“ស្តេចនំដូណាត់” ជាងាររបស់ លោក តឹក ង៉ូយ ជាពលរដ្ឋខ្មែរដំបូងគេបង្អស់នៅសហរដ្ឋអាម៉េរិក ដែល​ត្រូវបានប្រកាសនូវ​ងារ​នេះ​ឡើង ដោយប្រធានាធិបតី ទី៤១ របស់សហរដ្ឋអាម៉េរិក​ ចច អេច. ដិបបិលយូ. ប៊ូស / George H.​ W. Bush។ លោកកើតនៅថ្ងៃទី០១ ខែតុលា ឆ្នាំ១៩៤២ នៅ​ស្រុកសិរីសោភ័ណ ខេត្តបន្ទាយមានជ័យ (ពីមុនជាទឹកដី​ក្នុងខេត្តបាត់ដំបង)។ លោកមានឪពុកឈ្មោះ ង៉ូយ ជាវគីម និងម្តាយឈ្មោះ តាំង ចេង។ លោកជាកូនទី២ ក្នុងចំណោមបងប្អូនបង្កើតចំនួន​៣នាក់ បងស្រីធំម្នាក់ និងប្អូនស្រីពៅម្នាក់។ ក្នុងកំឡុងឆ្នាំ១៩៦៦ លោកបានរៀបការជាមួយប្រពន្ធទី១របស់លោកឈ្មោះ សុគន្ធីនី ។ បច្ចុប្បន្ន លោកជាមន្ត្រីចូលនិវត្តន៍ និងកំពុង​ធ្វើការងារជាមួយក្រុមហ៊ុនចិន ផ្នែកអចលនទ្រព្យមួយ នៅកម្ពុជា។

លោក តឹក ង៉ូយ និងស្នាដៃ​សៀវភៅ “ស្តេចនំដូណាត់” របស់លោកទាំង​ភាសាខ្មែរនិងអង់គ្លេស

ក្នុងបទសម្ភាសន៍ជាមួយ “គេហទំព័រអ្នកនិពន្ធកម្ពុជា” លោក តឹក ង៉ូយ ដែលជាម្ចាស់​ស្នាដៃ​សៀវភៅ “ស្តេចនំដូណាត់” លោក​បានប្រាប់អំពីជីវប្រវត្តិពិត និងបទពិសោធន៍ជីវិតមួយចំនួនរបស់​លោក​ ដែល​ឆ្លងកាត់កន្លងមក​យ៉ាង​ក្រីក្រលំបាក​តោកយ៉ាកពោរពេញ​ដោយភាពជូរចត់ជាមួយម្តាយមេម៉ាយនៅស្រុកស្រែ មុន​នឹង​ទៅបន្តការសិក្សានៅភ្នំពេញ ជួបស្នេហ៍ខុសវណ្ណៈហួសក្តីរំពឹង ប៉ុន្តែលោក​នៅតែតស៊ូជម្នះ​ប្តូរជីវិតរហូតទទួលបានជោគជ័យរៀបការសម​ដូចបំណង។ លោក​បាន​បន្ថែម​​ពី​ប្រវត្តិ​កាល​ពី​អតីតកាល​របស់លោក ​មុននឹងឈានដល់ការសរសេរនេះខាង​លើ​ឡើងថា “ដោយសារ​សង្គ្រាមរ៉ាំរ៉ៃក្នុងស្រុកទេស ពួកខ្មែរក្រហមដឹកនាំដោយក្រុម ប៉ុល ពត បានឈ្នះហើយកាន់កាប់ក្រុងភ្នំពេញនៅឆ្នាំ១៩៧៥ ពេលនោះខ្ញុំនិងគ្រួសារ បានក្លាយជាជនភៀសខ្លួនទៅរស់នៅសហរដ្ឋអាម៉េរិករហូតដល់១៩៩២។ ការតស៊ូរស់នៅរបស់ខ្ញុំនៅអាម៉េរិកមានជាដំណាក់កាលដូចជា ដំណាក់ទី១ ជាអ្នកស្ម័គ្រចិត្តសម្អាតទីធ្លាព្រះវិហារ ជាបុគ្គលិកចាក់សាំង និងជាភ្នាក់ងារលក់ទំនិញក្នុងហាង(រយៈពេល៣ខែដំបូង។ ដំណាក់កាលទី២ ខ្ញុំបានទៅរៀនវគ្គបណ្តុះបណ្តាលធ្វើនំដូណាត់ រួចក៏បើកហាងផ្ទាល់ខ្លួន និងពង្រីកសាខាជាច្រើន បន្តបន្ទាប់អស់រយៈពេល១៨ឆ្នាំ រហូតទទួលប្រសិទ្ធនាមថា ស្តេចនំដូណាត់ ពីប្រធានាធិបតីអាម៉េរិកលោក George H. W. Bush។ ដំណាក់ទី៣ តាមពិតទៅខ្ញុំមិនមែនជាអ្នកនិពន្ធ ប៉ុន្តែខ្ញុំគ្រាន់តែចង់ចងក្រងសរសេរជីវប្រវត្តិខ្លួនឯងតែប៉ុណ្ណោះ ដើម្បីចែករំលែកបទពិសោធន៍ក្នុងការពង្រឹងសមត្ថភាពបន្ថែមដល់យុវជនជំនាន់ក្រោយ​ឱ្យចេះតស៊ូក្នុងក្តីសង្ឃឹមទោះតិចតួចក៏ដោយ។”

