បើ​អ្នក​ជាប្រិយមិត្ត​របស់​ កញ្ញា ម៉ៅ ចាន់រស្មី ហៅ “កូនទន្សាយ” លោកអ្នកមុខជាបាន​ដឹង​ហើយពីដំណឹងដែលកញ្ញា​បង្ហោះ​ផ្សាយ​ក្នុង​ហ្វេស​ប៊ុក​ផេក​របស់​កញ្ញា អំពី​ការ​​សម្រេច​ចេញ​ផ្សាយ​ស្នាដៃ​និពន្ធ​ជាសៀវភៅ​ប្រលោមលោក​ដំបូង​របស់​ខ្លួន មានចំណងជើងថា “កំណត់ហេតុពណ៌ស្វាយ” ដែល​ស្ដាប់​ទៅហាក់​ប្លែក​យ៉ាងខ្លាំងបើ​ប្រៀបធៀបទៅនឹង​ចំណងជើង​ប្រលោមលោក​របស់​អ្នក​និពន្ធ​កម្ពុជាដទៃៗ​ទៀត​ដែលធ្លាប់​ចេញ​ផ្សាយ​កន្លងមក ជាពិសេស​ចំណងជើងប្រលោមលោក​របស់​ អ្នកស្រី ម៉ៅ សំណាង អ្នក​និពន្ធ​លោមលោកជើងចាស់​ដ៏ល្បីល្បាញ ដែលគ្រប់គ្នាស្គាល់​យ៉ាង​ច្បាស់​តាម​រយៈ​នាម​ប៉ាកកា​ “ទន្សាយ” តែម្ដង។

កញ្ញា ម៉ៅ ចាន់រស្មី កូនស្រីអ្នកនិពន្ធល្បី ម៉ៅ សំណាង និងសៀវភៅ “កំណត់ហេតុពណ៌ស្វាយ”

ទាក់​ទង​នឹង​មូលហេតុ​ដែលដាក់​ចំណងជើងបែបនេះ តាម​រយៈ​បទសម្ភាសន៍​ជាមួយ “គេហទំព័រអ្នក​និពន្ធ​កម្ពុជា” កញ្ញា​ ម៉ៅ ចាន់​រស្មី ម្ចាស់​ស្នាដៃបានបង្ហាញ​ពីហេតុ​ផលថា ​“ខ្ញុំដាក់ចំណងជើងថា កំណត់ហេតុពណ៌ស្វាយ ព្រោះវាគឺជាវត្ថុដ៏សំខាន់បំផុតក្នុងសាច់រឿងនេះ វាគឺជាសៀវភៅកំណត់ហេតុផ្ទាល់របស់នារីម្នាក់ ដែលស្រឡាញ់ពណ៌ស្វាយជាទីបំផុត។”

កញ្ញា​បាន​បន្ត​ពី​បុព្វ​ហេតុ ​ដែល​ជំរុញ​ឱ្យ​កញ្ញា​សម្រេច​ចិត្ត​និពន្ធ​បោះ​ពុម្ពផ្សាយ​ស្នាដៃ​ជាសៀវភៅ​ប្រលោមលោក​ដំបូងនេះ​ថា “ការណ៍ដែលនាងខ្ញុំសម្រេចចិត្តនិពន្ធប្រលោមលោកដំបូងមួយនេះឡើង គឺដោយសារ​មានកម្លាំងជំរុញចិត្តជាច្រើនយ៉ាង! ទីមួយ គឺព្រោះតែខ្ញុំជាមនុស្សដែលចូលចិត្តសរសេរអារម្មណ៍ផ្ទាល់ខ្លួនទៅក្នុងសៀវភៅកំណត់ហេតុប្រចាំថ្ងៃ ដោយពុំសូវចូលចិត្តនិយាយរឿងក្នុងចិត្តប្រាប់នរណាទេ! ហើយវាក៏ធ្វើឱ្យខ្ញុំដឹងថាមនុស្សម្នាក់ៗតែងតែមានរឿងអាថ៌កំបាំងជាច្រើន ដែលកប់ទុកនៅក្នុងចិត្តរហូតមក! យើងអាចស្គាល់ឈ្មោះមនុស្សម្នាក់ តែពុំអាចស្គាល់រឿងរ៉ាវដែលកើតឡើងចំពោះមនុស្សម្នាក់នោះទេ! តែរបស់ម្យ៉ាងដែលអាចដឹងរឿងរ៉ាវអាថ៌កំបាំងរបស់គេច្រើនបំផុតនោះ វាអាចជាសៀវភៅកំណត់ហេតុនេះឯង! ទើបខ្ញុំចង់សរសេររឿងប្រលោមលោកមួយដែលពាក់ព័ន្ធនឹងសៀវភៅកំណត់ហេតុ រៀបរាប់ពីអារម្មណ៍ដ៏ជ្រាលជ្រៅ និងស្នេហាដ៏ទន់ភ្លន់ដែលម្ចាស់សៀវភៅកំណត់ហេតុនោះបានកត់ត្រាទុក! ហើយពេលនោះខ្ញុំបានទៅលេងខេត្តបាត់ដំបង ជាហេតុធ្វើឱ្យខ្ញុំកាន់តែលង់ស្រឡាញ់ទិដ្ឋភាពនិងរចនាបទនាទសវត្សរ៍ ៦០ ទើបខ្ញុំសម្រេចចិត្តឱ្យរឿងប្រលោមលោកដំបូងរបស់ខ្ញុំជារឿងរ៉ាវស្នេហាដែលកើតឡើងក្នុងទសវត្សរ៍ទី ៦០តែម្តង!”

