លោក តុន ច័ន្ទរិទ្ធិ  មាននាមប៉ាកកាក្នុង​វិស័យតែង​និពន្ធ​ថា “សមុទ្រ” ។ លោក​កើតថ្ងៃទី១៣ ខែវិច្ឆិកា ឆ្នាំ១៩៩៦ នៅឃុំព្រៃស្វាយ ស្រុកមោងឫស្សី ខេត្តបាត់ដំបង។ មានឪពុកឈ្មោះ ទុំ សុផល និងម្តាយឈ្មោះ ហង្ស សាមាន និងមាន​បងប្អូនបង្កើតចំនួន២នាក់ ស្រីម្នាក់ និង​ប្រុស​ម្នាក់ ដោយ​ជាកូនទី២ក្នុងក្រុមគ្រួសារ។ សព្វថ្ងៃក្រៅពីមានអាជីពជាអ្នកនិពន្ធកម្ពុជា​មួយរូប លោក​​គឺ​ជា​បុគ្គលិក​ NGO គ្រីស្ទានមួយកន្លែងក្នុងក្រុងភ្នំពេញ។

លោក តុន ច័ន្ទរិទ្ធិ  និងសៀវភៅ “និទានម៉ែ”

ក្នុង​បទសម្ភាសន៍ជាមួយ “គេហទំព័រអ្នកនិពន្ធ​កម្ពុជា” អ្នកនិពន្ធ​ដែលមានប្រភព​ចេញពីទឹកដីខេត្ត​បាត់​ដំបងរូបនេះ បានបង្ហាញ​ពី​ដំណើរជីវិត​លើ​វិថី​តែងនិពន្ធ​របស់​លោកថា  “ខ្ញុំ​ចាប់​ផ្តើម​ចូល​ប្រឡូក​​ក្នុង​ការតែងនិពន្ធនៅក្នុងកំឡុងចុងឆ្នាំ២០១៨នេះ​ប៉ុណ្ណោះ! ហើយកត្តា​ដែល​ជំរុញ​ឱ្យ​ខ្ញុំ​ចង់​ចូល​រួមប្រឡូកក្នុងការតែងនិពន្ធនេះ​ពីព្រោះហេតុផល​មួយចំនួនដូចជា ទី១ ដោយសារ​វា​ជា​ចំណង់​​ចំណូលចិត្ត និងក្តីស្រមៃតាំងពីតូចដែលចង់ក្លាយជាអ្នកនិពន្ធ។ ទី២ ដោយសារ​ចង់​លើក​ស្ទួយ​ការ​អាន​នៅប្រទេសកម្ពុជាឲ្យប្រសើរឡើងជាងនេះ។ ទី៣ ព្រោះ​ចង់ចែករំលែកក្តីស្រឡាញ់ តាមរយៈស្នាដៃរបស់ខ្ញុំទៅកាន់មិត្តអ្នកអាន និងទី៤ចុងក្រោយ ព្រោះ​វា​ស្រប​នឹង​ជំនាញ​ដែល​ខ្ញុំ​បាន​សិក្សា​នៅសាកលវិទ្យាល័យ។” លោក​បន្តថា “ហើយ​​សម្រាប់​ការ​តែង​និពន្ធ​រូប​ខ្ញុំ​អាច​សរសេរ​បាន​ជាប្រភេទសៀវភៅ ទស្សនវិជ្ជាអប់រំ, លើកទឹកចិត្ត, ប្រលោមលោក និងរឿងខ្លីជាដើម។ ប៉ុន្តែអ្វីដែលខ្ញុំចូលចិត្តជាង និងផ្តោតទៅលើជាងគេគឺ ប្រភេទសៀវភៅទស្សនវិជ្ជាអប់រំ និងលើកទឹកចិត្ត។”

