ស្រួង ភាវី ៖ នៅពេលដែលនាងខ្ញុំកាន់តែអាន នាងខ្ញុំកាន់តែស្រឡាញ់ការអានទ្វេដង!
- February 25th, 2020
“ការអានជាការបើកចំហជើងមេឃនៃចំណេះដឹង” ហើយមានតែអ្នកដែលយល់ពីតម្លៃនៃការអានពិតប្រាកដប៉ុណ្ណោះ ទើបអាចពាល់ត្រូវនូវចំណេះដឹងដែលមានក្នុងសៀវភៅដែលអាននោះ។ ការបណ្ដុះនិស្ស័យអានសៀវភៅ មិនមែនងាយបណ្ដុះបានលឿនដូចជាការបណ្ដុះសណ្ដែកនោះទេ គឺទាមទារនូវការអត់ធ្មត់ក្នុងការហ្វឹកហាត់ និងពេលវេលាដ៏យូរមួយ ទើបអាចទៅរួច។ ការអានមិនពិបាកទេ ឱ្យតែចេះអក្សរគឺយើងអាចអានបានហើយ តែការអានឱ្យយល់នូវខ្លឹមសារ អានឱ្យបានប្រយោជន៍ពីសៀវភៅដែលយើងអាន និងចេះយកវាទៅអនុវត្តបានត្រឹមត្រូវស្របតាមផ្លូវសច្ចៈនិងគុណធម៌ នោះទើបហៅថា ការអានពិតប្រាកដ។
អ្នកនាង ស្រួង ភាវី កីឡាការិនីស្នូកឃ័រជម្រើសជាតិដ៏ឆ្នើមរបស់កម្ពុជា
ពាក់ព័ន្ធនឹងការអានសៀវភៅនេះ អ្នកនាង ស្រួង ភាវី ដែលជាកីឡាការិនីស្នូកឃ័រជម្រើសជាតិដ៏ឆ្នើមប្រចាំប្រទេសកម្ពុជា និងកំពុងតែមានឈ្មោះបោះសំឡេងល្បីល្បាញនៅប្រទេសកូរ៉េខាងត្បូង ក៏ដូចជាទូទាំងសកលលោកនាពេលបច្ចុប្បន្ន អ្នកនាងបានបង្ហាញប្រាប់ “គេហទំព័រអ្នកនិពន្ធកម្ពុជា” ពេលសម្ភាសន៍ថា “នាងខ្ញុំមិនដឹងថា អ្នកដែលកំពុងតែអានបទសម្ភាសន៍នេះ ជាបុគ្គលចូលចិត្តអានសៀវភៅឬយ៉ាងណានោះទេ! តែសម្រាប់នាងខ្ញុំវិញ សឹងនិយាយបានថាជាផ្នែកដ៏សំខាន់មួយក្នុងជីវិតមិនអាចខ្វះបានឡើយ” អ្នកនាងបន្តទៀតថា “មែនទែនទៅ បើរំពឹងលើចំណេះដឹងដែលនាងខ្ញុំមានពីសាលា គឺមិនអាចឱ្យនាងខ្ញុំយកទៅធ្វើអ្វីឱ្យជោគជ័យខ្លាំងពូកែបានឡើយ ព្រោះដោយសារតែនាងខ្ញុំរៀនក្នុងសាលាបានតិចពេក។ ហេតុនេះហើយ នាងខ្ញុំដឹងយ៉ាងច្បាស់ថា មានតែការខិតខំប្រឹងប្រែងស្វែងរកចំណេះដឹងពីប្រភពនានាមកបំពេញដល់ខ្លួនបន្ថែមប៉ុណ្ណោះ ទើបអាចឱ្យនាងខ្ញុំមានចំណេះដឹងគ្រប់គ្រាន់នឹងសាងភាពជោគជ័យតាមអ្វីដែលខ្ញុំប្រាថ្នាបាន ហើយក្នុងនោះ ការអានគឺជាអ្វីដែលអាចផ្ដល់ជាចំណេះដឹងថ្មីៗដល់នាងខ្ញុំបានច្រើនបំផុត។”
អ្នកនាង ស្រួង ភាវី កំពុងអានសៀវភៅចំណេះដឹងមួយក្បាល
អ្នកនាង ស្រួង ភាវី បានបន្តទៀតថា “រាល់ថ្ងៃ នាងខ្ញុំមមាញឹកនឹងការងារ ហ្វឹកហាត់ និងប្រកួតណាស់! តែបើទោះជាយ៉ាងនេះក្ដី ក៏នាងខ្ញុំមិនដែលភ្លេចអានម្ដងណាឡើយ សៀវភៅតែងតែនៅក្បែរនាងខ្ញុំជានិច្ច វាប្រៀបដូចជាទីប្រឹក្សាដែលចាំដាស់តឿននាងខ្ញុំគ្រប់ពេលយ៉ាងដូច្នោះដែរថា ចូរកុំភ្លេចខ្លួនឱ្យសោះ! ហើយត្រូវតែបន្តអាននូវសៀវភៅថ្មីៗដែលមានគុណតម្លៃពិតប្រាកដចំពោះជីវិតបន្តទៅទៀត កុំឈប់ឱ្យសោះ!”