កញ្ញា ម៉ៅ ចាន់រស្មី និងអ្នក​ស្រី ម៉ៅ សំណាង អ្នក​និពន្ធប្រលោមលោកល្បីល្បាញ ជាម្ដាយ

មុន​បិទ​បញ្ចប់​បទ​សម្ភាសន៍ កញ្ញា​ក៏បាន​ថ្លែងថា “ជាចុងក្រោយ ខ្ញុំពិតជាអរគុណដល់ការជ្រោមជ្រែងពីគ្រប់មជ្ឈដ្ឋាន ចំពោះស្នាដៃដំបូងមួយនេះ ហើយក៏អរគុណ ដល់ការគាំទ្រនិងការទន្ទឹងរង់ចាំដោយភាពអត់ធ្មត់។ ខ្ញុំសង្ឃឹមថា កំណត់ហេតុពណ៌ស្វាយ មិនធ្វើឱ្យមិត្តអ្នកអានអស់សង្ឃឹមទេ។”

សៀវភៅ “កំណត់ហេតុពណ៌ស្វាយ” ស្នាដៃ​កញ្ញា ម៉ៅ ចាន់រស្មី , តម្លៃ និងលេខទំនាក់ទំនងកក់ទុកមុន

“គេហទំព័រអ្នកនិពន្ធ​កម្ពុជា” សូមបញ្ជាក់ថា កញ្ញា​ ម៉ៅ ចាន់រស្មី មាននាមប៉ាកកា​ក្នុង​វិស័យតែង​និពន្ធថា “កូនទន្សាយ” កញ្ញាកើតឆ្នាំ១៩៩៥ ក្នុងស្រុកអង្គស្នួល ខេត្តកណ្តាល និង​ជាកូនស្រីរបស់​អ្នក​និពន្ធ​ប្រលោមលោក​ល្បីល្បាញ អ្នកស្រី ម៉ៅ សំណាង ដែល​ជាទូទៅ​ត្រូវបាន​អ្នក​និយម​អាន​ប្រលោម​លោក​ស្គាល់យ៉ាង​ច្បាស់​តាម​រយៈ​ឈ្មោះ “ទន្សាយ” ។ បច្ចុប្បន្ន​ក្រៅ​ពីមាន​​អាជីព​​ចម្បង​ជាអ្នក​និពន្ធអត្ថបទភាពយន្ត កញ្ញា​គឺ​ជាអ្នកដឹកនាំរឿង និងជា script supervisor (ត្រួតពិនិត្យ និងផ្តល់យោបល់លើអត្ថបទភាពយន្ត) ហើយ​អ្វីដែល​រឹតតែ​ពិសេសទៅទៀតនោះ ក្នុង​ពេល​ឆាប់ៗ​ខាង​មុខនេះ កញ្ញា​នឹង​បញ្ចេញ​ស្នាដៃ​និពន្ធ​ជាសៀវភៅ​ប្រលោមលោក​ដំបូង​របស់​ខ្លួនហើយ ដែលមានចំណងជើងថា  “កំណត់ហេតុពណ៌ស្វាយ” ដែល​បោះពុម្ពដោយ “គ្រឹះស្ថានសៀវភៅជីវិត” និងបើកកក់ចាប់ពីថ្ងៃទី៧ រហូតដល់ថ្ងៃទី២៤ ខែកញ្ញា ឆ្នាំ២០២០ ហើយគ្រោងនឹង​ចេញផ្សាយជាផ្លូវការនៅថ្ងៃទី២០ ខែកញ្ញា ឆ្នាំ២០២០ នេះផងដែរ ដោយអ្នកដែលបានកក់ទុកមុននឹងទទួលបាន​ការ​បញ្ចុះតម្លៃត្រឹម ២៤០០០៛ ក្នុងមួយក្បាលប៉ុណ្ណោះ ដោយ​តម្លៃពេញគឺ ២៨០០០៛ ក្នុងមួយក្បាល។ ដូច្នេះ ប្រសិនបើ​លោក​អ្នក​ចង់​ទទួលបាន​តម្លៃ​ពិសេសនេះ សូម​ធ្វើ​ការ​ទំនាក់​ទំនងកក់​តាមរយៈ​ហ្វេសប៊ុក​ផេក​ផ្លូវការ​របស់​ សៀវភៅជីវិត https://www.facebook.com/seavphovjivet  ឬក៏ហ្វេស​ប៊ុក​ផេក​ផ្លូវការ​របស់​ម្ចាស់​ស្នាដៃ​ដោយផ្ទាល់​ក៏បានឈ្មោះ ម៉ៅ ចាន់រស្មី – កូន​ទន្សាយ https://www.facebook.com/maochanraksmeylittlerabbit/  ។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ ម៉ៅ ចាន់រស្មី / រក្សា​សិទ្ធិ ៖ cambowriter.com