ជាធម្មតា​អ្នក​និពន្ធ​តែង​មានស្នាដៃ​ជារបស់​ខ្លួន។ ជាក់​ស្ដែង​លោក តុន ច័ន្ទរិទ្ធិ ក៏មាន​ស្នាដៃ​បោះពុម្ព​ផ្សាយ​ជាសៀវភៅពីរក្បាល​កន្លងមកផងដែរ​ ទី១មានចំណងជើងថា “អ្នកពិតជាពិសេស តោះ! ទៅមុខទៀត” និងមួយក្បាលទៀតគឺសៀវភៅមានចំណងជើងថា “និទានម៉ែ” ដែលសៀវភៅទី២នេះ ​ទទួលបានការគាំទ្រនិងចាប់អារម្មណ៍​យ៉ាង​ខ្លាំង​ពីសំណាក់​ប្រិយមិត្ត​អ្នក​អាន​ ដោយគេហទំព័រ​យើងខ្ញុំ​ជឿថា លោក​អ្នក​ក៏ប្រហែលជា​ធ្លាប់​ឮ ឬធ្លាប់​ឃើញផងដែរ ស្រួល​មិនស្រួល​ថែមទាំង​ធ្លាប់​ទិញ​យកមកអាន​ទៀតផង។ ទាក់​ទងនឹង​សៀវភៅ “និទានម៉ែ” ​ស្នាដៃ​ចុងក្រោយ​របស់​លោក​នេះ លោកបានរៀបរាប់​បង្ហាញ​ថា “សៀវ​ភៅ​ និទាន​ម៉ែ ​ជា​ស្នាដៃ​ទី២របស់ខ្ញុំដែលបានបោះពុម្ពផ្សាយ។ ហើយសៀវភៅ នេះ​បាន​បោះ​ពុម្ព​ផ្សាយ​នៅ​ដើម​ឆ្នាំ​២០២០​នេះឯង។ សៀវភៅនេះផ្តោតសំខាន់ទៅលើការ អប់រំ និងលើកទឹកចិត្តមិត្តអ្នកអានឱ្យស្វែង​យល់​អំពីគុណតម្លៃនៃជីវិត ការប្រើប្រាស់ជីវិតឱ្យបានត្រឹមត្រូវទៅតាមសក្តានុពល និងដើរ​ឆ្ពោះ​ទៅ​រកក្តីស្រមៃនៃជីវិត ដោយផ្អែកលើរឿងរ៉ាវ ក៏​ដូច​ជា​បទ​ពិសោធន៍​ផ្ទាល់​របស់​តួ​អង្គ​ម្តាយ​ជា​អ្នក​និទាន។ ដូច្នេះ ប្រសិនបើមិត្តអ្នកអានចង់ជាវសៀវភៅនេះយកទៅអាន ប្រិយមិត្ត​អាចរកបាននៅ បណ្ណាគារអង្គរធំ, ស្រឡាញ់​សៀវភៅ, ណាណាអាន,  Le Story និង​តូប​លក់​សៀវភៅ​ផ្សេងៗ​ទៀត​ជាច្រើន ឬ​ក៏​អាច​រកជាវបានតាមអនឡាញ នៅលើហ្វេកប៊ុកផេក សៀវភៅខ្ញុំ-#Mybook​ https://www.facebook.com/sievphowkhnhom/ ឬហ្វេសប៊ុករបស់​ខ្ញុំផ្ទាល់ដែលមានឈ្មោះថា Chanrith Ton https://www.facebook.com/chanrith.ton ក៏បាន។”

សៀវភៅ “អ្នកពិតជាពិសេស តោះ! ទៅមុខទៀត” និងសៀវភៅ “និទានម៉ែ” របស់លោក តុន ច័ន្ទរិទ្ធិ

បន្ទាប់ពីសៀវភៅ “និទានម៉ែ”  នេះ លោក​ក៏​មាន​គម្រោងបញ្ចេញ​​សៀវភៅថ្មី​ទៀតដែរ តែ​លោក​សុំលាក់​ចំណងជើងសិន ដើម្បី​ទុក Suprise ប្រិយមិត្ត​នៅពេលក្រោយ តែ​ទោះជាយ៉ាង​នេះ​ក្ដី​លោក​ក៏បាន​បង្ហើបថា ជាប្រភេទ​សៀវភៅបែប​លើកទឹកចិត្តដដែល និង​សន្យាថា នឹង​បង្ហាញ​ប្រាប់​ពីសៀវភៅថ្មី​នេះ​លម្អិតនៅក្នុង​បទសម្ភាសន៍ក្រោយ​ទៀត។