លោក តឹក ង៉ូយ និងភរិយា រួមនឹងលោក ប្រធានាធិបតីសហរដ្ឋអាម៉េរិក ទី៣៧ Richard Nixon

លោក តឹក ង៉ូយ និងប្រធានាធិបតី ទី៤១ របស់សហរដ្ឋអាម៉េរិក​ ចច អេច. ដិបបិលយូ. ប៊ូស / George H.​ W. Bush និង​ជំទាវភរិយាប្រធានាតិបតី 

ក្នុងបទសម្ភាសន៍តាមរយៈ​សារអេឡិចត្រូនិកនេះ លោកបាន​បង្ហាញអំពីឧបសគ្គ​​ក្នុង​ការតែងនិពន្ធរបស់លោក​វិញម្ដងថា “ខ្ញុំពិតជាមានការលំបាកខ្លាំងណាស់ ព្រោះមិនធ្លាប់​មានបទពិសោធន៍ក្នុងការសរសេរ ដូច្នេះ​ខ្ញុំ​ត្រូវប្រមូលឯកសារ រូបថត និងការចងចាំក្នុង​ចន្លោះ​ពេលដែល​កន្លងទៅជាង​៨០ឆ្នាំនេះ​ដើម្បីមក​រៀបរៀងឡើងវិញ ដោយ​ទម្រាំតែ​អាច​កើតចេញជាសៀវភៅ ស្តេចនំដូណាត់ មួយ​ក្បាល​នេះ ខ្ញុំ​ត្រូវប្រើពេលអស់៣ឆ្នាំ ទើបអាច​សម្រេចជាលទ្ធផលបោះពុម្ពលើកទី១ឡើង​ ក្នុងខែតុលា ឆ្នាំ២០១៩ ដោយ គ្រឹះស្ថានសៀវភៅជីវិត ។”

សៀវភៅ “ស្ដេចនំដូណាត់” ស្នាដៃជាភាសាខ្មែររបស់ លោក តឹក ង៉ូយ

សៀវភៅ “ស្ដេចនំដូណាត់” ស្នាដៃជាភាសាអង់គ្លេសរបស់ លោក តឹក ង៉ូយ

ក្រោយពីលោក​បាន​សម្រេច​ជោគជ័យក្នុងការនិពន្ធបោះ​ពុម្ព​ចេញ​ផ្សាយ​សៀវភៅ “ស្តេចនំដូណាត់” នេះ ​លោក​មានគោលបំណងចង់ស្វែងរកជំនួយបន្ថែម ដើម្បីបង្កើតជាមូលនិធិអប់រំដល់យុវវជនកម្ពុជាយើង ដែលនេះ​គឺជាបំណងចុងក្រោយរបស់លោក បន្ទាប់ពីលោកធ្លាប់​បានធ្វើពីមុនកន្លង​មក​ជាច្រើន​រួច​ទៅហើយក្នុង​វិស័យមនុស្ស​ធម៌នេះ ជាពិសេស​ចំពោះ​ពលរដ្ឋ​កម្ពុជា ដែលជាជនរួមជាតិ​របស់​លោក​តែម្ដង ដែលខាង​ក្រោមនេះ គេហទំព័រយើងខ្ញុំ​នឹង​បង្ហាញជូន​នូវ​សកម្មភាព​មនុស្ស​ធម៌ធំៗមួយចំនួន ដែល​លោក​ធ្លាប់ធ្វើ​កន្លងមក​ឱ្យ​លោក​អ្នក​បាន​ដឹង​ដូច​តទៅ ៖

