កញ្ញា​ ខន ចំប៉ា កើតឆ្នាំ១៩៩២ នៅស្រុកត្បូងឃ្មុំ ខេត្តកំពង់ចាម ដែល​បច្ចុប្បន្នបានប្ដូរមកជា​ខេត្តត្បូងឃ្មុំវិញ។ កញ្ញាមានបងប្អូនបង្កើតចំនួន៤នាក់ ក្នុងនោះ​ស្រី៣នាក់ និងប្រុស១នាក់ ដោយ​កញ្ញា​ជាកូនទី២​ក្នុង​គ្រួសារ​។ បច្ចុប្បន្ន កញ្ញា​គឺ​ជានិពន្ធនាយករងនៅគេហទំព័រ Tmeythmey.com ដែលជាសារព័ត៌មានល្បីមួយ​ក្នុង​ប្រទេស​កម្ពុជា​នា​ពេលបច្ចុប្បន្ន ចម្រុះ​ទៅដោយព័ត៌មាន​សំខាន់ៗល្បី​ជាច្រើន​ទាំង​ក្នុង​និង​ក្រៅប្រទេស។

កញ្ញា ខន ចំប៉ា និពន្ធនាយករងគេហទំព័រថ្មីៗ

ការងារមិនថាផ្នែកអ្វី ឬក្នុងវិស័យអ្វីនោះ​ទេ បើ​ចង់​ជោគជ័យលុះត្រាតែយើងតាំងចិត្ត​ធ្វើ​វាដោយពិតប្រាកដ និងមានចំណេះដឹងផ្នែកនោះ​ច្បាស់លាស់ ជាពិសេស​សកម្មតស៊ូព្យាយាមមិនរាថយ ទើបអាច​ទៅរួច។ ក្រឡេកមកខាង​ការងារ​ផ្នែក​សារព័ត៌មាន ដែលជាអាជីពការងារ​បច្ចុប្បន្នរបស់​កញ្ញា ខន ចំប៉ា វិញ ក៏ដូចគ្នាផងដែរ ទម្រាំតែកញ្ញា​អាច​ដើរមកដល់​ចំណុច​ជោគជ័យ​ដូច​សព្វថ្ងៃ​គឺ​មិនមែន​ជារឿង​ងាយស្រួល​ឡើយ ដោយកញ្ញា​បាន​បង្ហាញ​ក្នុង​បទសម្ភាសន៍​ជាមួយ “គេហទំព័រអ្នកនិពន្ធ​កម្ពុជា” ថា “ខ្ញុំចាប់ផ្តើមការងារជាអ្នកកាសែតពេញម៉ោង ក្នុងឆ្នាំ២០១២ នៅ VAYO FM Radio ក្រោយមកនៅអំឡុងចុងឆ្នាំ២០១៤ ខ្ញុំបានប្តូរមកធ្វើការនៅ Thmeythmey.com  ហើយក៏បន្តការងារនៅស្ថាប័នមួយ​នេះរហូត​ដល់​បច្ចុប្បន្ន។ ខ្ញុំសូមរំឭកដែរថា មុនកា្លយជាអ្នក​កាសែត ខ្ញុំគឺជាបុគ្គលិកស្ម័គ្រចិត្តនៅអង្គការក្នុងស្រុក​មួយ ​ដែល​ធ្វើការ​ពាក់ព័ន្ធនឹងការផលិតវីដេអូឯកសារជុំវិញស្ថានភាពកុមារ និងយុវជននៅកម្ពុជា។ តាមរយៈការងារស្ម័គ្រចិត្តនេះហើយ ដែលវាបានក្លាយជាស្ពានភ្ជាប់ចំណង់ចំណូលចិត្តរបស់ខ្ញុំ ដែលតាមពិតជានិស្សិតបរិញ្ញាបត្រផ្នែកធនាគារ និងហិរញ្ញវត្ថុ ឱ្យ​ក្លាយជាអ្នកកាសែតដូចបច្ចុប្បន្ន។” កញ្ញា​បន្ត “គិតមកទល់ពេលនេះ ខ្ញុំគឺជាអ្នកកាសែត ប្រមាណ៨ឆ្នាំហើយ។ ឆ្លងកាត់​ការធ្វើការងារជាច្រើន និងក្នុងរយៈពេល​មួយយូរគួរសមដែរ ច្បាស់ណាស់ការលំបាក គឺពិតជាមាន ហើយមានច្រើន ជាពិសេសគឺការពង្រឹងគុណភាពសំណេរតែម្តង។ អ្នកកាសែតពូកែ គឺគេមើលទៅលើស្នាដៃសំណេរនេះឯង។ ហើយការងារជាអ្នកសរសេរនេះ មិនមែនងាយស្រួលប៉ុន្មានទេ ប៉ុន្តែខ្ញុំជឿថា ការងារណា ក៏ដូចការងារណាដែរ គឺតែង​មាន​ផលលំបាក​របស់វារៀងៗខ្លួន អាស្រ័យលើអ្នក​​អនុវត្តការងារនោះ មានចំណេះដឹងកម្រិតណា និងឆ្លាតវាងវៃកម្រិតណា ​ហើយស្រឡាញ់ការងារ និងស្ថាប័នកម្រិតណាដែរ។ សម្រាប់ខ្ញុំដើម្បី​ជម្នះឧបសគ្គ​ក្នុងអាជីពនេះ គឺមានតែការខំប្រឹង និងការរៀនសូត្រពីអ្នកនៅក្នុងអាជីពដូចគ្នា និងស្តាប់បទពិសោធន៍ពីអ្នក​កាសែតដទៃទៀត ដែលយើងទទួលស្គាល់ថាស្នាដៃសំណេរ​គាត់​​​ល្អ សម្រាប់ការអភិវឌ្ឍសមត្ថភាពរបស់យើងប៉ុណ្ណោះ។”