គ្មាន​កិច្ចការ​សំខាន់​ណាមួយ ដែលអាចសម្រេច​បាន​ដោយគ្មាន​ឧបសគ្គការ​លំបាក​នោះឡើយ ហើយបើ​ជា​កិច្ចការ​តែង​និពន្ធ​ទៀត​នោះ គឺរឹតតែ​លំបាក​ខ្លាំងណាស់​ទៅទៀត ព្រោះ​ចាំបាច់​តម្រូវឱ្យអ្នកនិពន្ធ​ផ្ទាល់​ត្រូវមានចំណេះដឹង​ទូលំទូលាយ ពូកែគិត អាន ស្រាវជ្រាវ មានសេចក្ដី​អំណត់ និងចេះ​ជឿជាក់​លើ​ខ្លួន​ឯងខ្លាំង ​ទើបអាច​សម្រេច​បាន​​ស្នាដៃ​ល្អ​មួយឡើង។ ទាក់​ទងនឹង​ឧបសគ្គការ​លំបាក​នេះ លោក តុន ច័ន្ទរិទ្ធិ បានដោយគ្មាន​លាក់​លៀមថា “បាទជាការ​ពិត​ណាស់! ទម្រាំតែ​ខ្ញុំ​​អាច​ដើរមកដល់ចំណុច​នេះបាន គឺ​មិនមែន​ជារឿង​ងាយ​ស្រួល​ឡើយ ព្រោះ​ការ​លំបាក​មួយ​ចំនួន​ដែល​ខ្ញុំបានជួប និងចាំបាច់ត្រូវតែ​ជម្នះ​ឱ្យបាន​ ដូចជា ដំបូង​គឺ​មនុស្ស​នៅ​ជុំវិញ​ខ្លួន​ខ្លះ​​មិន​ជឿជាក់លើយើង ហើយគិតថាយើងធ្វើមិនបាន។ គេមិនផ្តល់កម្លាំងចិត្ត ប៉ុន្តែ​គេ​រង់​ចាំ​មើល​យើង។ បន្ទាប់មកទៀតមានស្នាដៃហើយ ក៏មិនដឹងថាធ្វើបែបណាទើបអាចយកទៅបោះពុម្ពបាន… ហើយ​ក៏ត្រូវសន្សំប្រាក់ខែខ្លួនឯង ដើម្បីបោះពុម្ពស្នាដៃនោះ​ រួច​ក៏​ពិបាក​មិន​ដឹង​សុំ​ច្បាប់​សុំ​អី​នៅ​ឯ​ណាទៀត… ហើយក្រោយពីបានបោះពុម្ពហើយ ក៏​ត្រូវ​បាន​បណ្ណាគារ​មួយ​ចំនួន​បដិសេធ​ស្នាដៃ​យើង​ដោយសារ​យើងជាអ្នកសរសេរថ្មី… ប៉ុន្តែ​ទាំង​អស់​នេះ​គឺ​ជា​មេរៀន​ដ៏​ល្អ​បំផុត​នៅ​ក្នុង​ជីវិត​ដែល​ខ្ញុំ​អាចរៀនបាន… ហើយខ្ញុំអាចជម្នះវាបានមកដល់ពេលនេះ ដោយ​សារតែ​ខ្ញុំ​តែង​តែ​ផ្តល់​កម្លាំង​ចិត្ត​ឱ្យ​ខ្លួនឯង ហើយជឿជាក់នូវអ្វីដែលខ្ញុំខ្លួនឯងកំពុងធ្វើ… ខ្ញុំតែងតែប្រាប់ខ្លួនឯងថា បើ​យើង​ស្រឡាញ់ យើងមិនត្រូវបោះបង់ជាដាច់ខាត… ជាមួយគ្នាក៏មានគ្រួសារ និង​មនុស្ស​មួយ​ចំនួន​ក៏​តែង​តែនៅក្បែរ និងលើកទឹកចិត្តខ្ញុំផងដែរ។ បន្ទាប់មកខ្ញុំក៏ចាប់ផ្តើមស្គាល់បងៗផ្សេងទៀតជាអ្នក និពន្ធរៀមច្បង ពួកគាត់បានណែនាំ និងលើកទឹកចិត្តបន្ថែមទើបធ្វើឱ្យខ្ញុំមិនរាថយ រហូត​ដល់​អាច​ជម្នះ​បាន​នៅទីបញ្ចប់។”