• កាលលោកនៅសហរដ្ឋអាម៉េរិក លោកបានជួយដល់ជនភៀសខ្លួនខ្មែរដែលរត់គេចពីសង្គ្រាមមកដល់ទឹកដីអាម៉េរិកដំបូង ឱ្យមានការងារធ្វើជាច្រើនពាន់នាក់ ពិសេសជួយជ្រោមជ្រែងផ្តល់ដើមទុននិងបង្រៀនឱ្យក្លាយជាម្ចាស់ហាងនំដូណាត់ផ្ទាល់ខ្លួនទៀតផង។
• ពេលលោក តឹក ង៉ូយ មកដល់ខ្មែរ នៅដើមទសវត្សទី៩០ លោកបានធ្វើឱ្យសេដ្ឋកិច្ចកម្ពុជាឈានមុខតាមរយៈMFNពីសហរដ្ឋអាម៉េរិក ក្នុងការបន្ធូរបន្ថយពន្ធលើវិស័យកាត់ដេរនៅកម្ពុជាដំបូងគេ។ លោកធ្វើឱ្យវិស័យកាត់ដេរនៅកម្ពុជារីកចម្រើន និងផ្តល់ការងារដ៏ច្រើនដល់ប្រជាជនកម្ពុជាផងដែរ។
• លោកបានស្នើសុំ និងទទួលការអនុញ្ញាតពីសម្តេចអគ្គមហាសេនាបតីតេជោ ហ៊ុន សែន ឱ្យបង្កើតសភាពាណិជ្ជកម្មកម្ពុជា និង អនុញ្ញាតឱ្យលោកបានទៅសិក្សារៀនសូត្រអំពីពូជស្រូវថ្មីនៅប្រទេសចិនមានិត ក្នុងការស្វែងយល់បន្ថែមពីបច្ចេកទេសបង្កាត់ពូជស្រូវថ្មី ដើម្បីឱ្យកំណើនទិន្នផលកសិកម្មស្រូវនៅប្រទេសកម្ពុជាកើនទ្វេដង។
• ទោះបីលោកបរាជ័យដុនដាបក្នុងផ្លូវជីវិតផ្ទាល់ខ្លួនក៏ដោយ ក៏លោកនៅឆ្លៀតដើរបង្រៀនភាសាអង់គ្លេសស្ម័គ្រចិត្ត ពេលមានឱកាសជោគជ័យថ្មីម្តងទៀត លោកបានកសាងព្រះវិហារក្រុមជំនុំនៃយើងនៅខេត្តកែប មានបង្រៀនអង់គ្លេស និងផ្តល់អាហារដោយឥតគិតថ្លៃ។
• លោកបានចំណាយថវិកាផ្ទាល់ខ្លួន១លានដុល្លារលើវិស័យអប់រំដើម្បីជួយដល់សិស្សនិស្សិតក្រីក្រឱ្យបានរៀនចប់កម្រិតបរិញ្ញា។
• ថ្មីៗនេះ​ លោក តឹក ង៉ូយ បានជួយឧបត្ថម្ភ១០ម៉ឺនដុល្លារលើវិស័យភាពយន្តខ្មែរខ្នាតធំរឿង ព្រលឹងល្បុក្កតោ។
• ទាំងវិស័យសេដ្ឋកិច្ច សង្គមកិច្ច វប្បធម៌ជាតិ ពិសេសវិស័យសប្បុរសធម៌ និងវិស័យអប់រំនៅកម្ពុជា គឺលោក តឹក ង៉ូយ មានទឹកចិត្តនិងសកម្មភាពយ៉ាងច្រើន។

លោក តឹក ង៉ូយ ក្នុង​ពិធីសម្ពោធរឿង “ព្រលឹងល្បុក្កតោ” ដែលលោកបានចូលរួមឧបត្ថម្ភថវិកាក្នុងការថត