កញ្ញា ខន ចំប៉ា ក្នុងសកម្មភាពកំពុងបំពេញការងារផ្នែកសារព័ត៌មានរបស់ខ្លួន

ខាង​លើ​ជាការបង្ហាញ​ពី​ដំណើរជីវិត​លើ​វិថីការងារ​ផ្នែក​សារព័ត៌មាន​របស់​កញ្ញា ខន ចំប៉ា និង​ការ​ជម្នះ​នូវផល​លំបាក​ដែល​កញ្ញា​បានជួប​ប្រទះ​ក្នុង​អាជីពនេះកន្លងមក។ បន្ទាប់​មក កញ្ញា​ក៏បានរៀបរាប់​បន្ត​ទៀត ទាក់​ទង​នឹងអត្ថបទព័ត៌មាន និងជ័យលាភីដែលកញ្ញា​ធ្លាប់​ទទួលបាន​កន្លងមកថា  “អត្ថបទព័ត៌មាន ជារួម​គឺជាការ​ជូនដំណឹង ការប្រាប់ពីព្រឹត្តិការណ៍ ឬដំណើរសាច់រឿងមួយ​ដែល​កើតឡើង​ពិតជាក់ស្តែង តាមរយៈការសម្ភាសន៍ និងការមើលឃើញ ឬការបាន​ចូល​រួមក្នុងព្រឹត្តិការណ៍ណាមួយដោយផ្ទាល់… វាខុសពីប្រលោមលោក ដែលអ្នក​និពន្ធបានបញ្ចូល​ការស្រមើស្រមៃ និងគំនិតផ្ទាល់ខ្លួនរបស់គេបាន។ ហើយ​កន្លងមក ខ្ញុំធ្លាប់ទទួលបានជ័យលាភីលេខ៣ចំនួន២លើក ជុំវិញការរាយការណ៍អំពីអំពើពុករលួយនៅកម្ពុជា រៀបចំដោយអង្គការតម្លាភាពកម្ពុជា និងក្លឹបអ្នកកាសែតកម្ពុជា នៅក្នុងឆ្នាំ២០១៥ និង២០១៧… ហើយនៅឆ្នាំ២០១៦ ខ្ញុំទទួល​បានចំណាត់ថ្នាក់លេខ២ នៅក្នុងការប្រកួតសំណេរ អំពីការពាក់មួកសុត្ថិភាព ដែលរៀបចំឡើង​ដោយ​ ​ AIP Foundation។”

កញ្ញា ខន ចំប៉ា ពេលទទួលពានរង្វាន់ពីការប្រកួតប្រជែងអ្នកសារព័ត៌មានឆ្នើម ជុំវិញការរាយការណ៍អំពីអំពើពុករលួយនៅកម្ពុជា

កញ្ញា ខន ចំប៉ា បាន​​ចែករំលែកចំណេះដឹង​ផ្នែក​អត្ថបទ​ព័ត៌មានទៅកាន់អ្នកទាំង​ឡាយ ដែលចង់​សរសេរ​អត្ថបទផ្នែក​នេះ​ឱ្យបាន​ល្អ​ថា “អត្ថបទព័ត៌មានល្អ គឺចាំបាច់ណាស់ដែលព័ត៌មានដែលយើងផ្តល់​ឱ្យ​អ្នកអានមានតុល្យភាព និងគ្រប់ជ្រុងជ្រោយ ព្រមជាមួយនឹងសំណេរទាក់ទាញប្រទាក់គ្នាពេញមួយ​សាច់រឿង ដើម្បីឱ្យ​ទាក់ទាញបាន​ គឺអាស្រ័យលើសិល្បៈនៃការប្រើពាក្យពេចន៍ សំណង់ប្រយោគល្អៗរបស់អ្នកនិពន្ធហ្នឹងហើយ ហើយអ្នកនិពន្ធ ត្រូវប្រយ័ត្នប្រយែង និងចៀសវាងឱ្យ​បាននូវកំហុសអក្ខរាវិរុទ្ធ។” កញ្ញា​បន្ត “ជាអ្នកនិពន្ធ​អត្ថបទព័ត៌មាន​មួយរូប គឺយើងត្រូវដាក់ចិត្ត​ និងព្រមលះបង់ពេលវេលាច្រើន  ព្រោះយើងតែងនិយាយថា អ្នកកាសែត គឺធ្វើការគ្រប់ពេល គ្រប់ទីកន្លែង… ដូច្នេះការងារ​នេះ វាស៊ីពេលយើងអស់មួយ​ចំណែក​ធំ។ លើសពីនេះ យើងត្រូវមានចំណេះ​ដឹងផ្នែក​ខេមរភាសា​ឱ្យ​បាន​ច្បាស់​លាស់ និងភាសាទី២ ឬទី៣ទៀតបើអាច។ យើងត្រូវ​ចេះបត់បែន និងមានភាពអំណត់ខ្ពស់ ហើយអ្នកកាសែតត្រូវមានជំហរច្បាស់លាស់ និងត្រូវប្រកាន់ខ្ជាប់នូវក្រមសីលធម៌ជានិច្ច និងមានចំណុចច្រើនទៀត ដែលយើងត្រូវដាក់ចិត្តរៀន​សូត្រជានិច្ចពាក់ព័ន្ធនឹងអាជីពមួយ​នេះ។” ​