លោក តុន ច័ន្ទរិទ្ធិ និងសៀវភៅ “អ្នកពិតជាពិសេស តោះ! ទៅមុខទៀត” របស់លោក

ការ​អាន​គឺជាការ​បើក​ចំហជើងមេឃនៃ​ចំណេះដឹង អ្នក​និពន្ធ​ដែលមិនចូលចិត្ត​អាន ក៏មិនអាច​និពន្ធ​ស្នាដៃ​មួយ​ល្អបានដែរ ពុំនោះ​ទេខ្លឹមសារ​នៃស្នាដៃនោះ​មុខជារួមតូចប៉ុនទំហំមាត់អណ្ដូងជាក់ជាមិនខាន។ ដោយយល់ពីតម្លៃ​នៃការ​អាននេះហើយ ទើបបានជាម្ចាស់​ស្នាដៃ​សៀវភៅ​ “និទានម៉ែ” ខាងលើមិនដែលព្រងើយ​កន្ដើយនឹងការអាន​ម្ដងណាឡើយ ហើយថែមទាំង​ផ្ដល់​តម្លៃ​យ៉ាងខ្លាំង​លើ​ការអាន​​​ក្នុង​នាម​លោក​ជា​អ្នក​និពន្ធ​មួយរូបទៀតផង ដោយលោកបាន​បង្ហាញថា “ខ្ញុំ​គិត​ថា​ការ​អានសៀវភៅពិតជាមានសារៈសំខាន់ខ្លាំង​ណាស់​សម្រាប់មនុស្ស​គ្រប់រូប ហើយ​បើចំពោះ​ខ្ញុំវិញ ​គឺសំខាន់​រហូត​ខ្លះ​មិនបានតែម្ដង ព្រោះ​វាជា​ការរួម​ចំណែក​ខ្លាំង​ក្នុង​ការ​តែង​និពន្ធរបស់ខ្ញុំ បើគ្មានការ អាន​សៀវ​ភៅ​ ខ្ញុំក៏​​មិន​អាច​ក្លាយ​ជា​អ្នក​សរសេរ​ដែល​មាន​គំនិតទូលំទូលាយបានដែរ។ ខ្ញុំ​ចាំ​បាន​ថា​តាំង​ពី​តូច​មក ​ប៉ារបស់​ខ្ញុំ​តែង​តែអានសៀវភៅឱ្យ​ខ្ញុំស្តាប់ ជា​ពិសេស​ប្រភេទរឿងព្រេងខ្មែរ… ដែល​ទង្វើជាគំរូ​នេះហើយ ​បាន​ជះ​ឥទ្ធិពល​មកដល់ខ្ញុំ ធ្វើឱ្យ​ខ្ញុំចាប់ផ្តើមស្រឡាញ់ការអានតាំងពីតូចមក ដោយ​ខ្ញុំ​ចាប់​ផ្តើម​អាន​សៀវ​ភៅ​ជាច្រើនប្រភេទចម្រុះគ្នា… ហើយខ្ញុំបានគិតថា អ្នកនិពន្ធ​ទាំង​អស់​ពិត​ជា​អស្ចារ្យ​ណាស់​ដែល​គាត់​អាចប្រើសិល្ប៍វិធីក្នុងការសរសេរ ដាក់បញ្ចូល មនោគមវិជ្ជា ទស្សនៈ​​ល្អៗ​ដើម្បី​តម្រង់​ផ្លូវ​ដល់​អ្នក​អាន និងជួយសង្គមតាមរយៈទឹកខ្មៅរបស់គាត់… នោះ​ហើយ​ជា​ហេតុ​ដែល​ខ្ញុំ​ប៉ង​ចង់​ក្លាយ​ជា​អ្នក​និពន្ធមួយរូបដែរ ដោយចាប់ផ្តើមពីការអាន។”