មែន​ទែន​ទៅ! សកម្មភាព​មនុស្ស​ធម៌​របស់​ លោក តឹក ង៉ូយ នៅមានច្រើនទៀតណាស់ តែ​នេះ​យើងខ្ញុំ​សូម​លើក​បង្ហាញ​តែ​សកម្មភាព​ធំៗ​មួយចំនួន​ដូច​រៀបរាប់ខាង​លើ​ប៉ុណ្ណោះ។ ចំណែក​ប្រវត្តិជីវិត​របស់លោកដែល​ធ្លាប់​ឆ្លង​កាត់​កន្លង​មកវិញ ក៏​​នៅវែងឆ្ងាយទៀតណាស់ដែរ ដែល​យើងខ្ញុំ​មិនបាន​រៀបរាប់​ជូន​ ព្រោះ​ទោះបី​ជារៀបរាប់ ក៏​រៀបរាប់មិន​ចប់​ចុង​ចប់​ដើម​លម្អិត​នោះ​ដែរ។ ហេតុនេះ​ហើយ ប្រសិនបើ​ប្រិយមិត្ត​មានបំណងចង់ដឹងច្បាស់ពីប្រវត្តិជីវិតលម្អិត​របស់​លោកថា មានការតស៊ូកម្រិតណា! ជូរចត់​លំបាក​វេទនា​កម្រិតណា!​ ទម្រាំតែ​លោក​អាច​សាង​ភាព​ជោគជ័យ​ល្បី​ល្បាញ​ដូច​សព្វថ្ងៃ​​នោះ លោកអ្នកអាចស្វែងរកទិញ​យក​មក​អាន​បាន ដោយ​មាន​រៀបរាប់​យ៉ាង​​លម្អិត​បំផុត​ក្នុងសៀវភៅ “ស្តេចនំដូណាត់” ទាំង​ភាសាខ្មែរ និង ភាសាអង់គ្លេស តាមរយៈហ្វេសប៊ុកផ្លូវការលោក Ted Ngoy https://www.facebook.com/ted.ngoy.1 ឬហ្វេស​ប៊ុក​ផេក​ផ្លូវ​ការ​របស់ សៀវភៅជីវិត https://www.facebook.com/seavphovjivet/ និងតាម​បណ្ណាគារមួយ​ចំនួនធំទូទាំងខេត្តក្រុង​ក្នុង​ប្រទេស​កម្ពុជាក៏បាន។

លោក តឹក ង៉ូយ ជាមួយនឹងប្រិយមិត្ត​ក្នុងពិធីសម្ពោធសៀវភៅ “ស្ដេចនំដូណាត់” របស់លោក

លោក តឹក ង៉ូយ កំពុងចុះហត្ថាលេខាលើសៀវភៅ “ស្ដេចនំដូណាត់” របស់លោក ជូនប្រិយមិត្តអ្នក​គាំទ្រ

ទាក់​ទង​នឹង​សៀវភៅ “ស្តេចនំដូណាត់” នេះ “លោក តឹក ង៉ូយ ដែលជាម្ចាស់​ស្នាដៃ ក៏​បានបង្ហាញ​ពីរឿង​ដ៏​គួរឱ្យភ្ញាក់ផ្អើលបំផុត​​ថា “ក្រុមហ៊ុនហូលីវូដអាម៉េរិក បានថតបញ្ចប់ខ្សែភាពយន្ត ស្តេចនំដូណាត់ រួចរាល់ហើយ! លើសពីនេះទៀត ផលិតករ Ridley Scott ក៏បានចុះហត្ថលេខាជាមួយលោកក្នុងការថតជា​ភាពយន្តខ្នាតធំលំដាប់អន្តរជាតិ អំពីប្រវត្តិជីវិតរបស់​លោកទាំងស្រុងទៀតផង ដោយ​គ្រោងបញ្ចប់នៅ២ឆ្នាំខាងមុខនេះ​ឯង។” ពិតណាស់! នេះ​គឺ​ពិតជា​ដំណឹង​ដ៏​គួរឱ្យ​ភ្ញាក់​ផ្អើល​ពិតប្រាកដមែន មិននឹក​ស្មានថា មានកូនខ្មែរ​ដែល​ល្បី​ល្បាញ​រហូត​ដល់​ត្រូវបាន​ផលិត​កម្មហូលីវូត​ដ៏ល្បី​ល្បាញ​លើ​សកលលោក ចាប់​អារម្មណ៍​រហូត​ដល់​ថត​ជាខ្សែ​ភាព​យន្ដ​បែប​នេះ​ឡើយ។ នេះ​ហើយ គឺជា​សមិទ្ធផល​ដែល​កើត​ចេញ​ពី​កិច្ចខិត​ខំ​ប្រឹងប្រែងរបស់លោកកន្លងមកក្នុងជីវិត ដែលកូនខ្មែរ​គ្រប់​រូប​គួរតែ​យក​តម្រាប់​តាម និង​ធ្វើ​ឱ្យបាន​ដូច​លោក ដើម្បី​ឱ្យ​ប្រទេស​ខ្មែរ​កាន់តែ​មានគេ​ស្គាល់​ច្រើន និងកាន់តែ​ល្បី​ល្បាញ​លើ​ឆាក​អន្តរជាតិ តាមរយៈ​ភាព​ជោគជ័យ​​ដ៏​អស្ចារ្យ​អ្វី​មួយរបស់​កូន​ខ្មែរ​ដទៃៗ​ទៀត។

