាមនុស្សឆ្លាត គឺមានតែការអានសៀវភៅប៉ុណ្ណោះ ដែលអាចជួយបាន មិនមែនការប្រើហ្វេសប៊ុក ឬមើលយូធូបនោះទេ ហើយការប្រើប្រាស់បណ្តាញសង្គមក៏ត្រូវប្រយ័ត្នផងដែរ ដ្បិតវាក៏អាចជាមហារីករង់ចាំសម្លាប់អ្នកបានដែរ បើអ្នកប្រើខុសដោយការញៀននឹងវា រហូតភ្លេចបាយភ្លេចទឹក ភ្លេចការហាត់ប្រាណ ភ្លេចរៀនភ្លេចសូត្រ ភ្លេចកិច្ចការផ្ទះ​ ឬមើល និងទទួលអ្វីដែលមិនល្អជាប្រចាំថ្ងៃ ហើយមិនចេះគ្រប់គ្រងវា និងគ្រប់គ្រងខ្លួនឯង អ្នកនឹងបរាជ័យងើបមុខមិនរួចនោះទេ។ ម្យ៉ាងទៀតត្រូវចងចាំថា ពេលវេលាដើរលឿនណាស់ មិនរង់ចំានរណាម្នាក់ទេ បើអ្នកខ្ជិល និងប្រើពេលវេលាដ៏មានតម្លៃនេះខុសទៅលើរឿងខូចខាត អត់ប្រយោជន៍ច្រើនដូចជា ចូលក្លឹប ដើរលេងច្រើន សេពគប់នឹងអមិត្តចូលចិត្តផឹកគ្រឿងស្រវឹង និងឆាប់ប្រឡូកក្នុងរឿងស្នេហាទាំងវ័យកំពុងសិក្សា អ្នកក៏នឹងបរាជ័យជៀសមិនរួចផងដែរ។ ដូច្នេះ សូមប្អូនៗដែលកំពុងសិក្សា ត្រូវធ្វើកិច្ចការផ្ទះជួយឪពុកម្តាយ ខិតខំរៀន និង រាប់អានមិត្តណាដែលចូលចិត្តរៀនសូត្រ ចេះតស៊ូ ជម្នះ និងមានគោលដៅច្បាស់លាស់ក្នុងជីវិតថាខ្លួនចង់បានអ្វី និងធ្វើអ្វីពិតប្រាកដ ដើម្បីជួយខ្លួនឯង គ្រួសារ និងប្រទេសជាតិ។ ​

លោក ប៊ីន យ៉ាន ហៅ “កវីឦសាន្ត” កំពុងតាក់តែងនិពន្ធទាំងកណ្ដាលរាត្រី

“គេហទំព័រអ្នកនិពន្ធ​កម្ពុជា” សូមបញ្ជាក់ថា លោក ប៊ីន យ៉ាន មាននាមប៉ាកកាក្នុងវិស័យតែងនិពន្ធថា  “កវីឦសាន្ត” ។ លោកកើតឆ្នាំ១៩៩១ នៅខេត្តស្ទឹងត្រែង។ បច្ចុប្បន្នក្រៅពីអាជីពជាអ្នកនិពន្ធកម្ពុជា វ័យក្មេង​ប្រកបដោយសមត្ថភាព​​ក្នុង​ការនិពន្ធ​ទាំង​ភាសាខ្មែរនិងបរទេសមួយរូប លោក​​ក៏នៅ​មានការងារ​ជាច្រើន​ទៀត​ដូចជា ជាទីប្រឹក្សាឱ្យ​អង្គការយុវជនជនជាតិដើមភាគតិចកម្ពុជា (CIYA) ជាអ្នកជំនួញផ្នែកអចលនទ្រព្យ ហើយ​ក៏ជាជំនួញផ្សេងៗទៀតផងដែរ។ អាស្រ័យហេតុនេះ ប្រសិនបើ​លោក​អ្នក​ចង់​ចង់ដឹងថា​ ស្នាដៃ​តែងនិពន្ធ​របស់​លោក​មាន​គុណតម្លៃ​ល្អ​កម្រិតណានោះ? លោក​អ្នក​អាច​ស្វែងរកស្នាដៃរបស់​លោក​យកមកអានបានទាំង​ភាសាខ្មែរនិងអង់គ្លេស តាមទីតាំង និងវិធី​ដែល​លោកបាន​បង្ហាញ​ខាងលើបាន។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ ប៊ីន យ៉ាន / រក្សាសិទ្ធិ ៖ cambowriter.com