មុននឹង​បញ្ចប់​បទសម្ភាសន៍ លោក តុន ច័ន្ទរិទ្ធិ អ្នក​និពន្ធ​ល្បីមួយរូប ក៏បាន​សម្ដែង​មតិជាចុងក្រោយថា “ជាចុងក្រោយខ្ញុំសូមអរគុណច្រើន សម្រាប់បងប្អូនមិត្តអ្នកអានទាំងអស់​របស់​ខ្ញុំ​ ដែលបានស្រឡាញ់ និងតែងតែ​គាំទ្រស្នាដៃនិពន្ធ​របស់ខ្ញុំកន្លងមក។ អ្នក​ទាំង​អស់​គ្នា​គឺ​ជា​កម្លាំង​ចិត្ត​ដ៏ធំសម្រាប់ខ្ញុំ ក្នុងការបន្តដំណើរលើ​វិថីមួយនេះ។ ខ្ញុំ​នឹង​ខិត​ខំ​បន្ត​ទៀត ​ដើម្បី​បង្កើត​ស្នាដៃ​ថ្មីៗ​ល្អៗ ទុកជាកាដូតបស្នងនូវការគាំទ្ររបស់បងប្អូនទាំងអស់គ្នា។ ខ្ញុំ​ចង់​ប្រាប់​ថា​ ខ្ញុំ​ស្រឡាញ់​បង​ប្អូន​ទាំងអស់គ្នាខ្លាំងណាស់… ហើយជាចុងក្រោយ រូបខ្ញុំសូមលើកទឹកចិត្តបងប្អូនខ្មែរទាំងអស់ ជាពិសេស​យុវវ័យ សូមបង្កើតទម្លាប់ក្នុងការអានឱ្យ​បានច្រើន តាមតែអាចធ្វើទៅបាន ពីព្រោះការ​អាន​ពិត​ជាជួយយើងបានច្រើនខ្លាំងណាស់នៅក្នុងជីវិតរស់នៅ។ ដូច្នេះសូមចាប់ផ្តើមអានទាំងអស់គ្នា ទោះ​មួយថ្ងៃបានមួយទំព័រក៏ល្អ ជាងការយកពេលវេលាទៅធ្វើអ្វីផ្សេងដែលមិន​សូវ​មាន​ប្រយោជន៍ ហើយរូបខ្ញុំក៏សូមអរគុណដល់ “គេហទំព័រអ្នកនិពន្ធកម្ពុជា” ផងដែរ ដែលបាន​ផ្ដល់​កិត្តិយ​សម្ភាសន៍​រូប​ខ្ញុំ​បាទ​នៅពេលនេះ។”

លោក តុន ច័ន្ទរិទ្ធិ អ្នក​និពន្ធកម្ពុជាមួយរូប និងសៀវភៅ “និទានម៉ែ” ស្នាដៃទី២របស់លោក

“គេហទំព័រអ្នកនិពន្ធកម្ពុជា”  សូមបញ្ជាក់ថា លោក តុន ច័ន្ទរិទ្ធិ  មាននាមប៉ាកកាក្នុង​វិស័យតែង​និពន្ធ​ថា “សមុទ្រ” ។ លោក​កើតថ្ងៃទី១៣ ខែវិច្ឆិកា ឆ្នាំ១៩៩៦ នៅឃុំព្រៃស្វាយ ស្រុកមោងឫស្សី ខេត្តបាត់ដំបង។ បច្ចុប្បន្ន ក្រៅពីមានអាជីពជាអ្នកនិពន្ធកម្ពុជា​មួយរូប និងជាស្នាដៃ​សៀវភៅ “និទានម៉ែ” ដែលជាសៀវភៅល្បីមួយ លោក​​គឺ​ជា​បុគ្គលិក​ NGO គ្រីស្ទានមួយកន្លែងក្នុងក្រុងភ្នំពេញ។ ដូច្នេះ ប្រសិនបើ​លោក​អ្នក​ចង់ដឹងថាស្នាដៃ​និពន្ធ​របស់​លោក​មាន​លក្ខណៈ​ល្អយ៉ាង​ណានោះ លោក​អ្នកអាច​ស្វែងរកទិញ​យកមកអានបាន តាមការ​បង្ហាញ​របស់​លោក​ខាងលើ។ សូមអរគុណ៕

អត្ថបទ ៖ ពុទ្ធិពង្ស / រូបភាព ៖ តុន ច័ន្ទរិទ្ធិ / រក្សាសិទ្ធិ ៖ cambowriter.com