លោក តឹក ង៉ូយ កាលលោកធ្លាក់ខ្លួនក្រ មុននឹងអាចក្រោកឈរតស៊ូជោគជ័យឡើងវិញ

កាល លោក តឹក ង៉ូយ បួសជាព្រះសង្ឃ នៅអារញ្ញប្រទេសថៃ

ជាចុងក្រោយ មុននឹងបិទ​បញ្ចប់កិច្ចសម្ភាសន៍ជាមួយ “គេហទំព័រអ្នកនិពន្ធកម្ពុជា” លោក តឹក ង៉ូយ ក៏​សូមផ្តាំផ្ញើទៅកាន់យុវជនកម្ពុជាយើងទាំងអស់ថា “ចូរ​យុវជន​ទាំងអស់​ខិតខំ​ប្រឹងប្រែង​សិក្សា​ស្វែង​រក​ចំណេះដឹង​ដល់ខ្លួន និងខិតខំ​ពុះពារ​សាង​ភាព​ជោគជ័យ​ក្នុងជីវិត​ឱ្យបាន ដោយសូមកុំ​អស់សង្ឃឹមក្នុងជីវិត រួចបោះបង់ចោលក្ដី​ស្រមៃឱ្យសោះ។ ហើយ​ក្នុង​នោះ​ សៀវភៅ ស្តេចនំដូណាត់ ដែល​ជា​សៀវភៅ​ឆ្លុះបញ្ចាំងពី មនុស្សពិត រឿងរ៉ាវពិត មានគ្រប់រសជាតិជីវិត ទាំងបរាជ័យ ជោគជ័យ ការងារ ស្នេហា ល្បែងស៊ីសង លាយឡំនឹងភាព​ជូរ​ចត់កម្សត់ក្នុងជីវិត ដោយធ្លាក់​ដល់ចំណុចសូន្យ ដែលជាជីវិតពិត​របស់​លោក​ធ្លាប់​ឆ្លង​កាត់មកជាង80ឆ្នាំនោះ គឺ​អាចឱ្យអ្នក​ទាំងអស់​គ្នា​​អាន​យក​ជាបទពិសោធចំណេះដឹង​ក្នុងជីវិតបាន…” លោក​បន្ត​ទៀតថា “លើស​ពីនេះ ខ្ញុំក៏សូមផ្តាំផ្ញើទៅក្មេងជំនាន់ក្រោយទាំង​អស់ដូច​​​តទៅថា…

• ត្រូវខិតខំរៀនសូត្រពីជីវិតជោគជ័យ ជៀសផុតពីមេរៀនបរាជ័យ
• តស៊ូគ្រប់កាលៈទេសៈ និងចេះឆក់ឱកាស ដើម្បីជីវិតជោគជ័យ
• ចេះរក្សាការពារ សុភមង្គលគ្រួសារ និងមនសិការជាតិ
• មានសុភវិនិច្ឆ័យ ចំពោះខុសនិងត្រូវ មុនអនុវត្តអ្វីមួយ