កញ្ញា ខន ចំប៉ា ក្នុងឯកសណ្ឋានការងារផ្នែកសារព័ត៌មានពេលចុះសម្ភាសន៍មួយ

​មុននឹង​បញ្ចប់​បទសម្ភាសន៍ កញ្ញាបាន​បង្ហាញ​ពីឱកាស​ល្អៗដែលទទួលបានពីអាជីពជាអ្នកសារព័ត៌មាន​នេះថា “អាជីព​ជាអ្នក​សារព័ត៌មាននេះ បាន​ផ្តល់ឱកាស​ឱ្យ​ខ្ញុំបាន​ទៅ​ចូលរួម​ព្រឹត្តិការណ៍ និងកម្មវិធីមួយ​ចំនួននៅក្រៅប្រទេសជាច្រើនលើក រួមមានដូចជា ប្រទេសថៃ វៀតណាម សិង្ហបុរី ហ្វីលីពីន សាធារណរដ្ឋកូរ៉េ ជប៉ុន ចិន និងសហរដ្ឋអាម៉េរិក ហើយ​ក្នុង​នោះ​ដំណើរមួយចំនួន គឺខ្ញុំទៅរៀន​បន្ថែមជុំវិញការងារជាអ្នកកាសែត និងដំណើរខ្លះទៀត គឺទៅចូលរួម​យក​ព័ត៌មាន​។”

កញ្ញា ខន ចំប៉ា ពេលធ្វើដំណើរទៅប្រទេសជប៉ុន ដែលជាផ្នែកមួយនៃកម្មវិធីអ្នកកាសែតអាស៊ាន ដែលត្រូវធ្វើដំណើរទៅកាន់៣ប្រទេស រួមមាន សហរដ្ឋ​អាម៉េរិក សាធារណរដ្ឋកូរ៉េ និងជប៉ុន ដែលត្រូវបានជ្រើសរើសដោយស្ថានទូតអាម៉េរិកប្រចាំកម្ពុជា

កញ្ញា ខន ចំប៉ា ពេលចូលរួមវេទិកាកិច្ចសហប្រតិបត្តិការសារព័ត៌មានឆ្នាំ២០១៨ ស្ដីពីខ្សែក្រវាត់ និងវិធី និងវេទិកាកិច្ចសហប្រតិបត្តិការសារព័ត៌មាន១០បូក៣ (Asain+3) លើកទី៩ នៅខេត្តហៃណាន់ និងទីក្រុងប៉េកាំង ប្រទេសចិន ក្នុងឆ្នាំ២០១៨

“គេហទំព័រអ្នកនិពន្ធ​កម្ពុជា” សូមបញ្ជាក់ថា កញ្ញា​ ខន ចំប៉ា កើតឆ្នាំ១៩៩២ នៅស្រុកត្បូងឃ្មុំ ខេត្តកំពង់ចាម (សព្វថ្ងៃ​ជា​ខេត្តត្បូងឃ្មុំ)។ បច្ចុប្បន្ន កញ្ញា​គឺ​ជានិពន្ធនាយករងនៅគេហទំព័រថ្មីៗ Thmeythmey.com ជា​សារព័ត៌មានល្បីមួយ​ក្នុង​ប្រទេស​កម្ពុជា​នា​ពេលបច្ចុប្បន្ន។ ដូច្នេះ ប្រសិនបើ​លោក​អ្នក​ចង់​មាន​សមត្ថភាព​អាច​សរសរ​អត្ថបទ​ព័ត៌មាន​បាន​ល្អនោះ លោក​អ្នក​អាច​អនុវត្ត​តាម​វិធី​ដែលកញ្ញា​បាន​ចែក​រំលែក​ខាង​លើ​បាន ហើយ​បើលោក​អ្នក​ខិត​ខំ​ប្រឹង​ប្រែង​ពិតប្រាកដ​ដោ​យមិន​បោះ​បង់​ទៀតនោះ លោក​អ្នក​មុខជា​អ្នក​សម្រេចជោគជ័យ​ក្នុង​អាជីព​នេះបាន​យ៉ាង​ប្រាកដ។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ ខន ចំប៉ា / រក្សាសិទ្ធិ ៖ cambowriter.com