អ្នកនាង ស្រួង ភាវី និងសៀវភៅ “វាចាមាសរបស់ម៉ែ”
អ្នកនាងបញ្ជាក់បន្ថែមជាចុងក្រោយពាក់ព័ន្ធនឹងចំណង់ចំណូលចិត្តអានសៀវភៅរបស់អ្នកនាងថា “សរុបមក នាងខ្ញុំចូលចិត្តអានសៀវភៅណាស់! នៅពេលដែលនាងខ្ញុំកាន់តែអាន នាងខ្ញុំកាន់តែស្រឡាញ់សៀវភៅទ្វេដង! វាប្រៀបដូចជាខ្យល់ដង្ហើមខ្ញុំយ៉ាងដូច្នោះដែរ បើនាងខ្ញុំឈប់អាន មុខជាដាច់ខ្យល់ស្លាប់មិនខាន!” នេះហើយជាតម្លៃនៃការអានសៀវភៅសម្រាប់ អ្នកនាង ស្រួង ភាវី ដែលអាចឱ្យលោកអ្នកយកទៅគិតពិចារណាបាន។
អ្នកនាង ស្រួង ភាវី និងសៀវភៅ “ប្រតិទិនទស្សនៈ ២២២ថ្ងៃ”
មុននឹងបញ្ចប់បទសម្ភាសន៍ អ្នកនាងក៏មិនភ្លេចថ្លែងអំណរគុណផងដែរថា “ជាចុងបញ្ចប់ នាងខ្ញុំ ស្រួង ភាវី ក៏សូមថ្លែងអំណរគុណដល់បងប្អូនជនរួមជាតិខ្មែរទាំងអស់គ្នាយ៉ាងជ្រាលជ្រៅបំផុត ដែលតែងតែស្រឡាញ់ ចូលចិត្ត និងគាំទ្ររូបនាងខ្ញុំរហូតមក! បើគ្មានអ្នកទាំងអស់គ្នាទេ នាងខ្ញុំក៏គ្មានថ្ងៃនេះដែរ។ ហេតុនេះ នាងខ្ញុំសូមជូនពរឱ្យពុកម៉ែបងប្អូនខ្មែរទាំងអស់ សូមជួបប្រទះតែសេចក្ដីសុខ សំណាងល្អ សុខភាពល្អ និងរកស៊ីមានបានគ្រប់ក្រុមគ្រួសារ ជាពិសេសសូមមានសុភមង្គលក្នុងជីវិតគ្រប់ៗគ្នាជារៀងរហូតតទៅ។”
អ្នកនាង ស្រួង ភាវី និងសៀវភៅ “នារីប្រពៃ” នៅកន្លែងហ្វឹកហាត់ស្នូកឃ័ររបស់អ្នកនាង
“គេហទំព័រអ្នកនិពន្ធកម្ពុជា” សូមបញ្ជាក់ថា អ្នកនាង ស្រួង ភាវី កើតថ្ងៃទី១២ ខែកញ្ញា ឆ្នាំ១៩៩០ កើតនៅភូមិថ្មពេជ្រ៣ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ។ បច្ចុប្បន្នអ្នកនាងជាកីឡាការិនីស្នូកឃ័រជម្រើសជាតិដ៏ឆ្នើមប្រចាំប្រទេសកម្ពុជា ដែលកំពុងតែមានកេរ្តិ៍ឈ្មោះបោះសំឡេងយ៉ាងខ្លាំងក្នុងនិងក្រៅប្រទេស ជាពិសេសប្រទេសកូរ៉េខាងត្បូង ដែលជាទឹកដីអ្នកនាងកំពុងតែរស់នៅសព្វថ្ងៃតែម្ដង។ ក្រៅពីមានឧបនិស្ស័យចូលចិត្តលេងកីឡាស្នូកឃ័របានយ៉ាងល្អអស្ចារ្យនេះ អ្នកនាងក៏ជាបុគ្គលមួយរូបដែលស្រឡាញ់ចូលចិត្ត និងផ្ដល់តម្លៃដល់ការអានសៀវភៅខ្លាំងបំផុតផងដែរ។ សូមអរគុណ៕
អត្ថបទ ៖ ឫទ្ធិពង្ស / រូបភាព ៖ ស្រួង ភាវី ៖ រក្សាសិទ្ធិ ៖ cambowriter.com