ប្រទេសយើងមួយនេះ បានឆ្លងកាត់នូវរឿងរ៉ាវចម្រូងចម្រាស សោដនាដកម្ម ច្រើនពេកមកហើយ ដូច្នេះចូរក្មួយៗជំនាន់ក្រោយ ខិតខំរៀនសូត្រឱ្យមានតម្រិះខ្ពង់ខ្ពស់ ដើម្បីបន្តការពារដែនដីមាតុភូមិមួយនេះឱ្យបានគង់វង្សជានិរន្តរ៍ ឈរលើវិស័យអប់រំតាមរយៈការអាន ដែលយើងត្រូវការជាចាំបាច់ នៅពេលបច្ចុប្បន្ននេះតទៅអនាគត... ចូរចាំថា​មានតែយុវជនយើងប៉ុណ្ណោះ ដែលជាសសរទ្រូងដ៏សំខាន់បំផុតក្នុងការអភិវឌ្ឍប្រទេសជាតិ… ដូច្នេះ ចង់អភិវឌ្ឍប្រទេសជាតិ ត្រូវអភិវឌ្ឍការអាននៅកម្ពុជា ឱ្យបាន​ជាមុនសិន ទើបអាចទៅរួច។”

លោក តឹក ង៉ូយ សកម្មភាពចូលរួមក្នុងកម្មវិធីសំខាន់មួយ

“គេហទំព័រអ្នកនិពន្ធកម្ពុជា” សូមបញ្ជាក់ថា លោក តឹក ង៉ូយ កើត​នៅថ្ងៃទី០១ ខែតុលា ឆ្នាំ១៩៤២ នៅ​ស្រុកសិរីសោភ័ណ ខេត្តបន្ទាយមានជ័យ (ពីមុនជាទឹកដី​ក្នុងខេត្តបាត់ដំបង)។ លោកជាកូនទី២ ក្នុងចំណោមបងប្អូនបង្កើតចំនួន​៣នាក់។ លោក​ជា​កូនខ្មែរ​មួយរូបដែលធ្លាប់​ហែលឆ្លង​នូវរឿងរ៉ាវ​ក្នុងជីវិតជាច្រើន ដោយមានគ្រប់​រសជាតិជីវិត ទាំង​ប្រៃ ផ្អែម ល្វីង ជូរចត់ មិនថាជាជីវិតគ្រួសារ ស្នេហា ការងារ សង្គម​ ឬនយោបាយអ្វីនោះ​ទេ ដែលកម្រនឹង​មាន​កូន​ខ្មែរ​ណា​មានបទពិសោធជីវិត​ដូចជារូបលោក​បែបនេះ​ខ្លាំងណាស់។ បច្ចុប្បន្ន ក្រៅ​ពីជាម្ចាស់ស្នាដៃ​សៀវភៅ “ស្ដេច​នំដូណាត់” ជាម្ចាស់​ហ្វ្រេនឆាយ ហាងស្ដេចនំដូណាត់ ដ៏ល្បីនៅសហរដ្ឋ​អាម៉េរិកជាច្រើន​កន្លែង លោកជាមន្ត្រីចូលនិវត្តន៍ (ងារជា​ឯកឧត្តមឧកញ៉ា) និងកំពុង​ធ្វើការងារជាមួយក្រុមហ៊ុនចិនផ្នែកអចលនទ្រព្យមួយនៅកម្ពុជា។ ដូច្នេះ ប្រសិនបើ​លោក​អ្នកចង់​ដឹង​ច្បាស់​ពីជីវប្រវត្តិ​ជីវិត​លម្អិត​របស់​លោក​នោះ លោក​អ្នក​អាច​ទិញ​សៀវភៅ “ស្ដេច​នំដូណាត់” ដែលជា​ស្នាដៃ​និពន្ធ​របស់​លោក​យកទៅអានបាន តាមរយៈ​ការ​បង្ហាញ​ខាង​លើ នោះ​លោក​អ្នកមុខជា​បានដឹងច្បាស់ថា ខ្សែជីវិត​របស់លោក​អស្ចារ្យ​កម្រិតណា​ជាក់​ជាមិនខាន។ សូមអរគុណ៕

អត្ថបទ ៖ សាន្ត ឫទ្ធិស័ក្តិ / រូបភាព ៖ លោក តឹក ង៉ូយ / រក្សាសិទ្ធិ៖ cambowriter.com